Padahngki Dahme Paipel Uhdahn Padahngki
“Padahkiong tohn wehi kan koaros; pwe re en wiahla nei tohnpadahk.”—MADIU 28:19, 20.
1. Dahme kitail kak nda duwen uwen tohtohn aramas akan me kak naineki Paipel?
MAHSEN EN SIOHWA, Pwuhk Sarawi, iei ehu pwuhk me keieu werei oh pil keieu tohto me kohseli nan sampah. Kisehn pwuhk wet kin kawehwehdiong nan lokaia tohto sang 2,300. Tohto sang persent 90 en aramas akan me kin mihmi pohn sampah kak naineki Paipel ni pein arail lokaia kan.
2, 3. (a) Dahme kahrehda mie pingiping duwen padahk en Paipel kan? (b) Peidek dah kan kitail pahn tehkpene?
2 Aramas rar kei kin wadek Paipel rahn koaros. Ekei wadekier Paipel pwon pak tohto. Pwihn en pelien lamalam kid kei kin kose me arail padahk kin poahsoankihda Paipel, ahpw re sohte kin pwungkihpene duwen dahme e padahngki. Patehng met, pil nan pelien lamalam tehieu kin mie irair en sohte wehwehpenen padahk kan. Ekei kin peikasalki Paipel, mwomwen ah wiawihda, oh katepe. Me tohto kin wiahki pwuhk wet pwuhk sarawi ehu ongete soangen ahnsou en wiahda inou kan de kahukihla me re pahn koasoi mehlel nan mwoalen kopwung.
3 Ni mehlel, sapwellimen Koht mahsen kehlail, de padahk, ong tohnsampah kin mihmi nan Paipel. (Ipru 4:12) Eri, nin duwen Sounkadehdehn Siohwa kan, kitail men aramas akan en sukuhliki dahme Paipel padahngki. Kitail kin perenki kapwaiada pwukoa ieu me Sises Krais ketikihong sapwellime tohnpadahk kan ni ahnsou me e mahsanih: “Kohwei . . . oh padahkiong tohn wehi kan koaros; pwe re en wiahla nei tohnpadahk.” (Madiu 28:19, 20) Nan atail doadoahk en kalohk en wehi pokon, kitail kin diarada aramas mehlel kan me kin pahtouki pingiping laud nan pelien lamalam kan nan sampah. Re men ese padahk mehlel duwen Sounkapikpatail oh men sukuhliki dahme Paipel mahsanih duwen wehwehn mour. Nna, kitail pahn tehkpene peidek siluh me aramas tohto kin nsenohki. Ong ehu ehu peidek, kitail pahn tehk dahme kaunen pelien lamalam kan kin nda ni sapwung, oh mwuri, kitail pahn kousapahlih dahme Paipel uhdahn padahngki. Peidek pwukat iei: (1) Koht kin ketin nsenohki kitail? (2) Dahme kitail mihmiehki pohn sampah? (3) Dahme pahn wiawiong kitail ni ahnsou me kitail mehla?
Koht Kin Ketin Nsenohki?
4, 5. Dahme kahrehda aramas akan kin lemeleme me Koht sohte kin ketin nsenohki kitail?
4 Kitail pahn tepikihda peideko, Koht kin ketin nsenohki kitail? Me kapahtou, aramas tohto kin lemeleme me pasapengpen peideko iei soh. Dahme kahrehda re kin ahneki soangen pepehm wet? Ehu kahrepe iei re kin momour nan sampah me dirkihla kailok, mahwen, oh lokolok. Re lemeleme ‘ma Koht kin uhdahn ketin nsenohki, e pahn uhdahn ketin irehsang soangen wiewia kansensuwed pwukat en wiawi.’
5 Pil ehu kahrepe me aramas akan kin lemelemeki me Koht sohte kin ketin nsenohki kitail iei pwehki kaunen pelien lamalam kan me kin kahrehiong irail en ahneki soangen pepehm wet. Dahme kaunen pelien lamalam kan kin kalapw nda ni ahnsou me soahng kansensuwed kan kin wiawi? Ni ahnsou me nein emen lih seri tikitik riemen mehkihla aksident en sidohsa, ah kaunen pelien lamalam nda: “Met kupwuren Koht. Koht ketin anahne tohnleng riemeno.” Ni ahnsou me kaunen palien lamalam kan kin nda soangen koasoi pwukat, ni mehlel, re kin kapwukoahki Koht soahng suwed kan me kin wiawi. Ahpw, tohnpadahk Seims ntingihdi: “Mehmen me lelohng nan songosong pwehki apwal me kohiengehr en dehr nda me, ‘Kasongosong wet sang rehn Koht.’ Pwe sohte me suwed kot kak kasongosonge Koht, oh pein Koht sohte kin kasongosonge aramas.” (Seims 1:13) Siohwa Koht sohte mwahn pahn ketin kahrehda me suwed en wiawi. Ni mehlel, “Koht mehlel sohte kak wiahda me suwed.”—Sohp 34:10, NW.
