Kesempwalpen Kasukuhl Sang Rehn Siohwa

“I pil mwamwahlkihla soahng koaros pwehki soahngteieu me inenen katapansang oh kesempwalsang, iei marain en Krais Sises.”—PHIL. 3:8.

1, 2. Pilipil dahieu me ekei Kristian kan kin wiahda? Dahme kahrehda?

SANGETE ni en Robert tepida sukuhl, e kin uhdahn pweida mwahu. Ni ahnsou me e sounpar wahlu, emen eh sounpadahk ko mwemweitla ni imweo oh padahkihong ih me e kak wiahla sohte lipilipil dahme e men wiahla. E padahkihong me e koapworopworki me Robert pahn wiahla emen toahkte ehu rahn. Erein ahnsou me e pwihn keduwau lel eisek riau, e wia tohnsukuhl men me kin inenen pweida mwahu oh e kak iang sohte lipilipil soangen sukuhl laud me keieu mwahu nan eh wehio. Ahpw Robert pilada en soikala dahme aramas tohto kin medewe me ihte ahnsou mwahu ong ih pwe e pahn kak lel eh mehn akadei en wiahla emen pioneer.

² Duwehte Robert, Kristian koaros ahneki ahnsou mwahu pwehn kak pweida nan koasoandi wet. Ekei pilada en sohte isaneki ahnsou mwahu pwukat pwe ren kak lel arail mehn akadei kan me pid arail kaudok. (1 Kor. 7:29-31) Dahme kin kamwakid Kristian kan duwehte Robert en men kalaudehla ar doadoahk en kalohk? Kahrepe keieu iei arail limpoak ong Siohwa, oh re pil kin kalahnganki kesempwalpen ale kasukuhl sang ih. Ke kin medemedewe ahnsou pwukat ia pahn duwen omw mour ma ke sohte esehla padahk mehlel? En medemedewe duwen kapai kaselel kan me kitail kin ahneki pwehki atail ale kasukuhl sang Siohwa pahn sewese kitail en kesempwalki rongamwahwo oh en ngoangki kalohkihong meteikan.

Pai Kaselel Ehu en Ale Padahk Sang Koht

3. Dahme kahrehda kitail kak kamehlele me Siohwa kin kupwurki padahki aramas soh unsek kan?

³ Pwehki sapwellime kupwuramwahu, Siohwa kin kupwurki padahki aramas soh unsek kan. Me pid duwen Kristian keidi kan, Aiseia 54:13 kohpada: “Pein ngehi [Siohwa] pahn padahkihong noumw aramas akan, oh ketikihong irail paiamwahu oh popohl.” Mahsen pwukat pil kin dokedoke sapwellimen Krais “sihpw teikan.” (Sohn 10:16, NW) Met sansal sang kokohp ehu me pweidahr nan atail ahnsou. Nan kaudiahl ehu, Aiseia kilangada aramas akan sang wehi koaros ar pokondohng kaudok mehlel. E kawehwehda me re kin ndaiong meteikan: “Nna, kitail kohdalahng pohn dohlen KAUN-O, nan Tehnpas Sarawien Koht en Israel. E ahpw pahn ketin kasalehiong kitail kupwure, pwe kitail en keid nan sapwellime ahl akan.” (Ais. 2:1-3) Ia uwen eh wia pai kaselel ehu en ale kasukuhl sang Koht!

4. Dahme Siohwa kin kupwurki sang irail kan me e kin ketin padahki?

⁴ Dahme kitail anahne wia pwehn ale kasukuhl sang Siohwa? Dahme keieu anahn pwehn ale kasukuhl wet iei en ahneki irair en aktikitik. Sounmelkahka Depit ntingihdi: “Pwehki KAUN-O eh pwung oh mwahu, . . . E kin ketin kahluwa me aktikitik kan nan ahl pwung oh kin ketin padahkihong irail kupwure.” (Mel. 25:8, 9) Sises pil mahsanih: “Maing Semei, Kaun en nanleng oh sampah! I kapingahkin komwi omwi ketin ekihsang soahng pwukat me loalokong oh koahiek en sampah kan, ahpw ketin kasalehiong me soaloalokong kan.” (Luk 10:21) En ese me Koht kin “ketikihong sapwellime kalahngan me karakarahk kan” kin kahrehiong kitail en poakohngala Koht.—1 Pit. 5:5.

