Sewese Meteikan En Peikiong Dahme Paipel Kin Padahngki
“A kisin werentuhke me pwupwudiong nan pwelmwahwo, wehwehki irail kan me kin rong, re ahpw katengehdi ong nan kapehdirail ni peik oh mwakelekel oh ni kanengamah, e lao kin wa mwahu rehrail.”—LUK 8:15.
1, 2. (a) Ong kahrepe dahieu pwuhken What Does the Bible Really Teach? wiawihda? (b) Nan sounpahr kerendohr kan, iaduwen Siohwa kin ketin kapaiada nanti en sapwellime aramas akan en katohnpadahk?
“PWUHKO uhdahn kaselel. Tohnsukuhl kan kin uhdahn perenki pwuhko. I uhdahn pil kin perenki pwuhko. Pwuhk wet kin sewese ie en tepida onop Paipel rehn aramas akan ni wenihmw en imwarail kan.” Ihme emen regular pioneer en Sounkadehdehn Siohwa kan koasoia duwen pwuhken What Does the Bible Really Teach? (Dahme Paipel Uhdahn Padahngki?)a Duwen pwuhkohte, emen sounkalohk en Wehio me mah koasoia: “I kin ahneki pwais en sewese aramas tohto en esehla Siohwa nan erein sounpahr 50 ni ahi kin kaukaule iang doadoahk en kalohk. Ahpw I men kasalehda me pwuhk wet uhdahn sikla. Lepin lokaia kansenamwahu kan oh kilel kan me kaperen.” Sounkalohk tohto nan sampah pwon kin ahneki soangen pepehmohte duwen pwuhken Bible Teach. Sawaspen Paipel wet wiawihda en sewese kitail en kapwaiada sapwellimen Sises kehkehlik: “Kohwei wasa koaros oh padahkiong tohn wehi kan koaros; pwe re en wiahla nei tohnpadahk, . . . kehkehlingkihong irail re en peikiong mehkoaros me I koasoanediong kumwail.”—Madiu 28:19, 20.
2 Ni soh peikasal, Siohwa kin ketin kupwurperenki en mahsanih duwen sapwellime sounkadehde wenerar wenelopw (6.6 million) ni arail kin perenki peikiong sapwellimen Sises kaweid en katohnpadahk. (Lepin Padahk 27:11) E sansal me Siohwa kin ketin kapaiada arail nanti. Karasepe, nan erein pahr 2005, rongamwahuo kin lohkseli nan sahpw 235 oh, tohtohsang onop en Paipel 6,061,500 kin wiawi. Pwehki met, aramas tohto ‘rongehr oh aleier mahseno, kaidehn nin duwen padahk en aramas, ahpw nin duwen mahsen en Koht.’ (1 Deselonika 2:13) Nan erein sounpahr riau me ahpwtehn neko, tohnpadahk kapw kan me tohtohsang elep en rar (half a million) koasoanehdier arail mour ong sapwellimen Siohwa koasoandi kan oh inoukihda pein irail ong Koht.
3. Soangen peidek dah kan me pid duwen pwuhken Bible Teach kitail pahn tehkpene nan artikel wet?
3 Mie pak ke ahneki peren en wia onop en Paipel rehn emen ni ahnsou kerendohr kan? Nin sampah pwon, mie aramas akan me kin ahneki ‘mohngiong mwahu oh pwung,’ oh ni ahnsou me re kin rong mahsen en Koht, re kin “katengehdi ong nan kapehdirail ni peik oh mwakelekel oh ni kanengamah, e lao kin wa mwahu rehrail.” (Luk 8:11-15) Kitail pahn tehkpene iaduwen atail pahn kak doadoahngki pwuhken Bible Teach nan doadoahk en katohnpadahk. Kitail pahn tehkpene iren peidek siluh: (1) Iaduwen kitail kak tepida ehu onop en Paipel? (2) Soangen wiepen kasukuhl dah kan pahn keieu pweida mwahu? (3) Iaduwen kitail kak sewese emen en wiahla kaidehn ihte tohnsukuhl men, ahpw emen sounpadahk en Mahsen en Koht, Paipel?
