“Pereperenki Serepein Me Ke Pwoudiki”
“Eri, ke en pereperenki omw pwoud oh rapahki omw peren rehn serepein me ke pwoudiki . . . Samwa, dahme ke pahn kihongki emen lih tohrohr omw limpoak?”—LEPIN PADAHK 5:18, 20.
1, 2. Dahme kitail kak ndahki me limpoak nanpwungen ohl oh lih pwopwoud iei kapai ieu?
PAIPEL sohte kin koasoi ni ekiek duwen tuhpenehn ohl oh lih. Nan Lepin Padahk 5:18, 19, kitail wadek: “Wiahki ahmw wasahn idipil en wia mehn kapai, eri, ke en pereperenki omw pwoud oh rapahki omw peren rehn serepein me ke pwoudiki me masamwahu oh kaselel rasehng tie men. Eh kaselel en kansenamwahwihiuk; en kapilkinuhkpene eh limpoak.”
2 Wasaht lokaia “wasahn idipil” kin wehwehki utupen nsenamwahu en tuhpenehn pwopwoud. E wia kapai pwehki pepehm en limpoak en riemen oh litepw me pwopwoud ieu kin perenki wia kisakis ieu me kohsang rehn Koht. Pepehm en kerenpene wet en kin wiawihte nanpwungen pwopwoud. Kahrehda Nanmwarki Solomon en Israel en kawao me ntingihada Lepin Padahk kan kin ni karasaras keinemwe: “Samwa, dahme ke pahn kihongki emen lih tohrohr omw limpoak? Dahme kahrehda ke anahne lingan en emen lih tohrohr?”—Lepin Padahk 5:20.
3. (a) Dahme kin uhdahn wiawihong pwopwoud tohto me kansensuwed? (b) Ia kupwuren Koht ohng dipen kamwahl?
3 Ni rahn en kapwopwoudo, ohl emen oh lih emen kin inoukihda ira en poakohng emenemen oh lelepekpene kohkohla. Ahpw mendahki met, pwopwoud tohto kin mwerkipeseng dipen kamwahl. Ni mehlel, mwurin soun roporop emen ah kasawiher roporop rieisek pahieu, e diaradahr me “25% en lih pwopwoud oh 44% en ohl pwopwoud kin wia nsenen pwopwoud ohng aramas teikan me kaidehn arail pwoud.” Wahnpoaron Pohl mahsanih: “Kumwail dehr nan kapehd rotorot, pwe me kin nenek kan, me kin pwongih dikedik en eni kan, me kamwahl akan, . . . sohte pahn iang sohsohki Wehin Koht.” (1 Korint 6:9, 10) E sansal mwahu. Dipen kamwahl wia dihp laud ehu mwohn silangin Koht, oh tohnkaudok mehlel kan en pere irail sang salelepek en pwopwoud. Dahme pahn sewese kitail en ‘kin loalopwoatpene, oh lohs en pwopwoud en dehr saminla’?—Ipru 13:4.
Tehk Kanahieng Mohngiong Widing
4. Ia ekei ahl akan me Kristian pwopwoud emen kak ni widing pidada wiewiahn limpoak ehu likin pwopwoud?
4 Duwen suwedlahn tiahk mwakelekel nan rahnwet, aramas tohto “nan pwoaren masarail kan me diren kamwahl. Ineng en wia dihp sohte kin tokedihsang rehrail.” (2 Piter 2:14) Irail kin pilahnehda ren rapahki wia nsenen pwopwoud likin arail pwoud. Nan ekei sahpw lih tohto kin doadoahk en mwohni, oh patpenehn ohl oh lih wasahn doadoahk kin kamangaiala limpoak sapwung en pwarada wasahn doadoahk. Pil Internet chat rooms pil kin kamangaiong pil aramas teikan nan computer. Aramas tohto kin sohte ese ahpw kin pwupwudiong nan soangen lidip pwukat.
5, 6. Iaduwen emen lih Kristian ah tepida pwupwudiong nan irair keper, oh dahme kitail sukuhlikihsang met?
