Ke Pahn Kasalehda Sapwellimen Koht Lingan?

“Eri, kitail . . . wia sansal en lingan en Kauno.”​—2 KORINT 3:18.

1. Dahme Moses kilangada oh dahme wiawi mwuri?

E WIA ehu mehn kasansal keieu kapwuriamwei me aramas kilangehr. Ni ah kelepw pohn nahna Sainai, Moses alehdi ah pekipek kapwuriamwei me e wia. E ale mweimwei en kilang mehkot me saikinte aramas kilang​—lingan en Siohwa. Moses sohte kilang silangin Siohwa. Silangin Siohwa me nohn lingan me aramas sohte pahn kak kilang oh mour. Ihme kahrehda Siohwa kihong “lime” pohn Moses pwehn wia mehn perepe ong Moses lao e sohrala sang mwowe, ni ah doadoahngki tohnleng men en wia met. Mwuhr ni ahnsou me e sohrasang mwowe e ahpw mweidala Moses en kilang ah lingan mwurin ah sohrasangehr ih. Siohwa pil doadoahngki tohnleng men en mahsen ong Moses. Paipel kasalehda dahme wiawi mwuhr: “Ni ahnsou me Moses patopatohdi sang pohn Nahna Sainai, wa pelien takai en kataman ko, e sasairki me meseo lingaling pwehki eh patopato ong Kauno.”​—Eksodus 34:29.

2. Dahme wahnpoaron Pohl ntingihdi duwen lingan me Kristian akan kin kasalehda?

² Nna, song medewehla ma ke iang Moses mih pohn nahnao. Ia uwen ah pahn wia mehkot kaperen en iang kilang lingan en Ih me Keieu Lapalap oh rong sapwellime mahsen kan! Ia uwen ah pahn wia kapai ieu ma ke iang Moses mwurin e alehdi Kosonnedo aluhdihdo sang pohn nahna Sainai. Ke wehwehki me irail Kristian mehlel kan kin kasalehda sapwellimen Siohwa lingan ni ahl ieu me daulih ahn Moses kasalehda lingan en Siohwa? Ire kesempwal wet kin dierekda nan kisinlikou ehu me ntingihdi sang rehn wahnpoaron Pohl. E ntingihdi me irail Kristian keidi kan “koaros wia sansal en lingan en Kauno.” (2 Korint 3:18) Irail Kristian kan me ahneki koapworopwor en mour sampah pil kin kasalehda sapwellimen Siohwa lingan.

Iaduwen Kristian akan kin Kasalehda Sapwellimen Koht Lingan

3. Iaduwen atail esehla Siohwa ni ahl ekei me Moses sohte wehwehki?

³ Iaduwen atail kak kasalehda sapwellimen Koht lingan? Kitail saikinte rong de pil kilang Siohwa ni ahl me Moses wia. Mendahki met, kitail esehla oh pil loalokongkihla Siohwa ni ahl akan me Moses sohte wehwehki. Sises sohte ketido nin duwen Mesaia lao sounpahr 1,500 mwurin Moses mehla. Kahrehda, Moses sohte kak ese iaduwen Kosonnedo ah pweida pwehki Sises, me mehla pwehn kapitala aramas sang dihp oh mehla. (Rom 5:20, 21; Kalesia 3:19) Pil patehng met, Moses sohte sukuhliki soahng koaros me pid kupwuren Siohwa kaselel me pid ah Wehi oh ah pahn wahdo paradais pohn sampah. Kitail pil kin alehda loalokong me pid duwen sapwellimen Siohwa lingan, kaidehn ki pein mesetail kan ahpw sang ni mesetail ni pwoson me poahsoankihda padahk kan en Pwuhk Sarawi. Oh pil, kitail pil rongehr “ngilen Siohwa” kaidehn sang rehn tohnleng men ahpw sang ni Paipel ahpw ni mehlel sang ni Rongamwahu ko, me ni ahl kaselel kasalehda duwen padahk oh doadoahk en kalohk me Sises kin wia.

