Kamourala, Kaidehnte Pwehki Atail Wiewia Kan, Ahpw Pwehki Kalahngan En Koht
“Pwe kalahngan en Koht me komourkumwailla ni pwoson, . . . kaidehn amwail wiewia kan, pwe pein sapwellime kupwurkalahngan ong kumwail; kahrehda sohte me kak suweiki mehkot.”—EPISOS 2:8, 9.
1. Iaduwen Kristian kan kin weksang aramas teikan me pid pweida kan nan arail mour, oh dahme kahrehda?
ARAMAS akan rahnwet kin pohnmwahsohki arail pweida kan, oh irail kin mwadang en suwei. Kristian akan kin weksang met. Kristian akan kin nantihong liksang en dehr suweiki arail pweida kan me re ahneki, itar ma pweida pwukat kin pid mehkan en pali ngehn. Ni arail kin iang perenki pweida kan me sapwellimen Siohwa aramas akan kin ahneki nin duwen pwihn ehu, re sohte kin men kasalehda dahme emen emen sawaskihda. Irail kin kilang me en papah Siohwa ni kahrepe mwahu kin kesempwal sang en wia mehkan pwehn wahdo pweida ong pein irail. Sohte lipilipil ihs me ale kisakis en mour kohkohlahte, sohte pahn kamourla pwehki pweida kan me re kin wahdohng pein irail, ahpw sang ni arail pahn pwoson oh sang kalahngan en Koht.—Luk 17:10; Sohn 3:16.
2, 3. Dahme Pohl kin suweiki, oh dahme kahrehda?
2 Wahnpoaron Pohl pil pohnese duwen ire wet. Mwurin e kapakap pak siluh pwehn ale kamaiou sang “kisin tek kamedek kis,” e alehdi pasapeng sang Siohwa: “Ei kalahngan itarohng uhk; pwe ei manaman kin sansalda mehlel rehn me luwet kan.” Ni karakarahk, e alehda en Siohwa pilipil ong ih oh Pohl mahsanih: “Ihme I kin perenki oh suweiki ahi luwet akan, pwe I en kin pehm manaman en Krais rehi.” E pahn mwahu kitail en kahlemengih en Pohl irair en karakarahk.—2 Korint 12:7-9.
3 Mendahki Pohl kin deila ni ah kin kapwaiada ah pwukoa en Kristian kan, e kin pohnese me e kin pweida kaidehn sang ni pein ah koahiek me kahrehda. Pohl kasalehda lamalam karakarahk ni e kasalehda: “Ngehi me keieu tikitik rehn sapwellimen Koht aramas sarawi kan, Koht ahpw ketikihong ie kalahngan wet, iei kalahngan en lohkihong mehn liki kan Rongamwahu duwen kapai lapalap kan en Krais me sohte kak nekila.” (Episos 3:8) Sapwellimen Pohl mahsen kan kin kasalehda me e sohte kin wia aramas aklapalap de leme me e mwahu sang meteikan ni pali ngehn. “Koht kin ketin sohpeisang me aklapalap, oh kin ketikihong me aktikitik kan sapwellime kalahngan.” (Seims 4:6; 1 Piter 5:5) Kitail kin kahlemengih Pohl oh ahneki madamadau me kitail sohte mwahu sang riatail kan ni pali ngehn?
“En Kilangwohng Meteikan me Irail Lapalap Sang Uhk”
4. Dahme pahn kak kahrehong kitail en apwaliki en kilangwohng meteikan en lapalap sang kitail?
4 Wahnpoaron Pohl kaweid Kristian kan: “Kumwail dehr wia mehkot sang ni amwail ineng en roporop ong pein kumwail de suwei mwahl; ahpw kumwail mpahipene nanpwungamwail, oh dehr wiahki me kumwail mwahusang aramas teikan.” (Pilipai 2:3) Met mwein pahn wia mehkot apwal, mehlel ma kitail kin ahneki pwukoa laud kan. En ahneki lamalam aktikitik pahn kak wia mehkot apwal pwehki ngenin aksiaipene oh madamadau en aklapalap kin inenen rek nan sampah rahnwet. Oh pil, e kakete me ni atail serio, kitail kin sukuhliki kitail en kin siai, mwein rehn riatail akan ni imwatail de rehn iengetail tohnsukuhl akan ni imwen sukuhl. Mwein ahnsou koaros kitail kin ale kangoang en wia emen me keieu nan palien mwadong de me keieu loalokong ni imwen sukuhl. Mehlel, e konehng kitail en kin kihong uwen atail kak koaros ong soahng kan me konehng. Kristian akan sohte kin wia met pwehn wahdo kaping ong pein irail, ahpw re kin kihong uwen arail kak koaros nan doadoahk kan pwehn kak paiekihda doadoahko oh pil en wia kamwahu ong meteikan. Ahpw, ma kitail kin ahnsou koaros rapahki kaping sang meteikan kak wia mehkot keper. Iaduwen?
