Nantihong Idawehn Mehn Kahlemeng Mwahu Me Sises Wiadahr
“I wiahiong kumwail mehn kahlemeng mwahu ehu, pwe kumwail en pil wia duwehte me I ahpwtehn kasalehiong kumwail.”—SOHN 13:15, NW.
1. Dahme kahrehda Sises kin wia mehn kahlemeng mwahu me Kristian kan kak idawehn?
SANGETE mahs leledo met nan poadoapoad en aramas, aramas emente me sohte wiahda dihp erein ah mour. Aramas menet iei Sises. Likin Sises, “sohte emen me sohte dipe.” (1 Nanmwarki 8:46; Rom 3:23) Ihme kahrehda, Kristian mehlel kan kin kilangwohng Sises nin duwen mehn kahlemeng mwahu unsek me kitail en idawehn. Nan Nisan 14, 33 C.E., mwohnte eh pwoula, pein Sises padahkiong sapwellime tohnpadahk kan en kahlemengih ih. E mahsanih: “I wiahiong kumwail mehn kahlemeng mwahu ehu, pwe kumwail en pil wia duwehte me I ahpwtehn kasalehiong kumwail.” (Sohn 13:15, NW) Ni kaimwiseklahn pwohng me e memour, Sises kasalehda ahl akan me Kristian akan en kak nantihong idawehn mehn kahlemeng mwahu me e wia. Nan artikel wet, kitail pahn koasoiapene duwen ekei ahl pwukat.
Kesempwalpen Ahneki Lamalam Aktikitik
2, 3. Ni ahl dah kan me Sises wia mehn kahlemeng mwahu duwen lamalam aktikitik?
2 Ni ahnsou me Sises kangoange sapwellime tohnpadahk kan en idawehn mehn kahlemeng mwahu me e wiadahr, e kasalehda ni sansal me e koasoakoasoia duwen lamalam aktikitik. Pak tohto, e kin kaweidki sapwellime tohnpadahk kan duwen lamalam aktikitik, oh ni pwohng en Nisan 14, e kasalehda pein sapwellime aktikitik ni e widen patehnehn sapwellime wahnpoaron ko. Sises mahsanih: “Ngehi, amwail Kaun oh Sounpadahk, me ahpwtehn widen patehnehmwail kan. Kumwail eri uhdahn pahn widen patehnehn emenemen kumwail.” (Sohn 13:14) Mwurinte mwo, e padahkiong sapwellime wahnpoaron kan en idawehn mehn kahlemeng mwahu me e wia. Oh met wia mehn kahlemeng mwahu en kasalehda lamalam aktikitik!
3 Wahnpoaron Pohl padahkiong kitail me mwohn Sises ketidihdo sampah, ih “ngehn ehu.” Ahpw, mendahki met, e kasapwildi pein ih oh wiahla aramas men. Ahpw, laud sang met, “e aktikitikala pein ih oh e ketin weid nan elen peik lao lel mehla, ei, ni eh mehla pohn tuhke.” (Pilipai 2:6-8, NW) Nna, medewehla met. Sises, me keriaun lapalap nanleng oh sampah, pwungki en kohdihdo oh wia-aramasala me wehwehki e pahn tikitik sang tohnleng kan, oh ipwidi nin duwen seri men me anahne sawas, oh kekeirada oh anahne peikiong pahpa oh nohno me soh-unsek, oh mwuhr, mehla nin duwen loallap men me aramas akan kin mwamwahleki. (Kolose 1:15, 16; Ipru 2:6, 7) En Sises aktikitik me inenen deila mehlel! Kitail kak kahlemengih soangen lamalam aktikitik oh kekeirada irair en karakarahk wet rehtail? (Pilipai 2:3-5) Ei, ahpw e sohte mengei.