4. (a) Iaduwen Kristian me keidi kan kin kasalehda sapwellimen Koht lingan?(b) Ni ahl dah kei irail ako me ahneki koapworopwor en mour pohn sampah kin kasalehda sapwellimen Koht lingan?

⁴ Mendahki Kristian kan sohte kin kasalehda lingan en Koht sang ni marain oh linganlahn meserail kan, ahpw meserail kan kin ni ahl ieu mwomwen linganla ni arail kin ehukihong meteikan duwen sapwellimen Siohwa irair kan oh kupwur kaselel kan. Ong atail ahnsou Aiseia kohpada me sapwellimen Koht aramas akan pahn “kalohki sapwellimen Siohwa roson lapalap nanpwungen wehi pwukat.” (Aiseia 66:19) Pil patehng met, nan 2 Korint 4:1, 2, e mahsanih: “Nan sapwellimen Koht kalahngan lapalap, e ketikihong kiht kohwa doadoahk wet; ihme se sohte kin pwangahkihda. Se kin soikeweisang reht soangen tiahk rir oh kanamenek koaros; se sohte kin widinge aramas akan, se pil sohte kin wekidala mahsen en Koht. Se kin momour nan marain unsek en me mehlel mwohn silangin Koht oh kin song kahdamwahwihkitala rehn aramas koaros me kupwuramwahu.” Pohl kin koasoakoasoia duwen irail Kristian me keidi kan me wia “sounpapah en inou kapwo.” (2 Korint 3:6) Ahpw, arail doadoahk en kalohki Wehio kin sewese aramas tohto en kawekila arail mour oh alehdi koapworopwor en mour kohkohlahte pohn sampah. Doadoahk en kalohk me pwihn riau wet kin wia, kin pidada en kasalehda lingan en Siohwa kaidehn ihte sang ni arail padahk kan ahpw sang pil mwomwen arail mour de wiewia kan. E wia atail pwukoa oh kapai ehu en kin kasalehda mwomwen mehn irongen en sapwellimen Koht Wasa Lapalahpie!

5. Dahme atail kekeirdahn ni pali ngehn kin kadehdehda?

⁵ Rahnwet, Rongamwahu en Wehin Koht kin lohkseli nan sampah pwon nin duwen Sises kohpada. (Madiu 24:14) Aramas sang nan wehi koaros, keinek koaros, oh lokaia koaros kin, ni ngoang, alehda Rongamwahu oh wekidala arail mour pwehn pahrekiong kupwuren Koht. (Rom 13:2; Kaudiahl 7:9) Duwehte tepin Kristian ako, irail sohte kak uhdi koasoia duwen soahng kan me re kilangehr oh rongehr. (Wiewia 4:20) Pohnangin aramas million weneu kin kasalehda sapwellimen Siohwa lingan, oh nan poadoapoad en aramas saikinte me wia soangen dir wet. Ke iang kisehn pwihn wet? Kekeirdahn pali ngehn en sapwellimen Siohwa aramas akan kin wia mehn kadehdehpen sapwellimen Siohwa kapai oh mehn perepe. Pwehki sapwellimen Siohwa ngehn kin mih rehtail, kin ahpwte sansalda keieu uhwong kan me kin lelohng kitail. Kitail kak tehk iaduwen sapwellimen Siohwa ngehn kin uhdahn mih rehtail.

