Mahsen en Siohwa Kin Ieias

Ire Kesempwal akan Sang Nan Pwuhken Lepin Padahk kan

NANMWARKI SOLOMON en Israel en kawao “kak koasoia Lepin Padahk silikid.” (1 Nanmwarki 4:32) Kitail kak iang wadek sapwellime mahsen erpit akan? Ehi, kitail kak. Pwuhk en Lepin Padahk kan, me ntingda mpen pahr 717 B.C.E., kin kasalehda duwen sapwellimen Solomon lepin padahk tohto. Ihte irelaud riau me kaimwisekala pwuhk wet me kaidehn sapwellimen Solomon—Akur me nein Jakeh oh Nanmwarki Lemuel me ntingihdi lepin padahk kan nan Lepin Padahk irelaud 30 oh 31. Ahpw, ekei aramas kose me Lemuel iei pil ehu mwaren Solomon.

Mahsen sarawi kan me wiahda pwuhken Lepin Padahk kan kin poahsoankihda kahrepe riau—“pwe aramas en esehla erpit oh kaweid.” (Lepin Padahk 1:2) Lepin padahk pwukat kin sewese kitail en ale erpit, me iei kehl en kilang mehkan ni sansal mwahu oh doadoahngki loalokong en kapwungala kahpwal akan. Sang ni lepin padahk pwukat, kitail kak ale mehn peneu kan oh kaweid en tiahk mwakelekel. Tetehk kanahieng lepin padahk pwukat oh kapwaiada arail kaweid kan kak kamwekid mohngiongitail, wahdohng kitail peren oh imwikihla mour nsenamwahu oh pweida mwahu.—Ipru 4:12.

‘ALEHDA ERPIT OH TAMATAMAN KAWEID’

(Lepin Padahk 1:1–9:18)

Solomon mahsanih: “Erpit kin liklikwer nanial kan oh nan wasahn netinet kan.” (Lepin Padahk 1:20) Dahme kahrehda kitail en karonge ngilen erpit me sansal mwahu? Lepin Padahk irelaud 2 kin kasalehda duwen kamwahu tohto en alehda erpit. Lepin Padahk irelaud 3 kin kasalehda iaduwen kitail kak karanih Siohwa. Solomon mahsanih: “Erpit me keieu kesempwal ke en alehda. Alehda erpit, oh nantihong dehdehkihla mehlel. Tamataman kaweid me kohwong uhk, oh sinsile mwahu.”—Lepin Padahk 4:7, 13.

Dahme pahn sewese kitail en pelian elen tiahk samin akan en sampah? Lepin Padahk irelaud 5 kihda pasapeng mwahu: Doadoahngki kehl en madamadau, oh kasawihada ahn sampah elen widing kan. Oh pil, kahpwal laud kan kin kohsang tiahk en wiewia samin, de wiewiahn nenek. Lepin Padahk irelaud 6 kin kalekehki aramas duwen wiewia kan oh madamadau kan me pahn kak kauwehla atail nanpwung mwahu rehn Siohwa. Lepin Padahk irelaud 7 kin kasalehda duwen mwekid en aramas emen me kin ahneki mour samin. Nan Lepin Padahk irelaud 8, e kin kasalehda duwen kesempwalpen erpit ni ahl lingan ehu. Lepin Padahk irelaud 9, me wia kaimwiseklahn mahsen kan me kin kamwekid aramas, kin kohda ni karasaras me kin kangoange kitail en nantihong alehda erpit.

Pasapengpen Peidek kan me Pid Duwen Iren Paipel kan:

1:7; 9:10—Ni ahl dah me lahn Siohwa iei “tepin loalokong” oh “tepin erpit”? Ma sohte lahn Siohwa, pahn sohte mie loalokong, pwe Ih me Sounkapikadahn soahng koaros oh Ih me ketin kamwekid ohl akan en ntingihdi Pwuhk Sarawi. (Rom 1:20; 2 Timoty 3:16, 17) Ih me Utupen soangen kupwurokong mehlel koaros. Kahrehda, loalokong tepikihda lahn Siohwa. Lahn Koht pil tepin erpit pwehki sohte erpit ma sohte loalokong mie. Laudsang met, aramas emen me sohte kin lahn Siohwa sohte pahn doadoahngki loalokong me e ahneki pwehn kawauwih Sounkapikpatail.