5. Ma sohte petehkpe pahn kohwong aramas emen me kin ahnsou koaros siai oh pohnmwahso, e pahn kak wiahla soangen aramas dah?
5 Ma sohte petehkpe pahn kohwong aramas emen me kin ahnsou koaros siai oh pohnmwahso, eri e kak kahrehong aramaso en wiahla aramas sohte wahu oh aklapalap. E pahn kin tepida peirinki en meteikan arail koahiek oh kapai kan. Lepin Padahk 28:22 mahsanih: “Aramas emen me kin peirin kin karuwaru en kepwehpwehla, ahpw e sohte ese iahd me paisuwed pahn lelohng ih.” E pahn kakete tepida ahneki madamadau me e kak wia pwukoa kan mwahu sang meteikan, ahpw ni mehlel e sohte kakong. Oh pwehki e men kamwahuwih pein ih, e pahn kahrehong en tepida kauwe oh suwediong meteikan—oh ih soangen wiewia kan me Kristian akan anahne liksang. (Seims 3:14-16) Sohte lipilipil dahme e pahn wia, e kakete tepida ahneki soangen madamadau me ih me keieu kesempwal.
6. Dahme Paipel kin kaweidki duwen ngenin siai?
6 Paipel kin kangoange Kristian akan: “Kitail en dehr aklapalap de kamwakara emen, de peirinpene.” (Kalesia 5:26) Wahnpoaron Sohn kasalehda duwen ienge Kristian emen me ahneki soangen madamadau duwehte met. Sohn mahsanih: “I kadarowohng tohn mwomwohdiso kisinlikou mwotomwot kis; ahpw Diohtrepihs, me inengieng en wia ih me keieu rehn koaros, sohte men waunekin ie de rong ahi koasoi. Eri, ni ei pahn pwarowei, I pahn kapwarehda mehkoaros me e wia: soahng suwed kan me e koasoiakin kiht, oh pil likamw akan me e kin koasoia.” Ia uwen kansensuwed ni ahnsou me emen Kristian kin lohdiong pahn soangen irair wet!—3 Sohn 9, 10, NW.
7. Dahme Kristian men pahn liksang nan ah wasahn doadoahk nan rahnpwukat?
7 Ni mehlel, Kristian akan sohte kak en kihweisang soangen siai koaros. Karasepe, mwein Kristian emen kin doadoahk ong pisnis ehu me kin siai ong pisnis teikan ni arail pahn kin wiahda soangen dipwisou kan de wia doadoahk teikan me pisnis teikan kin pil wia. Ahpw, nin duwen Kristian kan, kitail en wia atail doadoahk ni wahu, limpoak oh nsenohki pepehm en meteikan. Kristian mehlel men pahn liksang wiewia kan me kin kauwehla kosonned de wiewia kan me sohte konehng Kristian oh pil e sohte men wia soangen aramas me kin men aksiai oh medemedewekihte pein ih. Kristian emen sohte pahn leme me en keieu ni soahng koaros me keieu kesempwal nan mour. Ma met kin mehlel ong atail doadoahk en war, ia uwen met a pahn pil kesempwal ong soahng kan me pid atail pali ngehn!
“Dehr Kapahrekiong Meteikan”
8, 9. (a) Dahme kahrehda Kristian elder kan sohte kin siaipene nanpwungarail? (b) Ni ahl dah 1 Piter 4:10 kin dokedoke sapwellimen Koht ladu kan koaros?