5. Dahme kin kahrehiong kitail en kak loalokongkihla Koht?

⁵ Nin duwen sapwellimen Siohwa ladu kan, ia duwe, kitail kin esehla padahk mehlel sang pein atail koahiek de loalokong? Soh. Ni mehlel, kitail sohte kak pein esehla Koht. Sises mahsanih: “Sohte emen me pahn kak kohdo rehi, ma Semei me ketin kadariehdo sohte kainangihedo rehi.” (Sohn 6:44) Sang ni doadoahk en kalohk oh pil sapwellime manaman, Siohwa kin ketin kainangihedo irail kan me rasehng sihpw, me duwehte “dipwisou kesempwal akan” sang wehi koaros. (Ak. 2:7) Kitail sou kin kalahnganki atail wia emen me Siohwa ketin kainangihedo rehn sapwellime Ohl?—Wadek Seremaia 9:23, 24.

Kasukuhl Sang Koht Kin Kamwahwihala Mour

6. Soangen wekidekla kapwuriamwei dah kan kin wiawi nanpwungen aramas akan me ale “kupwurokong en KAUN-O”?

⁶ Kokohp en Aiseia doadoahngki lokaiahn karasaras me kasalehda wekideklahn irair en aramas akan nan atail ahnsou. Aramas akan me kin lemei mahs wiahla aramas popohl kei. (Wadek Aiseia 11:6-9.) Irail kan me kin imwintihtipene mahs pwehki wekpeseng en wehi, keinek oh tiahk kan kin esehla miniminpene. Ni karasaras, re “wekidohng neirail kedlahs akan ong ni mehn deipwel.” (Ais. 2:4) Ia kahrepen wekidekla kapwuriamwei pwukat? Aramas akan kin ale “kupwurokong en KAUN-O” oh kin doadoahngki nan arail mour. Mendahki soh unsek en sapwellimen Koht ladu kan, re wiahla pirien mehlel ehu nan sampah pwon. Soangsoangen aramas kin perenki rongamwahwo nan sampah pwon oh re kin kihda wah mwahu pwehki rongamwahwo. Met kadehdehda kesempwalpen kasukuhl sang rehn Siohwa.—Mad. 11:19.

7, 8. (a) Ia ekei soangen “wasa kehlail kan” me kasukuhl sang rehn Siohwa kin kasaledekihala aramas akan? (b) Dahme kin kasalehda me kasukuhl sang rehn Siohwa kin wahdo kaping ong ih?

⁷ Wahnpoaron Pohl kapahrekiong doadoahk en kalohk me sapwellimen Koht ladu kan kin wia duwehte arail anahne peiong Sehdan. E ntingihdi: “Pwe tehtehn pei me se kin doadoahngki nan at mahwen, kaidehk tehtehn sampah kei, pwe tehte manaman ekei en Koht, mehn kamwomwala wasa kehlail kan. Se kin kauwehla mahsen en widing kan; se kin kesehdi soangen aklapalap koaros me kin uhda oh kin pelianda erpit en Koht.” (2 Kor. 10:4, 5) Ia ekei soangen “wasa kehlail kan” me kasukuhl sang rehn Siohwa kin kasaledekihala aramas akan? Ekei karasepe iei padahk likamw akan, kihlenwo oh loalokong en aramas akan en sampah. (Kol. 2:8) Kasukuhl sang rehn Siohwa kin sewese aramas akan en powehdi wiewia suwed kan oh kakairada irair kan me kin kaperenda Koht. (1 Kor. 6:9-11) E kin kamwahwihala mouren peneinei. Oh e pil kin kihong mour me katapan mehlel ong irail kan me sohte arail koapworopwor. Met iei soangen kasukuhl me anahn rahnwet.

