Dahme Ke Kak Sukuhliki Sang Seri kan?

“KE MWOMWEN seri!” Ma soangen lokaia wet wiawi ohng kitail, ele kitail pahn nsensuwedkihla met. Mendahki aramas akan kin perenki seri kan ni ahnsou me re tikitik, irail sohte ahneki madamadau en aramas mah, saikinte lelohng nan ekei soangen irair kan me aramas laud kan lelohngehr, oh arail erpit sohte pil laud duwehte irail me mahlahr kan.—Sohp 12:12.

Mendahki met, mie ehu pak me Sises padahkiong sapwellime tohnpadahk ko: “Kumwail en ese pwe ma kumwail sohte wekila oh rasehngala kisin seri kan, kumwail sohte pahn pedolong nan Wehin Koht.” (Madiu 18:3) Ia wehwehn ahn Sises mahsan wasaht? Soangen irair dah kan me seri kan ahneki me irail me mah kan anahne kahlemengih?

Kakairada Soangen Irair en Aktikitik me Seri kan Ahneki

Na tehk dahme kahrehda Sises ah wia soangen mahsen wet. Mwurin ah pwurodohng Kapernaum sang nan eh seiloak reirei, Sises idek rehn sapwellime tohnpadahk ko “Dahme kumwail akahkamaiki kohdo nanialo?” Tohnpadahk ko sarohdi oh nennenlahte, pwe irail akahkamaiki ihs me keieu lapalap. Mwuri, irail lamalam kehlailda oh idek rehn Sises: “Ihs me keieu lapalap nan Wehin Koht?”—Mark 9:33, 34; Madiu 18:1.

Ele e pahn wia mehkot kapwuriamwei ehu ahr kin akamaiki duwen ihs me keieu lapalap pwehki ahr kin ieiangehr Sises kereniong sounpar siluh. Ahpw, irail kekeirada nan palien lamalam en mehn Suhs, me kin inenen kesempwalki soangen ire pwukat. Eri e sansal me soangen palien lamalam wet, oh iangahki soh unsek en aramas iei me kin kamwakid madamadau en sapwellime tohnpadahk ko.

Sises eri ketidi oh malipedohng reh sapwellime tohnpadahk ko oh mahsanih: “Mehmen rehmwail me men kaunda en ikmwurihla, oh en wiahla en koaros ar ladu.” (Mark 9:35) Irail ele pwuriamweikihla mahsen pwukat. Soangen ire kan me Sises ketin kasalehda inenen weksang lamalam en mehn Suhs! Sises eri ekerodo emen kisin serio mpe. Ni eh pwoalehdi serio, e kasalehda ire wet: “Kumwail en ese pwe ma kumwail sohte wekila oh rasehngala kisin seri kan, kumwail sohte pahn pedolong nan Wehin Koht. Pwe me kin aktikitik oh rasehngala kisin seri menet, ih me keieu lapalap nan Wehin Koht.”—Madiu 18:3, 4.

Ia wen met eh wia mehn kasukuhl mwahu duwen karakarahk! Medewehla dahme wiawi. Lapalahn pokon en ohl mehlel kei pidakihpene kisin seri men, oh kangkakil serio. Ia wen serio eh inenen namenek oh kihong ah likilik koaros rehn Sises. Ia wen ah sohte ahneki pepehm en aksiai oh kailok! Ia wen eh kin peik oh sohte pohnmwahso! Ehi, kisin serio wia mehn karasepe ehu duwen irair en aktikitik.

Ire me Sises men kasalehda inenen sansal. Kitail koaros anahne kakairada soangen irair en aktikitik me seri kan ahneki ma kitail men sohsohki Wehin Koht. Siohwa sohte kupwurki irair en aksiai oh pohnmwahso nan sapwellimen koasoandi en peneinei. (Kalesia 5:26) Ni mehlel, iei irair pwukat me kahrehda Sehdan me Tepil en tepida uhwongada Koht. Iei kahrepe wet me Siohwa inenen kalahdekiki soangen irair pwukat!—Lepin Padahk 8:13.

