Warohng en Iang Kahluwalahng ni Pilen Komour
“Sihmpwulo . . . pahn wialahr sileparail, oh ih me pahn kin kahluwairaillahng ni pilen komour.”—KAUD. 7:17.
1. Mahsen en Koht kin kasalehda Kristian keidi kan nin duwen dah, oh soangen pwukoa dahieu Sises ketikihong irail?
MAHSEN en Koht kin kasalehda irail Kristian keidi kan me kin apwahpwalih mehkan koaros me pid sapwellimen Krais Wehio pohn sampah nin duwen “ladu lelepek oh loalokong.” Ni ahnsou me Krais kasawih “sapwellime ladu kan” nan pahr 1918, e diarada me keidi kan pohn sampah kin lelepek en ketikihda padahk oh kaweid kan me poahsoanda pohn mahsan en Koht ni “ahnsou me konehng.” Met kahrehiong Kaun menet Sises en perenkihda irail oh kasapwilada irail “en kaunda sapwellime dipwisou kan koaros.” (Wadek Luk 12:42-44.) Ni ahl wet, mwohn irail ale sohso en nanleng, me keidi kan kin papah tohnkaudok en Siohwa teikan pohn sampah.
2. Kawehwehda sapwellimen Sises dipwisou kan.
2 Kaun emen kin ahneki manaman pohn sapwellime dipwisou kan, oh e kak doadoahngki irail nin duwen e ketin kupwurki. Dipwisou kan me Sises Krais sapwellimaniki, Nanmwarki me Siohwa ketin idihada, kin pid irail kan oh soahng kan koaros pohn sampah me pidada Wehio. Met iangahki “pokon kalaimwun” me wahnpoaron Sohn kilangada nan ehu kaudiahl. Sohn kawehwehdi duwen pokon kalaimwuno nin duwen met: “I ahpw kilangada pokon ehu me inenen kalaimwuhnie [“pokon kalaimwun,” NW]—me sohte aramas kak wadekedi uwen tohto! Re kohsang nan wehi koaros, ni kadaudok koaros, nan sahpw koaros, oh lokaia koaros; re ahpw uh mwohn mwoahlo oh mwohn Sihmpwulo, likawih likou pwetepwet reirei oh kolokol tehn paini.”—Kaud. 7:9.
3, 4. Iaduwen pokon kalaimwun kin ahneki pwais me inenen kaselel?
3 Towe kan en pokon kalaimwuno kin mih nanpwungen irail akan me Sises kin kahdaneki “sihpw teikan.” (Sohn 10:16, NW) Arail koapworopwor iei en mour kohkohlahte nan paradais nin sampah. Irail kin koapworopworki me Sises “pahn kin kahluwairaillahng ni pilen komour” oh “Koht pahn ketin limwihasang pilen masarail kan.” Ki koapworopwor wet, irail “kamwakeledahr ar likou kan, oh ntahn Sihmpwulo me re mwakelekelkilahr.” (Kaud. 7:14, 17) Irail kin pwoson sapwellimen Sises tomw, oh ki kahrepe wet, Koht kin ketin kilang irail nin duwen irail kan me ahneki ‘likou me mwakelekeldahr.’ Irail wialahr aramas pwung kan me kin kompoakepahkihla Koht, duwehte Eipraam.
4 Laudsang met, pwehki Koht kin wiahki pokon kalaimwun me wie tohtohla nin duwen aramas pwunglahr kan, irail kak koapworopworki en pitsang kasohrlahn koasoandi suwed wet nan kahn kamakam kowahlap. (Seims 2:23-26) Irail kak karanihala Siohwa, oh nin duwen pwihn ehu, re pahn ahneki koapworopwor kaselel ehu en pitsang Armakedon. (Seims 4:8; Kaud. 7:15) Irail sohte kin wia pwihn me kin tohrohrpeseng, ahpw re kin inengieng papah pahn kaweid en Nanmwarki me ketiket nanleng oh rie me keidier kan me mihmi pohn sampah.
5. Iaduwen pokon kalaimwun kin sewese rien Krais me keidi kan?
5 Kristian keidi kan lelohngehr oh pahn doulahte lelong uhwong kan sang en Sehdan sampah wet. Mendahki met, irail kak koapworopworki me iengerail pokon kalaimwuno pahn sewese oh utung irail. Mendahki ahnsouwet me keidi kan kin wie malaulaula, pokon kalaimwun kin wie tohtohla ni uwen rielopw samwa kei nan ehuehu pahr. Irail me keidi kan sohte kak apwalih ehuehu mwomwohdiso kan me tohtohki 100,000 nan sampah pwon. Ihme kahrehda ehu wiepen sawas me keidi kan kin ale iei sang sihpw teikan, irail ohl koahiek kan en pokon kalaimwun me kin wia pwukoahn elder en mwomwohdiso. Irail kin sewese apwalih Kristian me rar rar kei me mihla pahn epwelpen “ladu lelepek oh loalokong.”
