Tamanda Sounwiepomw Nindoken Omw Wie Pwulopwulte

“Eri, tamanda Sounwiepomw nindokon omw wie pwulopwulte.” —EKL. 12:1

1. Iaduwen Siohwa kin ketin kasalehda eh likilik ong sapwellime tohnkaudok pwulopwul akan?

SIOHWA kin ketin kilangwohng Kristian pwulopwul kan nin duwen aramas kesempwal kei oh me pil kin kansenamwahu duwehte pwoaiken nimenseng. Mehlel, e ketin kohpadahr me ni rahn me sapwellime Ohl pahn “mahweniong . . . imwintihti kan,” mwahnakapw oh pil peinakapw akan “pahn iang” doadoahk wet en Krais. (Mel. 110:3) Kokohp wet pahn pweida ahnsou ehu me pali moron en aramas akan sohte pahn kin nsenohki mehkan me pid duwen Koht, oh kin rapahkihte mehkan me irail nsenki oh kin noahrok mwohni oh pil kin sapeik. Ahpw, Siohwa mwahngih me irail me pwulopwul akan me kin kaudokiong ih pahn weksang soangen aramas pwukat. Ia uwen met kin kasalehda likilik me Siohwa kin sapwellimaniki ong brother oh sister akan me pwulopwul!

2. En tamanda Siohwa kin pidada dah?

² Medewehla duwen peren me Koht kin sapwellimanki ahnsou e kilang irail me pwulopwul akan ar kin tamanda ih nin duwen Sounwieperail. (Ekl. 12:1) En tamanda Siohwa kin pid laudsang en ihte medemedewe duwen ih. E kin pidada wiewia—en wia dahme kin kaperenda kupwure, oh mweidohng sapwellime kosonned akan oh pil mour en kosonned pwukat en kahluwa atail mour en ehuehu rahn. E pil kin wehwehki en likih Siohwa, oh kin ese me e kin ketin nsenohkin kitail oh kupwurki sewese kitail. (Mel. 37:3; Ais. 48:17, 18) Iaduwen ahmw pepehm ong Sounwiepomw?

“Likih KAUN-O ni Mohngiongomw Unsek”

3, 4. Iaduwen Sises ketin kasalehda eh likih Siohwa, oh dahme kahrehda e inenen kesempwal en likih Siohwa rahnwet?

³ Emen me wia mehn kahlemeng me keieu mwahu me pid duwen likih Koht iei Sises Krais. E kin mour pahrekiong mahsen en Lepin Padahk 3:5, 6: “Likih KAUN-O ni mohngiongomw unsek. Dehr koapworopworki mehkan me ke pein lemeleme me ke ese. Tamanda KAUN-O ni omw wiewia kan koaros, oh e pahn ketin kasalehiong uhk ahl me pwung.” Mwurinte en Sises ketin papidaisla, Sehdan pwarowohng ih oh nantihong en kasonge ih en men ahnekihla lingan oh manaman en sampah. (Luk 4:3-13) Sises sohte ketin mweidohng madamadau wet en pitihdi ih. E mwahngih me en uhdahn “kepwehpwehla, waunla, oh pil mour werei” pahn sang ni emen en “lemmwiki KAUN-O oh mpahi.”—Lep. Pad. 22:4.

⁴ Nan sampah rahnwet, noahrok oh roporop kin wia irair kei me aramas tohto kin ahneki. Nan soangen irair en sampah pwukat, e wia elen erpit en idawehn kahlemeng en Sises. Kitail en pil tamataman me Sehdan pahn wia uwen eh kak koaros pwehn pitihdi sapwellimen Siohwa ladu kan pwe irail en dehr keid nan ahl tehtik me kahluwahlahng mour. E kin men kilang koaros en kekeidwei pohn ahl tehlap me kin kahluwalahng mehla. Dehr mweidohng ih en pitihiukidi! Ahpw ke en koasoanehdi teng en kin tamataman Sounwiepomw. Likih ih ni unsek, oh koledi teng “mouro me uhdahn mour mehlel,” me pahn uhdahn wiawi ahnsou keren.—1 Tim. 6:19.

