Ahnsou Koaros Ale Sapwellimen Siohwa Kaiahn
“Ni ahnsou me KAUN-O pahn kapwunguhkala, . . . alehda nin duwen kehkehlik ehu.”—LEPIN PADAHK 3:11.
1. Dahme kahrehda kitail anahne ale sapwellimen Koht kaiahn?
NANMWARKI SOLOMON en Israel en mahs kihong emenemen kitail kahrepe mwahu ehu en ale kaiahn sang rehn Koht. Solomon mahsanih: “Samwa, ni ahnsou me KAUN-O pahn kapwunguhkala, rong kanahieng, oh alehda nin duwen kehkehlik ehu. KAUN-O kin ketin kapwungala irail kan me e kin ketin loalloale, duwehte sahm emen eh kin kapwungala nah pwutak me e kin suweiki.” (Lepin Padahk 3:11, 12) Ehi, Samamwail nanleng kin ketin kaiahnehda iuk pwehki e kin ketin poakohng iuk.
2. Ia wehwehn “kaiahn,” oh iaduwen emen pahn kak ale kaiahn?
2 “Kaiahn” kin wehwehki kalokepe, kapwung, kaweid, oh kasukuhl. Wahnpoaron Pohl ntingdi: “Kalokolok koaros likamwete kin kahrehiong kitail nsensuwed, kaidehk peren. Ahpw mwuhr, kalokolok kin kahrehda popohl oh mour pwung ong irail kan me kin ale.” (Ipru 12:11) En ale oh kapwaiada sapwellimen Koht kaiahn kak sewese iuk en idawehnla elen mour pwung oh kahrehiong iuk en karanih Koht sarawi, Siohwa. (Melkahka 99:5) Kapwung mwein ele pahn kohsang iengomw me pwoson kan, sang soahng kan me ke sukuhliki sang nan mihding en Kristian akan, oh sang ahmw onop en Mahsen en Koht oh sawaspen Paipel kan en “ladu lelepek oh loalokong.” (Luk 12:42-44) Ia uwen laud ahmw pahn kak kalahnganki ni ahmw kin diarada mehkot me ke anahne kapwungala! Ahpw soangen kaiahn dahieu me anahn ma dihp laud wiawi?
Dahme Kahrehda Ekei Kin Piskenla
3. Soangen ahnsou dahieu emen pahn piskenla?
3 Sapwellimen Koht ladu kan kin onop Paipel oh sawaspen Paipel en Kristian akan. Sapwellimen Siohwa koasoandi kan kin kohda nan arail mihding kan, oh kapokon kan. Kahrehda Kristian akan kin esehla dahme Siohwa kupwurki irail en wia. Emen tohnmwomwohdiso pahn piskenla ihte ma e wiahda dihp laud oh sohte koluhla.
4, 5. Mehnia karasepe en Paipel me pid piskenla me kohda wasaht, oh dahme kahrehda mwomwohdiso ale kaweid en kasapahldo ohlo?
4 Medewehla duwen karasepe ehu nan Paipel me pid duwen piskenla. Mwomwohdiso nan Korint kin mweidong “soangen tiahk me sohte pil kin wiawi rehn me rotorot akan; pwe dene mie . . . ohl emen me kin wendi rehn en eh pahpa eh pwoud.” Pohl padahkiong mehn Korint kan en “pangala aramas menen rehn Sehdan pwe en lokolok ni paliwere, pwe pali ngene en kak pitla” (1 Korint 5:1-5) Ni ahnsou me e piskenla oh pangala rehn Sehdan, me dipano pwurehng wiahla kisehn ahn Tepil sampah. (1 Sohn 5:19) Ah piskenla kihsang irair suwed en uduk sang nan mwomwohdiso oh pere sapwellimen Koht “ngehn,” de irair me kin kamwekid aramas akan.—2 Timoty 4:22; 1 Korint 5:11-13.
5 Mwohn ahnsou reirei dower powe, Pohl padahkiong Kristian akan nan Korint en kasapahldo me dipano. Pwekida? Pwe “Sehdan en dehr powehdi” irail nin duwen wahnpoarono koasoia. E sansal me dipano koluhlahr oh kamwakelehdahr ah mour. (2 Korint 2:8-11) Ma mehn Korint kan sohte kasapahldo ohl me koluhlahro, Sehdan pahn poweiraildi ni arail kin kasalehda irair kohte en lemei oh soh mahk nin duwen me Tepil men ren wia. Kitail kak kamehlele me irail mwadang “mahkohng oh sewesehda” ohl koluhlahro.—2 Korint 2:5-7.