4. Soahng dah kan kin kahrehiong aramas en aklapalap, ahpw dahme kahrehda aklapalap kin keper?
4 Me weksang aktikitik iei aklapalap. (Lepin Padahk 6:16-19) Aklapalap kahrehong Sehdan en pwupwudi. (1 Timoty 3:6) E kin mwadang kekeirada nan mohngiong en aramas kan, oh ma e kin wia met, e kin apwal en kihsang. Aramas kin aklapalapala pwehki sahpw me re kohsang ie, neirail mwohni oh dipwisou kan me re kin ahneki, arail sukuhl, soahng kan me re pweida loale nan arail doadoahk, soararail mwohn aramas, mwomwarail—arail masamwahu oh paliwar mwahu, arail mai en mwadong, oh pil soahng teikan. Ahpw, soahng pwukat sohte kesempwal mwohn silangin Siohwa. (1 Korint 4:7) Oh ma soahng pwukat kin kahrehong kitail en aklapalap, re kak kauwehla nanpwungen kitail oh Siohwa. “Mehnda ma Siohwa kin ketiket wasa ileilehie, e kin ketin kupwure me aktikitik kan; ahpw e sohte kin men karanih me aklapalap akan.”—Melkahka 138:6; Lepin Padahk 8:13.
Kasalehda Aktikitik Ong Riatail kan
5. Dahme kahrehda e kesempwal elder kan en ahneki lamalam aktikitik?
5 Dahme kitail kin wia ni atail kin papah Siohwa sohte pahn kahrehong kitail en aklapalap; oh pil atail pwukoa nan mwomwohdiso sohte pahn kahrehong kitail en aklapalap. (1 Kronikel 29:14; 1 Timoty 6:17, 18) Ni mehlel, uwen toutou en atail pwukoa kan pahn sewese kitail en wehwehki uwen aktikitik me kitail anahne kasalehda. Wahnpoaron Piter kangoange elder kan en “dehr kin aksoupeidi ong irail kan me mi pahn epwelparail—sapwellimen Siohwa sihpw kan—ahpw en wia mehn kahlemeng mwahu ong irail.” (1 Piter 5:3, NW) Elder kan kin idihdda pwehn wia ladu oh mehn kahlemeng mwahu kan nan mwomwohdiso, kaidehn en wia kaun de soumas kei.—Luk 22:24-26; 2 Korint 1:24.
6. Ni soangen irair en Kristian dah kan me kitail anahne kasalehda aktikitik?
6 Ahpw, kaidehn elder kante me anahne kasalehda lamalam aktikitik. Ong irail mwahnakapw akan, me kak aklapalapki arail madamadau mwahu oh paliwar kehlail kan me weksang me mah kan, Piter ntingihdi: “Kumwail koaros en pwuhriong nan likoun karakarahk oh uhpahpene nanpwungamwail, pwehki Koht kin ketin pelianda me aklapalap akan, a e ketikihong sapwellime kalahngan me karakarahk kan.” (1 Piter 5:5) Ei, kitail koaros anahne idawehn mehn kahlemeng mwahu en aktikitik me Krais wia. Kitail anahne ahneki lamalam aktikitik ni atail kin kalohki Rongamwahu, mehlel ni ahnsou me kitail pahn lelohng uhwong oh ni ahnsou me kitail pahn tuhwong aramas me sohte nsenohki doadoahk mwahu me kitail wiewia. Kitail anahne ahneki lamalam aktikitik ma kitail pahn ale kaweid de ma kitail pahn kihsang atail mour soahng soh katepe kan pwehn kak kalaudehla atail ahnsoun kalohk. Oh pil, kitail anahne ahneki lamalam aktikitik, pwoson oh eimah ma kitail pahn dadaur mendahki aramas kin kauwe kitail nan nuhs, doadoahngki kosonned kan ni ahl sapwung pwehn uhwong kitail, de kalokolok lemei kan.—1 Piter 5:6.
7, 8. Ia ekei ahl kan me kitail anahne kakairada lamalam aktikitik?
7 Iaduwen aramas men kak powehdi aklapalap me mihmi reh oh kasalehda “irair en karakarahk, oh ahneki madamadau me aramas teikan mwahusang” ih? (Pilipai 2:3) E anahne kilangwohng pein ih nin duwen Siohwa kin ketin wia. Sises kawehwe duwen madamadau pwung en kilangwohng pein kitail ni e mahsanih: “Kumwail pahn kin kapwaiada mehkoaros me kileldiong kumwail en wia, oh kumwail pahn kin nda, ‘Kiht, ladu soh katepe kei; ihte pwaisat, se en kapwaiada at pwukoa.’ ” (Luk 17:10) Tamataman me Sises wia soahng kan mwahu sang soahng koaros me kitail kak wia. Ahpw, mendahki met, Sises kin kasalehda lamalam aktikitik.