Iaduwen Kitail Kak Tepida Ehu Onop en Paipel
4. Dahme kahrehda ekei kin mwein pweieksang wia onop en Paipel, oh iaduwen kitail mwein kak sewese irail en powehdi arail pweiek?
4 Ma mie me ndahiong uhk ken lusuk palio pillap tehlap ehu, mwein ke sohte pahn wia. Ahpw iaduwen ma mie takai kan me ke kak sok powe pwe ken kak kotehla pillapo, mwein ke pahn men song kotehla. Duwehte met, mwein aramas men me soupisek pahn sohte men onop en Paipel. Mwein tohnihmwo pahn medemedewe me e anahne ahnsou laud oh doadoahk laud pwehn wia onop Paipel. Ia duwen atail pahn kak sewese ih en men onop Paipel? Sang ni atail pahn kaukaule wia koasoipene mwotomwot akan, ahpw kihda ire kesempwal kan, kitail kak doadoahngki pwuhken Bible Teach pwehn kainangihada aramaso en onop Mahsen en Koht kaukaule. Ma kitail pahn kaunopada mwahu, ehu ehu return visit rehn aramaso pahn duwehte takai pwukat nan pillapo me pahn sewese kakaranihala ih ong Siohwa.
5. Ma pwuhken Bible Teach mieier ni lokaia ehu me ke kak wehwehki, dahme kahrehda ke anahne wadek pwuhko?
5 Ahpw, mwohn soun kalohk men oh kak sewese emen aramas en kak paiekihda pwuhken Bible Teach, pein ih anahne esehla audepen pwuhko. Ehu pwopwoud wahda pwuhko ahnsou en kommoal en doadoahk oh tepida wadek pwuhko ahnsou me ira komkommoal ni oaroahr. Ni ahnsou me lih en netiki kepwe men ah keid limwahra, e kilangada oaralap en pwuhko me koasoia What Does the Bible Really Teach? Ih eri ndaiong pwopwoudo me awa keite mwowe, e kapakapki peidekohte, pekipeki rehn Koht pasapeng. Pwopwoudo perenkihda oh kihong liho ehu pwuhko. Ma pwuhko mieier ni lokaia ehu me ke kak wehwehki, ke kin ‘isaneki ahnsou mwahu koaros’ en wadek pwuhk wet?—Episos 5:15, 16
6, 7. Iaduwen kitail kak doadoahngki pwuhken Bible Teach pwehn tepida onop en Paipel kan?
6 Ni ahnsou me sounkalohk men kin kihla pwuhko nan doadoahk en kalohk nan wehi pokon, e mwahu doadoahngki kilel kan, iren Paipel kan, oh peidek kan nan pali 4, 5, oh 6. Karasepe, mwein kitail pahn kak tepikihda atail koasoiong aramas emen peidek wet, “Pwehki kahpwal tohto kin lelong tohnsampah rahnwet, iawasa ke lemeleme ke kak rapahki kaweid likilik kan?” Mwurin atail pahn rong kanahieng ahn tohnihmw pasapeng, kitail kak wadek 2 Timoty 3:16, 17, oh kawehwehda me Paipel kin kihda ehu ahl me kak uhdahn kamwahuiala kahpwal akan en tohnsampah. Mwurin mwo, kitail kak kahluwa madamadau en tohnihmwo ong pali 4 oh 5, oh idek: “Nanpwungen kahpwal akan me kileldi nan pali pwukat, mehnia kahpwal me kin keieu kansensuwedih komwi?” Ni ahnsou me tohnihmwo pahn pilada ehu, mwein kitail kak mweidong ih en kolokol pwuhko oh kitail pahn wadek iren Paipel me pid ireo sang nan neitail Paipel. Mwuri, kitail kak wadek pali 6, oh idek rehn tohnihmwo, “Sang peidek weneu me kileldi nan kaimwiseklahn pali wet, mehnia peidek me ke men sapengla?” Ni ahnsou me aramaso pahn pilada ehu rehrail, kitail ele pahn kasalehiong ih irelaud me pahn sapengla peideko, kihong ih pwuhko, oh wiahda koasoandi sansal pwe ken pwurehng pwurala reh oh koasoiaiong ih duwen peideko.
