Mahsen en Siohwa Kin Ieias
Ire Kesempwal akan Sang nan Pwuhken Esekiel—I
NAN Pahr 613 B.C.E. Soukohp Seremaia kin mih nan Suda, oh e kin pakpakairki ni eimah duwen ohlahn Serusalem oh tehnlahn sahpw en Suda me pahn kereniong wiawi. Nanmwarki Nepukadnesar en Papilon wahsangehr mehn Suhs tohto oh salihiraildi. Mwahnakapw Daniel oh ienge silimeno me iang mih nanpwungarail, kin papah nan tehnpas nan Papilon. Pali laud en mehn Suhs akan me kalipilipalahr kin mih mpen pillap Separ “nan Papilonia.” (Esekiel 1:1-3) Siohwa sohte ketin likidmeliehla irail me kalipilipalahr kan pwe e kin ketin kadarala meninkeder men rehrail. E ketin idihada Esekiel, me sounpahr 30 ni ah wia soukohp men.
Pwuhken Esekiel wiawihdahr nan pahr 591 B.C.E., oh e kin kasalehda dahme wiawiher nan erein sounpahr 22. Esekiel kin mahsanih oaritik nan sapwellime nting. E kasalehda ahnsou nan sapwellime kokohp, me pid mehnia rahn oh sounpwong oh pahr. Pali keieu en sapwellimen Esekiel kokohp kin mahsanih duwen ohlahn Serusalem. Pali keriau kin pid duwen pakair kan ong wehi kan me kin kapilpene Serusalem, oh kaimwiseklahn pali kin pid duwen onohnda sapahl en sapwellimen Siohwa kaudok. Artikel wet kin koasoia duwen ire kesempwal akan sang nan Esekiel 1:1–24:27, ah kasansal kan, kokohp kan, oh kamwomwada kan me pid duwen dahme pahn wiawiong Serusalem.
“I PAHN WIAHKINUHKALA SILEPEN WEHIN ISRAEL”
(Esekiel 1:1–19:14)
Mwurin Esekiel alehier kasansal kapwuriamwei ehu duwen mwoalen Siohwa, e uhd alehdi ah pwukoa. Siohwa mahsanihong ih: “I pahn wiahkinuhkala silepen wehin Israel. Ke ahpw padahkihong irail kehkehlik kan me I pahn wiahiong uhk.” (Esekiel 3:17) Pwehn kohpada duwen kapilpene en Serusalem oh imwilahn met, Esekiel anahne kamwomwada dahme pahn wiawi. Me pid duwen sapwen Suda, Siohwa mahsanih ni ah ketin doadoahngki Esekiel: “I pahn kadarodo kedlahs pwoat pwehn kamwomwala wasa kan me aramas kin kaudokohng dikedik en eni kan ie.” (Esekiel 6:3) Ong tohn sahpwo, e mahsanih: “Imwilahn ahnsou leledohr ong noumw aramas akan.”—Esekiel 7:7.
Nan pahr 612 B.C.E., Esekiel wisiklahng nan Serusalem ni mwomwen kasansal ehu. Ia uwen kasaut en soahng kan me e kilang me kin wiawi nan sapwellimen Koht tehnpas sarawi! Ni ahnsou me Siohwa ketin kadarala sapwellime sounpei en nanleng kan (me “ohl wenemen” kin wiliandi) pwehn kasalehda sapwellime engieng ong irail me salelepek kan, ihte irail kan ‘me kilel mi nan temwe’ pahn pitla. (Esekiel 9:2-6) Ahpw keieu, “mwoalus okohk”—sapwellimen Koht pakair kehlail en sapwellime engieng—anahne kohwong kahnimwo. (Esekiel 10:2) Mendahki ‘Siohwa pahn ketin kalokehkin me suwed kan dahme re wiadahr,’ e ketin inoukihda me e pahn ketin kapwurepene irail mehn Israel akan me mwerpesengehr.—Esekiel 11:17-21.
Sapwellimen Koht ngehn kapwurehla Esekiel ong Papilon. Kamwomwada ehu kin kasalehda me Nanmwarki Sedekaia oh aramas akan pahn tangasang Serusalem. Koht ketin soikala soukohp likamw akan. E ketin soikala irail akan me kin pwongih dikedik akan. Suda kin duwehla ni karasaras tuhkehn wain me sohte katepe. Karasaras en ikel oh tuhkehn wain kin kasalehda imwila suwed en ahn Serusalem peksawas rehn Isip. Karasaraso kin imwisekihla inou ieu me ‘Siohwa pahn ketin katipwasang apwoat kisin rah pwulopwul oh pahn padokedi pohn nahna ileile ehu.’ (Esekiel 17:22) Ahpw nan Suda, “solahr pahn wia sokon en nanmwarki.”—Esekiel 19:14.