8 Oh pil, kitail anahne peki sawas sang Siohwa en kakairada madamadau pwung duwen pein kitail. Duwehte sounmelkahka, kitail kak kapakapki: “Komw ketikihong ie loalokong oh erpit, pwe I kin likih sapwellimomwi mahsen kan.” (Melkahka 119:66) Siohwa pahn sewese kitail en kakairada madamadau pwung, konehng oh toupahrek duwen pein kitail, oh E pahn kapaiada kitail ma kitail pahn ahneki lamalam aktikitik. (Lepin Padahk 18:12) Sises mahsanih: “Pwe me aklapalap pahn tikitikla; oh me kin aktikitik pahn lapalapala.”—Madiu 23:12.
Madamadau Konehng Duwen Dahme Pwung oh Dahme Sapwung
9. Iaduwen Sises kin kilangwohng pwung oh sapwung?
9 Mendahki Sises memour nanpwungen aramas soh-unsek erein sounpahr 33, e “sohte ketin wiahda dihp.” (Hebrews 4:15) Ni ahnsou me sounmelkahkao kohpada duwen Mesaia, e mahsanih: “Komw kin ketin poakohng dahme pwung oh kin ketin kalahdeki me suwed.” (Melkahka 45:7; Ipru 1:9) Ni ahl wet, Kristian kan pil kin nantihong idawehn mehn kahlemeng mwahu en Sises. Irail pahn kaidehn ihte ese wekpeseng en dahme pwung sang dahme sapwung; irail pahn pil kailongki dahme suwed oh poakohng dahme pwung. (Eimwos 5:15) Met kin sewese irail en pelianda ineng en wia dihp me re ipwikihdi.—Senesis 8:21; Rom 7:21-25.
10. Ma kitail kin wiewia “dahme suwed” oh sohte koluhla mehlel, dahme met kasalehda duwen kitail?
10 Sises mahsanih ong Nikodihmus me kisehn pwihnen Parisi: “Pwehki mehmen me kin wia me suwed kin kailongki marain en me mehlel, oh e sohte kin men pwurarodohng marain wet, pwehki e sohte mwahuki eh wiewia suwed kan en sansalda. A mehmen me kin wia me mehlel kin pwarodohng marain, pwe maraino en kasalehda me eh wiewia kan poahsoanki eh peikiong Koht.” (Sohn 3:20, 21) Nna, medemedewe duwen met: Sohn kasalehda me Sises me “marain mehlelo me pwarodohng sampah pwe en kamarainih aramas akan koaros.” (Sohn 1:9, 10) Ahpw, Sises mahsanih me ma kitail wiewia “dahme suwed”—soahng kan me Koht kin kupwursuwedki—kitail pahn kailongki maraino. Ke kak medewehla kailongki Sises oh dahme e kupwurki oh sapwellime koasoandi kan? Ni mehlel, ih me irail me kin nseneki wiewia dihp kin wia. Mwein irail sohte kin lemeleme me re kailongki Sises oh dahme e kupwurki ahpw, ni mehlel, ong Sises, irail pwukat kin kailongki ih oh sapwellime koasoandi kan.
Iaduwen Kitail Kak Kakairada Soangen Madamadau me Duwehte Sises me Pid Dahme Pwung oh Dahme Sapwung
11. Dahme kahrehda e kesempwal en kahlemengih Sises ni e kin kilangwohng pwung oh sapwung?
11 Kitail anahne wehwehki ni sansal duwen dahme pwung oh dahme sapwung nin duwen kupwuren Siohwa. Kitail kin kak sukuhliki duwen met sang atail onopki Mahsen en Koht. Ni atail pahn nantihong onop Paipel, kitail anahne kapakap duwehte sounmelkahka wia wasaht: “Maing Kaun [“Siohwa,” NW], komw ketin padahkiong ie, oh kasalehiong ie sapwellimomwi ahl akan.” (Melkahka 25:4) Ahpw, tamataman me Sehdan inenen widing. (2 Korint 11:14) E kak kawekila wiewia suwed ong ni mwomwen mehkot mwahu oh e kin doadoahngki elen widing wet ong Kristian kan me sohte tehk mwahu dahme pwung oh dahme sapwung. Kahrehda, kitail anahne doudouloale dahme kitail sukuhliki oh peikiong kaweid en “ladu lelepek oh loalokong.” (Madiu 24:45-47) Onop, kapakap, oh doudouloale dahme kitail sukuhliki pahn sewese kitail en kekeirada ni pali ngehn lao lel kitail mahla nin duwen Kristian men oh pil wia kisehn irail me kak “kaiahnehda arail kehl en kasawihada dahme mwahu oh dahme suwed.” (Ipru 5:14, NW) Ma kitail pahn nantihong wia met, kitail pahn kak kailongki me suwed oh poakohng me pwung.