5 Tehk iaduwen Kristian emen, me kitail pahn kahdaneki Meri, ah pwupwudiong nan irair ehu me kahrehiong tikitik en wiahda dipen kamwahl. Ah pwoud, me sohte iang wia emen Sounkadehdehn Siohwa kan kin sohte kasalehong limpoak rehn ah peneinei. Meri tamanda pak ehu nan sounpar ekei samwalahr oko ni ah tuhwongada emen iengen ah pwoudo tohndoadoahk. Ohlo kin ese wauneki aramas, oh mwuri ehu pak, e nda me e pwungki ahn Meri palien lamalam. Meri koasoia: “E inenen mwahu, oh inenen weksang ahi pwoudo.” Mwurinte mwo, Meri oh iengen ah pwoudo tohndoadoahko mwahukihda emenemen. E medemedewe: “I saikinte wiahda dipen kamwahl oh ohlo men ese duwen Paipel. Mwein ele I kak sewese ih.”
6 Mwohn ah pepehm en mwahuki ohlo oh men karanih ah pahn kahrehong en wiahda dipen kamwahl, Meri tehkada me ah mwekid kan me keper. (Kalesia 5:19-21; Episos 4:19) Ah nsen mwakelekel tepida doadoahk pwung, oh ih doula oh kapwungala ireo. Dahme Meri lelohng wia kasalepen me mohngiong “sohte mehkot me duwehte me diren piht; sohte kamwahupe ieu kak dierekda.” (Seremaia 17:9) Paipel kehkehlikihong kitail mahsanih: “Me laudsang soahng teikan koaros me ke pahn pere, pere mohngiongomw.” (Lepin Padahk 4:23) Iaduwen atail kak wia met?
‘Aramas me eh Lamalam Mie Kak Kilang Kahpwal oh Wetweisang’
7. Ni atail kin sewese aramas emen me ahneki kahpwal akan en pwopwoud, ken kapwaiada mehnia kaweid en Pwuhk Sarawi pahn wia mehn perepomw?
7 Wahnpoaron Pohl ntingihedi, “Eri, mehmen me pepehm me e kesikesihnen teng, a en kanahieng pwe e de pwupwudi.” (1 Korint 10:12) Oh pwuhken Lepin Padahk 22:3 mahsanih: “Aramas me eh lamalam mie kak kilang kahpwal oh wetweisang.” Ke dehr nohn likihala pein kowe oh lemeleme, ‘Sohte mehkot pahn lelohng ie,’ e pahn erpit ma ke pahn kasikasik apwal akan me kakete wiawi. Karasepe, ma kowe ohl emen ah ken pereiukasang lih pwopwoud emen e wiahkihla me kowe kelehpwte me e pahn kin likih en koasoakoasoiahiong iuk ah koasoi rir akan me pid soansuwed laud akan en ih oh ah pwoud. (Lepin Padahk 11:14) Padahkihong aramas me kahpwal en pwopwoud akan pahn keieu mwahu en koasoakoasoiaiong pein ah pwoud, de lih teikan me wia Kristian mah me kin nsenohki pwe ah pwopwoud en soanamwahu, de en koasoiaiong elder kan. (Taitus 2:3, 4) Elder kan kin wia mehn kahlemeng mwahu ohng tohn mwomwohdisohn Sounkadehdehn Siohwa kan me pid duwen pwopwoud. Ni ahnsou me elder men anahne koasoiong kelehpw sister Kristian emen, e kin wia wasa me aramas teikan kak kilikilang ira—wasa me duwehte nan Kingdom Hall.
8. Mehn kaleke dahieu me kesempwal nan wasahn doadoahk?
8 Nan wasahn doadoahk oh pil wasa teikan, tetehk mwahu irair akan me kak kahrehiong uhk en nohn karanihala aramas emen. Karasepe, ieiang aramas emen doadoahk daulihla ahnsou awahn doadoahk ken kak elehda kasongosong en miehla. Nin duwen omw wia ohl de lih pwopwoud emen, kin kasalehda mwahu sang omw lokaia oh mwomwen omw wiewia me ke sohte mwamwahukihseli aramas teikan. Pwehki kowe aramas emen me inoukihong Koht omw mour, ke sohte men kamengei ong uhk aramas en tetehk uhk de kamwan suwed ohng uhk pwehki mwomwen omw likou suwed de mwomwen omw wia moahng me kahrehda. (1 Timoty 4:8; 6:11; 1 Piter 3:3, 4) Kolokol kilel en omw pwoud oh noumw seri kan nan omw wasahn doadoahk kak wia mehn ketemen sansal ohng uhk oh pil meteikan me mie omw koasoandi kesempwal akan. Wiahda omw koasoandi kehlail me ke sohte pahn pwungki aramas teikan en wia mwomwitik de kalahiong uhk.—Sohp 31:1.