Me Pwulopwul akan, Kumwail en Erpit!

5. Ia ahmw pepehm ong dahme pahn wiawiong sampah wet ni ahnsou kohkohdo?

⁵ Irail me pwulopwul akan me kin tamanda Sounwieperail kin ahneki erpit laudsang irail me pwulopwul akan en arail dih. (Wadek Melkahka 119:99, 100.) Pwehki irail ahneki soangen lamalam me Siohwa sapwellimaniki, irail inenen wehwehki ia uwen sampah wet solahr kak kihda koapworopwor ong irail oh pil duwen sampah wet eh pahn sohrala ahnsou keren. Pil nan mour mwotomwot me kumwail momourkier lel met, kumwail me pwulopwul kan kin kilang duwen pwunod oh kamasak me aramas akan kin ahneki ong ahnsou kohkohdo me e pil wie lalaudla. Ma ke kin iang sukuhl, mwein ke pil rong duwen saminlahn sampah, duwen karakarala en sampah pwon, paldi en tuhke tohto nan wasa kan, de pil soangen kahpwal duwehte met akan. Aramas akan kin inenen tetehk oh pwunodki duwen lalaudlahn irair pwukat, ahpw Sounkadehdehn Siohwa kante me kin uhdahn wehwehki me mepwukat kin wia kilel kei me kin kasalehda me ahn Sehdan sampah kereniongehr imwisekla.—Kaud. 11:18.

6. Iaduwen ekei me pwulopwul akan kin lohdi nan dihp?

⁶ E inenen kansensuwed me ekei ladu en Koht me pwulopwul kan kin sohla nsenohki en mwasamwasahn duwen met oh kin mweidohng pein irail en manokehla me kitail miher ni imwin ahnsou. (2 Pit. 3:3, 4) Ekei pil lohdiong kasongosong kan en wiahda dihp laud pwehki arail kin werek suwed oh pil sang ar kilang kilel suwed akan. (Lep. Pad. 13:20) Ia uwen kansensuwed en katihasang sapwellimen Koht kapai kan ahpw mehlel nan ahnsou pwukat me kereniong imwisekla! Eri, kitail en sukuhliki duwen dahme wiawiong mehn Israel akan nan pahr 1473 B.C.E., ahnsou me irail kin mihmihseli nan impwal akan nan Patapat en wehin Mohap, wasa ehu me inenen kerenlahngehr Sapwen Inou. Dahme wiawi wasao ahnsowo?

Re Lohdi ni Arail Kerenlang Arail Mehn Akadei kan

7, 8. (a) Soangen elen widing dahieu me Sehdan doadoahngki ong irail akan me kin koukousoan nan Patapat en wehin Mohap? (b) Soangen elen widing dahieu me Sehdan kin doadoahngki rahnwet?

⁷ Ni ahnsou ko, e kin uhdahn sansal me Sehdan kin men kauhdi irail sang en alehdi arail sohso me inoudahr ong irail. Sehdan doadoahngki Palaam pwehn nantihong keriala mehn Israel ako ahpw ni eh sohte pweida, ih uhd doadoahngki ehu elen widing, e uhd nantihong en kahrehda irail en sohla warohng alehdi kapai kan sang Siohwa. E kin doadoahngki lih en Mohap akan pwehn kasonge irail, oh e mwomwen me Tepilo pweida. Mehn Israel akan eri tepida neneke nein mehn Mohap akan neirail serepein kan oh kin pil tepida pwongih Paal, koht en Peor. Mendahkihla irail inenen kerenlahngehr Sapwen Inowo, me wia ar sohso kesempwal, mehn Israel 24,000 kamakamla. Met wia kamwomwala ehu me inenen laud mehlel!—Nemp. 25:1-3, 9.