7 Padahk wet pahn reireiki mpen minit limau oh kowe kaimwisekla. Ahpw, nan erein minit pwukat, kitail pahn wehwehkihda madamadau en tohnihmwo, oh wadek oh doadoahngki iren Paipel riau, oh koasoanehdi koasoandi ong ehu return visit. Atail koasoi mwotomwot rehn tohnihmwo ele pahn wia mehkot me keieu kangoang oh pwe mwein kamweit reirei e sohte kin alehdi. Imwilahn met, aramas emen me soupisek pahn kak kasikasik en iang kitail erein minit kei ni atail kin sewese ih en ale pil ehu ewen kahk me pahn kahluwa ih lahng ‘wenihmw me kolahng mour.’ (Madiu 7:14) Lao, ma ahn tohnihmwo perenki rong pahn laudla, kitail ahpw pahn kak kareireila ahnsou en onopo. Met pahn wiawi ni atail pahn idek rehn aramaso ma atail onop kak ekis kareireila.
Wiepen Kasukuhl me Pahn Keieu Pweida Mwahu
8, 9. (a) Iaduwen kitail kak kaunopada atail tohnsukuhl en Paipel pwehn kesihnenda teng ong kasongosong kan me e pahn lelong? (b) Iawasa ke kak diar dipwisou kan me sohte kak mwasikala pwehn kauwada pwoson kehlail?
8 Ni ahnsou me emen pahn tepida idek dahme Paipel padahngki, e pahn lelong kahpwal kan me kak kerempwa ah kekeirada. Wahnpoaron Pohl koasoia: “Aramas koaros me men ahneki mour mwahu ni arail pahn miniminiong Krais Sises, re pahn ale kamakam.” (2 Timoty 3:12) Pohl kin kapahrekiong kahpwal pwukat rasehng kisiniei me pahn kauwehla dipwisou kan me sohte kehlail, ahpw sohte pahn kak kauwehla soangen dipwisou kan me duwehte kohl, silper, de takai kesempwal akan. (1 Korint 3:10-13; 1 Piter 1:6, 7) Pwehn sewese irail me kin onop Paipel en kakairada soangen irair kan me anahn pwehn kesihnenda teng ong ahnsoun kasongosong kan me mwein e pahn lelong, kitail anahne sewese ih sang ni atail pahn kauwakihda ih dipwisou kan me sohte kak mwasikala ni karasaras.
9 Sounmelkahka men kin karasahiong “sapwellimen KAUN-O inou kan [“mahsen kan,” NW]” ong “silper me kamwakeldahr pak isuh nan kisiniei mwehl.” (Melkahka 12:6) Ni mehlel, nan Paipel, mie soangen dipwisou kesempwal kan koaros me kak doadoahk pwehn wiahda pwoson kehlail. (Melkahka 19:7-11; Lepin Padahk 2:1-6) Oh pwuhken Bible Teach kin kasalehiong kitail iaduwen atail kak doadoahngki iren Paipel kan ni koahiek.