6. Koasoandi en piskenla kak wahdo kamwahu dahieu?
6 Kamwahu dahieu kin wiawi sang koasoandi en piskenla? E kin kolokol sapwellimen Siohwa mwar sarawi sang kanamenek oh pere adamwahu en sapwellime aramas akan. (1 Piter 1:14-16) Kihsang me dipan me sohte koluhla sang nan mwomwohdiso kin utungada sapwellimen Koht koasoandi kan oh kolokol mwakelekel en mwomwohdiso ni pali ngehn. Oh pil mwein met pahn kak sewese me dipano me sohte koluhla en wehwehki uwen laud en dipeo.
Koluhla Kin Katepe
7. Ah sohte wehkada dipe kan kin kihong Depit soangen kahpwal dah kan?
7 Pali laud en irail me wiahda dihp laud kin koluhla mehlel oh sohte kin piskensang nan mwomwohdiso. Mehlel, ong ekei, e sohte mengei en koluhla mehlel. Medewehla duwen Nanmwarki en Israel Depit, me wiahda Melkahka irelaud 32. Koulo kasalehda me erein ahnsou kis Depit sohte wehkada dipe laud kan, iangahki dihp me e wiahda rehn Padsipa. Imwilahn met iei ah kapwunod laud duwen dipe kan kihsang ah kehl, duwehte karakar en ketipin kin kihsang pihl sang nan tuhke apwoat. Depit lokolongki ni pali war oh pali pepehm, ahpw ni ahnsou me e ‘wehkada dipe kan, Siohwa ketin mahkohng ih.’ (Melkahka 32:3-5) Eri Depit koulki:“Meid pai aramas me KAUN-O solahr ketin kapwukoahki dipe kan.” (Melkahka 32:1, 2) Ia uwen kansenamwahu en ale sapwellimen Koht mahk!
8, 9. Iaduwen koluhla kin sansalda, oh ia uwen kesempwal en met ong me pid duwen en me piskenlahro kasapahldo?
8 E sansal, me dipan men anahne koluhla ma e men ale mahk. Ahpw, pepehm en namenek oh masak dipe en sansalda kaidehn koluhla. “En koluhla” wehwehki “en wekidala ahn emen madamadau” me pid duwen wiewia sapwung, pwehki eh nsensuwedkihla dipeo. Emen me koluhla kin ahneki “mohngiong me ohlahr [NW]” oh men ‘kapwungala me sapwung’ ma e kak.—Melkahka 51:17; 2 Korint 7:11.
9 Koluhla wia mehkot me inenen kesempwal me pid duwen ahn emen kasapahldo nan mwomwohdiso. Emen me piskenlahr sohte kak kasapahldo nan mwomwohdiso ihte pwehki uwen reirei en ahnsou ehu me dower powe. Mwohn e kasapahldo, irair en ah mohngiong anahne uhdahn wekila. E anahne wehwehki uwen laud en dipe oh duwen eh kauwehla mwaren Siohwa oh eden mwomwohdiso. Me dipano anahne koluhla, kapakap ki mahk ni ngidingid, oh kapwungala ah wiewia kan en pahrekiong sapwellimen Koht kosonned pwung kan. Ni ahnsou me e peki en kasapahldo, e anahne kak kasalehda mehn kadehde me e koluhlahr oh e kin kasalehda “doadoahk kan me pahrekiong koluhla.”—Wiewia 26:20, NW.
Dahme Kahrehda en Wehkada Dihp?
10, 11. Dahme kahrehda kitail en dehr song en ekihla dihp?
10 Ekei me wiahda dihp mwein ele pahn medewe: ‘Ma I pahn padahkiong emen duwen dipei, mwein I pahn anahne sapeng peidek kanamenek kan oh I pahn piskenla. Ahpw ma I pahn nennenla, met sohte pahn wiawi oh sohte emen nan mwomwohdiso pahn ese duwen dipei.’ Soangen madamadau wet sohte kin medewe duwen ekei ire kesempwal kan. Ia ire pwukat?