Pasapengpen Peidek kan me Pid Duwen Iren Paipel kan:
1:4-28—Dahme kuruma en nanleng kin karasahiong? Kurumao kin karasahiong sapwellimen Siohwa pwihn en nanleng me wiawihkihda ngehn lelepek kan. Utupen ah manaman iei sapwellimen Siohwa ngehn sarawi. Soundak en kurumao, me wiliandi Siohwa, kin inenen lingan. Sapwellime popohl kin karasaraski ahia kaselel ehu.
1:5-11—Ihs irail menmour pahmeno? Nan keriaun ahn Esekiel kasansal en kurumao, e kasalehda me irail iei kerup kan. (Esekiel 10:1-11; 11:22, NW) Nan keriaun kasansalo, e kahdaneki mesen kouwol “mesen kerup.” (Esekiel 10:14, NW) Met konehng pwe kouwol kin karasahiong kehl oh manaman, oh kerup kan iei ngehn kehlail kan.
2:6—Dahme kahrehda Esekiel kin pwurepwurehng adaneki “nein aramas”? Siohwa ketin likwerih Esekiel ni ahl wet pwehn katamankin soukohpo me ih aramas emen, kahrehda e kin ketin kasalehda wekpeseng laud en meninkeder en aramas men oh Koht me ketin wiahda pakairo. Daidelo pil kin kadoadoahk ong Sises Krais mpen pak 80 nan Pwuhken Rongamwahuo, me kin kasansalehda me sapwellimen Koht Ohlo ketidihdo nin duwen aramas amen, kaidehn ngehn emen me pwuhriong paliweren aramas.
2:9–3:3—Dahme kahrehda Esekiel kehn mem ni ahnsou me e kangala pelien doaropwe ieu me limilimpene me audaudki mahsen kansensuwed kei? Kahrepen me Esekiel kehn mem ni ahnsou me e kangala pelien doaropweo iei duwen ah lamalam ong ah pwukoa. Esekiel kin kalahnganki ah pwais en papah Siohwa nin duwen soukohp men.
4:1-17—Esekiel uhdahn kamwomwada duwen kapilpene en Serusalem me pahn kereniong wiawi? Ahn Esekiel peki en wekidala dahme e pahn doadoahngki ong uhmw oh en Siohwa ah ketin mweidong ih dahme e pekihda kin kasalehda me soukohpo uhdahn mwomwehda met. En wendi keingihngla palimeingih erein rahn 390 iei ong dipen keinek-eisek en wehio—tepida sang nan pahr 997 B.C.E. lel ohlahr Serusalem nan pahr 607 B.C.E. En wendi keingihngla palimaunih iei ong dipen Suda nan erein sounpahr 40, me tepida sang ahnsou me Seremaia idihdda nin duwen soukohp men nan pahr 647 B.C.E lel 607 B.C.E. Nan erein sounpahr 430 pwon, Esekiel mourki kisin mwenge oh pihl, met kin wia kokohp en me pahn mie lehk ni ahnsou me sounpei kan pahn kapilpene Serusalem.
5:1-3—Dahme kesempwal me pid ahn Esekiel ah pahn ale ekis pitenmoange oh kamwerepeseng nan kisinieng oh pil kidimpene nan ah likou kan? Met kin kasalehda me aramas akan me pahn luwehdi pahn pwuralahng Suda, oh pwurehng kapwurehda sapahl kaudok mehlel mwurin ah tehnla erein sounpahr 70.—Esekiel 11:17-20.
17:1-24—Ihs lapalahn ikel riemeno, oh iaduwen rahn tuhkehn sidar pwulopwul apwoat tipw, oh ihs me “apwoat kisin rah pwulopwul” me Siohwa ketin padokedi? Ikel riemeno kin wiliandi kaun akan en Papilon oh Isip. Keieun Ikelo kohdo pohn kadoken tuhke sidar pwoat, met wehwehki, ong kaunen wehio nan kadaudok en Depit. Ikelo katipwasang rahn tuhke pwulopwul apwoat sang ni ah kin kihsang Nanmwarki Sehoiakim en Suda oh uhd idihada Sedekaia. Mendahki ah wia inou ehu, Sedekaia kin rapahki sawas sang rehn emen ikel torohr, kaunen Isip, ahpw met sohte pweida. E pahn selidi oh mehla nan Papilon. Siohwa pil ketin katipwasang “apwoat kisin rah pwulopwul,” Nanmwarki Mesaia. E ketin padokedi Menet pohn “nahna ileile ehu,” pohn Nahna Saion en nanleng, wasa me e pahn wiahla “tuhke sidar kaselel pwoat,” utupen kapai mehlel kan ong sampah.—Kaudiahl 14:1.