10. Iaduwen kitail kak kahre ahn tohnsukuhlo madamadau ong Paipel?
10 Nan erein onopo, kitail anahne kahluwa madamadau en tohnsukuhlo ong iren Paipel kan me mih nan ehuehu irelaud me kitail kin onopki. Kitail kak doadoahngki peidek kan pwehn sewese tohnsukuhlo en wehwehki iren Paipel kesempwal kan oh doadoahngki ire pwukat nan pein ah mour. Kitail anahne kanahieng en dehr padahkiong ih dahme e anahne wia. Kitail alasang sapwellimen Sises mehn kahlemeng. Ni ahnsou me ohl emen me samanih Kosonnedo peidek reh, Sises ketin sapeng: “Dahme ntinting nan Pwuhk Sarawi? Dahme Pwuhk Sarawi mahsanih?” Ohlo sapeng sang nan iren Paipel kan, oh Sises sewese ih en kilang iaduwen e kak doadoahngki mouren kosonnedo nan ah mour. Sang ni ah ketin doadoahngki karasaras ehu, Sises pil sewese ohlo en kilang iaduwen padahko anahne kamwekid ih. (Luk 10:25-37) Pwuhken Bible Teach kin audaudki karasaras mengei tohto me kitail kak doadoahngki pwehn sewese tohnsukuhl men en doadoahngki mouren iren Paipel kan nan pein ah mour.
11. Ia uwen laud en ire kan kitail anahne onopki ni ehu ehu onop?
11 Pwuhken Bible Teach kin doadoahngki lokaia mengei oh inen pwehn kawehwehda Mahsen en Koht, duwehte Sises me kin ketin kawehwehda padahk apwal kan ni mahsen mengei kan. (Madiu 7:28, 29) Kitail en idawehn sapwellime mehn kahlemeng. Kitail en kin kawehwe ire kan ni ahl mengei, sansal, oh pwung. Kitail en dehr karuwaru en onopki audepen pwuhko. Ahpw, kitail anahne mweidohng irair oh koahiek en tohnsukuhlo pwehn koasoanehdi parakrap depe kitail en onopki nan erein ehu ehu onop. Sises mwahngih uwen laud me sapwellime tohnpadahk kan kak wehwehki oh sohte kin padahkiong irail ire kan laud sang dahme re anahne ni ahnsowo.—Sohn 16:12.
12. Iaduwen kitail anahne doadoahngki appendix?
12 Nan pwuhken Bible Teach, mie appendix me kin audaudki oaralap 14. Poahsoankihda anahn akan en tohnsukuhlo, kitail, nin duwen ah sounpadahk, kak koasoanehdi iaduwen atail kak doadoahngki ire pwukat ni ahl me keieu mwahu. Karasepe, ma emen tohnsukuhl pehm me e sohte kak wehwehki oaralap ehu de mie ah peidek kan me pid duwen ire tohrohr kan pwehki dahme e kin kamehlele mahs, mwein e pahn mwahu en kasalehiong oaralap me mih nan appendix oh mweidong ih en pein medemedewe duwen oaralapo. Ni pali teieu, anahn en tohnsukuhlo mwein ele pahn kasalehda me kitail anahne iang ih wadek ireo. Apendix kin audaudki oaralap kesempwal en iren Paipel kan, duwehte “‘Soul’ and ‘Spirit’—What Do These Terms Really Mean? (‘Soul’ oh ‘Ngehn’—Ia Uhdahn Wehwehn Lepin Lokaia Pwukat?)” oh “Identifying ‘Babylon the Great’ (Kasawihada Dahkot ‘Papilon Lapalap’).” Mwein kitail men koasoiaiong tohnsukuhlo duwen oaralap pwukat. Pwehki sohte peidek ong oaralap pwukat nan appendix, kitail pahn anahne esehla audepe kan pwe kitail en kak wiahda peidek mwahu kan.