12. Mehnia kaweid sang Paipel pahn sewese kitail en dehr wiewia dahme suwed?
12 Ma kitail kailongki dahme suwed, kitail sohte pahn mweidohng ineng suwed kan en kekeirada nan mohngiongatail. Sounpahr tohto mwurin Sises pwoula, wahnpoaron Sohn ntingihdi: “Kumwail dehr poakohng sampah, de dipwisou me mihmi nin sampah. Pwe ma kumwail kin poakohng sampah, poakepen Sahmo sohte mi loalamwail. Pwe mepwukat koaros kisehn sampah: dipen ineng en uduk, oh mehkan me aramas kin kilang oh ahnehda, oh mehkoaros me mi nin sampah me aramas kin pohnmwahsohkihda—mepwukat koaros sohte kohsang rehn Sahm, re kohsang nin sampah.”—1 Sohn 2:15, 16.
13, 14. (a) Dahme kahrehda e keper ong Kristian kan en poakohng sampah oh dipwisou me mihmi nan sampah? (b) Iaduwen kitail kak pere sang kitail en dehr kakairada limpoak ong mehkan en sampah wet?
13 Ekei aramas pahn lemeleme me kaidehn soahng koaros nan sampah me suwed. Met pwung, ahpw sampah oh audepe kan kak kerempwa kitailla oh kahrehong kitail en ekis ekis solahr papah Siohwa. Oh pil, sohte mehkot me mihmi nan sampah kin sewese kitail en karanih Koht. Kahrehda, ma kitail pahn poakohng sampah oh dipwisou me mihmi nan sampah, mendahki dipwisou pwukat sohte uhdahn suwed, kitail mihla nan keper. (1 Timoty 6:9, 10) Oh pil, soahng tohto nan sampah me suwed oh kak kauwehla atail pwoson. Ma kitail kilang kasdo kan de TV prokram kan me kin kasalehda tiahk lemei, pei, mahwen, nohn kesempwaliki dipwisou en sampah kan, de tiahk samin, soahng kan pahn ekis ekis wia soahng kan me mwahu ong kitail—oh mwuri, soahng pwukat pahn wia kasongosong kan ong kitail. Ma kitail pahn werekiong aramas me kin keieu kesempwaliki irail en kamwahuwihala arail mour ong soahng kan me pidada ineng en uduk de irail kin mwohneki rapahki ahl akan en kalaudehla palien pisnis nan arail mour, soahng pwukat pil kak wiahla dahme keieu kesempwal nan atail mour duwehte irail pwukat.—Madiu 6:24; 1 Korint 15:33.
14 Ni pali teio, ma kitail pahn perenki Mahsen en Siohwa, “dipen ineng en uduk, oh mehkan me aramas kin kilang oh ahnehda, oh mehkoaros nin sampah me aramas kin pohnmwahsohkihda” pahn solahr wia kasongosong ong kitail. Oh pil, ma kitail werekiong irail me kin mwohneki soahng kan me pid duwen Wehin Koht nan arail mour, kitail pahn duwehte irail, kitail pahn poakohng dahme irail poakohng oh kitail pahn pil liksang dahme irail liksang.—Melkahka 15:4; Lepin Padahk 13:20.
15. Iaduwen atail poakohng dahme pwung oh kailongki dahme suwed, duwehte Sises wia, pahn kak kakehlailihala kitail?
15 Kailongki dahme suwed oh poakohng dahme pwung sewese Sises en kilangwohngete “peren me mihmi mwowe.” (Ipru 12:2, NW) Kitail en duwehte Sises ni ahl wet. Kitail ese me “sampah wet oh mehkoaros me aramas kin inengieng pahn sosohrala.” Peren en sampah wet pahn kihong kitail peren ong ahnsoukiste. Ahpw, “ih me kin kapwaiada kupwuren Koht pahn momour kohkohlahte.” (1 Sohn 2:17) Pwehki Sises kin wia kupwuren Koht, e ritingada ahl pwe aramas en kak ale mour soutuk. (1 Sohn 5:13) Kitail koaros anahne kahlemengih Sises oh sukuhliki sang dahme e wia ni lelepek oh ale kamwahupe, pwehki dahme e wia kak sewese kitail en ale mour soutuk.
