“Rahn Lapalap En Sihowa Kerendohr”
“Rahn lapalap en Kauno kerendohr—kerendohr mehlel oh pahn mwadang leledo.”—SEPANAIA 1:14.
1, 2. (a) Rahn tohrohr dahieu me Kristian kan kin awiawih? (b) Peidek dah kan me kitail anahne idek oh pwekida?
LIH peren emen kin wie kasikasik rahn me e pahn kapwopwoudo en leledo. Nohno liseian emen kin ni limpoak kasikasik rahn me nah serio pahn naitikidi. Tohn doadoahk pwangada men kin men en lelehr ahnsou en ah pahn kommoal. Dahme irail pwukat kin ahneki me duwepenehte? Irail koaros kin kilikilangwohng rahn tohrohr ehu—rahn ehu me pahn kamwekid arail mour. Arail pepehm kan kin loal ahpw wekpeseng. Rahn me irail kin awiawih pahn leledo, oh ahnsou me e pahn leledo, irail kin koapworopworki me irail pahn kaunopada ohng rahno.
2 Kristian mehlel kan rahnwet pil kin kasikasik rahn tohrohr ehu. Met iei rahn “rahn lapalap en Siohwa.” (Aiseia 13:9; Soel 2:1; 2 Piter 3:12) Dahkot “rahn en Siohwa” me pahn leledo, oh iaduwen leledo en rahn wet pahn kamwekid aramas akan? Oh iaduwen kitail kak ese me kitail kaunopada ohng rahno? E kesempwal kitail en rapahki pasapeng en peidek pwukat met pwehki mehn kamehlel kan kasalehdahr duwen mehlelpen mahsen pwukat me sansalda nan Paipel: “Rahn lapalap en Siohwa kerendohr—kerendohr mehlel oh pahn mwadang leledo!”—Sepanaia 1:14.
“Rahn Lapalap en Siohwa”
3. Dahkot “rahn lapalap en Siohwa”?
3 Dahkot “rahn lapalap en Siohwa”? Nan iren Paipel kan, lokaia “rahn en Siohwa” kin wehwehki ahnsou tohrohr kan me Siohwa kin kadeikada sapwellime imwintihti kan oh kin kawahuihala mware lapalap. Irail mehn Suda oh Serusalem salelepek kan oh pil mehn Papilon oh Isip me kin uhwong kan kin lelohng ‘rahn akan en Siohwa’ ni arail kin lel kalokolok kan sang sapwellimen Siohwa kadeik. (Aiseia 2:1, 10-12; 13:1-6; Seremaia 46:7-10)Ahpw, “rahn keieu lapalap en Siohwa” saikinte leledo. Iei ih “rahn” me sapwellimen Siohwa kadeik pahn kauwehla irail akan me kin mwamwahleki mware. E pahn tepikihda ohlahn “Papilon Lapalap,” kaun en pelien lamalam likamw koaros, oh kasohrala en koasoandi suwed wet en mehkan me pahn ohla nan mahwen en Armakedon.—Kaudiahl 16:14, 16; 17:5, 15-17; 19:11-21.
4. Dahme kahrehda pali laud en aramas anahne masak rahn en Siohwa me pahn leledo?
4 Ma irail wehwehki de soh, ahpw pali laud en aramas anahne en masak rahno me pahn leledohr ni ahnsou keren. Pwekida? Ki soukohp Sepanaia, Siohwa mahsanih: “E pahn wia rahnen engieng ehu, rahnen kahpwal oh kansensuwed, rahnen ohla oh mwomwla, rahnen rotorot oh kapahtou, rahn mahliok depwekin.” Uhdahn kamasepwehk! Soukohpo doula mahsanih: “I pahn ketikihdo soangen kahpwal ehu ong aramas koaros . . .Re wiahdahr dihp ong ie.”—Sepanaia 1:15, 17.