13. Iaduwen kapakap kin kakehle pwoson?
13 Melkahka 127:1 mahsanih: “Ma KAUN-O sohte ketin kauwada ihmwo, doadoahk en sounkou ihmw kan sohte pahn katepe.” Kahrehda, ni ahnsou me kitail pahn kaunopohng wia onop en Paipel, kitail anahne kapakapki sapwellimen Siohwa sawas. Kitail men kasalehda atail nanpwung mwahu rehn Siohwa sang ni dahme kitail pahn koasoia nin tepin atail kapakap oh kaimwiseklahn kapakap en ehu ehu onop. Kitail anahne kangoangeki tohnsukuhlo en kapakapkiong Siohwa en ketikihdo erpit en wehwehki Sapwellime Mahsen oh kehl en kapwaiada eh kaweid kan. (Seims 1:5) Ma e pahn wia met, tohnsukuhlo pahn kak ale kehl en dadaurete pahn kahpwal kan oh pousehla ah kekeirada nan pwoson.
Sewese Tohnsukuhl en Paipel kan en Wiahla Sounpadahk kan
14. Soangen kekeirada dahieu tohnsukuhl en Paipel kan anahne wiahda?
14 Pwe atail tohnsukuhl en Paipel kan en peikiong “mehkoaros” me Sises kehkehlikihong sapwellime tohnpadahk kan, re anahne kekeirada oh wiahla sounpadahk en Mahsen en Koht ekei. (Madiu 28:19, 20; Wiewia 1:6-8) Dahme kitail kak wia pwehn sewese emen tohnsukuhl en wiahda soangen kekeiradahn pali ngehn wet?
15. Dahme kahrehda kitail anahne kangoange atail tohnsukuhl en Paipel en iang towehda mihding en Kristian akan?
15 Sangete ni tepin onop, kitail anahne luhke tohnsukuhlo en iang kitail towehda mihding kan. Kitail anahne kawehwehiong ih me sang nan atail mihding kan, kitail kin ale kaiahn nin duwen sounpadahk kan en Mahsen en Koht. Nan erein wihk kei, kitail kak doadoahngki minit kei ni kaimwiseklahn ehu ehu onop en Paipel pwehn kawehwehda mwomwen prokram en kaweid en pali ngehn me kitail kin ale sang nan soahng soangen mihding kan oh kapokon kan. Kitail anahne ngoangki koasoia duwen kamwahu kan me kitail kin ale sang soangen ahnsou pwukat. (Ipru 10:24, 25) Ma tohnsukuhlo pahn tepida kaukaule iang towehda mihding kan, e pahn wiahla emen sounpadahk en Mahsen en Koht.
16, 17. Soangen mehn akadei dah kan me tohnsukuhl en Paipel men kak wiahda oh lel?
16 Kitail anahne sewese tohnsukuhl en Paipel kan en wiahda mehn akadei kan me e kak lel. Karasepe, kitail kak kangoange ih en ehukihong kompoakepah de ah peneinei dahme e kin sukuhliki. Oh pil, kitail kak kangoange ih en wiahda mehn akadei en wadek Paipel pwon. Ma kitail kak sewese ih en wiahda oh kolokol koasoandi en wadawad en Paipel kaukaule, met pahn wia kamwahu ehu ong ih ong ahnsou reirei mwurin ah papidaisla. Kapataiong met, kitail kak kangoange tohnsukuhlo en wiahda mehn akadei en tamanda ehu iren Paipel me kak sapengki ehu peidek kesempwal sang ehu ehu irelaud en pwuhken Bible Teach. Ni ah pahn wia met, e pahn wiahla “soundoadoahk men me sohte kin namenengki eh doadoahk, me kin padahkihong aramas akan mahsen en Koht ni mehlel.”—2 Timoty 2:15.
17 E pahn mwahu en kangoange tohnsukuhl men en kawehwe duwen iren Paipel kan me e pahn doadoahngki ni ahnsou me e pahn sapeng irail kan me pahn idek reh kahrepen ah pwoson. Met pahn mwahu sang ah pahn ndahte iren Paipel kan me e wadlikihla de mouren iren Paipel pwukat. Praktis mwotomwot mwein pahn kak wia sawas, ni atail pahn wia ah peneinei de ienge tohndoadoahk me pahn idek reh ia kahrepe ah kin kamehlele ekei padahk kan. Ni ahnsou me e pahn sapeng, kitail kak kasalehong ih iaduwen e kak sapeng ni “mpahi oh wahu.”—1 Piter 3:15, NW.
