Ke Kin Lelepek Ni Mehkan Koaros?
“Me kin loalopwoat ni mehkot tikitik, e pahn pil loalopwoat ni mehkot laud.”—LUK 6:10.
1. Ia ehu ahl me Siohwa kin lelepek?
NI RAHNO kin reireila, ke kin tehk dahme kin wiawiong ngenin tuhke (shadow) nan pwehlo? Ei, ngenin tuhkeo (shadow) kin wekiwekla ni sais oh mwohmw. En aramas inou kan oh ngoang kin pil wekiwekla duwehte ngenin tuhke wet. Ahpw, Siohwa Koht sohte kin kak wekila. Tohnpadahk Seims kin kahdaneki Siohwa “Sounwiepen marain koaros en nanleng,” oh e mahsanih: “Koht sohte kin ketin wekila, oh sohte kisin mwomwen wekila kis kak mie reh.” (Seims 1:17) Siohwa sohte kin wekila oh kitail kak likih Ih, mehnda ma pil ni soahng tikitik kan. E wia “Koht me loalopwoat oh mehlel.”—Deuderonomi 32:4.
2. (a) Dahme kahrehda kitail en kasawih pein kitail pwehn esehda ma kitail lelepek de soh? (b) Peidek dah kan me pid lelepek kitail anahne tehk?
2 Iaduwen Koht kin kilangwohng likilik me sapwellime kan ahneki ong Ih? E kin kilangwohng irail duwehte Depit ni ah mahsanih: “I pahn kin pwungki irail kan me kin loalopwoat ohng Koht oh mweidohng re en kin iang ie mihmi ni imweio. Irail kan me uhdahn mehlel iei irail me pahn mweimweiong en kin papah ie.” (Melkahka 101:5, 6) Ei, Siohwa kin diar peren ni sapwellime kan kin kasalehda lelepek. Ni kahrepe mwahu, wahnpoaron Pohl ntingihdi: “A ia duwe, dahme konehng en kin mie rehn sounkohwa kan? Re en kin likilik pahn ar kaun akan.” (1 Korint 4:2) Dahme kin pidada en wia emen me lelepek? Ni soangen dah kei nan mour kitail en mwekidki lelepek? Ia kapai kan me kin kohsang keid ni ahl lelepek?
Wehwehn Lelepek
3. Dahme kin kasalehda me kitail lelepek?
3 Pwuhken Ipru 3:5 mahsanih, “Moses me loalopwoat.” Dahme kahrehong Moses en lelepek? Ni kauwadahn ihmw likou en kaudok, “Moses kapwaiada soahng koaros nin duwen me Kauno ketin koasoanehdi.” (Eksodus 40:16) Nin duwen tohnkaudok kan en Siohwa, kitail kin kasalehda lelepek ni atail kin papah ih ni peik. Met kin pidada atail lelepek ong Siohwa mendahki kahpwal kan me kitail kin lelohng. Ahpw, mendahki met, kaidehn atail pweida ni kasongosong laud kante me kin kasalehda atail lelepek. Sises mahsanih, “Me kin loalopwoat ni mehkot tikitik, e pahn pil loalopwoat ni mehkot laud; oh me kin keseulikilik ni mehkot tikitik, e pahn pil keseulikilik ni mehkot laud.” (Luk 16:10) Kitail pil anahne en lelepek ni mehkan me tikitik.
4, 5. Dahme atail kin lelepek ni mehkan “me tikitik” kin kasalehda?
4 En peik ong soahng kan me “tikitik” pil kesempwal ong ni kahrepe riau. Keieu, e kin kasalehda duwen atail pepehm me pid kaundahn Siohwa. Medewehla duwen keieun kasongosong me kohwong tepin pwopwoudo, Adam oh Ihp. Kosonned wet sohte apwal ong ira en kapwaiada. Ira kak kang wahntuhke koaros nan mwetuwelo, ihte wahntuhke ehute me ira kaliksang—“ihte wahntuhkehn kehsehki aramas dahme mwahu oh dahme suwed me ke sohte pahn tungoale, ma ke pahn tungoale, ke pahn mehkihla rahnohte.” (Senesis 2:17) Arail lelepek en kapwaiada kehkehlik mengei wet pahn wia elen arail kasalehda me ira utung sapwellimen Siohwa kaunda. Ni atail pahn kin peikiong sapwellimen Siohwa kosonned kan nan atail mour en ehu ehu rahn pahn kasalehda atail kin iang utung sapwellimen Siohwa kaunda.