8 Soangen madamadau me Kristian kan konehng ahneki me pid arail kaudok sansalda nan mahsen pwukat: “Emen emen en pein kasakasawih pein eh wiewia kan. Ma eh wiewia kan me mwahu, eri, e kak pohnmwahsohki; a ieremen e kapahrekiong en meteikan ar wiewia kan.” (Kalesia 6:4) Elder kan nan mwomwohdiso kin ese me irail sohte kin siaipene nanpwungarail, ihme kahrehda irail kin ehupene oh doadoahkpene. Emen emen irail kin perenki sawas me elder teikan kin kihda ong kamwahupen mwomwohdiso pwon. Irail kin nantihong liksang ahneki madamadau en siaipene oh kin kihda mehn kahlemeng mwahu pwe mwomwohdiso en kak ehupene oh miniminpene.
9 Ekei elder kin koahiek de ese lamalam sang ekei pwehki irail mahlahr, de re lelohngehr soangen irair tohto nan arail mour, de pil sang koahiek me irail ipwikihdi. Pwehki irair pwukat, elder kan kin ahneki soangen pwukoa wekpeseng kan nan mwomwohdiso. Irail sohte kin kapahrekpene emen emen, oh irail kin tamataman kaweid wet: “Emen emen kumwail, nin duwen sounkohwa mwahu en sapwellimen Koht kapai kan, en kin doadoahngki ong ni kamwahupen meteikan, ni amwail kin kesempwaliki kalahngan me Koht ketin kasalehiong kumwail ni soangsoangen ahl kan.” (1 Piter 4:10, NW) Ni mehlel, ire wet kin dokedoke sapwellimen Siohwa ladu kan koaros, pwe kitail koaros alehdier kisakis en sukuhliki loalokong pwung oh kitail koaros kin perenki kapai en iang doadoahk en kalohk.
10. Ni ahl dahieu me atail kaudok kak wia mehkot kaperen ong Siohwa?
10 Atail kaudok kin wia mehkot kaperen ong Siohwa ihte ma e kin poahsoankihda limpoak oh lelepek, kaidehn sang ni atail nantihong kasalehda me kitail mwahu sang meteikan. Kahrehda, e kesempwal kitail en ahneki madamadau toupahrek ni atail kin utung kaudok mehlel. Pwehki kitail sohte kak kadeik ni pwung ahn meteikan madamadau oh mwekid kan, Siohwa kin ketin “kasawih nan mohngiong en aramas akan.” (Lepin Padahk 24:12; 1 Samuel 16:7) E pahn mwahu ma kitail pahn ekei pak pein idek rehtail, ‘Dahme poahsoanihada ahi kin kapwaiada kehkehlik kan en Siohwa kan oh iang doadoahk en kalohk?’—Melkahka 24:3, 4; Madiu 5:8.
En Ahneki Madamadau Pwung ong Atail Doadoahk ong Mehkan me Pid Atail Pali Ngehn
11. Soangen peidek dah kan me pid atail doadoahk nan kalohk me konehng kitail en medemedewe?
11 Ma atail doadoahk kin wia mehkot me kaidehn ih me keieu kesempwal pwe Siohwa en kupwurperenkin kitail, eri ia uwen laud kitail pahn nsenohki atail doadoahk ong mehkan me pid atail pali ngehn? Ma poahsoanpen atail doadoahk en kalohk kin pwung, e pahn kesempwal dahme kitail kin wia nan doadoahk wet oh ia uwen laud atail doadoahk? Mehpwukat kin wia peidek mwahu kan pwe kitail sohte men kihong nempe kan de ripoht mwahu kan me pid atail doadoahk en kalohk en kesempwal sang atail doadoahk en papah Siohwa—doadoahk ong mehkan me pid atail pali ngehn.
12, 13. (a) Ia ekei kahrepe kan me kitail kin wiahda ripoht en atail doadoahk nan kalohk? (b) Ia ekei kahrepe kitail en peren ni atail pahn kin kilang kohpenehn ripoht akan me kin kasalehda duwen doadoahk en kalohk me kin wiawi nan sampah pwon?