18. Ni ahnsou me tohnsukuhl en Paipel men kakehr wia sounkalohk men me saikinte papidaisla, pil soangen sawas dah kan kitail kak kihong ih?
18 Kedekedeo, tohnsukuhlo mwein ele pahn kakehr iang doadoahk en kalohk. Kitail anahne kasalehda me e wia pwais ehu en ale mweimwei en iang doadoahk wet. (2 Korint 4:1, 7) Ma elder kan koasoanehdi me tohnsukuhlo kakehr wia sounkalohk men me saikinte papidaisla, kitail anahne sewese ih en kaunopada padahk mengei ehu oh iang ih nan doadoahk en kalohk. Kitail anahne kaukaule iang ih nan soahng soangen elen doadoahk en kalohk kan en wehi pokon, oh anahne padahkiong ih iaduwen e kak kaunopada oh wia return visit kan me pahn pweida mwahu. Pein atail mehn kahlemeng mwahu pahn kamwekid ih.—Luk 6:40.
“Doarehla Pein Kowe oh Irail kan me Kin Rong Uhk”
19, 20. Soangen mehn akadei dahieu kitail anahne ahneki, oh pwekida?
19 Ni soh peikasal, e wia doadoahk laud en sewese emen en “marainkihla me mehlel.” (1 Timoty 2:4) Ahpw, sohte peren tohto mie nan mour me kak pahrekiong peren en sewese emen en peikiong dahme Paipel kin padahngki. (1 Deselonika 2:19, 20). Ni mehlel, kitail ahneki pwais kaselel en wia “tohndoadoahk kei me kin iang Koht” nan doadoahk en kalohk wet me kin wiawi nin sampah pwon!—1 Korint 3:9.
20 Sang ni ah ketin doadoahngki Sises Krais oh tohnleng kehlail kan, ni ahnsou keren, Siohwa pahn ketin kadeikada irail kan “me pohnsehse Koht oh irail kan me sohte kin peikiong Rongamwahu en Kaun Sises.” (2 Deselonika 1:6-8) Mour en aramas akan kin mih nan keper. Ke kak wia ahmw mehn akadei en wia ehu onop en Paipel? Ni ahmw kin iang doadoahk wet, ke pahn ahneki ahnsou mwahu en “doarehla pein kowe oh pil irail kan me kin rong uhk.” (1 Timoty 4:16) Met laud sang mahs, e inenen karuwaru kitail en anahne sewese meteikan en peikiong dahme Paipel kin padahngki.
[Nting tikitik me mi pah]
a Sounkadehdehn Siohwa kan me wiahda.
Dahme Ke Sukuhliki?
• Pwuhken Bible Teach wiawihda ong kahrepe dahieu?
• Iaduwen kitail kak tepida onop en Paipel kan ni atail kin doadoahngki pwuhken Bible Teach?
• Soangen wiepen kasukuhl dah kan pahn keieu pweida mwahu?
• Iaduwen kitail kak sewese tohnsukuhl men en wiahla emen sounpadahk en Mahsen en Koht?
[Kawehwehpen kilel kan nan ehu ehu pali 12]
Kitail kin doadoahngki pwuhk wet?
[Kawehwehpen kilel kan nan ehu ehu pali 13]
Koasoipene mwotomwot ehu kak kamwekid emen en men loalokongkihla Paipel
[Kawehwehpen kilel kan nan ehu ehu pali 15]
Dahme kitail kak wia pwehn kahre madamadau en tohnsukuhlo ong Paipel?
[Kawehwehpen kilel kan nan ehu ehu pali 16]
Sewese tohnsukuhl en Paipel en kekeirada