5 Keriau, atail peik ni mehkan me tikitik ahnsou wet pahn kak sewese kitail en peik ni mehkan me laud ahnsou kohkohdo. Nan irair wet, tehk duwen dahme wiawiong Daniel oh kompoakepah silimen, Ananaia, Misael, oh Asaraia. Re kalipilipala nan Papilon nan pahr 617 B.C.E. Irail meh pahmen pwukat inenen pwulopwul mwein sounpahr eisek samwa ni ahnsou me re wisiklahng nan tehnpas en nanmwarki Nepukadnesar. Wasao, “nanmwarkio ketin koasoanehdi pwe irail en kin tungoal duwehte tohn tehnpeseo rahn koaros. Eri, mwurin ar pahn kaiahnki soahng pwukat erein pahr siluh, re en patohdohng pahn kupwur en nanmwarkio.”—Daniel 1:3-5.
6. Soangen kasongosong dah kan me Daniel oh kompoakepah mehn Ipru silimeno lelohng nan tehnpas en nanmwarki en Papilon?
6 Mwenge me pahn kin kohsang rehn nanmwarki en Papilon menet kin wia kasongosong ehu ong mehn Ipru pahmen pwukat. Kisehn mwenge me nanmwarki koasoanehdi ong irail en kang iei soangen mwenge me Kosonned en Moses kasalehda me irail en dehr kang. (Deuderonomi 14:3-20) Mahn akan me kamakamla ong mehn mwenge mwein sohte kohsang nta koaros oh ma irail kang uduk pwukat, met pahn kauwehla Kosonned en Koht. (Deuderonomi 12:23-25) Oh pil, irail mwein meirongkihongehr dikedik kan mwenge ko nin duwen tiahk en tohnkaudok en mehn Papilon pwukat kin wia.
7. Dahme peik me Daniel oh kompoakepah mehn Ipru silimeno kin kasalehda?
7 E sansal me irail tohnihmw en nanmwarki en Papilon sohte kin lipilipilki soangen mwenge kan me irail kin kang. Mendahki met, Daniel oh kompoakepah kan katengehdiong nan mohngiongarail me re sohte pahn kasamineirailla ki mwenge pwukat me Sapwellimen Koht Kosonned ong Israel kin keinapwidi. Met wia irair en kasongosong ong arail lelepek ong Koht. Irail eri peki ren kangte wahntuhke oh nim pihlte oh pekipek wet pweiong irail. (Daniel 1:9-14) Ong ekei aramas rahnwet, dahme irail meh pahmeno wia mwein sohte kesempwal. Mendahki met, arail peikiong Koht kin kasalehda iawasa irail kin kesihnenda ie me pid duwen sapwellimen Koht kaunda.
8. (a) Ia kasongosong laud me irail mehn Ipru lelepek silimeno lelohng? (b) Dahme imwikihla kasongosongo oh dahme met kin kasalehda?
8 Arail kasalehda lelepek ni mehkot me mwomwen sohte katepe kaunopadahn kompoakepahn Daniel silimen pwukat ong kasongosong me laudsang met. Pahkala pwuhken Daniel irelaud siluh oh wadek duwen irail mehn Ipru silimenet arail pahn kamakamala pwehki irail kak kahng kaudokiong sansal kohlo me Nanmwarki Nepukadnesar kauwada. Ni ahnsou irail wisikla mwohn nanmwarkio irail kasalehda arail lelepek ni soh peikasal ni arail mahsanih: “Ma at Koht me se kin papah pahn kak kapitkitala sang nan kisiniei mwehlo, oh sang omwi manaman, a ih me pahn keieu wia. Ahpw, ma e pil sohte ketin wia, a komwi en ketin mwahngih me se sohte pahn pwongih omwi koht, oh se sohte pahn pil poaridihsang sansal kohl me komw ketin kauwadahro.” (Daniel 3:17, 18) Siohwa kapitirailla? Irail sounpei ko me keseiraillahng nan kisinieio mehla, ahpw mehn Ipru lelepek silimen pwukat pedoi sang nan kisinieio oh sohte wasakis rehrail rongala! Arail kin kaiahnehda arail lelepek inenen mwahu me kahrehiong irail kak lelepek ni ahnsou me kahpwal laud lelohng irail. Met soh kin kasalehda kesempwalpen lelepek ni soahng kan me tikitik?