⁸ Ehu irair me Siohwa kin ketin sewese aramas akan en kakairada iei mehlel, duwehte dahme wiawi wasaht. (Ipru 13:18) Emen lihen India tepida onop Paipel oh kedekedeo wiahla emen sounkalohk me saikinte papidais. Ehu rahno ni eh pwurodo sang doadoahk en kauwada Wasahn Kaudok en Sounkadehdehn Siohwa kan, e diarada mehn kapwat kohl ehu me mi ni mpen tala walipwiki nan pwehlo limwahn wasahn bus. Mendahki e semwehmwe, e wahla mehn kapwato ni ohpis en pilismen pwe ren diar ihs me naineki. Pilismeno pwuriamweikihla met! Mwuhr emen pilismen idek reh, “Dahme ke sou nainekihla mehn kapwato?” Ih eri nda, “Padahk en Paipel wekidala ei mour, eri, met ngehi aramas mehlel men.” Pilismeno pwuriamweikihla oh ndaiong elder me iang liho kohdo ni ohpiso: “Mie aramas silidep walirar (38,000,000) nan sahpwet. E pahn wia mehkot inenen kapwuriamwei ma ke kak sewese aramas ehk en duwehla lih menet.” Ni atail medewehla duwen aramas rar kei me kamwahwihala arail mour pwehki kasukuhl sang rehn Siohwa, kitail ahneki kahrepe tohto en kapinga Siohwa.

9. Ia duwen aramas akan arail kak wekidala mehlel arail mour?

⁹ Kehl en Mahsen en Koht, iangahki sawas me Siohwa ketikihda sang sapwellime manaman kin kak kahrehiong aramas akan en wekidala mehlel arail mour. (Rom 12:2; Kal. 5:22, 23) Kolose 3:10 mahsanih: “Kumwail pwuhriongehr nan likoun mour kapw en aramas kapw. Iei aramas kapw me Koht, Sounwiepe, kin ketin onohne sapahl ahnsou koaros nin duwen pein sapwellime roson, pwe en ketin kamakamarainihekin kumwail duwen pein ih.” Audepen Mahsen en Koht kak kasalehda dahme uhdahn mi nan loalen aramas, oh kak wekidala mwomwen eh madamadau oh pepehm. (Wadek Ipru 4:12.) Sang ni emen eh esehla loalokong pwung me pid iren Paipel kan oh sang ni eh kin peikiong sapwellimen Siohwa koasoandi pwung kan, e kak kompoakepahnki Koht oh ahneki koapworopwor en mour soutuk.

Siohwa Ketin Kaunopkitailda ong Ahnsou Kohkohdo

10. (a) Dahme kahrehda Siohwa kelehpw me kak ketin kaunopkitailda ong ahnsou kohkohdo? (b) Soangen wekidekla laud dah kan pahn wiawi nan sampah pwon?

¹⁰ Siohwa kelehpw me kak ketin sewese kitail en kaunopada ong ahnsou kohkohdo pwehki e mwahngih dahme pahn wiawi ahnsou keren. E ketin koasoanehdi (de mwahngih) ia pahn duwen aramas ni ahnsou kohkohdo. (Ais. 46:9, 10) Kokohp en Paipel kasalehda me “Rahn lapalap en KAUN-O kerendohr.” (Sep. 1:14) Me pid duwen rahno, mahsen en Lepin Padahk 11:4 pahn pweida: “Reken kepwe sohte pahn wia kamwahu ehu ong uhk ni rahn me ke pahn mehla, [“rahn en engieng,” NW] ahpw lelepek me pahn doarehla omw mour.” Ni ahnsou me sapwellimen Siohwa kadeik pahn leledohng ahn Sehdan sampah, dahme keieu kesempwal iei en ahneki nanpwungmwahu rehn Koht. Mwohni solahr pahn mie katepe. Ni mehlel, Esekiel 7:19 mahsanih: “Re pahn kesehla neirail kohl oh silper kan pohn ahl akan duwehte kihd.” Ni atail ese met e pahn sewese kitail en wiahda pilipil pwung ni ahnsou wet.