6. Ia mwomwen kohpadahr sawas me Kristian keidi kan alehdi sang iengerail sihpw teikan?
6 Soukohp Aiseia kohpada duwen peren en sawas me Kristian keidi kan kin alehdi sang rehn iengerail sihpw teikan. E ntingihdi: “Iet me Siohwa ketin mahsanih: ‘Tohndoadoahk kan me sohte kin ale pweinerail en Isip, soun netinet en Idiopia oh ohl reirei kan en Sepa pahn patohdo rehmwi oh wiahla ahmw ladu kan. Re pahn kin idawehn uhk.’” (Ais. 45:14, NW) Ni ahl en karasaras, Kristian akan me alehdi koapworopwor en mour pohn sampah rahn pwukat kin keid mwuri oh idawehn kaunda en pwihn en ladu lelepek oh Governing Body. Nin duwen “tohndoadoahk kan me sohte kin ale pweinerail,” irail sihpw teikan kin sang ni pein nsenarail doadoahngki arail kehl oh arail kepwe kan pwehn sewese doadoahk en kalohk me Krais ketikihong sapwellime ladu keidi kan me mihmihte pohn sampah en pwukoahki wia.—Wiewia 1:8; Kaud. 12:17.
7. Kapai kaselel dahieu me pokon kalaimwun kin ale kasukuhl ong?
7 Ni arail kin kihda arail sawas ong riarail me keidi kan, irail me kisehn pokon kalaimwun kin alehdi kasukuhl en wiahla poahsoan en pwihn kapw en aramas kan me pahn mihmi pohn sampah mwurin Armakedon. Poahsoan wet pahn anahne en teng oh kisehn pwihn wet pahn anahne kapwaiada kaweid kan en arail Kaun Lapalap sang ni pein nsenarail. Emenemen Kristian alehdier ahnsou mwahu en kasalehda me Nanmwarki Sises Krais kak en doadoahngki irail. Ni en emen kin kaiahne eh pwoson oh kasalehda irair en lelepek ahnsou wet, e kasaledahr me e onopadahr en mwekid ahnsou me Nanmwarkio pahn ketikihong ih kaweid kan en wia nan koasoandi kapw.
Pokon Kalaimwun Kasalehda Arail Pwoson
8, 9. Iaduwen irail pokon kalaimwun kin kasalehda arail pwoson?
8 Sihpw teikan me iengen mwomwohdiso en Kristian keidi kan kin kasalehda arail pwoson ni soangen ahl tohto kan. Keieu, re kin sewese oh utung riarail keidi kan en kalohkiseli rongamwahu en Wehin Koht. (Mad. 24:14; 28:19, 20) Keriau, irail kin pein men uhpahiong kaweid kan me Governing Body kin ketikihda.—Ipru 13:17; wadek Sekaraia 8:23.
9 Kesiluh, pokon kalaimwun kin utung riarail keidi kan ni arail kin mourki mour me kin pahrekiong sapwellimen Siohwa mour en kaweid pwung kan. Irail kin nantihong en kairada “limpoak, peren, popohl, kanengamah, kadek, loalopwoat, opampap, oh liksang me suwed.” (Kal. 5:22, 23) Rahn pwukat pali laud en aramas sohte kin perenki mourki soangen irair pwukat ahpw re uhd kin keirda “wiewia kan nin duwen ahnepen aramas.” Mendahki met, kisehn pokon kalaimwun kin koasoanehdi teng en liksang “nenek oh kamwahl, tiahk samin, pwongih dikedik en eni kan, oh wunahni; kailok, akatat, luwak, lingeringer, oh akamai, saminimin, mehwo, peirin, sakaula, oh soahng teikan me duwehte mepwukat.”—Kal. 5:19-21.
10. Dahme kisehn pokon kalaimwun kin tengediong en wia?
10 Pwehki kitail me soh unsek, e kin apwal en kapwarehda wahn ngehn kan de irair mwahu kan en Kristian, soikeweisang wiewia kan nin duwen ahnepen aramas oh pelianda kasongosong kan sang sampah en Sehdan. Mendahki met, kitail kin tengediong en dehr mweidohng atail luwet akan, atail kin sapwungala ni atail kin men alasang Sises, de sou itar en paliwaratail en kaluwetala atail pwoson, de kak kahrehda atail limpoak ong Siohwa en tikitikla. Kitail ese me Siohwa pahn kapwaiada dahme e ketin inoukidahr—kamourala pokon kalaimwun sang kahn kamakam kowahlap.