Kristian mehlel kan kin men papah, kaidehn en kaunda. Mendahki ekei pak doadoahk sohte kin kaperen de kitail kin papah aramas akan me sohte wia me lapalap ekei, irair en aktikitik mehlel kin kamwakid kitail en men papah mehteikan. Soangen pwukoah tikitik wet kin wahdo kapai laud. Sises mahsanih: “Mehmen me kin kasamwo emen kisin seri pwukat ni mwarei, ngehi me e kin kasamwo; oh mehmen me kin kasamwo ie; kaidehk ngehite me e kin kasamwo, pwe pil ih me ketin kadariehdo.” (Mark 9:37) En kakairada ngenin kadek oh irair en aktikitik en seri kin kakerenih kitail ohng Ih me keieu lapalap nanleng oh sampah oh Sapwellimeo. (Sohn 17:20, 21; 1 Piter 5:5) Kitail pahn dolung kating en peren me kin kohsang kihkihwei. (Wiewia 20:35) Oh kitail kin inenen perenki ni atail kin iang kakehle irair en popohl oh miniminpene me mie nanpwungen sapwellimen Koht aramas akan.—Episos 4:1-3.

Mengei en Kasukuhl oh Kin Likilik

Sises pil uhd kasalehda ehu mehn kasukuhl me aramas mah kan kak sukuhliki sang rehn seri kan: “Mehmen me sohte pahn ale Wehin Koht rasehng kisin seri men, e sohte pahn pedolong loale.” (Mark 10:15) Seri kan sohte kin aktikitikte; e kin mengei en kasukuhlih irail. Emen nohno nda: “Arail mwahliel kan kin koledi ire kan duwehte lihmw kin koledi pihl.”

Kahrehda, pwe kitail en kak sohsohki Wehin Koht, kitail anahne alehda oh kapwaiada mahsen en Wehio. (1 Deselonika 2:13) Duwehte seri pwelel kan me ahpwtehn neitikidi, kitail anahne “ngoangkihte kang pilen dihdi mehlel en pali ngehn pwe [kitail] en keirda oh mourkihla.” (1 Piter 2:2) Eri, iaduwen ma padahk en Paipel ehu mwomwen apwal ong kitail en wehwehki? Emen lih me kin apwalih seri kan koasoia: “Seri kan pahn wie peipeidengki ‘Pwekida?’ lao irail diarada pasapengpen arail peidek kan.” E konehng kitail en alasang ahr mehn kahlemeng. Eri, nantihong oh doula nan ahmw onop. Koasoi ohng Kristian koahiek kan. Peki sapwellimen Siohwa erpit. (Seims 1:5) Ke dehpa peikasal pwe, ke pahn ale katingpen ahmw kin kapakap ni ngidingid.—Madiu 7:7-11.

Ekei ele pahn medemedewe, ‘Iaduwen, e sou pahn mengei en pitihedi irail aramas akan me mengei en kasukuhlih?’ Met sohte kak wiawi ma mie neirail mehn kaweid de arail sounpadahk likilik. Karasepe ehu, seri kan kin likih ale kaweid en pahpa oh nohno. Emen pahpa koasoia: “Pahpa oh nohno kan kin kasalehda me irail wia aramas likilik kei ni arail kin apwalih anahn kan en neirail seri kan ehu ehu rahn.” Mie kahrepen kitail en pil likih Samatail nanleng, Siohwa. (Seims 1:17; 1 Sohn 4:9, 10) Siohwa kin ketikihda sapwellime kaweid ki sapwellime Mahsen. Sapwellime ngehn sarawi oh sapwellime pwihn kin kihda kamweit oh utuht ohng kitail. (Madiu 24:45-47; Sohn 14:26) Atail doadoahngki sawas pwukat pahn pere kitail sang keper kan ohng atail pali ngehn.—Melkahka 91:1-16.

Ni atail pahn kakairada atail likih Koht me duwehte seri kan ahr kin likih ahr pahpa oh nohno, met pahn kahrehiong kitail en dehr pwunod. Emen me samanih Paipel koasoia: “Ni ahnsou me kitail tikitik, kitail kin tepiada atail seiloak en nan mour ni atail sohte ahneki de naineki mehkot me kitail pahn kak pwainki pweinen seiloak wet, oh kitail sohte ese iaduwen atail pahn kak lella ni imwin seiloak wet, ahpw sohte pak kitail kin peikasalki me atail pahpa oh nohno pahn sewese kitail oh pere kitail nan seiloak wet.” Iaduwen, kitail pil kin ahneki soangen likilik wet rehn Siohwa ni atail wia atail seiloak en mour?—Aiseia 41:10.