“Dadaurete Omw Peren Ong Lih Emen Me Ke Poakohng”
9. Irair dah kan me kin doadoahkpene oh kak tapihada ehupene kapw ieu en mwomwen mengei en wiawihda?
9 Pere mohngiong kin wehwe laudsang ihte ken kalekehkin uhk irair keper kan. En mwahukihda emen aramas tohrohr likin omw pwoud kak wia kilel ieu me ohl pwopwoud de lih pwopwoud emen sohte kin nsenohki anahn en ah pwoud. E kakete me lih pwopwoud ah pwoud sohte kin nsenohki oh tehk ih de ohl pwopwoud emen ah pwoud kin ahnsou koaros kauwe de kasohwe ah wiewia kan. Eri aramas tohrohr—nan wasahn doadoahk de pil nan mwomwohdisohn Kristian—pahn likamwete e kin mwahusang pein ah pwoudo. Eri paiahn tepida wiawi, oh ehupene kapw kin mengei en wiawihda. Mwekid rir pwukat me kin doadoahkpene kin kamehlelehda dahme Paipel mahsanih: “A aramas kin lelohng nan songosong sang ni pein eh ineng suwed eh kin kainangiong pein ih oh kahrehiong nan dihp.”—Seims 1:14.
10. Iaduwen ohl oh lih pwopwoud akan ar en katengepene arail ehupene?
10 Ohl oh lih pwopwoud en dehr rapahkihla likin ah pwopwoud pwehn kaitar ah ineng kan—ma ineng en limpoak, de utuht ahnsou apwal—ahpw ira en kin koadoahke pwe ira en katengepene irair en ehupene limpoak ieu nanpwungara. Eri, nantihong wiahda amwa ahnsou ong emenemen pwe kumwa en kak kerenpene. Kumwa en kin katamanda dahme kahrehda miehla limpoak nanpwungamwa nin tapio. Nantihong pwurehng kolodo pepehm en poakpoake me ke ahneki ong aramaso me wialahr omw pwoud. Tamanda ahnsou kaperen akan me kumwa kin ehukihpene. Kapakapkiong Koht apwal wet. Soun Melkahka Depit peki rehn Siohwa: “Maing Koht, komw ketin wiahiong ie ehu mohngiong mwakelekel, oh ketikihong nan kapehdiet ehu ngehn kapw oh loalopwoat.” (Melkahka 51:10) Koasoanehdi teng nan kapehdomw ken ‘Dadaurete omw peren ong lih emen me ke poakohng, erein omw mour me Koht ketikihong uhk nin sampah.’—Eklesiasdes 9:9.
11. Dahme kupwurokong, erpit, oh kehl en wehwehki kin wia pwehn kakehlakahla ehupenehn pwopwoud?
11 Ehu me aramas dehr mwamwahliki ohng kakehlailihala pepehm en pwopwoud iei en ese kesempwalpen kupwurokong, erpit, oh kak wehwehki. Lepin Padahk 24:3, 4 mahsanih: “Ihmw kan kin kokouda pohn poahsoan me poahsoanki kupwurokong oh dehdehki. Wasa me loalokong kin mi ie, pere kan kin audaudkihda dipwisou kesempwal oh lingan.” Nanpwung soahng kesempwal akan me kin wahdo peren ohng tohnihmw akan iei limpoak, loalopwoat, lahn Koht, oh pwoson. Pwe amwa emen en kak ahneki mepwukat e anahne ahneki kupwurokong en Koht. Pwopwoud akan, eri, en kesempwalki wia tohnsukuhl en Paipel. Oh ia kesempwalpen erpit oh kak wehwehki mehkan? Pwe aramas emen en kak powehdi kahpwal akan en ehu-ehu rahn uhdahn anahne erpit, oh kak doadoahngki loalokong sang nan iren Pwuhk Sarawi kan. Aramas emen me wehwe kin kak ese madamadau kan oh pepehm akan en ah pwoud. (Lepin Padahk 20:5) Siohwa doadoahngki Solomon oh mahsanih: “Samwa, tehk oh rong kanahieng ei kupwurokong oh erpit.”—Lepin Padahk 5:1.