12 Tehk dahme pwuhk en “Organized to Do Jehovah’s Will” koasoia: “Irail sapwellimen Sises Krais tohnpadahk kan en mahs ko kin perenki rong ripoht duwen kekeiradahn doadoahk en kalohk. (Mark 6:30) Nan Paipel nan pwuhken ‘Wiewia kan’ padahkiong kitail me irail aramas 120 mihmi nan Serusalem ni ahnsou me ngehn sarawi keiehdi irail tohnpadahk ko ni Pendekos. Mwurin ahnsoukis, irail tohnpadahk ko tohtohla lel 3,000, oh pil mwuri ekis, irail tohtohla lel 5,000. (Wiewia 1:15; 2:5-11, 41, 47; 4:4; 6:7) Ia uwen kekeirada pwukat kin wia mehn kangoang ong irail tohnpadahk kan ahnsowo!” Ohng ni kahrepeohte, Sounkadehdehn Siohwa kan rahnwet kin ngoangki en wiahda rekord pwung kan ong kekeiradahn doadoahk en kalohk nan sampah pwon me Sises kehkehlingkihong Kristian kan: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” (Madiu 24:14) Ripoht pwukat kin kasalehda dahme wiawi nan doadoahk en kalohk wasa koaros nan sampah. Re pil kin kasalehda mehnia sahpw akan me anahne sawas, soangen pwuhk dah kan anahn oh dahme anahn pwe doadoahk en kalohk en kak pweida mwahu wasa koaros nan sampah.
13 Kahrehda, atail kin ripohtki duwen atail doadoahk en kalohk kin sewese kitail en pweida mwahu nan atail doadoahk en sewese aramas akan. Oh pil, kitail sou kin ale mehn kangoang ni ahnsou me kitail rong duwen doadoahk en kalohk me riatail kan kin wia nan sahpw teikan? Rohng me pid duwen kekeirada oh uwen kohpeseng laud en doadoahk wet kin kadirehkin kitailla peren oh kamwekid kitail en wia doadoahk laud oh kin pil kamehlelehiong kitail me Siohwa pahn kapaiada kitail. Oh pil, ia uwen atail kin kalahnganki me pein neitail ripoht kin iang mih nan ripoht pwukat! Mehlel, pein atail ripoht kin mwein tikitik kapahrekiong ahn sounkalohk koaros nan sampah pwon arail ripoht kapatpatpene, ahpw Siohwa kin ketin tamataman soahng koaros me kitail kin wia ni atail kin papah Ih. (Mark 12:42, 43) Taman me ma sohte pein nein emen emen ripoht kan, eri ripoht kan me kapatpatpene sohte pahn unsek.
14. Likin doadoahk en kalohk oh padahk, dahme pil pidada atail kaudok ong Siohwa?
14 Mehlel me pali laud en dahme emen emen Sounkadehde kin wia ong me pid kapwaiada arail pwukoa en papah Siohwa nin duwen aramas me inoukihong Siohwa arail mour sohte kin pwarada nan neitail ripoht kan. Karasepe, ripoht kan sohte kin kasalehda ahn emen emen ahnsou me re kin kihda ong wadek pein neirail Paipel, arail iang towehda mihding kan, wia pwukoa nan mwomwohdiso, sawas me emen kin kihong rie brother oh sister ni pali ngehn, oh sawas en mwohni ong doadoahk en kalohk, oh pil soahng teikan. Mendahte atail ripoht en doadoahk en kalohk kin wia mehkot kesempwal pwehki e kin sewese kitail en dadaurete ngoangki kalohk oh dehr pwangahkihda, kitail anahne kilangwohng met ni ahl konehng. Kitail en dehr leme me neitail ripoht en kalohk me pahn kihong kitail mour soutuk.
“Ngoangki Wiewia Mwahu kan”
15. Mendahki wiewia kelepw sohte kin kamourkitailla, dahme kahrehda re konehng?
15 Mehlel me kaidehn wiewia kelepw me pahn doarekitailla, ahpw wiewia kan me anahn. Ihme kahrehda, Kristian akan me adanekihki “aramas me wiahla sapwellime kelepw oh ngoangkihte wiewia kan me mwahu” oh ih kahrepen re kin ale kangoang en “nsenohki sawaspene ni kasalepen atail limpoak oh atail wiewia mwahu kan.” (Taitus 2:14; Ipru 10:24) En kalaudehla met, soun nting en Paipel, Seims, mahsanih: “Pwe nin duwen paliwar ehu me sohte ngeni eh uhdahn mehlahr, ih pil duwen pwoson, ma sohte wiewia iang, pwoson mehla ehu.”—Seims 2:26.