11 Siohwa iei “Koht emen me diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel, . . . oh kin mahkohng me suwed kan oh me dipan akan.” Ahpw, e kin ketin kapwungala sapwellime aramas akan “ni pwung.” (Eksodus 34:6, 7; Seremaia 30:11) Ma ke wiahda dihp laud, iaduwen ke kak ale sapwellimen Koht mahk ma ke song en ekihla dipomw? Siohwa ketin mwahngih met, oh e sohte pahn ketin pohnsehse wiewia suwed kan.—Lepin Padahk 15:3; Apakuk 1:13.
12, 13. Imwila dahieu kak wiawi sang ahn emen song ekihla dipe?
12 Ma ke wiahda dihp laud, en wehkada kak sewese iuk en pwurehng ahneki nsen mwakelekel. (1 Timoty 1:18-20) Ahpw ahmw sohte wehkada pahn imwikihla saminlahn nsen mwakelekel oh met pahn kak kahrehiong iuk en kapataiong dihp tohto. Tamataman me dipomw kaidehn wiawi ohngete emen aramas de mwomwohdiso. E wiawi ong Koht. Sounmelkahkao koulki: “KAUN-O kin ketiket nan tehnpese sarawi; mwoale kin mi nanleng. E kin mahmahsanih aramas akan wasa koaros oh mwahngih dahme re kin wiewia. E kin ketin kasawih aramas mwahu oh me suwed kan koaros.”—Melkahka 11:4, 5.
13 Siohwa sohte pahn ketin kapaiada emen me kin ekihla dihp laud oh song en mihmi nan mwomwohdiso mwakelekel en Kristian. (Seims 4:6) Eri ma ke wiahda dihp oh men wiahda dahme pwung, dehr pweiek en wehkada ni mehlel. Ma ke sohte pahn wia met, ke pahn ahneki ohlahn nsen mwakelekel, keieu ni ahnsou me ke wadek de rong kaweid kan me pid duwen dihp laud me ke wiahdahr. Iaduwen ma Siohwa pahn ketikihsang rehmw sapwellime ngehn, duwehte e ketin wiaiong Nanmwarki Sohl? (1 Samuel 16:14) Pwehki Koht ketikihsang rehmw sapwellime ngehn, ke kak lohdi pahn dihp laud sang dihp me ke wiadahr.
Likih Riomw Brother Lelepek kan
14. Dahme kahrehda me dipan men anahne idawehnla kaweid en Seims 5:14, 15?
14 Eri, dahme me dipan men me koluhla anahne wia? “En ekerodo me mah kan en mwomwohdiso pwe re en kapakapki oh keiehki leh ni mwaren Kaun-o. Oh kapakap wet me pahn wiawi ni pwoson, pahn komourala me soumwahwo: Kaun-o pahn ketin kakehlahda.” (Seims 5:14, 15) En tuhwong elder kan wia ehu ahl ong emen en “kapwarehda tiahk kan me pahn kasalehda [ah] wiliakapwalahr.” (Madiu 3:8) Ohl pwukat me lelepek oh kadek pahn ‘kapakapki oh keiehki leh ni mwaren Siohwa.’ Duwehte leh me kansenamwahu, arail kaweid sang nan Paipel pahn kamweit aramas sohte lipilipil me koluhla mehlel.—Seremaia 8:22.
15, 16. Iaduwen Kristian elder kan kin idawehnla mehn kahlemeng me Koht kin ketin kasalehda, nin duwen me kileldi nan Esekiel 34:15, 16?
15 Ia uwen eh wia kahlemeng mwahu en limpoak me Silepatail, Siohwa, kasalehdahr ni ahnsou me e ketin kasaledekla mehn Suhs akan sang arail kalipilipala nan Papilon nan pahr 537 B.C.E. oh ni ahnsou me e kasaledekla Israel en ngehn sang “Papilon Lapalap” nan pahr 1919 C.E.! (Kaudiahl 17:3-5; Kalesia 6:16) Ih eri kapwaiada sapwellime inou wet: “Pein ngehi me pahn wia silepen nei pelin sihpw, oh I pahn kin rapahkihong irail wasahn ar kommoal . . . I pahn kin rapahki me salongalahr akan, kapwurehdo me kin kohkohseli mwahl akan, kidimpene ohlahn me lipwalipwada kan, kamwahwihala me soumwahu kan.”—Esekiel 34:15, 16.
