Kesempwalpen Erpit me Kin Kohsang Sukuhliki Duwen Koht
1 Ekei aramas kin medemedewe me Sounkadehdehn Siohwa kan anahne nannanti pwehn sewese kamwahuwihala kahpwal akan me aramas kin lelohng rahnwet. Aramas pwukat sohte kin wehwehki duwen kesempwalpen doadoahk en kasukuhliki aramas duwen Paipel me kitail kin wiewia ahnsou wet. E mehlel dahme wahnpoaron Pohl ntingihdi: “Pwe rohng pwoatet duwen Krais eh pwoula nin tuhke, iei mehkot mwahl ehu ong irail kan me sohte iang mi nan ahl en komour; ahpw rehtail me komourlahr akan, e wehwehki manaman en Koht.” (1 Kor. 1:18) Ni mehlel, kitail wehwehki me doadoahk en kalohk me Kristian akan kin wiewia iei doadoahk me keieu kesempwal me kin wiwiawi nan sampah rahnwet.
2 Mour Mwahu Ahnsou Wet: Pali laud en ahnsou, nannanti me aramas kin wia pwehn kamwahuwihala kahpwal akan sohte kin pweida. Kosonned akan me irail kin songosong en kauhdi oh wiewia suwed akan sohte kak katikitikihala kauwehla kosonned. Inou kan me irail kin wiahda pwehn kamwahuwihala nanpwungen wehi kan pwehn kak mie popohl sohte kak kauhdi mahwen kan. Soangen koasoandi kan me irail kin wiahda pwehn kak kamwahuwihala kahpwal en semwehmwe sohte kak kamwahuwihala kahpwal pwukat douluhl. (Melkahka 146:3, 4; Seremaia 8:9) Ni pali teio, Rongamwahu en Wehin Koht kawekilahr mour en aramas rar rar kei ni e kin sewese irail en pwuhriong nan likoun mour kapw me Koht kin kupwurki. (Rom 12:2; Kolose 3:9, 10) Ni arail kin wia met, irail kin perenkihda soangen mour me meleilei oh kansenamwahu ahnsou wet.—1 Tim. 4:8.
3 Koapworopwor en Ahnsou Kohkohdo me Kitail Kak Ahneki Peren Mehlel: Likin atail kin powehdi kahpwal akan me kitail kin lelohng ahnsou wet nan mour, erpit me kin kohsang sukuhliki duwen Koht kin sewese kitail en koasoanehdi dahme kitail pahn wia ni ahnsou kohkohdo. (Melkahka 119:105) E kin sewese kitail en wehwehki me kitail sohte anahne kesehla mwahl atail ahnsou pwehn kamwahuwihala koasoandi suwed wet. (Ekl. 1:15; Rom 8:20) Kitail kak kalahnganki me kitail sohte kin doadoahngki sapwung atail mour ni atail nantihong wia soahng kan me sohte katepe! Ni pali teio, kitail kin wia uwen atail kak koaros en nantihong wia soahng kan me pidada sapwellimen Siohwa inou en “lahng kapw oh sampah kapw” me dahme pwung pahn pweida ie. Ni ahnsou me sapwellimen Siohwa rahnen kadeik pahn leledo, e pahn sansal me irail akan me kin likih erpit me kin kohsang sukuhliki duwen Koht iei me wiahda pilipil pwung.—2 Pit. 3:10-13; Mel. 37:34.
4 Mendahki erpit me kin kohsang sukuhliki duwen Koht kin mwomwen pweipwei ong irail me kin kesempwalikihte “loalokong me kisehn sampah wet,” ni mehlel, doadoahngki erpit me kin kohsang ni sukuhliki duwen Koht kin wia elen mour ehu me pahn kak kelepw pweida mwahu. (1 Kor. 1:21; 2:6-8) Kahrehda, kitail kin nantihong kalohki rohngo me kin kohsang rehn Koht, me “Ih kelepw me erpit.”—Rom 16:27.