11. Ia ehu ahl me kasukuhl sang rehn Siohwa kin sewese kitail en kaunopada ong ahnsou kohkohdo?

¹¹ Kasukuhl sang rehn Siohwa kin wia ehu ahl en kaunopada kitail ong sapwellime rahn me kohkohdo ni eh sewese kitail en koasoanehdi dahme keieu kesempwal nan atail mour. Wahnpoaron Pohl ntinglahng Timoty: “Panawiheki koaros me kepwehpwe nan mour wet re en dehr aklapalap, oh dehr koapworopworki soahng kan me sohte kin tengeteng, duwehte atail kepwehpwehn sampah; ahpw re en koapworopworki Koht.” Mehnda ma sohte neitail mwohni tohto, kitail kak paiekihda kaweid wet me pwilisang rehn Koht. Ia wehwehn met? Kitail en dehr nantihong en kepwehpwehkihla dipwisou kan ahpw kitail anahne nantihong “wia me mwahu” oh “kepwehpwehki doadoahk mwahu.” Sang ni atail mwohneki mahs doadoahk ong Siohwa nan atail mour, kitail ‘pahn kaunopada ehu pai kesempwal ong pein kitail, me pahn wia ehu poahsoan kehlail ong ni ahnsou kohkohdo.’ (1 Tim. 6:17-19) Soangen elen tounmetei wet kin kasalehda atail kin wiahda pilipil pwung duwehte me Sises mahsanih, “dah katepehiong aramas emen, ma e alehdi kepwe koaros en sampah pokon, e ahpw pahn pwupwusang eh mour?” (Mad. 16:26, 27) Ni atail wehwehkier kerendohn rahn en Siohwa, emenemen kitail anahne idek: ‘Dahme I en ngoangki kepwehpwehkihla? I kin liduwih Koht de kepwehn sampah?’—Mad. 6:19, 20, 24.

12. Dahme kahrehda kitail en dehr nan kapehd tikitikla ma ekei mwamwahliki atail kalohk?

¹² Me keieu kesempwal nanpwungen “doadoahk mwahu” kan me sansalda nan Mahsen en Koht ong Kristian akan iei doadoahk en komour sang atail kalohki Wehio oh wie katohnpadahk. (Mad. 24:14; 28:19, 20) Duwehte ni mwehin tepin Kristian kan, ekei aramas kakete mwamwahliki atail kalohk. (Wadek 1 Korint 1:18-21.) Ahpw met sohte kin wekidala kesempwalpen dahme kitail kin kalohki, oh e sohte kin kihsang kesempwalpen atail en kihong ahnsou mwahu ong koaros en pwosonla erein ahnsou me luhluhwe. (Rom 10:13, 14) Ni atail sewese meteikan en paiekihda kasukuhl sang rehn Siohwa, kitail pahn alehdi kapai tohto.

Siohwa Kin Ketin Kapaia Irail kan me Kin Wiahda Tounmetei kan

13. Soangen tounmetei dah kei me wahnpoaron Pohl wiahda pwehki rongamwahwo?

¹³ Mwohn e wiahla emen Kristian, wahnpoaron Pohl ale kasukuhl pwehn pweida nan koasoandi en mehn Suhs kan. Ni ahnsou me e sounpar 13, e kasausang eh wasa nan kahnimw en Tarsus kohlahng Serusalem pwehn ale kasukuhl sang rehn Kamaliel, emen sounpadahk en kosonned me ndand oh waun. (Wiewia 22:3) Kedekedeo, Pohl me keieu nanpwungen ienge ko, oh ma e mihmihte nan soangen mour wet, e kakete ndandla nan pelian lamalam en mehn Suhs kan. (Kal. 1:13, 14) Ahpw e kesehla soahng pwukat koaros ni ahnsou me e sukuhlki duwen rongamwahwo oh tepida iang doadoahk en kalohk. Ia duwe, Pohl koluhkihla eh pilipil wet? Soh. Ni mehlel, e ntingihdi: “I pil mwamwahlikihla soahng koaros pwehki soahngteieu me inenen katapansang oh kesempwalsang, iei marain en Krais Sises, ei Kaun. I keselahr soahng koaros pwehki ih, I wiahki soahng koaros mehn lekdekla kei, pwe I en kak ale Krais.”—Pil. 3:8.

