Pwulopwul Kan Me Kin Tamanda Ahr Sounkapikada

“Eri, tamanda Sounwiepomw nindokon omw wie pwulopwulte.”​—EKLESIASDES 12:1.

1. Dahme emen me mahki sounpahr 11, koasoiada me kin kasansalehda me e uhdahn kamehlele Sounkapikada?

IA UWEN kaselel ni ahnsou me pwulopwul kan kin wia ahr koasoi oh tiahk kan ni ahl me pahn kasansalehda me irail kin kamehlele Siohwa Koht nin duwen emen me momour me irail kin wadekala oh men kaperenda! Pwutak me mahki sounpahr 11 koasoia: “Ni ahnsou I kin kelep oh kilangla likin wenihmwtok, I kilangada ia uwen kasalel kapikapikda kan en Siohwa. Oh I kin medemedewe duwen ia uwen kaselel paradais ni ahnsou kohkohdo oh I kin auremenih duwen mwadongki mahn akan.” (Aiseia 11:6-9) E kapataiong: “Ni ahnsou I kin kelep, I kin kapakap ong Siohwa. I ese me e sohte pahn lingeringer pai, pwehki ahi kin kalap koasoi ong ih ahnsou koaros. I ese me e kin ahnsou koaros kilikilangie.” Atail sounkapikada iei emen me memour ninduwen pwutak menet kin kamehlele?

Ia uwen Iasanei Koht ong Komwi?

2. (a) Dahme pahn sewese iuk en uhdahn kamehlele omw Sounkapikada? (b) Dahme pahpa oh nohno kan kak wia pwen sewese neirail seri kan en kalahnganki me Koht uhdahn emen me memour?

² Mwohn Siohwa oh sapwellime inou kan pahn kak mehlel ong uhk, ke anahne sukuhliki mahs duwen ih oh duwen koapworopwoar en sampah kapw pwung ehu me Paipel kin kawehwehda. (Kaudiahl 21:3, 4) Ma omw pahpa oh nohno padahkiong uhk duwen mehkan, ke ahneki kahrepe mwahu en kalahnangki met, pwehki met pahn sewese uhk en kapwaiada kaweid me kohsang powe: “Tamanda, Sounwiepomw nindokon omw wia pwulopwulte.” (Eklesiasdes 12:1) Emen pwulopwul koasoi duwen kaiahn me e ale sang eh pahpa oh nohno ahnsou e tikitik: “Soahng koaros nan mour kin pidada Siohwa. Met poahsonpen ai tamataman ai Sounkapikada.” Pil emen serepein koasoi: “Ai kalahngan sohte pahn uhdi kohkohlahte ong dahme ai pahpa oh nohno padahkiong ie duwen Siohwa me Ih uhdahn emen me momour. Ira padahkiongie iaduwen I kak poakong ih oh padahkiongie duwen peren en papah ih kaukaule (full-time).”

3, 4. Dahme pahn kak sewese iuk en kamehlele me Siohwa iei uhdahn emen me memour?

³ Ahpw, aramas tohto kin apwaliki en wehwehki me Koht iei emen me kin nsenohkin kitail ni ahnsowet. Iaduwen kowe? Emen pwulopwul ale sawas sang The Watchtower en karanih Koht: “Ia uwen laud en Siohwa Koht, kitail sehse.” Ahpw, ahn Koht lapalap sohte kin poahsonda pohn ia uwen laud en ih de ia mwomwen, ahpw lokaia kan en mwuhr nan Watchtower koasoi: “Lapalap en Koht kin pidada ia soahngen Koht ih,” emen me lelepek, kompoake, oh dihren mahk.a (Eksodus 34:6; Deuderonomi 32:4; Melkahka 86:5; Seims 5:11) Ke kin kilangwong Siohwa nin duwen emen me sapwellimaniki irair pwukat, nin duwen koampoakepomw likilik emen me ke kak ahneki nanpwungmwahu reh? ​—Aiseia 41:8; Seims 2:23.

