Kasukuhl me Kin Kahluwalahng Mour Soutuk
1 Ia uwen kaperen en kilang mesen aramas akan kin peren ni arail esehla padahk mehlel sang Mahsen en Koht! Atail ehukihong meteikan duwen loalokong me pid duwen Koht oh pil kupwuren Koht ong aramas akan kin inenen kansenamwahu ong kitail. Soangen kasukuhl wet kin kak kahluwa aramas akan ong mour soutuk.—Sohn 17:3.
2 Dahme Kahrehda Kasukuhl wet Kesempwal: Rahnwet, kasukuhl kin wiawi ni soangen ahl tohto oh pid duwen soangsoangen oaralap kan. (Eklesiasdes 12:12) Ahpw, soangen loalokong wet me kitail koasoia wasaht sohte kak pahrekiong “soahng kasehlel kan me pid duwen Koht.” (Wiewia 2:11) Iaduwen—kasukuhl en sampah wet kin sewese aramas en karanih Siohwa Koht me wie Sounkapikpatail de sewese aramas en wehwehkihla duwen kupwure? E kin sewese aramas en wehwehki dahme kin wiawi ni atail kin mehla de dahme kahrehda aramas tohto kin lelohng kahpwal akan oh lokolok rahnwet? E kin kihong aramas akan koapworopwor? E kin sewese kamwahuwihala mour en peneinei? Soh. Ihte kasukuhl sang rehn Siohwa Koht me kak sewese kitail en wehwehki duwen mour oh sapeng atail peidek kan me pid mour.
3 Kasukuhl sang rehn Siohwa Koht kin kak sewese aramas en wia mehkot me sampah wet sohte kak wia iei sewese aramas en tiahk mwahu. Mahsen en Koht kin usasang nan mohngiong lipilipilki aramas, uhki wehi oh pil uhki keinek rehn aramas akan me kin alehda oh doadoahngki audepe. (Ipru 4:12) Sukuhliki Mahsen en Koht kin pil kamwekid aramas akan en liksang tiahk lemei oh en ‘pwuhriong nan likoun mour kapw en aramas kapw.’ (Kolose 3:9-11; Maika 4:1-3) Oh pil, kasukuhl sang rehn Siohwa Koht sewese aramas rar rar kei en kak powehdi tiahk kan oh wiewia kan me irail kin ahnla wia me kin kansensuwedihala Koht.—1 Korint 6:9-11.
4 Dahme Kahrehda Kasukuhl wet me Karuwaru: Siohwa Koht, atail Sounpadahk Lapalap, kin kasukuhlikin kitail duwen wehwehn ahnsou me kitail mihmi loale. Sapwellimen Koht kokohp en kadeik kin audaudki mahsen kesempwal kan me pid atail ahnsou me anahne pakair ong aramas wasa koaros nan sampah. (Kaudiahl 14:6, 7) Ahnsou wet, Krais wie kakaun nanleng, kaudok likamw koaros kereniong pahn kasohrala, oh Wehin Koht kaunopadahr en kauwehla kaundahn wehi kan koaros en sampah wet. (Daniel 2:44; Kaudiahl 11:15; 17:16) Ihme kahrehda, e kesempwal oh karuwaru aramas en wehwehki duwen kaundahn nanmwarki me Koht pilidahro, iei Sises, oh tangasang Papilon Lapalap, oh likweriong mwaren Siohwa ki pwoson. (Melkahka 2:11, 12; Rom 10:13; Kaudiahl 18:4) Eri, kitail en wia uwen atail kak koaros en sewese aramas en ale kasukuhl wet me pahn kak kahluwalahng mour soutuk.