⁸ Rahnwet, kitail kerenlahngehr sapwen inou ehu me mwahu sang Sapwen Inou en kawao—iei koasoandi kapw. Duwehte dahme e kin wiewia sangete mahs, Sehdan pil pwurehng doadoahngki mour en nenek pwehn kasaminehkihla sapwellimen Koht aramas akan. Koasoandi en mour mwakelekel nan sampah wet kin mihlahr nan irair ehu me pali laud en aramas kin leme me nenek wia mehkot sohte kapwuriamwei oh tiahk en ohl mwahuki ohl de lih mwahuki lih pahn kin sang pein en emen pilipil. Lih Kristian emen koasoia, “Ihte nan imwato oh pil nan Kingdom Hall me nei seri kan kin sukuhliki me ohl mwahuki ohl de lih mwahuki lih oh pil dipen nenek kin wia tiahk kei me inenen suwed mwohn silangin Siohwa.”

9. Dahme kak wiawi ahnsou me pepehm en wia nsenen pwopwoud kin laudla, oh iaduwen me pwulopwul kan kak powehdi met?

⁹ Me pwulopwul kan me kin tamanda Sounwieperail kin ese me en wia nsenen pwopwoud wia kisakis ehu me sarawi me kin pidada mour oh kaparapar. Eri, irail ese me en wia nsenen pwopwoud anahne wiawi nin duwen me Koht ketin koasoanehdier—nanpwungen pwopwoudte. (Ipru 13:4) Ahpw, ni ahnsou me pepehm en men wia nsenen pwopwoud kin laudla oh kakete karotongehla ahn emen kehl en madamadau, met kak wia kahpwal ehu en kolokol irair en mwakelekel. Dahme ke kak wia ahnsou me ke ahneki madamadau me sohte mwakelekel? Kapakap ong Siohwa ni ngidingid oh peki en sewese iuk en kin nantihong medemedewe soahng kan me konehng oh mwakelekel. Ahnsou koaros Siohwa kin ketin karonge irail akan me kin sohpeiong ih ni mehlel. (Wadek Luk 11:9-13.) En koasoia soahng kan me kin mwakelekel oh me kin kakehle atail pwoson pil kak sewese kitail en wekidala atail irair en madamadau.

Pilada Ahmw Mehn Akadei kan ni Erpit!

10. Soangen madamadau soh katepe dah me kitail men soikala, oh mehnia peidek kan me kitail kak pein idek rehtail?

¹⁰ Ehu kahrepe me pali tohto en me pwulopwul kan nan sampah kin mour saledek oh kin mourkihte mehkan me irail perenki iei pwehki irail sohte ahneki “kaweid” sang Koht de koapworopwor mehlel en ahnsou kohkohdo. (Lep. Pad. 29:18) Irail duwehla mehn Israel akan ni mwehin Aiseia me kin solahr kapwaiada kosonned en Koht oh kin momour pwe irail en “kokouruhr oh kamakamadipw . . . en tungoale, oh niminim wain.” (Ais. 22:13) Pwe ken dehr mwomwen peirinki soangen wiewia pwukat, ke sou kin medemedewe duwen koapworopwor kaselel oh kesempwal me Siohwa kin ketin kaunopadahngehr sapwellime aramas akan me kin lelepek ong ih? Ma kowe emen ladu en Koht pwulopwul men, ke kin uhdahn kasikasik sampah kapwo? Ke kin wia uwen omw kak en “momourki mour pwung . . . ni [ahmw] pahn awiawih Rahnen kapaio” me Siohwa ketin pwilikidier mwohmw? (Taitus 2:12, 13) Ahmw pasapeng ong peidek wet pahn kaweidih mehn akadei kan oh pil mehkan me ke kin mwohneki nan ahmw mour.