⁴ Sises sewesehda sapwellime tohnpadahk kan en perenki ahneki nanpwungmwahu rehn Koht. Ihme, ni ahnsou wahnpoaron Sohn ntingihdi duwen e kaskasikong iasadahn mour nanleng, e koasoia: “Kitail pahn duwehla ih [Koht], pwehki kitail pahn uhdiahl ni uhdahn mwomwe.” (1 Sohn 3:2; 1 Korint 15:44) Nan rahnpwukat, pwulopwul kan kak ale sawas en kamehlele Koht nin duwen emen me mehlel, oh emen me re kak esehla edetehn re sohte kak kilang ih. Emen ohl me pwulopwul koasoia: “Ai pahpa oh nohno sewese ie en tamanda Siohwa, sang ni ara peidek kan ong ie, duwehte, ‘Dahme Siohwa pahn mahsanih? Iaduwen pein kowe pahn kawehwehda met ni pein omw lokaia? Ia wehwehn met?’” E soh mehlel, me peidek pwukat kin sewese kitail en medemedewe duwen nanpwungen kitail oh Koht?

Ia Wehwehn en Tamanda

5. Mehnia karasaras kan nan Paipel kin kasansalehda me en tamanda emen kin pidada laudsang ihte en tamanda eden aramaso?

⁵ En peikiong kaweido, “Tamanda, Sounwiepomw,” kin wehwehki laudsang ihte medemedewe duwen Siohwa. E kin pidada wiewia kan, kapwaiada dahme Siohwa kin kupwurperenki Siohwa. Ni ahnsou loallap suwedo wia pekipek rehn Sises, “Tamanda ie ni omwi pahn ket nan sapwellimomwi wehi,” e men Sises en taman ih laudsang ede. Ahpw e mwahuki Sises en mwekidki, kaiasada ih. (Luk 23:42) Duwehte, Sosep ahnsou e selidi nan imweteng, e kaskasik mehkot en wiawi ong ih ni ahnsou e peki rehn nein Parao sounkohwahn wain en tamanda ih. Oh ni ahnsou Sohp peki rehn Koht, “Tamanda ie” Sohp kin wia pekipek me ni ahnsou kohkohdo, Koht pahn mwekidki kaiasada ih.​—Sohp 14:13; Senesis 40:14, 23.

6. Iaduwen lepin lokaiahn Ipru “tamanda” kin pid pepehm kan ong mehkot de emen?

⁶ Emen me loalokong, nda me lepin loakaia Ipru “tamanda” kin pak tohto wehwehki “pehm en madamadau kan oh wiewia kan me kin kohsang dahme ke tamanda mahs.” Wehwehn “pehm” me pid lepin lokaiao “tamanda” kin sansalda ni en aramas akan ar likwer nan sahpwtehn: “Ia uwen aht kin tamanda kisin mwahmw ko me kitail ki tungoale nan Isip!” Duwehte Sohp me wia pekipek pweh Koht en tamanda ih, pil Esekaia, Nehmaia, Depit, oh emen sounmelkahka (ede sohte sansal) pil kin wia pekipek pwe Siohwa en ahneki pepehm ong irail pwehki irail kin lelepek ong ih.​—Nempe 11:4, 5; 2 Nanmwarki 20:3; Nehmaia 5:19; 13:31; Melkahka 25:7; 106:4.

7. Ma kitail tamanda Siohwa ki atail pepehm akan, iaduwen met pahn kak sewese atail tiahk kan?

⁷ Eri, kitail kak idek, ‘Kitail kin tamanda atail Sounkapikada ki atail pepehm kan oh liksang wia mehkot me pahn kansensuwedih de kamedek ih?’ Emen pwulopwul koasoia: “Ai nohno sewese ie en pohnese me Siohwa sapwellimaniki pepehm akan, oh ni ahnsou I tikitik, I sukuhlikiehr me ai wiewia kan pahn mie lipwe ong ih.” (Melkahka 78:40-42) Pil emen kawehwehda: “I ese me ai wiewia kan pahn sewese de karoampwa en sapengki ahn Sehdan uhweng Siohwa. I men kaperenda sapwellimen Siohwa mongiong, eri met sewese ie lao lel rahnwet.”​—Lepin Padahk 27:11.

8. (a) Dahme pahn kasansalehda me kitail kin tamanda Siohwa ki atail pepehm akan? (b) Mehnia peidek kan pwulopwul kan pahn anahne medemedewe duwe?