Sapwellimen Koht Aramas akan Sohte Pahn Nennenla

6. Dahme kahrehda pwoson oh ngoang anahn pwe kitail en kak kesihnenda teng ni atail kin lelepek ong Siohwa?

⁶ Medewehla ma ke kohla ni mwoalen kopwung pwehn wia kadehde ong aramas suwed emen. Ke ese me aramas suwed menet kin iang pwihn ieu me ahneki kehl oh manaman laud oh e pahn doadoahngki soahng koaros me e ahneki pwehn kauhiukdihsang en dehr kasalehda duwen mwersuwed me e wiahdahr. Pwe ken kak kadehde duwen mwersuwed me wiawi ke pahn anahne kehl oh koapworopwor laud me irail tohndoadoahk en kosonned pahn pere iuk sang aramas suwed menet. Rahnwet kitail pil kin mih nan soangen irairo. Ni atail kin kadehde duwen Siohwa oh kupwure kan kitail kin pelianda Sehdan me Tepil oh kitail kin kadehdehda me e wia sounkamaramas oh sounlikamw men me kin pitih tohnsampah pwon. (Sohn 8:44; Kaudiahl 12:9) Pwehn kesihnenda teng lelepek ong Siohwa oh pelianda Tepilo kin pidada pwoson oh kehl laud.

7. Ia uwen kehlail Sehdan oh dahme e kin song en wia?

⁷ Siohwa iei Ih me Keieu Lapalap. Sapwellime kehl oh manaman laudsang mehlel ahn Sehdan. Kitail kak likih me Siohwa sohte kin ihte kak, ahpw e pil men pere kitail ni atail kin papah Ih ni lelepek. (2 Kronikel 16:9) Mendahki met, Sehdan iei ih kaunepen ngehn saut akan oh pil tohnsampah me kin sohpeisangehr Koht. (Madiu 12:24, 26; Sohn 14:30) Pwehki Sehdan sensel nan sampah wet oh kin “lingeringer kowahlap,” e kin, ni kailok, uhwong sapwellimen Siohwa ladu kan oh kin doadoahngki sampah wet pwehn song en kauhdi irail koaros me kin kalohki Rongamwahuo. (Kaudiahl 12:7-9, 12, 17) Iaduwen ah kin wia met? E kin doadoahngki ahl siluh.

8, 9. Iaduwen ahn Sehdan kin doadoahngki limpoak ni ahl sapwung, oh dahme kahrehda kitail en kanahieng pilada ihs me kitail en werekiong?

⁸ Ehu ahl me Sehdan kin song en kauhdi kitail, iei sang ni e kin doadoahngki kapwunod en mour en ahnsou wet. Aramas akan nan imwin rahn pwukat kin limpoak ong mwohni, poakohng pein irail oh pil poakohng pein arail ineng kan. Irail sohte kin poakohng Koht. (2 Timoty 3:1-4) Pwehki arail kin kedirepwkihla mwekid en ehu ehu rahn nan arail mour, pali laud en aramas kan sohte kin tehk duwen Rongamwahuo me kitail kin wahdohng irail. Irail, ni mehlel, sohte kin nsenohki en sukuhliki duwen padahk mehlel en Paipel. (Madiu 24:37-39) Soangen elen wiewia wet kin kak doulahng kitail oh kahrehong kitail meleileidi oh nennenla ni pali ngehn. Ma kitail mweidohng atail limpoak ong kepwe oh peren en mour en laudla, atail limpoak ong Koht pahn loula.​—Madiu 24:12.

⁹ Pwehki kahrepe wet, Kristian akan kin kanahieng ni arail kin pilada ihs me irail kin werekiong. Nanmwarki Solomon ntingihdi, “Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.” (Lepin Padahk 13:20) Eri, kitail en iang irail kante me kin kasalehda sapwellimen Koht lingan. Met pahn wia mehkot mwahu! Ni atail kin iang riatail brother oh sister kan pokonpene ni atail mihding kan, kitail kin ale mehn kangoang sang ni atail limpoak, pwoson, peren oh erpit. Soangen ehupene wet me kin kakehle atail mehn akadei en doula nan atail doadoahk en kalohk.