5:3—Dahme kahrehda aramas en netiki paliwere men adaneki “lih me aramas sehse”? Lepin Padahk 2:16, 17 koasoia duwen “lih me aramas sehse” me duwehte aramas emen “me kin manokehla inou en ah Koht.” Aramas emen me kin kaudokiong koht likamw akan de aramas men me sehse Kosonned en Moses, me iangahki aramas en netiki paliwere men, kin adaneki ih me aramas sehse.—Seremaia 2:25; 3:13.

7:1, 2—Dahme kin pidada “ahi mahsen akan” oh “pein ahi padahk kan”? Patehng padahk en Paipel akan, mepwukat kin iangahki koasoandi en peneinei kan de kosonned akan, me kin koasoandi sang rehn pahpa oh nohno pwe en wia kamwahupen tohnpeneinei. Irail me pwulopwul akan kin anahne kapwaiada kosonned pwukat oh pil padahk en Pwuhk Sarawi kan me re kin alehsang rehn arail pahpa oh nohno kan.

8:30—Ihs me “sounsawaso”? Erpit kin rasehng aramas emen me adaneki sounsawas. E kin wia mehkot me ah doadoahk laudsang en kawehwehdahte mwomwen erpit, oh met pil kin karasahda sapwellimen Koht mesenih, Sises Krais, mwohn ah ketido oh wie aramasala. Mwohn sapwellime ipwidi oh wiahla aramas emen nin sampah, e ketin wia ‘keieun sapwellimen Koht doadoahk mahsie.’ (Lepin Padahk 8:22) Nin duwen Sises wia “sounsawas emen,” e pwerisek iang Semeo wia doadoahk ni ahnsou me Semeo kapikada soahng koaros.—Kolose 1:15-17.

9:17—Dahkot “pihl oko me pirapada,” oh dahme kahrehda re “mem”? Pwehki Paipel kin karasahiong wendipenehn pwopwoud duwehte niminim pihl lemwulemwur sang nan pwarer ehu, eri pihl pirapada kin wehwehki dipen kamwahl oh nenek me rir akan. (Lepin Padahk 5:15-17) Madamadau en wiahda mehkot ahpw sohte dierekda kin kihong aramaso soangen madamadau me soangen pihl wet mwomwen mem.

Mehn Kasukuhl kan ong Kitail:

1:10-14. Kitail en pere kitail sang pwakihala pahn irail me pahn waikitaillahng nan ahl akan en me dipan akan ni ahr pahn kin inoukihong kitail kepwe kan.

3:3. Kitail en inenen kesempwaliki limpoak-kadek oh lokaia mehlel oh kitail kasalehda irair pwukat duwehte atail kin mware elin kapwat pweilaud ni tepinweretail. Kitail pil anahne ntingihdi ong irair pwukat nan mohngiongitail, oh wiahkinirailla kisehn paliwaratail.

4:18. Loalokong en ngehn kin lalaudla. Pwe kitail en mihmihte nan marain, kitail en kaukaule kasalehda karakarahk oh opampap.

5:8. Kitail en dohweisang ineng suwed koaros en nenek, mehnda ma re kohkihdo sang ni koul, mehn kamweit, internet, de pwuhk oh makisihn kan.

5:21. Iaduwen—aramas emen me poakohng Siohwa kak kauwehla ah nanpwungmwahu rehn Koht mehlel pwehki kisin kaperen ong ahnsou kiste? Ni mehlel soh! Mehn kangoang keieu kehlail pwe aramas emen en kolokol ah tiahk mwahu iei en pehmitikiong me Siohwa kin mahsanih atail ahl akan oh kapwukoahkin kitail met.

6:1-5. Nan iretikitik pwukat, kitail kin ale kaweid mwahu me pid kitail en dehr ‘wiahda inou’ en wiliandi emen de wiahda inou soaloalokong me pid mwohni, pwe en wiliandi aramas teikan! Ma kitail kasawih keneinei oh diarada me atail mwekid sohte pwung, kitail en dehr pwand ahpw mwadangete tuhwong oh ngidingid pekipek oh wia uwen me kitail kak en kapwungala mehkan me sapwung.

6:16-19. Irair isuh pwukat kin pidada kereniong soangen irair en sapwung koaros. Kitail en kailongki wiewia pwukat.

6:20-24. Kakairada aramas emen ki Pwuhk Sarawi kak pere aramaso sang nan lidip en wia nenek. Pahpa oh nohno en dehr soukautihong kihda soangen kaiahn wet.

7:4. Kitail en kakairada limpoak ong erpit oh wehwehki mehkan.