Lelepek me pid Doadoahngki “Kepwehn Sampah”
9. Ia wehwehn sapwellimen Sises mahsan kan me ntingihdi nan Luk 16:10?
9 Mwohn ah kasalehda duwen kehkehlik en ih me kin lelepek ni mehkan me tikitik kin lelepek ni mehkan me laud Sises kaweidki sapwellime sounrongorong kan: “Eri, I ndaiong kumwail, kumwail en doadoahngkihong aramas teikan amwail dipwisoun sampah kan, pwe re en wiahla kompoakepahmwail; pwe ni amwail dipwisou eh pahn sohrala, Koht pahn ketin kasamwolong kumwail nan dehu soutuk kan. Eri, ma kumwail sohte pahn loalopwoat ni paien sampah kan, a ihs me pahn likih ong kumwail ni pai mehlel kan en powe? . . . Sohte ladu men kak papah soumas riemen: pwe e pahn kailongki emen oh poakohng meteio; e pahn kesempwaliki emen, oh mwamwahliki meteio. Eri, kumwail sohte kak papah Koht oh dipwisoun sampah.”—Luk 16:9-13.
10. Iaduwen atail kak kasalehda lelepek ni atail kin doadoahngki “kepwehn sampah kan”?
10 Mahsen kan en Luk 16:10 kin pidada doadoahngki “kepwehn sampah kan.” Dipwisou en sampah pwukat kin kahdaneki dipwisoun sampah kan oh keieu mwohni me kin mih pahn manaman en aramas dipan akan. Me laudsang met, ma aramas emen ngoangki kepwehpwehla, met kak kahluwalahng ih en lelohng kahpwal akan. Kitail kin kasalehda lelepek ni atail kin doadoahngki erpit ni atail pahn doadoahngki atail kepwe kan. Kitail sohte kin doadoahngki atail pai kan ong ni kahrepe roporop kan, ahpw kitail en doadoahngki ong kalaudlahn doadoahk en Wehio oh sewese irail kan me anahn. Ni atail pahn lelepek ni ahl wet, kitail kin kompoakepahkihla Sises Krais oh Siohwa Koht me kin kolokol “wasahn mour kohkohlahte.” Ira pahn mweidohng kitail nan wasa pwukat me iei nanleng de nan paradais nin sampah wet.
11. Dahme kahrehda kitail en dehr pweiek kawehwe ong tohnihmw kan duwen koasoandi en sawas ong doadoahk en kalohki Wehio me Sounkadehdehn Siohwa kan kin wia?
11 Pil tehk dahme kitail kin wiaiong aramas akan ni atail kin kihong irail neirail Pwuhk Sarawi de sawaspen Pwuhk Sarawi kan ni atail kin kalohki Rongamwahuo oh kawehwe ong irail me kitail kin alehda sawas kan me kin kohwong doadoahk wet me kin wiawi sang rehn sapwellimen Siohwa aramas akan. Kitail soh kin wiaiong irail en doadoahngki arail kepwehn sampah kan oh neirail mwohni ni elen loalokong? Mendahki kaweid me kohda nan Luk 16:10 kin keieu pidada duwen doadoahngki kepwehn sampah kan ahpw mahsen pwukat pil kin kak doadoahk ong ni wasa teikan en atail mour.
En Mehlel Pil Kesempwal
12, 13. Ni soangen ahl dah kei kitail kak kasalehda mehlel?