⁸ Ni mehlel, nan sampah suwed wet, e sohte mengei en ahnsou koaros tamanda Siohwa oh iang wiewia kan me kin kaparenda ih. Ahpw ia uwen kaselel ma ke kak alasang pwulopwul Timoty nan keieun senturi​—duwehte me pwulopwul kid kei me kin lemwihki Koht nan rahnpwukat​—en nantiong iang doadoahk en Kristian, full-time nin duwen pioneer men! (Wiewia 16:1-3; 1 Deselonika 3:2) Ahpw, kitail kak wia peidek pwukat, I kak apwalih pein ngehi nan doadoahk en pioneer? Oh ma ke pahn pwopwoud ehu rahn, ke koahiekla en apwapwalih omw peneinei? (1 Timoty 5:8) Peidek pwukat me inenen kesempwal, oh pil kesempwal ken medemedewe laud duwe.

Kasukuhl Ehu Me Mie Katepe

9. Pilipil dah kin kohwong pwulopwul kan me pid ong kasukuhl en sampah?

⁹ Nin duwen mouren aramas akan kin apwalla, en kalaudehla atail kasukuhl me anahn pwen kak ahneki soangen doadoahk me pahn kak sewese kitail en apwaliahda pein kitail nan atail doadoahk en pioneer. Ele mwein ke pil kin kilang me irail kan me kohla sukuhl laud (university) pwurehng sukuhl oh ale subject kan pwen kalaudehla ahr sukuhl pwen kak koahiekla nin duwen me kaun en pisnes kan kin kesempwaliki nan rahnpwukat. Eri pwulopwul kan me men kaperenda Koht, ia uwen laud ke pahn sukuhl? Amwail pilipil kan pahn anahne poahsonda pohn kaweid me kohsang powe: “Tamanda Sounwiepomw.”

10. Mehnia kasukuhl me keieu mwahu ong kitail?

¹⁰ Ahpw ni mehlel, ke men nantiong ni oaretik onop Mahsen en Koht, nin duwen me lapalap tohto kan en sampah wet kin kilangwong Paipel me inenen kasukuhl laud ehu. Soun nting en mehn German Johann Wolfgang von Goethe koasoia: “Kekeiradahn aramas me pid loalokong, e pahn kakong pil doadoahngki Paipel nin duwen poahsone oh mehn doadoahk ehu en kasukuhl.” Ehi, sukuhliki Paipel, pahn sewese uhk en kaunopada ong omw mour laudsang kasukuhl en sampah kan!​—Lepin Padahk 2:6-​17; 2 Timoty 3:14-​17.

11. (a) Mehnia doadoahk me keieu kesempwal kitail kak wia? (b) Dahme kahrehda emen pwulopwul pilada en ale ekis sukuhl?

¹¹ Pwehki loalokongkihla Koht kak kahrehong kitail en ale mour soutuk, doadoahk me keieu kesempwal ken kak iang wia rahnwet iei en padahkiong mehteikan en esehla padahk wet. (Lepin Padahk 3:13-18; Sohn 4:34; 17:3) Ahpw pwe ken kak wia doadoahk wet pweida mwahu, ke anahne ale kasukuhl ong mehkot kesempwal. Ke anahne sukuhliki en koasonehdi omw madamadau kan, koasoai ni wehwe pwung, oh esehla wadawad oh nting mwahu​—kak sukuhliki mehpwukat nan sukuhl. Eri en nantiong onop mwahu nan sukuhl, nin duwen emen pwulopwul adaneki Tracy, me kohsang Florida, U.S.A., me kasapwil sang high school ki deng laud. E kasansalehda e koapworopwoar: “Sangete mahs lel met ai mehn akadei iei en wiahala laduhn Koht Siohwa ni doadoahk en pioneer, oh I koapworopwoarki ai sukuhl pahn sewese ngehi en kapwaiada ai mehn akadei.”

12. Ma omw pilipil iei en kalaudehla omw sukuhl likin dahme koperment kosonehdi, dahme met pahn kak sewese kowe en kapwaiada?