5. Soangen lamalam en ehi dah me meh rar kei kin ahneki me pid sapwellimen Siohwa rahn oh pwekida?
5 Ni pali teio, aramas rar kei kin kasik ahnsou me rahn en Siohwa pahn leledo. Pwekida? Irail ese me met iei ahnsou en komourala oh doarehla ohng irail me pwung kan, rahn me pein Siohwa pahn lapalapala oh mware pahn sarawihla. (Soel 3:16, 17; Sepanaia 3:12-17) Duwen ma rahno pahn wia rahn ehu me aramas akan pahn masak de kasik, met uhdahn poasoanda pohn dahme aramas akan kin wia nan arail mour met. Iaduwen ahmw kin kilangwohng rahno me pahn kohdo? Ke kaunopada ohng met? Iaduwen, pwehki rahnen Siohwa kerendohr, met kin kamwekid ahmw mour en ehu-ehu rahn met?
“Aramas ekei Pahn Pwarodo oh Kepitkin Kumwail”
6. Iaduwen aramas tohto kin kilangwohng “rahn en Siohwa” oh dahme kahrehda Kristian mehlel kan rahnwet sohte kin pwuriamweiki met?
6 Mendahki karuwaru en irair wet, pali laud en tohnsampah kan sohte kin katapanki duwen kerendo en “rahn en Siohwa.” Irail kin kouruhrki oh kepitki irail kan me kin padahkiong irail duwen kerendo en rahno. Kristian mehlel kan sohte kin pwuriamweiki mepwukat. Irail kin tamanda kehkehlik en wahnpoaron Piter me kileldi: “Mwohn mehkoaros, kumwail en ese pwe ni imwin ahnsou kan aramas ekei pahn pwarodo me pahn kin kaweidki ar mour pein ar ineng suwed kan. Re pahn kin kepitkin kumwail, ndinda, “E soh inoukihong kumwail me e pahn pwurodo? Eri, ia ih? Samatail ko melahr, a mehkoaros duweduwehte sang nin tepin sampah eh wiawihda!””—2 Piter 3:3, 4.
7. Dahme pahn sewese kitail en kolokolete lamalam en karuwaru?
7 Dahme kak sewese kitail en liksang soangen lamalam en peikasal wet oh kolokolete atail lamalam en karuwaru? Piter ndaiong kitail: “I song en pangenkin kumwail lamalam mwakelekel kei ni ei katamankin kumwail soahng pwukat. Eri, kumwail tamanda mahsen en soukohp ako me wiawiher kawao oh kosonned en Kauno oh Sounkomour me amwail wahnpoaron ko kihong kumwail.” (2 Piter 3:1, 2) Atail kin tehk duwen kehkehlik kan nan kokohp kan pahn sewese kitail en ‘pangenda atail wasahn lamalam mwakelekel.’ Ele kitail kin pwurepwurehng rong duwen mehn kataman kan, ahpw e keieu kesempwal ahnsouwet sang mahs kitail en tehk mwahu kehkehlik pwukat.—Aiseia 34:1-4; Luhk 21:34-36.
8. Dahme kahrehda me tohto kin pohnsehse mehn kataman kan en Paipel?
8 Dahme kahrehda ekei kin pohnsehse mehn kataman pwukat? Piter doula nda: “Irail sohte kin men ese duwen Koht eh ketin mahsenier kawao, oh duwen nanleng oh sampah eh wiawihkihda mahseno, duwen sampah eh pwarada oh wiawihda sang pihl oh nan pihl, oh duwen eh ohkihla pihl kawao, iei pilen Nohlik Lapalapo.” (2 Piter 3:5, 6) Ehi, mie ekei me sohte kin men sapwellimen Siohwa rahno en leledo. Irail sohte men mehkot en kauwehla arail mour en ehu ehu rahn. Irail sohte men pwukoahki arail mour en roporop kan mwohn Siohwa! Nin duwen me Piter kasalehda, irail pahn mour nin duwen “irail sohte kin men ese.”
9. Soangen lamalam dah me sansalda sang rehn aramas akan ni mwein Noha oh Lohd?
9 Pwehki irail pein “sohte kin men ese,” soun kapailok pwukat kin pohnsehsehla me mahs Siohwa kamwekidada mour en aramas akan. Sises Krais oh Piter kin karasahiong ahnsou pwukat koaros—“rahn en Noha” oh “rahn en Lohd.” (Luhk 17:26-30; 2 Piter 2:5-9) Mwohn Nohliko, aramas sohte kin pohnese kehkehlik kan me Noha kihda. Duwehte met, mwohnte ohla en Sodom oh Komora, ohl riemen me pwoudiki nein Lohd serepein ko kin wiahki me Lohd “wie kamwakamwanohng ira.”—Senesis 19:14.