6. Ihs me kin kahrehda me suwed oh lokolok nan sampah wet?
6 Eri, dahme kahrehda me suwed tohto oh lokolok tohto kin miehki? Ehu kahrepe iei pwehki pali laud en tohnsampah kin soikala Koht nin duwen Kaun, re sohte men peikiong sapwellime kosonned pwung kan oh mouren kosonned kan. Aramas akan sohte kin ese me re kin peikiong Imwintihtien Koht, Sehdan, pwe “sampah unsek mi pahn manaman en Me Suwedo.” (1 Sohn 5:19) En wehwehki duwen ire wet kin kamengeila en wehwehki dahme kahrehda irair suwed kin mihmihte. Sehdan kin suwed, diren kailok, piht, oh lemei. Kahrehda kitail anahne kasik me sampah wet pahn kasalehda irair en ah kaun. Ihme kahrehda me suwed tohto mie!
7. Ia ekei kahrepe kan ong lokolok me kitail kin lelong?
7 Soh unsek en tohnsampah pil wia ehu kahrepe ong lokolok me kitail kin lelong. Aramas dipan akan kin song en ahneki manaman en kaunda, oh met kin kalapw imwikihla mahwen kan, kaunda lemei, oh lokolok. Eklesiasdes 8:9 kin mahsanih: “Ekei aramas ahneki manaman, a ekei kin wie lokolok pahn ar manaman.” Pil ehu kahrepe ong lokolok iei “paisuwed kin lelohng aramas koaruhsie.” (Eklesiasdes 9:11) Aramas akan kin kalapw lelong kahpwal kan pwehki re mihmi nan wasa kan me kahpwal kan wiawi.
8, 9. Iaduwen kitail kin ese me Koht kin ketin uhdahn nsenohki kitail?
8 E kin kansenamwahu en sukuhliki me Siohwa sohte kin ketin kahrehda lokolok kan. Ahpw Koht kin ketin uhdahn nsenohki dahme kin wiawi nan atail mour? Pasapeng kaperen iei ehi! Kitail ese me Siohwa kin ketin nsenohki pwe sapwellime Mahsen en kin padahkiong kitail dahme kahrehda e kin ketin mweidong aramas akan en idawehnla ahl sapwung. Kahrepe kan me Koht sapwellimaniki kin pid ire riau: sapwellime kaunda oh lelepek en aramas akan. Pwehki e wia Sounkapikada Lapalapo, Siohwa sohte anahne padahkiong kitail dahme kahrehda e kin ketin mweidong lokolok. Ahpw, e kin ketin padahkiong kitail pwe e kin ketin nsenohki kitail.
9 Medewehla pil ehu mehn kadehde me Koht kin ketin nsenohki kitail. E ketin “toutoukihla” ni ahnsou me sampah dirkihla me suwed ni mwehin Noha. (Senesis 6:5, 6) Sapwellimen Koht pepehm weksang rahnwet? Soh, pwe e sohte kin ketin wekila. (Malakai 3:6) E kin ketin kalahdeki kopwung sapwung oh kupwur suwedkihla mahsanih lokolok en aramas akan. Paipel kin padahngki me Koht pahn kereniong ketikihsang imwila suwed kan en kaundahn aramas oh manaman en Sehdan. Met sou kin kadehde mwahu me Koht kin ketin nsenohki kitail?
10. Iaduwen Siohwa kin ketin pehm duwen lokolok en tohnsampah?
10 Kaunen pelien lamalam kan kin padahngki me sapwung duwen Koht ni ahnsou me re kin nda me kahpwal kan me kitail kin lelong iei kupwure. Weksang met, Siohwa kupwurki en ketikihweisang lokolok en tohnsampah. 1 Piter 5:7 mahsanih, “Eh kin ketin apwahpwalih kumwail.” Ih met dahme Paipel kin uhdahn padahngki!
Dahme Kitail Mihmiehki Pohn Sampah?