11. Dahme kahrehda Kristian pwulopwul kan me ieiangete sukuhl ahnsouwet anahne nantihong nan sukuhl?

¹¹ Sampah wet kin men me pwulopwul akan en kin keieu nsenohki soangen mehn akadei kan me pid doadoahk en mwohni. Irail akan me kin ieiang sukuhl ahnsouwet anahne en nantihong pwehn kak alehdi kasukuhl mwahu. Ke anahne en tamataman me ahmw mehn akadei iei en diarada doadoahk ehu me pahn mwahu ahpw pil ahnsowohte kak wia sawas ehu nan mwomwohdiso oh pil en sewese iuk en wiahla sounkalohk koahiek men en Wehio. Pwe mehn akadei wet en pweida, ke anahne en esehla iaduwen ke pahn kapehse mwahu oh sansal ong aramas akan, en lamalam pwung, oh pil ahneki koahiek en kapwungala ire kan ni meleilei oh en pil kin wauneki meteikan. Ahpw ni mehlel, me pwulopwul kan me kin onop Paipel oh nantihong en doadoahngki mouren kaweid kan en Paipel nan arail mour kin alehdi kasukuhl me keieu mwahu oh kin kihdi poahsoan mwahu ehu ong ahnsou kohkohdo me pahn pweida mwahu oh poatopoat.—Wadek Melkahka 1:1-3.a

12. Soangen mehn kahlemeng dah me peneinei Kristian kan anahne alasang?

¹² Nan Israel, kasukuhl me seri kan kin alehdi sang rehn arail pahpa oh nohno wia ire ehu me inenen kesempwal rehrail. Kasukuhl wet kin pidada mehkoaros me pid mour, ahpw mehlel mehkan me pid duwen arail kaudok ong Koht oh pil duwen sapwellime kosonned akan. (Deud. 6:6, 7) Eri, irail me pwulopwul kan en Israel me kin rong arail pahpa oh nohno oh pil irail akan me kin lemmwiki Koht kin ahnekihdi kaidehn ihte loalokong, ahpw pil erpit, kupwurokong, dehde mwahu, oh pil koahiek en madamadau—irair kei me sohte kin kalapw dierek rehn aramas oh me pil kin sangete ahn emen pahn sukuhliki duwen Koht oh sapwellime kosonned akan. (Lep. Pad. 1:2-4; 2:1-5, 11-15) Peneinei Kristian kan nan rahnwet pil anahne en ahneki soangen nsenoh wet ong duwen soangen kasukuhl dah me neirail seri kan kin ale.

Rong Irail akan me Kin Poakohng Uhk

13. Soangen kaweid dah kan me irail me pwulopwul kan kin ale, oh dahme kahrehda kitail anahne kanaiehng?

¹³ Me pwulopwul akan kin ale kaweid sang soangsoangen aramas akan—pil sang sounkaweid kan nan sukuhl me kin nsenohkihte tohnsukuhl akan en pweida nan arail sukuhl. Menlau kapakapki met ong Koht en kaweidih iuk ni omw pahn teneki de kasawih duwen kaweid kan en aramas pwukat ki sawas kan sang mahsen en Koht, oh pil pwuhken sawaspen Paipel kan me pwihn en ladu lelepek oh loalokong kin kihda. Sang ahmw kin onopki Paipel, ke eseier me Sehdan kin keieu men kasonge irail me pwulopwul oh soakoahiek kan pwehki irail sohte ahneki koahiek en madamadau. Karasepe ehu, nan mwetuwel en Ihden, Ihp sohte ahneki koahiek en madamadau oh ih eri rongala Sehdan, emen me e sehse oh me kin pil sohte kasalehda limpoak de nsenoh ong Ihp. Ia uwen e pahn wia imwila mwahu ehu ma Ihp rongete Siohwa, me kin kasalehda ni ahl tohto uwen eh kin poakohng Ihp!—Sen. 3:1-6.