Dadaurete Mendahki Kalokolok
16. Dahme kahrehda e kesempwal Kristian kan en limpoakpene nanpwungarail?
16 Sises kasalehda pil ehu ahl me sapwellime tohnpadahk kan kak kahlemengih ih, ni e mahsanih: “Iet ei kosonned ong kumwail: kumwail en poakpene nanpwungamwail, duwehte ei kin poakohng kumwail.” (Sohn 15:12, 13, 17) Mie kahrepe tohto me Kristian kan kin poakohng riarail kan. Ahnsowo, Sises keieu kin medemedewe duwen kailok me re pahn ale sang sampah. E mahsanih: “Ma sampah kin kailongkin kumwail, kumwail en tamataman me e kailongkin ie mwohn eh kailongkin kumwail. . . . Sohte ladu men kin laudsang eh soumas. Ma irail kalokeieier, re pil pahn kalohkei kumwail.” (Sohn 15:18, 20) Ei, Kristian kan pil duwehte Sises ni arail pahn anahne ale lokolok. Irail anahne kakairada limpoakpene nanpwungarail pwehki met pahn sewese irail en dadaurete mendahki kalokolok.
17. Dahme kahrehda sampah kin kailongki Kristian mehlel kan?
17 Dahme kahrehda sampah pahn kailongki Kristian kan? Pwehki, duwehte Sises, irail “kaidehn kisehn sampah.” (Sohn 17:14, 16) Irail kin soupoupali nin duwen soahng kan me pid mahwen oh politik, oh irail kin kapwaiada kaweid sang Paipel, duwehte kaweid me pid kesempwaliki mour oh mourki tiahk mwakelekel oh mwahu. (Wiewia 15:28, 29; 1 Korint 6:9-11) Mehn akadei kan nan arail mour kin pidada soahng ngenin kan, kaidehn soahng kan me pidada kepwe en sampah. Mendahki re kin mihmi nan sampah wet, nin duwen Pohl ntingihdi, irail sohte kin ‘iang mourki mour en sampah wet.’ (1 Korint 7:31, NW) Mehlel, ekei aramas kin nda me irail wadek Sounkadehdehn Siohwa kan pwehki irail kin ahneki tiahk mwakelekel ahnsou koaros. Ahpw, Sounkadehdehn Siohwa kan sohte kin kauwehla arail tiahk mwakelekel pwe aramas en pwungkin irail de wadek irail. Ihme kahrehda, pali moron en aramas nan sampah sohte kin wehwehki irail, oh aramas tohto kin kailongki irail.
18, 19. Iaduwen Kristian kan en duwehte Sises ahnsou me irail kin lelohng uhwong oh kalokolok?
18 Sapwellimen Sises wahnpoaron kan kilang ahn sampah kailok laud ahnsou me irail salihedi Sises oh kemehla ih, oh sapwellime wahnpoaron ko kilang dahme Sises wia ni ahnsou me aramas kin kailongki ih. Nan mwetuwel en Ketsemeni, irail kaun en lamalam kan me kin uhwong Sises kohla reh pwehn parokedi ih. Piter nantihong pwehn pere Sises doadoahngki kedlahs, ahpw Sises mahsanih ong Piter: “Kapwurehiong noumw kedlahs en nan dewe, pwe koaros me kin doadoahngki kedlahs pahn mehkihla kedlahs.” (Madiu 26:52; Luk 22:50, 51) Kawao, mehn Israel kan kin mahweniong arail imwintihti kan. Ahpw, met soahng koaros wekila. Pwehki Wehin Koht “sohte kin kisehn sampah,” e sohte anahne pere irepen wehi kan. (Sohn 18:36) Ni ahnsou keren, Piter pahn kisehn wehi en ngehn ehu, me irail towe kan me pahn sohsohki nanleng. (Kalesia 6:16; Pilipai 3:20, 21) Ihme kahrehda, sang ahnsowo kohdo, sapwellimen Sises tohnpadahk kan kin kilangwohng kailok oh kalokolok duwehte Sises kin wia—irail kin kanengamahiong met ni popohl oh irail sohte kin masak. Irail pahn mweidohng Siohwa en kapwungala irail oh re kin likih Ih oh peki reh sapwellime sawas pwehn dadaurete mendahki kalokolok.—Luk 22:42.