EHUEHU LEPIN PADAHK KAN KAK KAWEID KITAIL

(Lepin Padahk 10:1–29:27)

Luwen sapwellimen Solomon lepin padahk kan me inenen audapan. Irail kin kohda pwe en kasalehda wekpeseng, karasa, oh duwepenehte kan, oh irail kin kihda mehn kasukuhl kehlail me pid wiewia, lokaia oh madamadau.

Lepin Padahk irelaud 10 lel 24 kin kasalehda duwen kesempwalpen lemmwiki Siohwa. “Nanmwarki en Suda, Esekaia, sapwellime ohl akan” me ntingihda lepin padahk kan nan irelaud 25 lel 29. (Lepin Padahk 25:1) Lepin padahk pwukat kin padahkihong kitail duwen kehliki Siohwa oh iren kasukuhl kesempwal teikan.

Pasapengpen Peidek kan me Pid Duwen Iren Paipel kan:

10:6; footnote—Iaduwen ‘en aramas suwed eh lokaia kin karirihala eikek en nan kapehde’? Met kak wehwehki me sang ni lokaia kan me aramas suwed emen kin wia, e kin ekihla ah lamalam suwed en kauwehla aramas teikan. De e kakete me pwehki aramas suwed akan kin mie arail imwintihti, wiewia lemei en aramas teikan kin kameleilei irail.

10:10—Iaduwen “ih me kin manih meteikan” kin kahrehda kahpwal? “Ohl soh katepe men” sohte kin ihte wia “lokaia mwersuwed” ahpw e pil kin song en ekihla ah madamadau kan ki mwekid en paliwar, me duwehte “manih aramas.” (Lepin Padahk 6:12, 13) Soangen likamw wet kak wiahla mehkot kapwunod ong aramas teikan.

10:29—Dahkot “elen Siohwa”? Mahsen wasaht kin pid duwen sapwellimen Siohwa wiewia ong aramas a kaidehn elen mour me kitail pahn idawehn oh wia. Sapwellimen Koht wiewia ong aramas kin wehwehki nsenamwahu ong irail me sohte wia sapwung ahpw ohla ong me suwedo.

11:31—Dahme kahrehda aramas suwedo pahn ale pweipwei laud sang aramas pwungo? Ale pweipwei wasaht kin sosohng ni uwen uk en kalokolok me emenemen pahn ale. Ni ahnsou me aramas pwung men kin sapwungala, pweine me e pahn ale ki ah sapwungala iei kalokepe. Aramas suwedo kin wiahda dihp sang pein ah inengkihda oh kahng wekidala ah mour pwehn wia dahme mwahu. Kahrehda e warohng ale kalokolok laud.

12:23—Iaduwen aramas emen ah ‘sohte kin kasalehda dahme e ese’? Wasaht sohte wehwehki me e sohte kin kasalehda douluhl dahme e ese. Ahpw, e kin wehwehki me aramas emen kin kasalehda dahme e ese ni aktikitik, oh sohte kin suwei.

14:17—Ni ahl dah me ‘mehmen me ahneki kehl en madamadau aramas kin kailongki’? Mahsen pwukat “kehl en madamadau” ni lokaiahn Ipru kin wehwehki kilang wasa de kak pil wehwehki madamadau kailok. Aramas me ah madamadau kin suwed, ni mehlel, aramas kin kailongki. Ahpw, pil duwehte aramas me kin kilang wasa me kin doadoahngki ah kehl en madamadau oh pilada en “dehr wia kisehn sampah.”—Sohn 15:19.

18:19—Iaduwen ‘riomw men ke dipadahng kin teng sang kahnimw kehlail ehu’? Duwehte kahnimw kehlail ieu me aramas songosong en kalowehdi, soangen aramas menet kin apwaliki kasalehda mahk. Imwintihti nanpwungen ih oh me wiahiong dihpo kak wiahla kehl nanpwungara duwehte “wenihmw mete en wasahn kousoan.”

Mehn Kasukuhl kan ong Kitail:

10:11-14. Pwe atail koasoi kan en wia mehn kakehlahda aramas, atail madamadau en direki loalokong mehlel, atail mohngiong en mwekidiki limpoak, oh erpit en kaweid dahme pahn kohsang nan awatail kan.

10:19; 12:18; 13:3; 15:28; 17:28. Atail koasoi kan en malaulau oh keneinei.

11:1; 16:11; 20:10, 23. Siohwa kupwurki atail mwekid oh doadoahk ong meteikan en mehlel.

11:4. E sapwung en rapahki kepwehpwehla oh pwehki met, kitail sohlahr kin pein onop Paipel, iang towehda mihding kan, kapakap, oh kalohk.