11. Soangen mwadik dahkei Sehdan kin doadoahngki ni eh kin songosong en kaluwetehla en Kristian kan arail pwoson?
11 Sohte lipilipil dahme kin wiawi, kitail kin ahnsou koaros mwasamwasahn pwehki kitail ese me uhdahn atail imwintihtio iei Tepil oh e sohte kin tokedi. (Wadek 1 Piter 5:8.) E songehr en doadoahngki irail akan me kin uhwong padahk mehlel oh meteikan ren kamehlelehiong kitail me padahk kan kitail kin kamehlele kin likamw. Ahpw mwadik wet kin kalapw sohte pweida. Me kin duwehte met, mendahki kalokolok kin ekei pak kahrehda doadoahk en kalohk en wawaila, pak tohto e kin uhd kakehlailiada pwoson en irail akan me lelong nan kalokolok. Pwehki met, Sehdan kin kalaudehla eh kin doadoahngki wiepe kan me e pehm kak pweida en kaluwetehla atail pwoson. E kin isanekihla atail pepehm kan en mworusala oh nan kapehd tikitikla. Tepin Kristian kan alehdi peneu duwen keper wet me koasoia: “Kumwail medemedewe uwen me [Krais] ketin lokolongki, oh duwen eh ketin kanengamahiong kailok me e ketin alehsang rehn me dipan akan.” Pwekida? “Eri, kumwail dehr mworusala oh nan kapehd tikitikla.”—Ipru 12:3.
12. Iaduwen kaweid en Paipel kin sewese irail akan me mworusala?
12 Mie pak ke kin pehm en men uhdihsang papah Siohwa? Mie ahnsou kan ke pehm me ke sohte kin pweida? Ma iei, a ken dehr mweidohng pepehm pwukat en kerempwa iuk sang papah Siohwa. En kin onopki loal Paipel, ngoangki kapakap oh kaukaule towehda mihding kan oh werekiong iengetail Kristian kan pahn kakehlailiuk pwe ken dehr ‘nan kapehd tikitikla.’ Siohwa ketin inoukidahr en sewese irail kan me kin papah ih en kehlailda oh kitail kak koapworopworki met. (Wadek Aiseia 40:30, 31.) Kilangwohngete doadoahk en Wehio. Soikeweisang mehn kerempwa kan me kin kauwehla mwahl ahnsou oh medemedewehte en sewese meteikan. Met pahn sewese iuk en kehlailda pwe ken dadaur mendahte ma mie soahng kan me kak kaluwetehla ahmw pwoson.—Kal. 6:1, 2.
Pitsang Kahn Kamakam Kowahlap oh Pidelong nan Koasoandi Kapw
13. Soangen doadoahk dahkei ong irail kan me pitsang Armakedon?
13 Mwurin Armakedon, tohto me kin wiewia me suwed mwohn re mehla pahn iasada oh anahne en sukuhliki sapwellimen Siohwa ahl akan. (Wiewia 24:15) Irail anahne en sukuhliki duwen en Sises tomw; laudsang met, irail anahne en sukuhliki en kaiahne pwoson pwe ren kak alehdi kapai kan en tomw wet. Irail anahne kesehla padahk likamw akan me re kin kamehlele oh kesehla arail mour en mahs akan. Irail anahne en sukuhliki en kawiliakapwala pein irail nin duwen Kristian mehlel kan. (Ep. 4:22-24; Kol. 3:9, 10) Irail sihpw teikan me pitsang Armakedon pahn ahneki doadoahk tohto. E pahn inenen kaperen en wia doadoahk ong Siohwa ni atail pahn saledeksang kasongosong kan en sampah suwed wet!
14, 15. Kawehwehda soangen koasoi kan nanpwungen irail me pitsang kahn kamakam kowahlap oh me pwung kan me kaiasada sang mehla.
14 Sounpapah lelepek kan en Siohwa me mehla mwohn en Sises ketido wia doadoahk en kalohk nin sampah pahn pil anahne sukuhliki soahng tohto kan nan ahnsowo. Irail pahn sukuhliki duwen sansalda en ihs Mesaia me inoupe mie, duwen ih me re kin kasikasik en kilang ahpw sohte tuhwong. Nan arail mour en mahs oko, irail kasalehdahier me re kin perenki weid pahn en Siohwa kaweid kan. Medewehla ia uwen e pahn kaperen oh pil wia pwais kaselel ehu en sewese irail—karasepe, en kawehwehiong Daniel pweidahn kokohp kan me e ntingihdi ahpw sohte wehwehki!—Dan. 12:8, 9.