10. Iaduwen Siohwa kin ketin mwekidki irail akan me sohte kin mehn tetehk?
10 E pil duwehte rahnwet. Ahpw, tehk duwen sapwellimen Siohwa mwekid ohng irail akan me sohte kin wie tetehk: “I pahn kaloke aramas akan me koapworopworki pein irail oh sohte pwunodki mehkot, me kin mengmengiloalki, ‘Siohwa sohte kin ketin wia mehkot mwahu de suwed.’ Arail reken kepwe pahn kulsang oh imwarail kan pahn ohla. Re sohte pahn kousoan nan ihmw kan me re wiewia de nim wain sang ar mwetin wain me re padopadok.” (Sepanaia 1:12, 13) Aramas ele kin doula wia soahng kan me irail kin “kalapw” wia nan ehu ehu rahn, ahpw irail sohte pahn ale mehn kating poatopoat ehu sang arail doadoahk laud. Pwekida? Pwehki sapwellimen Siohwa rahno pahn leledo oh kepwehpwe kan koaros me irail alehdi sohte kak doareirailla.—Sepanaia 1:18.
“Wie Kaskasikte”
11. Kehkehlik dah kitail anahne en tamataman?
11 Weksang sampah suwed me kapilkitailpene, kitail anahne tamataman kehkehlik en soukohp Apakuk: “E saikinte lel ahnsou me e pahn wiawi. Ahpw e pahn mwadang leledo, oh dahme I pahn kasalehiong uhk pahn pweida. Mehnda ma e pahn pwand, ahpw awiawihte; pwe e pahn pweida ni ahnsawi; oh e sohte pahn pwand.” (Apakuk 2:3) Mehnda ma e pahn mwomwen pwand ohng kitail me kin lamalam soh unsek, kitail anahne en tamataman me Siohwa sohte kin pwand. Sapwellime rahn pahn kohdo ni ahnsawi, ahnsou ehu me aramas sohte pahn kasik.—Mark 13:33; 2 Piter 3:9, 10.
12. Kehkehlik dah me Sises ketikihda oh iaduwen met kin weksang wiewia en irail sapwellimen Sises me lelepek kan?
12 Pwe en kasalehda duwen kesempwal en kasikasik rahn en Siohwa, Sises mahsanih me pil ekei sapwellime kan pahn pil kesehla arail lamalam en karuwaru. E kohpada duwen irail mahsanih: “A ma papah suwed men ih, e pahn mengimengloalki, ‘Ei kaun pahn pwand en pwurodo,’ e ahpw pahn tepihada keme ienge papah teikan, oh patehng me kapehd en mwenge kan oh me kamam sakau kan. Kauno ahpw pahn pwurodo ehu rahn me papaho sohte lemeleme oh ahnsou me e sehse; e ahpw pahn pelepeseng oh katohrelahng rehn me mwalaun kan; wasa e pahn sengiseng ie oh ngih kan tehtehrek.” (Madiu 24:48-51) Weksang met, pwihn en ladu lelepek oh loalokong kan kin kolokolete arail lamalam en karuwaru. Irail pwihn en ladu wet kin tetehk oh kasalehda me irail kaunopada. Sises kasapwilirailda “pohn sapwellime dipwisou kan koaros” pohn sampah.—Madiu 24:42-47.
Anahn en Karuwaru
13. Iaduwen Sises kasalehda duwen anahn en ahneki lamalam en karuwaru?
13 E inenen kesempwal irail Kristian kan en senturi keieu en kolokolete arail lamalam en karuwaru. Irail anahne en mwadang tangasang Serusalem ni arail pahn kilang me “sounpei ko kapilpenehr kahnimwo.”(Luke 21:20, 21) Met wiawi nan pahr 66 C.E. Tehk iaduwen Sises kasalehda duwen Kristian kan arail anahne lamalam en karuwaru ni ahnsowo: “A aramas me mihmi pohn pweleng en imwe, e dehpa kohdiong ale mehkot sang loale pwe solahr ahnsou; oh me mihmi nan sapwe, e dehpa pwurodo ale eh likou puhp nan imwe.” (Madiu 24:17, 18) Pwehki poadoapoad kasalehda me Serusalem sohte ohla sounpar pahieu mwuri, eri dahme kahrehda Kristian kan anahne rong sapwellimen Sises mahsen me nohn karuwaru nan 66 C.E.?