19 Sounpahr kei mwuri, Piter ntingihdi: “Pein Krais eh lokolongkin kumwail oh ketikihong kumwail karasepe mwahu, ih pil duwen amwail pahn idawehn oh kahlemengih. . . . Ni aramas ar lahlahwe, e soh mwahn dupukohng irail; nan sapwellime lokolok mwuledek, e sohte angiangihada sounkamakam ko, pwe e ketin mweidalahte sapwellime koapworopwor koaros rehn Koht, Sounkadeik Pwung.” (1 Piter 2:21-23) Duwehte me Sises kasalehda, Kristian akan pahn lelohng kalokolok laud erein sounpahr tohto. Nan keieun senturi oh pil rahnwet, Kristian kan kin idawehn mehn kahlemeng mwahu en Sises oh kasalehda mwahu me irail kak dadaurete ni lelepek mendahki kalokolok, oh pil kasalehda me irail kak kolokolete arail lelepek ni arail papah Siohwa ni popohl. (Kaudiahl 2:9, 10) Kitail en pil kolokolete atail lelepek ni atail papah Siohwa ni popohl ni ahnsou me kitail kin lelohng kalokolok de uhwong.—2 Timoty 3:12.
“Pwuhriong Atail Kaun Sises Krais”
20-22. Ni ahl dah me Kristian kan kak “pwuhriong atail Kaun Sises Krais?
20 Pohl ntingihwohng mwomwohdiso en Rom: “Kumwail en pwuhriong atail Kaun Sises Krais, oh tokedihsang amwail ngoangki kapwaiada amwail ineng suwed kan.” (Rom 13:14, NW) Kristian kan kin “pwuhriong Krais” duwehte likou. Met wehwehki me irail kin kahlemengih sapwellime irair kan oh wiewia kan oh irail kin wia uwen arail kak koaros en kahlemengih ih mendahki irail kin wia aramas soh-unsek kei.—1 Deselonika 1:6.
21 Kitail kak “pwuhriong Sises Krais” ni atail pahn sukuhliki duwen mour en Sises Krais, atail Soumas, oh nantihong kahlemengih ih. Kitail men kahlemengih sapwellime irair kan duwehte: lamalam aktikitik, poakohng dahme pwung, kailongki dahme suwed, poakohng rie kan, en dehr wia kisehn sampah, oh kanengamah dadaurete mendahki kalokolok. Kitail sohte kin ‘ngoangki kapwaiada atail ineng suwed kan’—met wehwehki me: kitail sohte pahn nantihong mehn akadei en sampah wet de nantihong kapwaiada ineng en uduk kan. Ahpw, ni ahnsou me kitail anahne wia atail pilipil de kamwahuwihala kahpwal ehu, kitail pahn pein idek rehtail: ‘Dahme Sises pahn wia nan soangen irair duwehte met? Dahme e pahn mwahuki ngehi en wia?’
22 Ni kaimwisekla, kitail en kahlemengih Sises ni atail pahn soupisengki “kalohki Rongamwahu.” (Madiu 4:23; 1 Korint 15:58) Ni ahl wet, Kristian kan pil kak idawehn mehn kahlemeng mwahu en Sises, oh artikel mwurin met pahn kasalehda iaduwen irail kak wia met.
Ke Kak Kawehwe?
• Dahme kahrehda e kesempwal ong Kristian kan en kasalehda lamalam aktikitik?
• Iaduwen kitail kak kakairada madamadau pwung ong dahme pwung oh dahme sapwung?
• Ni ahl dah me Kristian kan kak kahlemengih Sises ni arail lelohng uhwong oh kalokolok?
• Iaduwen kitail kak “pwuhriong atail Kaun Sises Krais”?
[Kilel nan Pali 17]
Sises wia mehn kahlemeng unsek en kasalehda lamalam aktikitik
[Kilel nan Pali 18]
Soahng koaros me pidada en Kristian kan arail mour, me iangahki arail wia doadoahk en kalohk, anahne kasalehda lamalam aktikitik
[Kilel nan Pali 19]
Sehdan kak wiahiong mehn kamweit sohte konehng kan en mwomwen mwahu ong Kristian kan
[Kilel nan Pali 20]
Limpoak ong riatail kan kak sewese kitail ni ahnsou me kitail lelohng uhwong oh kalokolok