¹² Ke medemedewe ia karepen ke kin iangki sukuhl? Keieu, pwehki ke men kaunopada pwen kak wiahla sounpapah Siohwa koahiek men? Ma ehi, ke anahne tehk mwahu oh medemedewe duwen ia uwen mwahu omw kasukuhl kak sewese uhk. Mwurin ahmw koasoiong omw pahpa oh nohno, ele mwein amw pilipil kan iei me ken kalaudehla omw sukuhl, sukuhl me laudsang dahme kosonned en sahpwo kosonnedier. Kasukuhl wet ele mwein pahn kak sewese kowe en diarada doadoahk ehu oh kowe pahn kak apwaliahda pein kowe oh pil pahn mie ahnsou oh omw kehl en iang doadoahk en Wehio ni unsek.​—Madiu 6:33.

13. Iaduwen Kristian riamen me kohsang Russia kasansalehda ara mehn akadei ong ara mour edetehn ira kalaudehla ahr sukuhl?

¹³ Ekei pwulopwul kan kin iang doadoahk en kalohk en full-time edetehn irail kin kalaudehla ahr sukuhl. Peinakapw riamen adaneki Nadia oh Marina, me kohsang Moscow, Russia. Ira pepdaisla nan April 1994 oh tepida iang doadoahk en auxiliary pioneer. Mwurinte met ira kasapwil sang high school oh kalaudehla ara sukuhl nan prokram en accounting me reireiki sounpar riau. Nan May 1995 ira tepida iang doadoahk en regular pioneer, ahpw re pil pweida mwahu nan ara sukuhl en accounting, A average. Nanpwungen ira, re naineki Paipel study 14 ehu ehu wihk ni ahnsou ira kin wia ara sukuhl. Serepein pwukat kin koapwoaropwoarki me ahr sukuhl en accounting pahn sewese ira en diarada doadoahk me pahn itar pwen sewese ira en apwaliahda pein ira nan doadoahk en Pioneer.

14. Mendahki kitail pilada en kalaudehla atail sukuhl de soh, dahme pahn keieu kesempwal nan atail mour?

¹⁴ Ma ke pahn kalaudehla omw sukuhl laud sang dahme kosonned en sahpw kin kosonnedi ken wia, menlau kasawiahda mwahu duwen kahrepen omw kin wia met. Pwehki ken adamwahukihla de noahroake kepwe kan de dipwisou kan? (Seremaia 45:5; 1 Timoty 6:17) De omw mehn akadei en kalaudehla omw sukuhl pwehki e pahn sewese uhk en wia doadoahk ong Siohwa kaukaule? Emen pwulopwul, Lydia, me pilada en kalaudehla eh sukuhl, ahpw kasansalehda me e kin kesempwaliki mehkan me pid pali ngehn: “Mehteikan me sohte kin iang Sounkadehde kin nantiong en sukuhl laud oh tepida noaroake mwohni, re kin manokehla Koht. Ai nanpwungmwahu rehn Koht, ih me I kin keieu kesempwaliki.” Ih soahngen madamadau me kitail koaros anahne en ahneki!

15. Ni ahl dah me Kristian akan nan tepin centuri kin ahneki soangsoangen kasukuhl?

¹⁵ Kristian akan nan keieun centuri kin ahneki soangsoangen kasukuhl kan. Karasepe ieu, wahnpoaron Piter oh Sohn, aramas kin kilang ira nin duwen aramas me sohte “iang sukuhl” pwehki ira sohte ale kasukuhl nan sukuhl en Rabbi kan. (Wiewia 4:13) Ahpw, ni pali teieu, wahnpoaron Pohl, ale sukuhl laud, oh eh kasukuhl pahn duwehte kasukuhl en university nan atail ahnsou. Ahpw, Pohl sohte doadoahngkihla kasukuhl wet ong suweiki pein ih; ahpw e kin doadoahngki met ong sewese eh doadoahk en kalohk ong soansoangen aramas tohto. (Wiewia 22:3; 1 Korint 9:19-​23; Pilipai 1:7) Duwehte, Manaen, “ale sukuhl sang rehn Herod,” me kin iang sewese apwalih mwomwohdiso en Andiok.​—Wiewia 13:1.