14, 15. Soangen kapai dah kan me kitail kin alehdi nin duwen “tohndoadoahk kei me kin iang Koht”?

¹⁴ Duwehte Pohl, Kristian kan rahnwet kin wiahda tounmetei kan pwehki rongamwahwo. (Mark 10:29, 30) Ia duwe, mie mehkot me kitail kin katihasang pwehki atail wia met? Robert, me kitail koasoia nin tapio, ahneki soangen pepehm me me tohto pil ahneki, ni eh nda: “Sohte mehkot me I koluhkihla. Doadoahk en pioneer wadohng ie peren oh nsenamwahu, oh e kahrehiong ien song oh kilang ‘uwen kalahngan en KAUN-O.’ Ahnsou koaros me I kin tounmeteikihla soahng kan me I ahneki pwehn lel ei mehn akadei kan en papah Siohwa, e kin ahnsou koaros ketin kapaiehda laudsang dahme I tounmeteikihla. Likamwete sohte mehkot me I tounmeteikihla. Ahpw ihte, I alehdi soahng tohto!”—Mel. 34:8; Lep. Pad. 10:22.

¹⁵ Ma ke iangehr wia doadoahk en kalohk oh padahk erein ahnsou ehu, ele ke pil ahnekier ahnsou mwahu en song oh kilang uwen kalahngan en Siohwa. Mie pak me ke kehn sawas sang sapwellime manaman ni ahnsou me ke ehukihong meteikan rongamwahwo? Mie pak me ke kin kilang meteikan ar perenda ni Siohwa eh kin ketin ritingada mohngiongirail kan pwehn rohng duwen mahseno? (Wiewia 16:14) Ia duwe, Siohwa kin ketin seweseiuk en powehdi kahpwal kan pwe ken kalaudehla omw kalohk? E kin ketin seweseiuk ni ahnsou apwal akan oh ni ahnsou me ke luwetala pwe ken kak pousehlahte papah ih. (Mel. 55:22) Kitail kin karanihala ih oh kalaudehla atail kamehlele me e kin ketin ieiang kitail ni atail kin kilang sapwellime sawas kan nan atail doadoahk en kalohk. (Ais. 41:10) E sou wia kapai ehu en wia “tohndoadoahk kei me kin iang Koht” nan sapwellime doadoahk en kasukuhl kesempwal wet?—1 Kor. 3:9.

16. Ia omw pepehm ong doadoahk oh tounmetei kan me ke wiahda ong kasukuhl kan sang rehn Siohwa?

¹⁶ Aramas tohto kin men wia mehkot me katapan erein arail momour. Kitail kilang me soangen pweida kan me uhdahn kaselel nan sampah wet kin mwadang manokonokla. Ahpw doadoahk me sapwellimen Siohwa aramas akan kin wia pwehn kasarawihla mware pahn wiahla kisehn poadopoad en sapwellimen Siohwa aramas akan kohkohlahte. Sapwellimen Koht aramas akan pahn tamatamante doadoahk wet. (Lep. Pad. 10:7; Ipru 6:10) Eri, kitail en kesempwalki pwais en padahkihong meteikan duwen Siohwa, doadoahk ehu me sohte pahn manokonokla.

Ia Duwen Omw Pahn Sapeng?

• Dahme Siohwa kupwurki sang irail kan me e kin ketin padahki?

• Ia duwen kasukuhl sang rehn Siohwa eh kin kamwahwihala mouren aramas akan?

• Soangen kapai dah kan me kitail ale ni atail sewese meteikan en paiekihda kasukuhl sang rehn Siohwa?

[Kawehwehpen kilel kan nan ehu ehu pali 25]

Irail kan me Siohwa ketin padahki kin wiahla pirien mehlel ehu nan sampah pwon

[Kawehwehpen kilel kan nan ehu ehu pali 26]

E sou wia kapai ehu en wia “tohndoadoahk kei me kin iang Koht”?