16 Siohwa kamwenge sapwellime sihpw ni karasaras, kahrehiong irail en wonohn oh sohte perki mehkot, oh rapahki me salongalahr kan. Duwehte met, silepen sihpw Kristian akan kin tehk me Sapwellimen Koht sihpw kan kin ale mwengehn ngehn oh sohte mih nan irair en keper. Elder kan kin rapahki sihpw me salongalahr sang nan mwomwohdiso. Duwehte Koht kin ketin ‘kidimpene ohlahn me lipwalipwada men,’ sounapwalih kan kin “kidimpene” sihpw men me ohla pwehki ahn emen lokaia kan de pein ah wiewia kan. Oh duwehte Koht kin ketin ‘kamwahwihala me soumwahu,’ elder kan kin sewese irail me soumwahuda ni pali ngehn, mwein pwehki pein ah wiewia sapwung.
Iaduwen Silepen Sihpw kan Kin Kihda Sawas
17. Dahme kahrehda kitail en dehr pweiek sang en rapahki sawas en pali ngehn sang rehn elder kan?
17 Elder kan kin perenki kapwaiada kaweid wet: “Kasalehiong irail kalahngan [‘mahk,’ NW] ahpw ni amwail pahn masak.” (Sud 23) Ni arail lohdiong nan dihp me pid nsenen pwopwoud, ekei Kristian akan wiahdahr dihp laud. Ahpw ma re uhdahn koluhla, re kak kasik en ale mahk, epwel limpoak sang rehn elder kan me kin ngoangki sewese irail ni pali ngehn. Pohl kin koasoia duwen soangen ohl pwukat iangahki pein ih: “Se sohte kin wia amwail soumas kan duwen amwail pwoson, ahpw se kin wia iengemwail tohndoadoahk kan ong amwail peren.” (2 Korint 1:24, NW) Kahrehda, dehr pweiek sang en rapahki arail sawas en pali ngehn.
18. Iaduwen elder kan kin apwalih iengerail me pwoson akan me wiahda dihp?
18 Ma ke wiahda dihp laud, dahme kahrehda ke kak koapworopworki elder kan? Pwehki irail kin keieu wia silepe kan en sapwellimen Koht pelin sihpw kan. (1 Piter 5:1-4) Sohte silepe limpoak men kin kaloke sihpw peik men, me sengisengki eh ohla. Ni ahnsou me elder kan kin apwalih iengerail pwoson akan me wiahda dihp, re kin nsenohki kaidehn kalokepen diparail, ahpw dihp oh kamwahulahn pali ngehn ma met kak wiawi. (Seims 5:13-20) Elder kan anahne kadeik ni pwung oh “apwalih pelin sihpw ni kadek.” (Wiewia 20:29, 30, NW; Aiseia 32:1, 2) Duwehte Kristian teikan koaros, elder kan anahne kasalehda ‘me pwung, limpoak poatopoat, oh iang Koht kekeid ni karakarahk.’ (Maika 6:8) Soangen irair pwukat me kesempwal ni ahnsou me re pahn wiahda pilipil kan me pid mour oh doadoahk sarawi en “sapwellimen [Siohwa] pelin sihpw.”—Melkahka 100:3.
19. Ni soangen lamalam dahieu Kristian elder kan kin song en kapwungala emen?
19 Silepen Kristian akan kin idihdda ki ngehn sarawi oh song en mweidong ngehno en kahre irail. Ma emen “lohdiong nan sapwung ehu”—ni ah sohte mwasamwasahn—ohl kan me koahiek ni pali ngehn pahn song en “kapwungala [aramaso ni] kamantik.” (Kalesia 6:1; Wiewia 20:28) Ni mpahi ahpw kolokol sapwellimen Koht koasoandi kan, elder kan pahn song en kapwungala ah madamadau, duwehte toahkte nsenoh men kin kainenehla tih me tipw ni keneinei, pwehn dehr kahrehda nohk medek laud ahpw ni ahnsowohte kamwauihala kahpwalo. (Kolose 3:12) Pwehki arail pilipil en kasalehda mahk pahn poahsoankihda kapakap oh iren Paipel kan, pilipil en elder kan pahn kasalehda sapwellimen Koht madamadau duwen ire pwukat.—Madiu 18:18.