Dahme kahrehda kesempwal en Kosonehdi Noumw Mwohni kan ni Elen Loalokong?

16. (a) Dahme kahrehda e pahn apwal en tamanda atail Sounkapikada ma mie atail pweipwand? (b) Iaduwen ehu karasaras en Sises kin kasansalehda kesempwalpen medemedewe mahs mwohn kitail pahn pwainda mehkot?

¹⁶ Ma ke sohte kin kosonehdi noumw mwohni kan ni elen loalokong, ele mwein e pahn apwal en tamanda Sounwiepomw pwehn wia mehkan me pahn kaperenda ih. Pwe ma ke pahn wia pweipwand, met wehwehki ke pahn wiahla lidu ong emen soumwas tohrohr. Paipel kawehwehda: “Pekihsang emen mwohni, ke ahpw pahn wiahla lidun aramas me ke pekihsang mwohnio.” (Lepin Padahk 22:7, Today’s English Version) Ehu karasaras en Sises, kin kasansalehda kesempwalpen medemedewe mwohn kitail pahn doadoahngki neitail mwohni kan. “Pwe ihs rehmwail,” Sises mahsanih, “nan eh koasoakoasoane en kauwada eh imwen doulik ehu, e soh pahn mwohndi mahs oh medemedewe uwen pweine, pwe en kilang ma mie reh mwohni me itar kanekehla ihmwo. Pwe ma e sohte pahn wia met, e sohte pahn kak kanekehla ihmwo mwurin eh kihdiongehr poahsoane, Aramas koaros me pahn kilang met, re pahn kouruhrki de kepitki.”​—Luk 14:28, 29.

17. Dahme kahrehda e kin apwalki kasoutikih neitail mwohni kan?

¹⁷ Ahpw ni elen loalokong, ke pahn nantiong song en kapwaiada iren Paipel wet ‘dehr pweipwand ong emen-iei soangen pweipwand teieu me kumwail pahn wia; limpoakpene nanpwungamwail.’ (Rom 13:8) Ahpw met apwal en wia, keieu, pwehki ahnsou koaros sounpisnes kan kin pakairki arail dipwisou kapw kan nin duwen mehkot me ke anahne en pwainda. Emen pahpa, me kin sewese nah seri kan en doadoahngki ahr loalokong ni ahl me pwung, koasoia: “Kitail isaneki ahnsou laud oh ahnsou koaros koasoiapene duwen wekpeseng en dahme kitail anahne naineki oh dahme kitail mwahukihte.” Sukuhl kan sohte kin padahkiong seri kan duwen ire pwukat, ele mwein ekiste kaweid ong iaduwen emen kak koasonehdi mwahu nah mwohni kan ni ahl me pwung. Emen tohndoadoahk me pid aramas koasoia: “Se kasapwil sang High School oh esehla duwen isosceles triangle laudsang sukuhliki duwen kasoutik neitail mwohni kan. Eri dahme pahn kak sewese kowe en doadoahngki noumw mwohni kan ni ahl en loalokong?

18. Ia poahsonpen en doadoahngki mwahu neitail mwohni kan, oh pwekihda?

¹⁸ En kapwaiada kaweido, “Tamanda, Sounwiepomw,” iei poahsoanpen doadoahngki mwahu noumw mwohni kan. Pwehki, ni ahnsou ke pahn peikiong kaweido, ahmw ineng keieu iei en kaperenda Siohwa, oh omw pepehm kan ong ih pahn kamwekid iuk ong iaduwen ke pahn doadoahngki noumw mwohni kan. Eri, ke sohte pahn mweidong dahme ke men pwainda en karoampwa omw papah Koht ni mour-unsek. (Madiu 16:24-​26) Ke pahn nantiong en mwohniki Wehin Koht oh kapwaiada kupwure. (Madiu 6:22-​24) Eri ke pahn kilangwong kaweid me kohsang powe, “wahuneki Kauno [Siohwa] ni omw pahn meirongkihong wahnsahpw me keieu mwahu” nin duwen pwais kaperen ieu.​—Lepin Padahk 3:9.