14. Dahme kahrehda kitail anahne en rong Siohwa oh pil atail pahpa oh nohno kan me kin poakohng Koht?

¹⁴ Sounwiepomw pil inenen poakohng uhk, oh e kin ketin kasalehda met ni irair me mwakelekel oh mehlel. E ketin kupwurki ken peren kohkohlahte, kaidehn ihte nan ahnsouwet! Eri, me duwehte pahpa oh nohno men me kin nsenohki neira seri kan, e kin ketin mahsanihong uhk oh pil koaros me kin kaudokiong ih: “Iet ahlo, kumwail idawehn.” (Ais. 30:21) Ma ahmw pahpa oh nohno kin uhdahn poakohng Siohwa, met pil wia kapai ehu de sawas laud ehu ong uhk. Kasalehda wahu oh rong ara kaweid kan ahnsou me ke pahn koasoanehdi dahme ke kin mwohneki nan ahmw mour oh pil ahmw mehn akadei kan. (Lep. Pad. 1:8, 9) Met pwehki ira men ken ahneki mour, mehkot me inenen kesempwal sang en kepwehpwehla de ndandla nan sampah wet.—Mad. 16:26.

15, 16. (a) Dahme kitail kak kamehlele me Siohwa pahn ketin wia? (b) Mehn kasukuhl kesempwal dahieu kitail sukuhlikihsang dahme wiawihong Paruk?

¹⁵ Irail akan me kin tamanda Sounwieperail kin mourki mour ehu me sohte anahnepen en kepwehpwehkihla kepwehn sampah de noahrok mwohni, pwehki irail kamehlele me Siohwa “sohte pahn” mweisang irail, oh pil “sohte pahn” keseirailla. (Wadek Ipru 13:5.) Pwehki madamadau pwung wet kin weksang madamadau en sampah, kitail en kanaiehng pwe irair en sampah wet en dehr kaunda kitail. (Ep. 2:2) Pwehki met, kitail en tehkpene kahlemeng en Paruk, nein Seremaia sekteri, me kin momour erein kaimwiseklahn rahn apwal akan en Serusalem mwohnte eh kamwomwala nan pahr 607 B.C.E.

¹⁶ Mwein Paruk men ahneki soangen mour ehu me pahn kahrehiong ih en kepwehpwehla. Ahpw Siohwa ketin mwahngih duwen met oh kin panawih Paruk en dehr kin raparapahki “ehu kamwahu” ong pein ih. Paruk kasalehda me e wia ohl aktikitik oh erpit men, pwehki e rong Siohwa oh pitsang kamwomwala me wiawi nan Serusalem. (Ser. 45:2-5) Ni pali teio, irail iengen Paruk kan me alehda “kamwahu” kan oh kepwehpwehla, oh solahr kin mwohneki arail kaudok ong Siohwa, mwuhr katihasang soahng koaros me irail ahneki ni ahnsou me mehn Papilon kan kalowehdi Serusalem. Pali laud en irail pwukat pil kamakamala. (2 Kron. 36:15-18) Dahme wiawihong Paruk kin sewese kitail en kilang me atail nanpwung mwahu rehn Koht kin uhdahn kesempwal sang en kepwehpwehla oh en ndandla nan sampah wet.