10. Ni ahl dah kei Sehdan kin doadoahngki kapailok pwehn uhwong irail akan me kin kasalehda sapwellimen Koht lingan?

¹⁰ Ahl keriau me Sehdan kin doadoahngki pwehn song en kauhdi Kristian kan sang kasalehda sapwellimen Koht lingan iei sang kapailok. Met sohte kapwuriamwei ong kitail. Ni ah wia ah doadoahk en kalohk pohn sampah wet, Sises Krais pil kin ale kapailok kan, re kin kouruhrki, kilangdiohng, wia mehn kemenkouruhrki, lemei ong oh pil kandipih. (Mark 5:40; Luk 16:14; 18:32) Tepin Kristian akan nan rahnwet pil kin lelohng soangen lokolokohte. (Wiewia 2:13; 17:32) Kristian akan nan rahnwet pil kin lelohng soangen lokolokohte. Nin duwen wahnpoaron Piter kasalehda, irail pahn kin likwerikin irail “soukohp likamw akan.” Piter pil kohpada, “kumwail en ese pwe ni imwin ahnsou kan aramas ekei pahn pwarodo me pahn kin kaweidki ar mour pein ar ineng suwed kan. Re pahn kin kepitkin kumwail, ndinda, “E soh inoukihong kumwail me e pahn pwurodo? Eri, ia ih? Samatail ko mehlahr, a mehkoaros duweduwehte sang nin tepin sampah eh wiawihda!’” (2 Piter 3:3, 4) Sapwellimen Koht aramas akan kin ale karaun me dene arail madamadau kin mwomwen auraman. Kaweid kan en Paipel kin mwomwen wia mehkot en mahs. Ong aramas tohto, dahme kitail kin kalohki kin wia mehkot sohte katepe oh elen pweipwei. (1 Korint 1:18, 19) Nin duwen Kristian, kitail mwein kin lelohng kapailok nan sukuhl, nan atail wasahn doadoahk, oh pil ekei pak nan peneineite. Kitail kin ni tengeteng oh kehlail doulahte kasalehda sapwellimen Siohwa lingan sang ni atail doadoahk en kalohk oh ni atail wehwehki duwehte Sises me Mahsen en Koht iei me mehlelo.​—Sohn 17:17.

11. Iaduwen Sehdan ah doadoahngki kalokolok pwehn song en kauhdi Kristian akan?

¹¹ Kesiluh en ahl me Tepilo kin doadoahngki pwehn song en kauhdi kitail iei kalokolok oh uhwong. Sises mahsanih ong sapwellime tohnpadahk kan: “Aramas akan pahn salihkumwaildi oh pangkumwailla pwe kumwail en lokolok oh kamakamala. Tohn wehi koaros pahn kailongkinkumwail pwehki ngehi.” (Madiu 24:9) Mehlel, nin duwen Sounkadehdehn Siohwa kan, kitail kin lelohng uhwong kehlail ni wasa tohto nan sampah wet. Kitail kin pohnese me Siohwa kohpadahr mahso me kailok oh imwintihti pahn mie nanpwungen irail kan me kin papah Koht oh pil irail ko me kin papah Sehdan. (Senesis 3:15) Kitail pil ese me sang ni atail kin dadaur ni tengeteng pahn kalokolok, kitail kin kadehdehda me Siohwa me sapwellimaniki pwung en kaunda. Kitail ese me met kin kakehlekitailda mendahki soangen kalokolok laud kan. Sohte kalokolok ehu me pahn kak kauhdi kitail, ahpw kitail en nantihongete kasalehda lingan en Koht.