Mehn Kasukuhl kan ong Kitail:
2:6-8; 3:8, 9, 18-21. Kitail en dehr masak me suwed kan oh en dehr uhdi sang pakpakairki sapwellimen Koht pakair kan, me kin pidada peneu kan ong irail. Ni ahnsou me kitail tuhwong aramas akan me sohte men rong de lelong uhwong kan, kitail anahne kehlail duwehte daimond. Ahpw, kitail pil anahne kanaiehng en dehr keptakai, sohte nsenohki meteikan, de lemei. Sises ketin poakehla aramas akan me e kin kalohk ong, oh kitail pil anahne mwekidki nsenoh ni atail kin kalohk ong meteikan.—Madiu 9:36.
3:15. Mwurin ah alehdi ah pwukoa, Esekiel kin kousoan nan Tel Apip, oh ‘wie pwunopwunod erein rahn isuh,’ medemedewe duwen pakair kan me e pahn pakairki. Kitail sou anahne koasoanehdi ahnsou ong onop oh doudouloale pwehn wehwehki padahk loal kan?
4:1–5:4. Esekiel anahne aktikitik oh eimah pwehn wia kamwomwada en kokohp riau. Kitail pil anahne aktikitik oh eimah pwehn kapwaiada soahng soangen doadoahk kan me Koht kin ketikihong kitail.
7:4, 9; 8:18; 9:5, 10. Kitail sohte anahne poakehla irail akan me pahn ale sapwellimen Koht kadeik.
7:19. Ni ahnsou me Siohwa pahn ketin kadeikada koasoandi wet, mwohni sohte pahn mie katepe.
8:5-18. Lahlahwe padahk mehlel kin kauwehla ahn emen nanpwung mwahu rehn Koht. “Ke kak ohkihla lokaiahn aramas me sehse [“lahlahwe,” NW] Koht.” (Lepin Padahk 11:9) E wia elen loalokong kitail en dehr rong dahme irail akan me kin lahlahwe padahk mehlel kin nda.
9:3-6. En alehdi kilel—mehn kadehdehn me kitail wia sapwellimen Koht ladu inoudahr oh papidaislahr akan oh kitail kin ahneki irair en Kristian akan—inenen kesempwal pwehn pitsang “kahn kamakam kowahlap.” (Madiu 24:21, NW) Kristian me keidi kan, me rasehng ohlo me weuwa ingk en sekteri, kin tiengla mwomwe nan doadoahk en kihdiong kilelo, iei doadoahk en kalohki Wehio oh katohnpadahk. Ma kitail men kolokol atail kilel, kitail anahne ngoangki sewese irail nan doadoahk wet.
12:26-28. Ong irail akan me kin mwamwahliki ah padahk kan, Esekiel pahn mahsanihong: “Solahr pahn pwapwand. Dahme [Siohwa] mahsanih pahn pweida.” Kitail anahne wia soahng koaros me kitail kak wia pwehn sewese meteikan en likih Siohwa mwohn e pahn ketin kaimwisekala koasoandi wet.
14:12-23. En ale komourpatail iei pein atail pwukoa. Sohte emen tohrohr kak wiliandi kitail en wia met.—Rom 14:12.
18:1-29. Kitail kin pwukoahki imwilahn pein atail wiewia kan.
‘KAUWEHLA, KAUWEHLA I PAHN KAUWEHLA’
(Esekiel 20:1–24:27)
Nan kaisuh en pahr en arail kalipilipala, 611 B.C.E., me mah en mehn Israel kan kohla rehn Esekiel pwe ren “ale kaweid duwen kupwur en KAUN-O.” Irail rong poadopoad reirei en ahn Israel sapeik oh peneu me ‘Siohwa pahn ketin usada sapwellime kedlahs’ oh kemeiirailla. (Esekiel 20:1; 21:3) Ong kaunen Israel (Sedekaia), Siohwa ketin mahsanih: “Kihsang sapwellimomwi nihn oh lisoarop en nanmwarki. Soahng koaros solahr pahn duweduwehte. Kasapwilada me semwehmwe kan pwe re en ahnekihla manaman! Kasapwilidi me kakaun akan! Kauwehla, kauwehla! Ei, I pahn wiahkihla kahnimwo mohn kahnihmw ehu. Ahpw met sohte pahn wiawi lao mehmeno [Sises Krais] pahn kohdo me I piladahr en kaloke kahnimwo. Ong ih me I pahn ketikihong kahnimwo.”—Esekiel 21:26, 27.