Pwulopwul kan me Warong en Kahlemengih

19. Iaduwen pwulopwul kan mahs kin tamataman ahr Sounkapikadao?

¹⁹ Ni peren kitail kak nda, me pwulopwul tohto sangete mahs oh lel ahnsowet, kin tamanda ahr Sounkapikada. Samuel pwulopwul kin lelepek ni eh doadoahk nan tehnpas sarawio, edetehn ienge papah kan kin wia tiahk suwed. (1 Samuel 2:12-​26) Lih suwed men, ahn Podipar eh pwoud, sohte kak kaluwetala pwulopwul Soseph en wia dihp. (Senesis 39:1-​12) Edetehn Seremaia, “pwutak men,” e kin ni eimah kalkalohk pahn uhweng kan. (Seremaia 1:6-8) Emen serepein tikitik en mehn Israel kin ni eimah kamwekidada kaun en sounpei en mehn Siria en rapahki sawas nan wehin Israel, oh iei wasa me e kak sukuhliki duwen Siohwa. (2 Nanmwarki 5:1-4) Pwulopwul Daniel oh ienge kan kolokolte ahr pwoson ni ahnsou irail lelong kasongosong me pid kosonned kan en Koht. Oh pwulopwul Sadrak, Mihsak, Apedneko pilada en lekdekla nan kisiniei mwehlo, pwehki irail sohte men kasehla ahr lelepek ong Koht sang ni ahr pahn kaudokiong dikediko.​—Daniel 1:8, 17; 3:16-18; Eksodus 20:5.

20. Iaduwen pwulopwul tohto nan rahnpwukat kaselehda me re kin tamanda ahr Sounkapikada?

²⁰ Rahnwet, me pwulopwul tohto sang 2,000 me mahki sounpahr 19 lel 25 kin papah nan poahsoan kaun en Sounkadehdehn Siohwa kan nan State en New York, U.S.A. Irail me kisehn pwihn en me pwulopwul nen kei me kin tamanda ahr Sounkapikada nin sampah pwon. Duwehte Soseph en mahs, irail kin kahng kasehla ahr tiahk mwahu. Tohto kin peikihong Koht sang aramas ni ahnsou re ale kalokolok. (Wiewia 5:29) Nan pahr 1946 nan sahpwen Poland, Henryka Zur me sounpahr 15, ale lokolok pwehki e kahng iang wiewiahn kaudokiong dikedik en pelien lamalam. Emen me kaloke ih padahkiong ih, “Ke kak kamehlele dahme ke kamehlele, ahpw ihte wiahda kilel en lopwu en Kahdolik.” Pwehki e kahng wia met, sounkalokolok kan wahla ih nanwel oh kaskidi, ahpw irail sohte kak kawehla eh koapworoapwoar en mour soutuk!b

21. Mehnia luhk me elen loalokong en ale, oh e pahn imwkihla dah?

²¹ Mongiong en Siohwa kin inenen dirkihla peren laud ni ahnsou e kilang me pwulopwul tohto sang mahs lel met me kin taman ih! Ke pahn pil mwekidki luhk wet, “Tamanda Sounwiepomw”? E warong ken tamanda ih! Rahn koaros ken medemedewe duwen soahng koaros me e wiahda ong uhk oh pahn wiahda ni ahnsou keren, oh ale luhke: “Samwa, ke en loalokongla, I ahpw pahn kin pereperen; e pahn mie ei pasapeng ong mehmen me pahn kauwei ie.”​—Lepin Padahk 27:11.

[Nting tikitik kan me mi pah]

Ke Tamanda?

◻ Iaduwen pwulopwul kan kak ale sawas en kilangwong Koht me ih uhdahn emen me memour?

◻ Ia wehwehn tamanda Sounwiepomw?

◻ Ia kahrepen atail sukuhl?

◻ Dahme kahrehda elen loalokong en doadoahngki neitail mwohni kan mwahu?

◻ Ihs me pwulopwul kan kin warong kitail en kahlemengih?

[Kilel nan pali 17]

Ke medemedewe duwen dahme kahrehda ke anahne iang sukuhl?

[Kilel nan pali 18]

Ke kin sukuhliki en doadoahngkihla de kosonehdi mwahu noumw mwohni kan?