16. Dahme kesempwal sang wiewia kan, ahpw dahme kitail anahne kanahieng?
16 Uwen kesempwal en wiewia mwahu kan iei pil uwen kesempwalpen dahme poahsoanda wiewia mwahu pwukat. Kahrehda, e pahn wia elen loalokong en kin, ekei pak, tehk duwen poahsoanpen atail wiewia kan me wehwehki ia kahrepen atail wiewia kan. Pwehki aramas sohte kak ese ahn emen tohrohr kahrepe me e wia mehkot, kitail en kanahieng oh dehr kadeik meteikan. Peidek wet kohwong kitail koaros: “Ihs kowe pwe ke en kadeikada en emen eh lidu?” Iei pasapengpen peidek wet: “En liduwohte eh soumaste me pahn kupwurkupwure ma e pahn pweida de soh.” (Rom 14:4) Siohwa, me Kaun en koaros, oh sapwellime Sounkopwung pilipilda, Sises Krais, pahn ketin kadeik kitail, kaidehnte ong atail wiewia kan, ahpw pil ong poahsoanpen atail wiewia kan, iaduwen kitail doadoahngki ahnsou mwahu kan me kohwong kitail, atail limpoak, oh atail lelepek. Siohwa oh Sises Krais kelepw me pahn kak kadeik kitail ni pwung ong ma kitail kapwaiada kehkehlik kan me kohwong Kristian kan, nin duwen me wahnpoaron Pohl kasalehda: “Wia uwen omw kak mwohn silangin Koht, pwe en ketin pwungkin uhk, nin duwen tohndoadoahk men me sohte kin namenengki eh doadoahk, doadoahngki mahsen en padahk mehlel ni ahl me pwung oh konehng.”—2 Timoty 2:15, NW; 2 Piter 1:10; 3:14.
17. Ni atail pahn nantihong wia uwen me kitail kak, dahme kahrehda kitail en tamataman dahme Seims 3:17 kin kasalehda?
17 Siohwa kin kasalehda irair en toupahrek pwe e kin kasik sang kitail mehkot me kitail kakong, kaidehn mehkot me kitail sohte kakohng. Nin duwen me Seims 3:17 mahsanih, “erpit me kin sang powe kin toupahrek.” E sou pahn wia elen loalokong oh pweida mehlel ma kitail pahn kahlemengih Siohwa nan irair wet? Ihme kahrehda, kitail en dehr wiahda mehn akadei kan me kitail sohte kakong, oh pil kitail en dehr kasikasik sang riatail soahng kan me irail sohte kak wia.
18. Dahme kitail kak ale ma kitail ahneki madamadau toupahrek duwen atail wiewia kan oh kalahngan en Siohwa?
18 Erein atail pahn kin ahneki madamadau toupahrek ong wiewia kan nan pwoson oh pil kalahnganki kadek me Siohwa kin ketin kasalehiong kitail, kitail pahn kak kasalehda kilel en sapwellimen Siohwa ladu mehlel kan. (Aiseia 65:13, 14) Kitail en perenki kapai kan me Siohwa kin ketikihong sapwellime aramas akan nin duwen pwihn ehu, mendahki ia uwen laud emen emen kitail kin wia. En doulahte “kapakap oh kapingkalahngan ong Koht,” oh peki en sewese kitail en wia uwen atail kak koaros. Eri, ni soh peikasal, “sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” (Pilipai 4:4-7) Ehi, kitail pahn kak ale mehn kamweit oh kangoang sang ni atail pahn ese me kitail pahn kak kamourla, kaidehnte pwehki atail wiewia kan, ahpw pwehki kalahngan en Siohwa!
Ke Kak Kawehwehda Dahme Kahrehda Kristian akan
• sohte kin suweiki arail pweida kan?
• kin liksang kasalehda ngenin siai?
• kin ripohtki arail doadoahk nan kalohk?
• kin liksang kadeikih Kristian teikan?
[Kilel nan Pali 23]
“Ahi kalahngan itarohng uhk”
[Kilel nan Pali 25]
Elder kan kin perenki sawas me emen emen irail kin kihda ong kamwahupen mwomwohdiso
[Kilel nan Pali 27]
Ma sohte nein emen emen ripoht, eri ripoht kan me kapatpatpene sohte pahn unsekla