14, 15. Dahme kahrehda e kesempwal ohng Kristian kan nan senturi keieu en mwadang mwekid ni arail pahn kilang sounpei kan pahn kapilpene Serusalem?
14 Mendahki e mehlel me sounpei en Rom kan sohte kauwehla Serusalem lao lel 70 C.E., e sohte meleilei erein sounpar pahieu pwukat. E inenen weksang met! Sounpar pwukat kin direki pei oh kakerehdi nta laud. Emen soun poadoapoad kawehwehda duwen irair en Serusalem erein ahnsowo nin duwen “mahwen me kin wiawi nanpwungen aramas akan nan wehi ehute me inenen kamasepwehk oh diren kakerehdi nta oh lemei laud.” Irail alehda mwahnakapw kan en kakehlailih arail pwihn en sounpei kan oh iang ale neirail dipwisou en mahwen. Irail kin sukuhl en mahwin rahn koaros. Ohng koaros me sohte men utungada met, aramas akan kin kilangwohng irail pwukat nin duwen soun pangala kei. Ma irail Kristian kan mihmihte ekis werei nan kahnimwo, irail pahn mihla nan keper inenen laud.—Madiu 26:52; Mark 12:17.
15 Tehk wasaht me Sises mahsanih me “irail nan Sudia,” kaidehn Serusalem kelehpw, me en tang. Met kesempwal pwe sounpwong keite mwurin arail pahn tangasang Serusalem, irail mehn Rom ako pwurehng pwurodo mahwen. Keieu, Kalili lohdi nan 67 C.E., oh mwuri Sudia pil lohdi nan sounpar mwurio. Met imwikihla nsensuwed laud nan wehio pwon. E pil apwalla ohng irail mehn Suhs kan en tangasang Serusalem. Kehl en kahnimwo silasildi, oh koaros me song en tang kin mwomwen me irail tangalahng rehn mehn Rom kan.
16. Soangen lamalam dah me irail Kristian akan nan senturi keieu anahne en ahneki pwe irail en kak komourala nan ahnsou apwalo?
16 Ni atail pahn medewe soahng pwukat koaros, kitail pahn kak wehwehki dahme kahrehda Sises kasalehda duwen kesempwal en karuwaru nan irair wet. Kristian kan pil anahne en men tounmetei, oh dehr mweidohng pein irail en pwupwudi pwehki kepwe kan. Irail anahne en uhdahn men “mweisang mehkoaros me [irail] ahneki” pwe irail en kapwaiada sapwellimen Sises kehkehlik. (Luk 14:33) Irail me mwadangete kapwaiada oh tangala ni pali teio en Sordan komourla.
Kolokol Atail Lamalam en Karuwaru
17. Dahme kahrehda kitail anahne en kakehlailihala atail lamalam en karuwaru?
17 Kokohp en Paipel kan kasalehda ni sansal me kitail miher ni imwin ahnsou. Laudsang mahs, kitail anahne en kakehlailihala atail lamalam en karuwaru. Sounpei men sohte kin pehm apwal oh keper en mahwin ahnsou me meleilei. Ahpw, ma e sohte pahn ahneki pepehm me e anahne pepehd oh pehmitik ahpw mwadangete kohla nan mahwin, e sohte pahn kaunopada oh e pahn imwila suwed. Met pil duwehte atail pali ngehn. Ma kitail pahn mweidohng atail lamalam en karuwaru en mehla, kitail ele sohte pahn kaunopada en doarehla pein kitail ni ahnsou me apwal pahn lel kitail oh kitail sohte pahn tehk ah rahn en Siohwa pahn leledo. (Luhk 21:36; 1 Deselonika 5:4) Ma mie me ‘sohpeisang oh sohla idawehn Siohwa,’ eri met ahnsou me irail anahne en pwurehng rapahki ih.—Sepanaia 1:3-6; 2 Deselonika 1:8, 9.