Kilangwohng Mehn Kahlemeng Mwahu kan

17. Dahme kahrehda Sises, Pohl oh Timoty kin wia mehn kahlemeng mwahu kei ong sapwellimen Koht ladu kan rahnwet?

¹⁷ Pwehn sewese kitail en keid nan ahl en mour, Mahsen en Koht kin ketikihda mehn kahlemeng tohto ong kitail. Karasepe ehu, Sises iei me keieu koahiek nanpwungen aramas koaros en sampah, ahpw sapwellime madamadau kin uhlahngete en kalaudehla doadoahk me pahn sewese aramas akan kohkohlahte—iei “Rongamwahu en Wehin Koht.” (Luk 4:43) Pwehn patohwanohng Siohwa duwen eh koahiek koaros, wahnpoaron Pohl pwilikihdi doadoahk ehu me kakete kahrehiong ih en kepwehpwehla oh doadoahngki eh ahnsou oh kehl koaros pwehn kalohki rongamwahu wet. Timoty, “pwutak mehlel nan pwoson” men kin kahlemengih kahlemeng mwahu kan en Pohl. (1 Tim. 1:2) Iaduwen, Sises, Pohl, oh Timoty kin koluhkihla pilipil me irail wiahda nan arail mour? Uhdahn soh! Ni mehlel, Pohl koasoia me e kin kilangwohng mehkan me e kak alehdi sang sampah nin duwen “mehn lekdekla kei” me sohte kak pahrekiong pwais kaselel en papah Koht.—Pil. 3:8-11.

18. Soangen wekidekla laud dah me emen brother pwulopwul wiahda, oh dahme kahrehda e sohte kin koluhkihla met?

¹⁸ Kristian pwulopwul tohto rahnwet kin kahlemengih pwoson en Sises, Pohl, oh Timoty. Karasepe ehu, mie brother pwulopwul men me ahneki doadoahk pwei mwahu ehu ntingihdi: “Pwehki ei kin mour pahrekiong kaweid kan en Paipel, I kin kalapw kesepwilda ong pwukoa laud kan nan ei wasahn doadoahk. Ahpw mendahki ei doadoahk kin pweimwahu, I kin pehm me I kin ihte pwakipwakih kisinieng. Ahnsou me I kohla tuhwong kaun akan en wasahn doadoahko oh kawehwehiong irail duwen ei ineng en iang doadoahk en pioneer, irail mwadangete men kalaudehla pweinen ei doadoahko oh pil padahkihong ie duwen kamwahu kan me irail kak kihong ie, oh kin koapworopworki me I pahn mihmi. Ahpw I koasoanehdier teng dahme I mwahuki wia. Aramas tohto sohte kin wehwehki dahme kahrehda I pwilikihdi doadoahk pweilaud ehu pwehn iang doadoahk en pioneer. I kin sapeng ni mehlel me I men kapwaiada ei inou ong Koht. Pwehki ei mour ahnsouwet kin ohngete en papah Koht, I kin ahneki peren oh nsenamwahu inenen laud me mwohni de en ndandla sohte kak kihong ie.”

19. Soangen pilipil erpit dahieu me pwulopwul akan kin ale kangoang en kapwaiada?

¹⁹ Nan sampah pwon, me pwulopwul kid kid kei pil kin wiahda soangen pilipil erpit wet. Eri, me pwulopwul akan, kumwail en kasikasik rahn en Siohwa ahnsou kan me kumwail kin medemedewe duwen ahnsou kohkohdo. (2 Pit. 3:11, 12) Ke dehr kin mwomwen peirinki irail akan me kin kepwehpwehla de pweida mwahu nan sampah wet. Ahpw, kin rong irail akan me kin ni mehlel poakepoake iuk. En kepwehpwehkihla “paien nanleng” iei koasoandi ehu me ke kak pilada en ahneki me pahn keieu apwalih iuk mwahu nan ahnsou kohkohdo oh ihte me pahn wahdo kamwahu kan me sohte imwi. (Mad. 6:19, 20; wadek 1 Sohn 2:15-17.) Ei, tamanda Sounwiepomw. Ni omw wia met, Siohwa pahn ketin kapaiada oh katingih uhk.

[Nting tikitik me mi pah]

Ke Kak Tamanda?

• Iaduwen kitail kin kasalehda atail likih Koht?

• Mehnia soangen kasukuhl me keieu mwahu?

• Mehn kasukuhl dah me kitail kak sukuhlikihsang Paruk?

• Ihs me wia mehn kahlemeng mwahu, oh dahme kahrehda?

[Kawehwehpen kilel kan nan ehu ehu pali 17]

Siohwa kin ketikihda kasukuhl me keieu mwahu