Me Pwoson Pahn Ale Kating
1 Nan Ipru 11:6 kitail sukuhliki me Koht “kin ketin katingih irail kan me kin raparapahki ih.” Ehu ahl e kin katingih sapwellime ladu lelepek kan me kin ‘loalopwoat ni koadoahkpen mehkot tikitik’ iei sang ni e pahn ‘kihong irail mehkot laud pwe irail en kin apwahpwalih.’ (Madiu 25:23) Met kin wehwehki me Siohwa kin katingih irail me kin doadoahk mwahu ni e kin kihong sapwellime sounkadehde lelepek kan pwais tohtohsang pwais kan me irail anehkiehr.
2 Pwehki wahnpoaron Pohl kin lelepek, ihme e ale kating en kalohk lau lel kahnihmw en Iurop oh Eisia Minor. (1 Tim. 1:12) Mendahki e kin doadoahk laud ni eh kalohk, Pohl kin kalanganki pwais kaselel me e ahneki. (Rom 1:13; Kol. 1:25) E kasalehda eh kin kalanganki pwais me e ahneki ni e kin ahnsou koaros kalohk. Ni eh kin ngoangki kalohk, e kin kasalehda me e mourki pwoson. E kihda mehn kalimeng mwahu me pahn kamwekid kitail en kesempwaliki pwais kan me kitail kin ahneki.
3 Siohwa Kihong Kitail Doadoahk en Kalohk: Iaduwen kitail pahn pil kasalehda atail kalahnganki kating en pwais kan me kitail ahneki duwehte Pohl? Kitail kak rapahki ahl kan pwehn kalaudehla atail ansoun kalohk. Kitail kak kalohk ahnsou koaros, kaidehn ihte kalohk ihmw-lel-ihmw, ahpw pil kalohk ahnsou sohte lipilipil. Kitail kak pwurehng pwurala rehn aramas me sohte mihmi nan imwarail ahnsou me kitail kalohk ihmw-lel-ihmw oh pwurehng pwurala rehn aramas me kin perenki rong. Kitail pil kak pwurehng pwurala rehn aramas ahnsou me kitail inou ong irail pwehn tepida onop en Paipel rehrail.
4 Me pid duwen atail doadoahk en kalohk, Pohl kaweidki: “Nantiong kalohk ni karuwaru.” (2 Tim. 4:2, New World Translation) Mehkot karuwaru wehwehki me kitail anahne mwadang nsenohki. Kitail kin wia atail doadoahk en kalohk ni karuwaru, ni atail kin mwohnki doadoahk wet nan atail mour? Karasepe ieu, kitail sohte pahn mweidong mehn kamweit kan de pein atail kedirepw kan en kawehla atail ahnsou me kitail kileledi ong kalohk Rahn Kaunop oh Rahn Sarawi. Pwehki kitail wehwehki me imwin koasoandi wet kerendohr, kitail pil wehwehki me kalohki rongamwahu en Wehio iei doadoahk me keieu kesempwal kitail en wia.
5 Atail lelepek ong Koht kin sansalda ni atail kin mehlel oh lelepek ong ih oh nannanti wia doadoahk me Siohwa ketkihong kitail. Kitail en kapwaiada atail pwukoah koaros nin duwen doadoahk en kalohk, pwe Siohwa kak katingih atail lelepek ni ahl laud ehu.