12 Wahnpoaron Pohl ntingihdi: “Kumwail wonoweite kapakapkin kiht. Se pepehm me nan kapehdit me uhdahn mwakelekel, pwehki at kin men wia dahme pwung ni soahng koaros.” (Ipru 13:18) “Ni soahng koaros” wasaht kin pidada ni soangen ahl koaros me kin pidada atail doadoahngki mwohni. Kitail kin pwain atail pweipwand oh daksis ni pwung oh mehlel. Pwekihda? Kitail kin wia met sang ni atail nsen mwakelekel oh keieu sang ni atail limpoak ong Siohwa oh atail kin diarada mehkot me kaidehn atail. (Rom 13:5, 6) Dahme kitail kin wia ni atail kin diarada mehkot me kaidehn atail? Kitail kin kapwurelahng ih me uhdahn ahnekiher. Ia uwen ah kin wia mehn kalohk mwahu ni atail kin kawehwe ong irail kahrepen kitail kapwurelahng irail kepwe pwukat!
13 En lelepek oh mehlel ni soahng koaros pil kin pidada atail mehlel ni atail wasahn doadoahk kan. Atail mehlel ni wasahn atail doadoahk kin kasalehda soangen Koht dah kitail kin weliwelian. Kitail sohte kin “kesehla” atail ahnsou pwehki kitail dangahnga. Me weksang met kitail kin doadoahk laud duwehte atail kin doadoahk ong Siohwa. (Episos 4:28; Kolose 3:23) Roporop kasalehda me nan ehu sapwen Iurop, silikis ehu en irail tohndoadoahk kan me kin peki kisinlikou sang rehn toahkte pwehn kasalehda me re soumwahu oh sohte pahn doadoahk kin wia met ni likamw. Sapwellimen Koht ladu mehlel akan sohte kin likamwkihda kahrepe kan pwehn dehr kohla doadoahk. Ni ekei ahnsou, irail Sounkadehdehn Siohwa kan kin kasapwilada nan arail doadoahk pwehki arail mehlel oh doadoahk laud.—Lepin Padahk 10:4.
Lelepek nan Atail Doadoahk en Kristian
14, 15. Ia ekei ahl me kitail kak kasalehda atail lelepek ong ni doadoahk en Wehi?
14 Iaduwen atail kin kasalehda lelepek nan doadoahk en kalohk me Siohwa likikihong kitail? Pwuhk Sarawi mahsanih, “Eri, kitail poaden wiahiong Koht atail tungoal meirong en kaping rehn Sises; pwe ih soangen meirong wet me kin kadehdehda duwen Sises me Kaun.” (Ipru 13:15) Me kin keieu kasalehda laud atail lelepek nan kalohk iei atail pahn kin iang towehda ni kaukaule. Mie kahrepe kitail en dehr kalohk mwein sounpwong ehu oh sohte kalohki duwen Siohwa oh sapwellime kupwur kan? Atail kaukaule iang kalohk pahn kamwahuwihala atail wiepen kalohk.
15 Ehu ahl me kak kasalehda atail lelepek nan kalohk iei en kapwaiada kaweid kan me kin kohda nan Kahn Iroir oh Atail Doadoahk Ong Wehio. Ni atail kin doadoahngki padahk kan me kin kohda nin duwen mehn sawas, kitail kin diarada me atail kalohk kin pweida? Ni atail kin tuhwong aramas emen me kin perenki rong, kitail kin mwadang pwurala rehrail? A iaduwen irail me kin onop Paipel rehtail? Kitail kin kasalehda me kitail nsenohki irail oh wia uwen atail kak en sewese irail en kekeirada ni pali ngehn? Atail kin lelepek nan doadoahk en kalohk kak kahluwalahng kitail oh irail kan me kin rong kitail ong mour soutuk.—1 Timoty 4:15, 16.
En Dehr Kisehn Sampah
16, 17. Ni ahl dah kei kitail kak kasalehda me kitail kin tohrohr sang sampah?