11. Dahme pelien lamalam en sampah kan kin kalapw nda duwen mour en aramas pohn sampah?
11 Na, kitail pahn medewehla keriaun peidek me aramas tohto kin pwonopwonki, Dahme kitail mihmiehki pohn sampah? Pelien lamalam en sampah wet kin kalapw sapeng me aramas kin mihmi pohn sampah ohngete lepin ahnsou. Irail kin kose me sampah wia wasa me kitail pahn mihmihki erein ahnsoukiste, de e wia ewen kahk ehu doula nan mour nan ehu wasa tohrohr. Ekei kaunen pelien lamalam kan kin padahngki padahk likamw me dene Koht pahn kasohrehla sampah wet ehu rahn. Pwehki soangen padahk pwukat, aramas tohto kin lemeleme me e pahn mwahu en ale uwen me re kak nan erein arail mour pwe mehlahte me awiawih irail. Dahme Paipel kin uhdahn padahngki duwen dahme kitail mihmiehki pohn sampah?
12-14. Dahme Paipel padahngki duwen kupwuren Koht ong sampah oh tohnsampah?
12 Koht sapwellimaniki kupwur kaselel ehu ong sampah oh tohnsampah. E “sohte ketin wiahda [sampah] ni mwomwen sapwtehn ehu” ahpw “ni mwomwen wasa mwahu ong aramas en kousoan ie.” (Aiseia 45:18) Kapatahiong met, Siohwa “ketin koasoanehdi teng sampah pohn poahsoane, oh e sohte mwahn pahn mwekid kohkohlahte.” (Melkahka 104:5) En sukuhliki soahng pwukat duwen kupwuren Koht ong sampah oh tohnsampah kak sewese kitail en wehwehki dahme kitail mihmiehki pohn sampah.
13 Senesis irelaud 1 oh 2 kin kasalehda me Siohwa ketin kasalehda nsenoh laud pwehn kaunopada sampah ong aramas akan en kousoan. Ni kaimwiseklahn erein ahnsou ehu en kapikada soahng kan pohn sampah, “Koht eri inenen kupwurperenkihda” soahng pwukat koaros. (Senesis 1:31) Koht ketin pwilikihdi tepin ohl oh lih, Adam oh Ihp, nan mwetuwel kaselel en Ihden oh ketikihong ira reken mwenge. Koht mahsanihong tepin pwopwoudo:“Kumwa kaparaparala pwe kadaudokamwa kan pahn kousoanla wasa koaros nin sampah oh kaunda mehkoaros.” Ira pahn naineki seri unsek kan, kalaudehla irepen arail mwetuwel lel sampah pwon, oh kaunda mahn akan ni elen limpoak.—Senesis 1:26-28.
14 Met kupwuren Siohwa iei en sapwellimaniki tohn sampah nin duwen peneinei unsek ehu pwehn kousoan pohn sampah kohkohlahte. Mahsen en Koht mahsanih: “Me pwung kan pahn koukousoan nan sahpwo oh re pahn sapwenikihla kohkohlahte.” (Melkahka 37:29) Ehi, tohnsampah pahn paieki mour soutuk nan Paradais pohn sampah. Ih kupwuren Koht, oh ih me dahme Paipel kin uhdahn padahngki!
Dahme Pahn Wiawiong Kitail ni Ahnsou me Kitail Mehla?
15. Dahme pali laud en pelien lamalam kan en sampah kin padahngki duwen dahme pahn wiawiong kitail ni ahnsou me kitail mehla?
15 Ni ahnsouwet kitail pahn tehkpene kesiluh en peidek me aramas tohto kin pwonopwonki: Dahme pahn wiawiong kitail ni ahnsou me kitail mehla? Pali laud en pelien lamalam en sampah kin padahngki me mehkot me mih nan loalen aramas men pahn pousehla en momour mwurin paliwereo mehla. Ekei pwihn en pelien lamalam kan kin kolokolete soangen madamadau me Koht kin ketin kaloke me suwed kan sang ni ah kin ketin kahrehiong irail en lokolongki kalokolok soutuk nan kisiniei nan ehl. Ahpw met uhdahn mehlel? Dahme Paipel kin uhdahn padahngki duwen mehla?
16, 17. Nin duwen Paipel, ia irair en me mehlahr?