Ahnsou En “Kahpwal”
12. Dahme kahrehda e sohte kapwuriamwei me pwopwoud akan pahn kin lelohng kahpwal akan?
12 Sohte pwopwoud ieu me unsek. Pil pein Paipel mahsanih me pwopwoud ieu pahn ahneki “kahpwal.” (1 Korint 7:28) Pwunod, soumwahu, lokolok, oh soahng teikan kak katauredi pwopwoud ieu. Ni apwal akan ar kin pwarada, kumwa anahne ehupene nin duwen pwopwoud lelepekpene ieu oh rapahkihda dahme pahn kaperenda Siohwa.
13. Ni soangen irair dah kan me pwopwoud ehu anahne tehk sapahl pein ira?
13 Iaduwen ma pwopwoud ieu pahn soansuwedda pwehki sang ni mwohmw akan me ira kin wiapene nanpwungara? Rapahkihda dahme pahn kamwahuwihala kin anahne doadoahk laud. Karasepe, mwein elen koasoakoasoipene lemei oh pwisirek kin miehla nanpwungara oh ira ahnla. (Lepin Padahk 12:18) Duwen me pwaradahr nan artikel en mwowe, me kak kauwehla pwopwoud. Mahsen loalokong en Paipel mahsanih: “Kousoan pohn pwelengen ihmw ehu mwahusang iang kousoan nan ihmw ehu me lih pwopwoud lokaia tohto men mihmi loale.” (Lepin Padahk 21:19) Ma kowe soangen lih pwopwoud wet, eri pein idek rehmw, ‘Mwomwei kat kin kahpwalihala ahi pwoud en kin patohdohng ie?’ Paipel padahkiong ohl pwopwoud akan mahsanih: “Kumwail ohl akan, kumwail en poakohng amwail pwoud kan, oh dehr lemeiong irail.” (Kolose 3:19) Ma kowe ohl pwopwoud emen, pein idek rehmw, ‘Mwomwen ahi wiewia ong ahi pwoud, kin wia kasongosong ieu en rapahkihla nsenamwahu wasa tohrohr?’ Mehlel me sohte kahrepe ieu me dipen kamwahl en wiahki mehkot konehng. Ahpw, pwehki soahng suwed wet a kak wiawi, iei me kahrehda e mwahu aramas en koasoia apwal akan me pid met ni sohte ekiek.
14, 15. Dahme kahrehda doula likin omw pwoud sohte wia elen kapwungala kahpwal akan nan pwopwoud?
14 Rapahkihla kansenamwahu en likin omw pwoud sohte wia pasapengpen kahpwal akan. Ia imwilahn soangen ehupene wet? E pahn wiahda irair en pwopwoud kapw oh mwahu? Ekei iei ar madamadau met. Irail kin nda, ‘Ahpw iei soangen aramas menet me I men wia ahi pwoud.’ Ahpw soangen madamadau wet me sapwung, pwe aramas soulipilipil emen me kin kesehla ah pwoud—de kangoangehkin uhk ken kesehla omw pwoud—ahneki kahpwal laud en sohte wauneki sarawi en pwopwoud. E sohte kak kasik me ara pahn uhd ehupene pahn wiahda pwopwoud mwahu ieu.
15 Mary, me koasoiepe wiawiher mwowe, medemedewe kanahieng imwilahn ah wiewia, iangahki ahl me ih de emen aramas tohrohr, Koht kakete sohla pahn poakohng. (Kalesia 6:7) E nda, “Nin doken ahi tepida kasakasawih ahi pepehm akan ohng iengen ahi pwoud tohndoadoahko, I diarada me ma ohl menet kakete alehda padahk mehlel, ngehi me pahn kauwehla. Wiewia sapwung pahn inenen kauwehla irail akan me pahn wia me sapwung oh pahn kadipekelekele meteikan!”—2 Korint 6:3.
Mehn Kangoang Keieu Kehlail
16. Ia ekei soahng me kin pwarada mwurin aramas emen a wiahda tiahk samin?
16 Paipel kalekehkin kitail mahsanih: “Kilin ewen lih keiru men pahn mem rasehng sukehn loangalap oh eh metik uhk pahn kansenamwahu rasehng lehn olip. Ahpw ni imwilah sohte mehkot me e pahn kihong uhk, ihte nsensuwed oh medek.” (Lepin Padahk 5:3, 4) Mwurimwurin wia dihp samin kamedek oh kak kemehla aramas. Met kin iangahki ohlahn nsen mwakelekel, soumwahu suwed akan, oh ohlahn pepehm en ahn aramas salelepeko ah pwoud. Ni mehlel met wia kahrepe ieu aramas en dehr pil lemehda wia mehkot me pahn kahrehda salelepek en pwopwoud.