12. Dahme kahrehda kitail en peren ni atail kin nantihongete lelepek ahnsou me Sehdan kin uhwong kitail?

¹² Ke kin pelianda kasongosong en sampah wet oh kadehde ni lelepek mendahki kapailok oh uhwong? Eri mie kahrepen ken peren. Sises kamehlele ong irail kan me pahn idawehn ih: “Meid pai kumwail ma aramas akan pahn lahlahwe kumwail oh kaloke kumwail oh karaunkin kumwail soangen suwed oh likamw koaros pwehki ngehi. Kumwail nsenamwahu oh perenda, pwe ketingpamwail me laud kowahlap nanleng. Ih duwen ar kaloke soukohp ako me tiengehr mwohmwail.” (Madiu 5:11, 12) Ahmw kin dadaurete kin wia kasalepen sapwellimen Siohwa ngehn sarawi ah kin ieiang iuk oh kakehle iuk pwe ken kasalehda sapwellime lingan.​—2 Korint 12:9.

Dadaurete kin Sawas Me Kohsang Rehn Siohwa

13. Ia kahrepe keieu me kitail en dadaurete nan atail doadoahk en Kristian?

¹³ Kahrepe keieu me kitail kin dadaurete nan kalohk iei pwehki kitail poakohng Siohwa oh perenki kasalehda sapwellime lingan. Aramas kin kalap alasang irail kan me re poakohng oh wauneki, oh sohte me konehng kitail en alasang laudsang Siohwa Koht. Pwehki sang ni pein ah limpoak laud, e kadarodo sapwellime pwutak pohn sampah pwehn kadehde me mehlelo oh kapitala irail aramas peik kan. (Sohn 3:16; 18:37) Duwehte Koht, kitail kin men aramas koaros en koluhla oh komourala, ihme kahrehda kitail kin kalohk ong irail. (2 Piter 3:9) Ineng wet oh pil iangahki atail nantiong en alasang Koht, kin kamwekid kitail en kasalehda sapwellime lingan sang atail ngoangki wia doadoahk en kalohk ni lelepek.

14. Iaduwen Siohwa kin kakehle kitail nan atail doadoahk en kalohk?

¹⁴ Ni mehlel, atail kehl en dadaurete nan doadoahk en Kristian kin kohsang Siohwa. E kin kakehle kitail ki sapwellime ngehn sarawi, sapwellime pwihn, oh sapwellime Mahsen, iei Paipel. Siohwa kin “kihong kehl” ong irail ko me kin sang ni pein nsenarail kasalehda sapwellime lingan. E kin ketin sapeng atail kapakap oh ketikihong kitail erpit pwe kitail en kak dadaur pahn kahpwal kan. (Rom 15:5; Seims 1:5) Me pil laud sang met, Siohwa sohte kin mweidala kitail en lelohng kahpwal me kitail sohte kakohng. Ma kitail pahn likih Siohwa, e pahn wiahda ehu ahl me kitail en kak doulahte kasalehda sapwellime lingan.​—1 Korint 10:13.

15. Dahme kin sewese kitail en dadaur?

¹⁵ Atail dadaurete nan atail doadoahk en kalohk kin wia mehn kadehde me sapwellimen Koht ngehn sarawi kin ieiang kitail. Karasepe: Medewehla ma emen peki rehmw ken kihpeseng soangen pilawa ieu sang ihmw lel ihmw ni soh pweipwei. Ke pahn wia doadoahk wet ki pein noumw sent oh pil doadoahngki ahmw ahnsou pwehn wia met. Me pil patehng met, ke diarada me aramas malaulaute me men ale pilawa ko oh pil mie me kin uhwong ahmw doadoahk wet pwe ken dehr kihpeseng pilawa pwukat. Ke leme ke pahn men doulahte wia doadoahk wet mwurin sounpwong kei, de pahr kei de pil kohkohlahte? Mwein soh. Ei, mwein ke kin pein nsenkihda pwehn kalohki duwen Rongamwahuo ni pein ahmw ahnsou oh pil dipwisou ki sounpahr tohtohie. Pwekida? Ke kin wia doadoahk wet pwehki ke poakohng Siohwa oh sang ni sapwellime ngehn sarawi e kin kapaia ahmw nannanti sang ni ah kin sewese iuk dadaur! Ei, met uhdahn mehlel!