16 Mahsen en Koht mahsanih: “Me momour kan ese me re pahn mehla, ahpw me melahr akan sohte ese mehkot. Solahr keting ehu pahn kohieng irail.” Pwehki me mehlahr akan “sohte ese mehkot,” re sohte kak rong, kilang, lokaia, pehm, de medewe mehkot. Irail sohlahr kak ale pweinen doadoahk. Iaduwen re kak ale? Irail sohlahr kak wia doadoahk! Kapatahiong met, “arail limpoak, kailok, oh ineng en nan kapehdirail, iang irail mehla,” pwe re sohlahr kak kasalehda arail pepehm.—Eklesiasdes 9:5, 6, 10.
17 Dahme Paipel mahsanih duwen oaralap wet e mengei oh sansal—me mehlahr sohte kin pousehla en momour nan ehu wasa tohrohr. Sohte mehkot me kin mwesel sang nan paliwaratail ni ahnsoun mehla oh momour pwehn pwurehng ipwidi nan ehu paliwar tohrohr, nin duwen irail kan me kin kamehlele padahk ehu me adaneki reincarnation kin nda. Mwein kitail kak karasahiong ire pwukat ni ahl wet: Mour me kitail kin ahneki duwehte mpwul en kandel. Ni ahnsou me mpwul pahn kunla, e sohte pahn kohla wasa kis. E sohlahr pahn mie.
18. Ni ahnsou me emen me kin onop Paipel sukuhliki me mehlahr akan sohte ese mehkot, dahme e kak wehwehki?
18 Medewehla duwen ia wehwehn padahk mengei ahpw kehlail wet. Ni ahnsou me emen me kin onop Paipel sukuhliki me mehlahr akan sohte ese mehkot, e pahn mengei ong ih en wehwehki me sohte lipilipil ia uwen laud ah pahpa kahlap kan me mehlahr kin lingeringer ni ahnsou me re momour, re sohte kak lidere ih. E pil pahn mwadang wehwehki me kompoakepah kan me mehlahr sohlahr kak rong, kilang, lokaia, pehm de medewe mehkot. Kahrehda, re sohte kak pehm kasangat laud nan purkadori de lokolok nan wasahn kalokolok en kisiniei. Ahpw, Paipel kin padahngki me mehlahr akan me Koht kin ketin tamanda pahn iasada. Ia uwen met wia koapworopwor kaselel ehu!—Sohn 5:28, 29.
Pwuhk Kapw Ehu ong Kitail en Doadoahngki
19, 20. Nin duwen Kristian akan, soangen pwukoa dahieu kitail kin ahneki, oh soangen sawaspen Paipel dahieu me wiawihda ong kitail en doadoahngki nan atail doadoahk en kalohk?
19 Kitail tehkpene peidek siluh te me aramas tohto kin pwonopwonki. Nan ehu ehu ire, dahme Paipel kin padahngki sansal oh inen. Ia uwen kaperen en ehukihong aramas akan me men ese dahme Paipel kin padahngki duwen soangen padahk mehlel pwukat! Ahpw mie peidek kesempwal teikan tohto me aramas mohngiong mehlel kan kin ahneki me anahne pasapengla. Nin duwen Kristian akan, kitail ahneki pwukoa ieu en sewese irail en diarada pasapengpen peidek pwukat.
20 E sohte mengei en padahngki padahk mehlel en Paipel ni ahl me sansal oh sair mohngiong. Pwehn sewese kitail en wia met, “ladu lelepek oh loalokong” kaunopadahr pwuhk ehu me wiawihda pwe kitail en doadoahngki nan atail doadoahk en kalohk. (Madiu 24:45-47) Oaralap en pwuhk wet me wiawihkihda pali 224 iei What Does the Bible Really Teach? (Dahme Paipel Uhdahn Padahngki?)
21, 22. Ia ekei ire kesempwal kan en pwuhk What Does the Bible Really Teach?
21 Pwuhk wet kohda nan Kapokon en District en Sounkadehdehn Siohwa kan me wiawi nan pahr 2006,me oaralap “Peikiong Koht” oh mie soahng soangen ire tohto nan pwuhko. Karasepe, mie oaralap en pwuhko me wiawihkihda pali limau me kak wia sawas laud pwehn tepida Paipel study kan. Ke pahn diarada me e pahn mengei en koasoiapene duwen kilel kan oh iren Paipel kan nan oaralap en pwuhko. Mwein ke pil pahn doadoahngki ire kan nan wasao pwehn kasalehong me pahn sukuhliki Paipel kan iaduwen arail pahn kak diarada irelaud kan oh iretikitik kan en Paipel.