17. Ia kahrepe me keieu kehlail me kitail en kolokolki lelepek en nan pwopwoud?
17 Me poahsoanehda kahrepen salelepek en pwopwoud oh wia mehkot sapwung, pwehki Siohwa, me tepin wiahda pwopwoud oh koasoanehdi wiepen tuhpene en paliwar, kalahdeki met. Ni ah ketin doadoahngki soukohp Malakai, E mahsanih: “I pahn ketido pwe I en kapwung kumwail, oh I pahn wia kadehde me pahn uhwong. . . irail me kin kamwahl.” (Malakai 3:5) Duwen kupwuren Siohwa, Lepin Padahk 5:21 mahsanih: “Kauno kin ketin mahsanih mehkoaros me ke kin wia. E kin ketin mwasamwasahn uhk wasa koaros me ke pahn kohla ie.” Ei, “sohte mehkot me kak rirsang silangin Koht. Mehkoaros nanleng oh sampah pokon kin sansal oh dehde mwohn silangi. Eri, kitail koaruhsie pahn wehkadahng ih atail wiewia kan.” (Ipru 4:13) Mehn kangoang me keieu laud oh lelepek en pwopwoud, iei wehwe sansal me sohte lipilipil ia wen rir en salelepek en pwopwoud wet, ia wen tikitik kahpwal akan me e wiahda, soangen wiewia samin sou lipilipil ieu kin kauwehla atail ehuong Siohwa.
18, 19. Dahme kitail koledihsang ahn Sosep ekspiriens me e wia rehn ahn Podipar ah pwoud?
18 Mehn kahlemeng mwahu en Sosep, me nein Seikop pahpa en keinek kan, kasalehda me ineng en kolokol meleilei ong Koht wia mehn kahlemeng keieu kehlail. Pwehki Podipar, emen nein Parao lapalap, ah poakepoakehla Sosep, e kihong ih pwukoah tohrohr ehu nan imweo. Sosep pil “menen paliwaramwahu oh masamwahu” oh ahn Podipar pwoud pil kilang. Rahn koaros, e kin song en kalowehdi Sosep, ahpw sohte pweida. Dahme wiahiong Sosep en powehdi ahn liho kin kasonge ih? Paipel mahsanih ong kitail: “Sosep sohte men dukiong, e ahpw ndaiong liho, ‘Ei soumas . . sohte irehdihsang ie mehkot, ihte komwi, eh pwoud, me e irehdihsang ie. Eri a, ia duwen ei pahn wiahda soangen sapwung laud wet, oh dipikihda mwohn Koht?’”—Senesis 39:1-12.
19 Sosep me kiripw kin kolokolete ah mwakelekel en wiewia, ni ah soikala en dehr wendi rehn ahn emen ohl tohrohr ah pwoud. Lepin Padahk 5:15 mahsanihong ohl pwopwoud akan, mahsanih “Loalopwoatohng omw pwoud oh kihong ih kelepw omw limpoak.” Kahrehda pein pereiukasang en mwahukihda emen aramas likin omw pwoud. Nantihong kakehlailihala kolokolpenehn limpoak nan omw pwopwoud, oh doadoahk laud en kapwungala kahpwal en pwopwoud soulipilipil akan me ke pahn loiong. Ni soangen irair koaros, “rapahki omw peren rehn serepein me ke pwoudiki.”—Lepin Padahk 5:18.
Dahme Ke Sukuhliki?
• Iaduwen ni ahn Kristian emen pahn sohte ese ahpw lohdiong nan lidip en mwahukihda emen tohrohr?
• Mehn kaweid dah kan me pahn kak sewese aramas emen en dehr mwahukihda aramas tohrohr likin ah pwoud?
• Ni aramas pwopwoud kan ahr pahn lel apwal akan, dahme ira pahn wia?
• Ia mehn kangoang keieu kehlail ong kolokol lelepek en pwopwoud?
[Kawehwehpen kilel kan nan ehu ehu pali 4]
Kansensuwed pwe wasahn doadoahk kak wiahla wasahn limpoak sapwung
[Kawehwehpen kilel kan nan ehu ehu pali 6]
‘Wasa me loalokong kin mi ie, pere kan kin audaudkihda mehkan me lingan’