Likih mehlel Koht kin sewese kitail en dehr wia tiahk de madamadau me kak keper ohng atail pali ngehn. Weksang met, kitail kin likih mahsen en Sises me kasalehda me Samatail nanleng kin mwahngih atail wiewia kan oh erein atail pahn kin rapahki mahs Wehio oh sapwellimen Koht pwung, Koht pahn ketin apwalih kitail. Met pahn sewese kitail en soikala kasongosong en rapahki mahs atail anahn en war oh tounmeteikihla atail pwukoa kan en pali ngehn.—Madiu 6:19-34.

“Ni Mehkan me Pidada Mehkot me Suwed Kumwail en Rasehng Kisin Seri Pwelel kan”

Mendahki seri kan soh unsek ni ahnsou me re ipwidi, irail kin ahneki mohngiong oh madamadau mwakelekel. Ki kahrepe wet, Paipel kangoangehki Kristian akan: “Ni mehkan me pidada mehkot me suwed kumwail en rasehng kisin seri pwelel kan.”—1 Korint 14:20.

Na song medewe dahme Monique me sounpar limau me ndahiong eh nohno: “Piten moangen kompoakepahi Sarah pinipin duwehte piten moangeiet!” Serio sohte koasoiahda poh dah kilin Sarah de ih mehnia keinek. Emen lih koasoia: “Seri kan sohte kin kilang pohn kilin aramas. Irail sohte kin ese duwen keinek kan en aramas oh irail sohte kin lipilipilki aramas.” Ni soangen irair wet, ia wen seri kan eh kin wia kasalepen atail Koht me sohte kin poupali, me kin poakohng aramas en wehi kan koaros.—Wiewia 10:34, 35.

Seri kan pil kin ahneki irair en mahk. Emen pahpa koasoia: “Ni ahnsou me kisin pwutak riemeno Jack oh Levi kin pei, se kin padahkiong ira en pekmahkpene, oh mwurin kisin ahnsou kis ira kin tepidahr mwadmwadongpene oh pereperenpene. Ira sohte kin medemedewe oh pwurehng kapwurehda mehkan me nekier, de idingki mehteio en pekimahk. Ira kin sohlahr nsensuwedpene oh pousehla mwadmwadong.” Ia wen eh wia mehn kahlemeng mwahu ohng aramas laud kan en alasang!—Kolose 3:13.

Patehng met, kisin seri kan kin kamehlele me mie Koht. (Ipru 11:6) Pak tohto, en seri kan kin mehlel kin kamwakid irail en kin eimah kalohk ohng mehteikan. (2 Nanmwarki 5:2, 3) Arail kapakap mengei kan me kin kohsang nan mohngiongarail kin kak kamwakid mohngiong kekeluwak kan. Oh ni ahnsou kan me re kin lelohng nan songosong, irail kin kak kasalehda arail kehl en kolokol arail lelepek. Ia wen seri kan ahr kin wia kisakis inenen kesempwal kei!—Melkahka 127:3, 4.

Pwurehng Linganla

Ele ke pahn medemedewe, ‘Iaduwen, aramas laud kan kak pwurehng ahnekihla soangen irair kaselel kan me irail ahneki ni ahnsou me re seri?’ Pasapeng mengei oh mehlel iei ehi! Sapwellimen Sises kaweid me kitail en “rasehngala kisin seri kan” kasalehda me met kak wiawi.—Madiu 18:3.

Pwehn karasahda met: Irail pwihn en sounkamwahuihala mahlen kan ele pahn nantihong kamwahuwihala mahlen kaselel ehu. Ni arail pahn wia met, irail pahn kihsang pwelipar me kohpene oh kamwahuiala wasa kan me sohte mwahu. Mwurin kanengamah oh doadoahk laud me irail sounkamwahuihala mahlen pwukat kin ahneki, koaros kakehr pwurehng kilang duwen kaselel en mahleno. Duwehte met, ni emen ah pahn nantiong ni wen me e kak, ki sawas en sapwellimen Siohwa ngehn sarawi, oh utuht limpoak en mwomwohdiso en Kristian, kitail kak pwurehng ahnekihda soangen irair kaselel kan me kitail kin kasalehda ni ahnsou me kitail wia seri tikitik kei.—Episos 5:1.

[Kawehwehpen kilel kan nan ehu ehu pali 5]

Seri kan kin aktikitik

[Kawehwehpen kilel kan nan ehu ehu pali 4]

Kisin seri kan sohte kin lipilipilki aramas, oh irail kin mwadang en mahk oh manokehla