15 Me kaiasada kan pahn sukuhliki sang kitail soahng tohto kan, ahpw ni mehlel, kitail pil pahn ahneki peidek tohto kan en idek rehrail. Irail kak en audehkihda kitail mengihtik kan duwen mehkan me wiawi nan Paipel me sohte oaritikpe kileldi. Ia uwen e pahn kaperen en esehda duwen oaritik kan me pid duwen en Sises mour sang rehn eh cousin Sohn Sounpapidais! Mehkan me kitail pahn esehda sang rehn sounkadehde lelepek pwukat uhdahn pahn kahrehiong atail kalahnganki Mahsan en Koht en laudsang mahs. Ladu lelepek en Siohwa kan me melahr—iangahki irail me iang pokon kalaimwun me mehla ni ahnsou en imwin rahn akan—pahn alehdi “iasadahng mour me mwahusang.” Irail tepikihda arail papah Siohwa nan sampah ehu me Sehdan kin kaunda. E pahn inenen kaperen ong irail en pousehla arail doadoahk en papah nan irair kaselel ehu nan sampah kapw!—Ipru 11:35; 1 Sohn 5:19.
16. Nin duwen me kokohpdahr, iaduwen Rahnen Kadeik pahn pweida?
16 Nan erein Rahn en Kadeiko, pwuhk kan pahn papahkpeseng. Pwuhk pwukat iangahki Paipel pahn wiahla utupen mehn kadeiki irail koaros me momour pwe en kak kasalehda ma re warohng alehdi mour soutuk. (Wadek Kaudiahl 20:12, 13.) Ni kaimwisekpen Rahnen Kadeiko, emenemen pahn ahnekier ahnsou mwahu en kasalehda pali dahieu irail mih ie ong ihs me ahneki pwungen kaunda mehkoaros. E pahn uhpahiong kaundahn Wehin Koht oh mweidohng Sihmpwulo en kahluwalahng ih “ni pilen komour”? De e pahn pelian oh sohte men uhpahiong Wehin Koht? (Kaud. 7:17; Ais. 65:20) Ni ahnsowo, koaros pohn sampah pahn kak wiahda pein arail pilipil oh sohte mehkot duwehte soh unsek oh irair suwed kak kerempwa arail pilipil kan. Sohte emen pahn peidengki en Siohwa pwung en kopwung oh kadeik. Irail me suwed kante me sohte men koluhla me pahn kasohrala soutuk.—Kaud. 20:14, 15.
17, 18. Soangen mehn kaperen dahieu me Kristian keidi kan oh sihpw teikan kin ngoangki kasikasik?
17 Kristian keidi kan rahnpwukat, me warohngehr en ale pwais en Wehio, kin ngoangkihla kasikasik en kaunda ni erein Rahnen Kadeik. Ia uwen ileile en pwais kaselel wet me re pahn ahneki! En ahneki pwais wet kin kamwakid irail en idawehn kaweid me Piter kihong tepin Kristian brother kan: “Kumwail nantihong laudsang mahs pwe sapwellimen Koht luhk oh pilipil ong kumwail en wiahla momour poatopoat ehu: pwe ma kumwail pahn wia met, kumwail sohte pahn kesehla amwail pwoson. Pwe ih duwen met amwail pahn ahnekihla pwung unsek en pedolong nan wehi soutuk en atail Kaun oh Sounkomour Sises Krais.”—2 Pit. 1:10, 11.
18 Sihpw teikan kin iang perenkihda duwen dahme riarail me keidi kan kin kasikasik. Irail kin koasoanehdi teng en utungada oh sewese irail. Nin duwen sapwellimen Koht kompoakepah kan rahnwet, irail kin mwekidkihda en wia ni uwen arail kak koaros nan sapwellimen Koht doadoahk. Erein Rahnen Kadeiko, irail pahn inenen perenkihda en utungada Koht ki mohngiong unsek ni en Sises pahn kahluwairaillahng pilen komour. Eri—lao pweidahr—re pahn wiahla aramas me warohng wia sapwellimen Siohwa ladu en sampah kohkohlahte!—Rom 8:20, 21; Kaud. 21:1-7.
Ke Tamataman?
• Dahme kin iang pidada sapwellimen Sises dipwisou kan?
• Iaduwen pokon kalaimwuno kin sewese riarail me keidi kan?
• Mehnia pwais kaselel oh dahme irail pokon kalaimwun kin kasikasik en paiekihda?
• Ia duwen ke kin kilangwohng Rahnen Kadeik?
[Kawehwehpen kilel kan nan ehu ehu pali 25]
Irail pokon kalaimwun kin kamwakeledahr arail likou kan oh ntahn Sihmpwulo me re mwakelekelkilahr
[Kawehwehpen kilel kan nan ehu ehu pali 27]
Dahme ke kasik en esehda sang me lelepek kan me kaiasada?