22 Mwomwen ntingdahn en pwuhk wet pil mengei oh sansal. Doadoahk laud wiawihda nan wasa kan me konehng pwehn wiahiong tohnsukuhlo en pehm me ire kan kin pid pein ih pwehn lel ah mohngiong. Nan ehu ehu irelaud, mie tepin peidek kan oh pil mie koakon ehu ni kaimwiseklahn ehu ehu irelaud me oaralape koasoia “Dahme Paipel Padahngki.” Nan koakono mie pasapeng en Paipel kan ong tepin peidek kan. Kilel kaselel kan oh kawehwehpen kilel pwukat oh pil karasaras kan nan pwuhk wet pahn sewese tohnsukuhlo en koledi padahk kapw kan. Mendahki ire kan nan pwuhk wet ah kin mengei, mie appendix me pahn mweidong iuk en tehkpene ire kesempwal 14 me pid oaritik kan ma tohnsukuhlo anahne oaritik pwukat.
23. Soangen sawas dah kan kin kohda me pid duwen doadoahngki pwuhken Bible Teach nan onop en Paipel kan?
23 Pwuhken Bible Teach wiawihda pwehn sewese kitail en padahkiong aramas akan me alehdi soahng soangen kasukuhl oh me kohsang soahng soangen pelien lamalam kan. Ma emen tohnsukuhl sohte ese duwen Paipel, mwein e pahn anahne tohto sang pak ehu en onop pwehn kanekehla irelaud ehu. Dehr karuwaru en onop ire kan, ahpw song en lel mohngiong en tohnsukuhlo. Ma e sohte wehwehki ehu karasaras me kohda nan pwuhko, kawehwe duwen karasaraso de doadoahngki ehu karasaras tohrohr. Kaunopada mwahu, wia uwen me ke kak pwehn doadoahngki mwahu pwuhko, oh kapakapki sapwellimen Koht sawas pwe ke en kak ‘padahkihong aramas akan mahsen en Koht ni mehlel.’—2 Timoty 2:15.
En Kalahnganki Ahmw Pwais Kaselel kan
24, 25. Soangen pwais kaselel dah kan Siohwa ketikihong sapwellime aramas akan?
24 Siohwa ketikihong sapwellime aramas akan pwais kaselel kan. E kin ketin kahluwa pwe kitail en kak sukuhliki padahk mehlel duwen ih. Kitail en dehr sohte kalahnganki pwais wet! Ni mehlel, Koht kin ketin karirih kupwure kan sang me aklapalap oh ketin kasalehong irail me aktikitik kan. Me pid duwen ire wet, Sises mahsanih: “I kapingahkin komwi omwi ketin kasalehiong me soaloalokong kan mehkan me komw ketin ekihsang me koahiek oh loalokong en sampah kan.” (Madiu 11:25) E wia pwais kaselel ieu en pilipilda nin duwen me aktikitik kan me kin papah Kaunepen Lahng oh Sampah, Siohwa.
25 Koht pil ketikihong kitail pwais en padahkiong meteikan duwen ih. Tamanda me aramas tohto kin padahngki padahk likamw duwen ih. Kahrehda aramas tohto kin ahneki madamadau me uhdahn sapwung duwen Siohwa, re kin medemedewe me e sohte kin ketin nsenohki de poakehla aramas akan. Ke kin perenki, ehi, ngoangki sewese kapwungala madamadau sapwung pwukat? Ke men aramas mehlel akan me mih wasa koaros en ese padahk mehlel duwen Koht? Eri, kasalehda ahmw peikiong Koht sang ni ahmw kin ngoangki doadoahk en kalohk oh padahkiong meteikan dahme iren Paipel kan kin koasoia me pid duwen ire kesempwal pwukat. Irail akan me kin raparapahki padahk mehlel anahne sukuhliki dahme Paipel kin uhdahn padahngki.
Ia Ahmw Pasapeng kan?
• Iaduwen kitail kin ese me Koht kin ketin nsenohki kitail?
• Dahme kitail mihmiehki pohn sampah?
• Dahme pahn wiawiong kitail ni ahnsou me kitail mehla?
• Mehnia ire kan en pwuhken Bible Teach me ke keieu perenki doadoahngki?
[Kawehwehpen kilel kan nan ehu ehu pali 8]
Paipel kin padahki me lokolok pahn imwisekla
[Credit Lines]
Powe palimaun, serepein: © Bruno Morandi/age fotostock; palimeing, lih emen: AP Photo/Gemunu Amarasinghe; pah palimaun, irail kan me tangasang pein sapwarail: © Sven Torfinn/Panos Pictures
[Kawehwehpen kilel kan nan ehu ehu pali 9]
Me pwung kan pahn mour kohkohlahte nan Paradais