Doadoahk Ieu Ken Tamataman

16. Dadaurete nan atail doadoahk en kalohk kin wia wehwe dah ong kitail oh irail ako me kin rong kitail?

¹⁶ Doadoahk me pidada kosonned kapw iei kisakis ieu me sohte me kak pahrekiong. (2 Korint 4:7) Duwehte met, doadoahk en Kristian me irail sihpw teikan nan sampah pwon kin kapwaiada kin rasehng dipwisou kesempwal kan. Ni ahmw pahn doulahte dadaurete nan doadoahk en kalohk, ke kak iang kisehn dahme Pohl ntingihdi ong Timoty, “ke pahn doarehla pein kowe oh pil irail kan me kin rong uhk.” (1 Timoty 4:16) Medemedewe ia wehwehn met. Rohng me ke kin kalohki kin kihong meteikan koapworopwor en mour kohkohlahte. Ke kak ahneki nanpwung mwahu rehn irail ako me ke kin sewese ni pali ngehn. Medewehla ia uwen peren laud ke kak ahneki ni ahmw pahn mour kohkohlahte nan paradais iangahki irail ako me ke sewesehda esehla Koht. Ni mehlel, irail sohte pahn kak manokehla ahmw nsenoh oh sawas me ke wiaiong irail. Ia uwen met wahdohng uhk pepehm en kansenamwahu!

17. Dahme kahrehda atail ahnsou wia ahnsou ehu me weksang ahnsou teikan nan poadoapoad en aramas?

¹⁷ Ni ahnsouwet ke mih nan ahnsou ieu me weksang ahnsou teikan nan poadoapoad en aramas. Sohte pahn pil pwurehng mie kalohk ong aramas akan me sohpeisangehr Koht. Noha iangehr mour nan sampah duwe met oh e kilang ah sohrla. Ia uwen ah peren ni ah esehda me e ni lelepek kapwaiada kupwuren Koht ni ah kauwada warihmwo, me kahrehda ih oh ah peneinei mourla! (Ipru 11:7) Ke pil kak ale soangen peren. Medewehla ia pahn ahmw pepehm ni ahmw pahn mih nan sampah kapwo oh kilangdohng ahmw wiewia kan nan imwin rahn pwukat ni ahmw ese me ke wia uwen me ke kak pwehn sewese kalohki Rongamwahu en Wehio.

18. Mehn kangoang likilik dahieu me Siohwa ketikihong sapwellime ladu kan?

¹⁸ Kitail en doulahte kasalehda sapwellimen Koht lingan. Atail wia met pahn wia mehkot me kitail en taman kohkohlahte. Siohwa kin pil taman atail doadoahk kan. Paipel kangoange kitail: “Koht me uhdahn pwung; e sohte pahn ketin meliehla amwail wiewia kan de amwail limpoak ong ih ni sawas me kumwail kasalehdahr oh pil kin kasalehiong riamwail Kristian kan. Ih at ineng lauden: emenemen kumwail en kin nantihong eh ngoang lel ni imwi, pwe me kumwail kin koapworopworki en kak pweida. Kumwail dehr dangahngahla, ahpw kumwail alasang irail kan me kin pwoson oh kanengamah re lao lel dahme Koht ketin inoukihong irail.”​—Ipru 6:10-12.

Ke Kak Kawehwe?

• Iaduwen Kristian akan kin kasalehda lingan en Koht?

• Ia ekei ahl me Sehdan kin doadoahngki pwehn song en kauhdi doadoahk me sapwellimen Koht aramas akan kin wia?

• Mehn kadehde dahieu me kasalehda me sapwellimen Koht ngehn sarawi kin mih rehtail?

[Kilel nan Pali 5]

Mesen Moses linganla

[Kilel nan Pali 6]

Kitail kin kasalehda sapwellimen Koht lingan nan atail doadoahk en kalohk