18, 19. Dahme pahn sewese kitail en kasikasik “sapwellimen Siohwa rahno”?
18 Ihme kahrehda wahnpoaron Piter kehkehlik ohng kitail en kasikasik “rahn en Siohwa”! Iaduwen atail pahn wia met? Ehu ahl iei en iang mourki “mour me kin mwakelekel oh kasarawihong Koht.” (2 Piter 3:11, 12) Ni atail pahn kin kedirepwki soahng pwukat, e pahn sewese kitail en kasikasik “rahn en Siohwa.” Lepin lokaia en Krihk kin kawehwehda “en kasikasik” e kin wehwehki “en kamwadangahla.” Kitail sohte kak kamwadangahla ahnsou me luhluhwe lao lel rahn en Siohwa. Ahpw, ni atail pahn kin awiawih rahno, ahnsou pahn mwomwen mwadang ma kitail pahn kin kedirepwki doadoahk en Koht.—1 Korint 15:58.
19 Doudouloale mahsen en Koht oh medemedewe duwen mehn kataman kan me kin dierek loale pahn kahrehiong kitail en wia met—“kasik” rahno, ei en “ahnsou koaros kasikasik” met.(2 Piter 3:12, The Amplified Bible; The New Testament, by William Barclay) Pil mie kokohp tohto me pwarada nan mehn kataman pwukat me kin kohpada kaidehn ihte duwen rahn en Siohwa ahpw pil duwen kapai tohto kan me irail me ‘kin kasik rahn en Siohwa’ pahn alehdi.—Sepanaia 3:8.
20. Kehkehlik dah kan me kitail anahne en kihong nan atail mohngiong?
20 Met iei ahnsou me kitail koaros anahne en medewe laud oh kihong nan atail mohngiong kehkehlik en soukohp Sepanaia: “Mwohn engieng en Siohwa eh pahn lelohng uhk, mwohn rahn me e pahn kasalehda sapwellime engieng laud. Kumwail sohpeiong Siohwa, kumwail me mpahi koaros en sahpwo, me kin peikiong sapwellime kosonned akan. Kumwail wiahda dahme pwung oh aktikitikla mwohn silangi. Mwein ele kumwail kak pitsang kalokolok en rahn me e pahn ketin kasalehda sapwellime engieng.”—Sepanaia 2:2, 3.
21. Ire kesempwal dahieu me irail sapwellimen Koht aramas pahn anahne tetehk oh medemedewe erein pahr 2007?
21 Eri ia uwen konehng en iren pahr me pilipilda ohng pahr 2007: “Rahn lapalap en Siohwa kerendohr.” Sapwellimen Siohwa aramas uhdahn kamehlele me e “kerendohr mehlel oh pahn mwadang leledo” (Sepanaia 1:14) “E sohte pahn pwand.” (Apakuk 2:3) Eri ni atail pahn awiawih rahno, kitail en ahnsou koaros pehmitik ohng ahnsou me kitail mihmi loale, oh tamataman me pweida en kokohp keieu mwuri kan pahn kereniongehr wiawi!
Ke Kak Sapeng?
• Dahkot “rahn lapalap en Siohwa”?
• Dahme kahrehda me tohto kin pohnsehsehla duwen karuwaru en ahnsouwet?
• Dahme kahrehda irail Kristian kan nan senturi keieu anahne en mwekid ni lamalam en karuwaru?
• Iaduwen atail kak kalaudehla atail lamalam en karuwaru?
[Kawehwehpen kilel kan nan ehu ehu pali 7]
Iren pahr en 2007 iei: “Rahn lapalap en Siohwa kerendohr”—Sepanaia 1:14.
[Kawehwehpen kilel kan nan ehu ehu pali 5]
Duwehte rahn en Noha, irail sounkepit kan pahn pwuriamwei ni ahnsou me Siohwa pahn mwekid
[Kawehwehpen kilel kan nan ehu ehu pali 6]
Kristian akan anahne mwadangete mwekid ni ahnsou me irail kilang “sounpei kan arail kapilpene” Serusalem