13:4. “Inengieng” ale pwukoa nan mwomwohdiso de ale mour nan sampah kapw, sohte itar. Kitail en pil pwerisek oh mehlel ong dahme Siohwa kupwurki kitail en wia.

13:24; 29:15, 21. Pahpa oh nohno limpoak sohte kin mweidohng nsenen neira seri kan ahnsou koaros oh re sohte kin pohnsehse arail sapwung kan. Ahpw, pahpa oh nohno men en kapwungala oh kihsang utupen sapwung kan mwohn arail pahn tengehdi nan loalarail.

14:10. Pwehki kitail sohte kak kawehwe atail pepehm en nan loaletail ahnsou koaros oh pil kitail sohte kak ahnsou koaros en wehwe mwahu ong aramas teikan, kamweitpen loaletail me aramas teikan kin song en kihda pahn kakete sohte itar. Kitail ele pahn kin dadaurete mendahki kahpwal akan oh kihong atail koapworopwor unsek ong Siohwa.

15:7. Kitail dehr mwadangete kasalehda soahng koaros me kitail ese ong aramas emen, me rasehng soumwet emen sohte kin padokedi ah weren tuhke kan wasatehkis. Aramas erpit emen kin kamwarakseli ah loalokong ekis ekis ni ahnsou me anahnepe mie.

15:15; 18:14. Kolokol madamadau mwahu pahn sewese kitail en diar peren, mehnda ma kitail mihmi pahn irair kansensuwed.

17:24. En weksang “aramas pweipwei men,” me poaren mese kan oh ah madamadau kan kin piripirseli oh sohte kin inenweite, kitail en rapahki en ahneki wehwe mwahu pwe kitail en kak wia mwekid erpit.

23:6-8. Kitail en kaleke kin kitail mwekid mwalaun me kin mwomwen kadek.

27:21. Kaping kin kak kasalehda ihs kitail. Aktikitik kin sansalda ma kaping kin kamwekid kitail en pohnese atail pweipwand ong Siohwa oh kamwekid kitail en tengediong papah Ih. Aklapalap kin sansalda ni ahnsou kaping kin kamwekid madamadau me kitail mwahu sang meteikan.

27:23-27. Lepin padahk pwukat kin wiawihong koasoandi en likin kahnimw pwehn kasalehda mwahu kesempwalpen diarada nsenamwahu ni sohte kepwehpwe ahpw doadoahk mehlel. Ire pwukat kin kadehde ong kitail me kitail anahne kehliki Koht.a

28:5. Ma kitail kin ‘rapahki Siohwa’ ni kapakap oh onop sapwellime Mahsen, kitail “kak wehwehki mehkoaros” me anahnepe mie ohng papah Ih ni ahl me pwung.

‘PAKAIR KESEMPWAL KAN’

(Lepin Padahk 30:1–31:31)

Pwuhken Lepin Padahk kin imwisekihla ‘pakair kesempwal’ riau. (Lepin Padahk 30:1; 31:1) Sang ni karasaras kehlail en kamwekid madamadau, ahn Agur pakair kin kasalehda kasuwedpen noahrok, oh kin kasalehda ia uwen rir elen wekid madamadau me aramas widing men kin wiahong serepein meipwon men.b E pil kin kalekehki aramas sang lokaia pohnmwahso oh lokaia lingeringer.

Pakair kesempwal me Lemuel alehsang ah nohno audaudki kaweid konehng duwen nim wain oh sakau kehlail oh pil duwen kasawihada irair pwung. Kawehwehpen lih pwopwoud mwahu men kin imwisekihla mahsen wet: “Koaros en kapingkihong uwen me konehng ni eh wiewia kan. Me konehng lih menet en ndand mwahu mwohn mesen aramas akan koaros.”—Lepin Padahk 31:31.

Alehda erpit, mwekidki kaweid, kakairada lahn Koht, kehliki Siohwa. Ia uwen ah nohn kesempwal mehn kasukuhl kaselel akan me lepin padahk kan sukuhlikin kitail! Eri, kitail doadoahngki kaweid kan sang lepin padahk kan oh diar peren en “aramas me kin lahn Siohwa.”—Melkahka 112:1.

[Nting tikitik me mi pahs]

[Kawehwehpen kilel kan nan ehu ehu pali 28]

Siohwa me Utupen loalokong mehlel koaros

[Kawehwehpen kilel kan nan ehu ehu pali 30]

Ia wehwehn en ‘kamwarakseli loalokong’?