Serusalem ale kadeik. Dipen Oh-olah (Israel) oh Oh-olipah (Suda) sansalda. Oh-olah pangalahng “rehn eh mwohnlimpoak kan, iei mehn Asiria kan.” (Esekiel 23:9) Ohlahn Oh-olipah kerendohr. Nan 609 B.C.E., kapilpene en Serusalem me reireiki sounpwong 18 tepidahr. Ni ahnsou me kahnimwo pahn ohla, mehn Suhs akan sohte pahn kak kasalehda arail pahtou pwe re pahn nohk pwuriamwei. Esekiel en dehr mahsanih mahsen en Koht ong irail me kalipilipala lao lel e pahn ale ripoht en ohlahn kahnimwo sang rehn “mehmen me pahn pitsang paisuwedo.”—Esekiel 24:26, 27.
Pasapengpen Peidek kan me Pid Duwen Iren Paipel kan:
21:3—Dahkot “kedlahs” me Siohwa ketin usada? “Kedlahs” me Siohwa ketin doadoahngki pwehn kihong kadeik ong Serusalem oh Suda iei Nanmwarki Nepukadnesar oh nah sounpei kan. E pil kak iang pidada sapwellimen Koht pwihn en nanleng me wiawihkihda ngehn kehlail kan.
24:6-14—Dahme mer en einpwoat kin karasahiong? Serusalem rasehng einpwoat au laud ehu ni ahnsou me imwintihti kan kin kapilpene. Ah mer kin karasahiong tiahk samin en kahnimwo—samin, tiahk samin, oh kakerehdi nta me e kin pwukoahki. Ah samin inenen laud oh ihme kahrehda en kihdiong einpwoat pohn mwoalus kan oh mweidong ih en uhdahn karakarala sohte kak kihsang ah mer.
Mehn Kasukuhl kan ong Kitail:
20:1, 49. Mwekid en ohl mah en Israel akan kin kasalehda me irail sohte kamehlele dahme Esekiel mahsanih. Kitail en dehr kakairada soangen peikasal duwen peneu kan me kohsang rehn Koht.
21:18-22. Mendahki Nepukadnesar doadoahngki wunahni, Siohwa ketin koasoanehdi me kaun akan me kin kaudokiong koht teikan pahn kohla Serusalem. Met kin kasalehda me ngehn saut kan pil sohte kak kauhdi irail akan me pahn wia sapwellimen Siohwa kadeik en kapwaiada sapwellime kupwure kan.
22:6-16. Siohwa ketin kalahdeki karaun likamw, tiahk samin, doadoahngki manaman ni ahl me sapwung, oh natih. Kitail anahne koasoanehdi teng nan kapehdatail en liksang soangen wiewia suwed pwukat.
23:5-49. Arail wiahda inou kan rehn wehi teikan kin kahrehiong Israel oh Suda en iangala arail kaudok likamw kan. Kitail en liksang werek suwed me kak kauwehla atail pwoson.—Seims 4:4.
Mahsen me Wie Momour oh Manaman
Met wia mehn kasukuhl mwahu me kitail kak sukuhliki sang nan tepin irelaud 24 en pwuhken Esekiel! Mouren kaweid kan me ntingdi wasaht kin kasalehda dahme pahn kansensuwedih Koht, iaduwen kitail pahn kak ale sapwellime mahk, oh dahme kahrehda kitail anahne kihong me suwed kan peneu kan. Kokohpo me pid duwen ohlahn Serusalem kin kasalehda ni sansal me Siohwa iei Koht emen me kin ‘kasalehiong sapwellime aramas akan irair kapw kei, mwohn ar pahn tepida wiawi.’—Aiseia 42:9.
Soangen kokohp pwukat me kileldi nan Esekiel 17:22-24 oh 21:26, 27 kin koasoia duwen wiawihdahn Wehin Mesaia nanleng. Ni ahnsou keren, kaundao pahn kahrehiong kupwuren Koht en wiawi pohn sampah. (Madiu 6:9, 10) Ki atail pwoson kehlail, kitail kak kasikasik kapai kan me Wehio pahn wahdo. Ehi, “mahsen en Koht wie momour oh manaman.”—Ipru 4:12.
[Kawehwehpen kilel kan nan ehu ehu pali 18]
Dahme kuruma en nanleng kin karasahiong?
[Kawehwehpen kilel kan nan ehu ehu pali 20]
En ngoangki iang doadoahk en kalohk kin sewese kitail en kolokol atail “kilel”