16 Nan sapwellimen Sises kapakap ong Koht, e padahkiong sapwellime ko: “I kihongirailehr sapwellimomwi mahsen, oh sampah kailongkiniraillahr pwehki irail kaidehn kisehn sampah, duwehte ngehi me kaidehn sampah. I sohte peki rehmwi pwe komwi en ketikinirailsang nin sampah, ahpw pwe komwi en ketin perehsang irail Me Suwedo. Duwehte ngehi me kaidehn kisehn sampah, pil ih duwen irail, kaidehn irail kisehn sampah.” (Sohn 17:14-16) Kitail en kin kolokol atail lelepek ong Siohwa oh tengehdi ni atail pilipil en dehr kisehn sampah wet ong soahng kan me pidada kasarawi holiday kan oh tiahk kan oh soahng kan me kin pid mour suwed. A iaduwen mehkan me tikitik? Kitail kak alehda wiewiahn sampah wet ni atail sohte tehk? Ma kitail sohte pahn kanahieng atail likou pahn kak wekila oh solahr konehng. Ma kitail lelepek ong Koht, atail likou oh kapwat pahn “soandi mwahu oh konehng” nin duwen Kristian mehlel kan. (1 Timoty 2:9, 10) Ei, “se sohte men aramas emen en kahdsuwedih at kohwa doadoahk, ihme se sohte kin men kadirapwahki emen. Eri, se kin kasalehda ni mehkoaros me se kin wia ladun Koht kei.”—2 Korint 6:3, 4.
17 Sang ni atail kin men kasalehda atail wauneki Siohwa, kitail kin doadoahngki likou me konehng ni atail kin iang towehda mihding kan. Met pil duwehte ni atail kin tuhpene ong kapokon laud kan. Atail likou kan en kin soandi oh konehng Kristian. Met kin wia mehn kadehde ong meteikan me kin kilang kitail. Pil tohnleng kan pil kin tehk duwen atail wiewia kan me duwehte ni ahnsoun Pohl oh ienge Kristian teikan kin momour nan sampah mahs. (1 Korint 4:9) Ni mehlel, kitail en kin ahnsou koaros likouki likou konehng kan. Mwein ong ekei, en lelepek ong ahmw pilipil me pid duwen likou kan kin wia mehkot tikitik ahpw mwohn silangin Koht met kin wia mehkot kesempwal.
Kapai ong me Lelepek kan
18, 19. Ia kapai kan me kin kohsang lelepek?
18 Kristian mehlel akan kin wia “sounkohwa mwahu en sapwellimen Koht kapai kan sangehr rehn Koht.” Irail kin ale “kehl sang ni kehl me Koht ketikihda.” (1 Piter 4:10, 11) Me laudsang met, nin duwen sounkohwa kei, kitail kin ale likilik ong mehkot me kaidehn atail me iei wiewia kadek kan en Koht oh doadoahk en Wehio. Ni atail kin nantiong wia sounkohwa mwahu kei, kitail kin likih kehl me kin kohsang rehn Koht, “manaman lapalap eh uhdahn sapwellimen Koht, a kaidehk aht.” (2 Korint 4:7) Ia uwen ah wia mehn kaiahn mwahu en sewese kitail en kak dadaur nan kahpwal kan ong ni ahnsou kohkohdo!
19 Sounmelkahkaho koulki: ““Kumwail poakohng Kauno, kumwail koaros sapwellime aramas loalopwoat akan! Kauno kin ketin sinsile me loalopwoat akan, e ahpw kin ketin kaloke me aklapalap akan.” (Melkahka 31:23) Kitail en kasalehda atail lelepek, oh ni soh peikasal koapworopworki me Siohwa iei “Sounkomour en aramas koaros, ahpw mehlel en irail kan me kin pwoson.” (1 Timoty 4:10)
Ke Tamatamante?
• Dahme kahrehda kitail en “lelepek ni mehkan me tikitik”?
• Iaduwen atail pahn kak kasalehda lelepek ong mehkan me kin pid mehlel?
• Iaduwen atail pahn kak kasalehda lelepek nan kalohk?
• Iaduwen atail pahn kak kasalehda lelepek ni atail pahn kin tohrohr sang sampah wet?
[Kilel nan Pali 14]
Me kin loalopwoat ni mehkot tikitik, e pahn pil loalopwoat ni mehkot laud
[Kilel nan Pali 15]
‘En kin mehlel ni soahng koaros’
[Kilel nan Pali 15]
Ehu ahl mwahu en kasalehda lelepek iei en kaunopada mwahu ong doadoahk en kalohk
[Kilel nan Pali 16]
Kasalehda me ke wauneki
Siohwa ni ahmw pahn doadoahngki likou oh kapwat me konehng Kristian