20. Ni soangen ahnsou dah kan pakair anahne wiawi ong mwomwohdiso me emen aleier kaweid?
20 Ma me tohto esehda duwen dihp de re pahn ese dihpo, e konehng pakair ong mwomwohdiso pahn wiawi pwehn pere eden mwomwohdiso. Pakair pil pahn wiawi ma mwomwohdiso anahne ese duwen ireo. Nan erein ahnsou me emen me ale kaweid sang judicial committee kin mwamwahula ni pali ngehn, e pahn duwehte emen me kin mwamwahula sang eh ohla, me keinapwihsang reh ekei wiewia kan. Nan erein ahnsoukis, e pahn mwahu ong me koluhlao en rong sang eh iang pasapeng nan mihding kan. Elder kan mwein ele pahn koasoanehdi emen en wia onop en Paipel reh pwehn kakehlailih wasa me e luwet pwe en pwurehng “kehlail nan pwoson.” (Taitus 2:2) Soahng pwukat koaros kin wiawi ni limpoak oh sohte kin wiawi pwehn kaloke me dipano.
21. Iaduwen elder kan pahn mwein ele apwalih ekei dihp kan?
21 Elder kan kak kihda sawas en pali ngehn ni ahl tohto. Karasepe, emen brother me ahneki kahpwal en sakau en wai mahs pwurehng nim sakau en wai nohk daulihla pak ehu de riau ni ahnsou me ih kelepw nan imweo. De mwein emen me wereila kesehlahr ah kin simoak sika pwurehng simoak pak ehu de riau ni ahnsou me ih kelepw pwehki ah luwet ni ahnsoukiste. Mendahki e kapakap oh kamehlele me Koht ketin mahkohng ih, e anahne rapahki sawas sang rehn emen elder pwe dipeo sohte pahn pwurepwurehng wiawi. Mwein elder emen de riemen kak apwalih ireo. Ahpw eldero (pwukat) pahn padahkiong presiding overseer, pwe mwein mie kahpwal teikan pil iang pidada.
Pousehlahte en Ale Sapwellimen Koht Kaiahn
22, 23. Dahme kahrehda ke anahne kaukaule ale sapwellimen Koht kaiahn?
22 Pwehn kenikenla rehn Koht, emen emen Kristian anahne tehk sapwellimen Siohwa kaiahn. (1 Timoty 5:20) Eri kapwaiada kaweid kan koaros me ke kin ale ni ahnsou me ke wia onop en Iren Paipel kan oh sawaspen Paipel en Kristian akan de ni ahnsou me ke rong kaweid me kohda nan mihding kan oh kapokon kan en sapwellimen Siohwa aramas akan. En tetehk omw kin wia kupwuren Siohwa. Eri, sapwellimen Koht kaiahn pahn sewese iuk en kolokol mehn perepen pali ngehn—mehn pelianda dihp duwehte kelen ihmw kehlail ehu.
23 En ale sapwellimen Koht kaiahn pahn kak sewese iuk en mih nan sapwellimen Koht limpoak. Mehlel, ekei piskensangehr nan mwomwohdiso en Kristian akan, ahpw met sohte anahne wiawiong iuk ma ke kin “kanahieng omw madamadau [‘mohngiong,’ NW]” oh ‘weweid nin duwen me loalokong men.’ (Lepin Padahk 4:23; Episos 5:15) Ma ke piskenla ni ahnsou wet, ke sou wia kahk kan pwehn kasapahldo? Koht kupwurki irail koaros me wiahda inou ong ih en kaudokiong ih ni lelepek oh ni “mohngiong peren.” (Deuderonomi 28:47) Ke kak wia met kohkohlahte ma ke pahn ahnsou koaros ale sapwellimen Siohwa kaiahn.—Melkahka 100:2.
Iaduwen Ke Pahn Sapeng?
• Dahme kahrehda ekei kin piskensang nan mwomwohdiso en Kristian?
• Dahme koluhla mehlel kin pidada?
• Dahme kahrehda emen anahne wehkada dihp laud?
• Ni ahl dahkei Kristian elder kan kin sewese me dipan akan me koluhla?
[Kawehwehpen kilel kan nan ehu ehu pali 12]
Dahme kahrehda wahnpoaron Pohl kadaralahng mehn Korint kan kaweid kan duwen koasoandi en piskenla?
[Kawehwehpen kilel kan nan ehu ehu pali 15]
Duwehte silepen sihpw en mahs akan, Kristian elder kan kin “kidimpene” sapwellimen Koht sihpw me ohlahr