Dahme Ahnsou Kohkohdo Kin Kolokol ong Kitail?
DAHME KAHREHDA PASAPENG ONG PEIDEK WET KESEMPWAL? Ahn aramas men madamadau ong dahme pahn wiawi lakapw kin kamwakid mwomwen eh wiewia de tiahk kan rahnwet. Karasepe, irail kan me sohte arail koapworopwor ong ahnsou kohkohdo, ele pahn kin ahneki soangen lamalam wet: “Kitail en kin kamakamadipwte, pwe lakapw kitail pahn mehla.” (1 Korint 15:32) Soangen madamadau wet kin kalapw kahrehiong aramas kan en mwenge nohn laudla, kamam sakau, oh pwunod—met kin kahrehda irail en sohte kak ahneki lamalam meleilei.
Ma koasoandi en ahnsou kohkohdo koaros kohieng aramas me en pilada, eri kitail pahn sohte atail koapworopwor. Nan wehwe, pihl, oh sahpw pahn saminla laudsang dahme kitail kin kilang met. Kamasepwehk en dipwisoun mahwen kan oh aramas mwersuwed (terrorist) kan wie lalaudla. Soumwahu oh duhpek kin lelohng aramas lik kei nan rahnwet. Ahpw mendahki met, mie kahrepe mwahu ong kitail en ahneki koapworopwor.
Mendahki aramas kan sohte kak kohpada ni pwung dahme pahn wiawi ni ahnsou kohkohdo, Siohwa Koht ketin mahsanih: “Sangete nin tapio I kasalehda dahme pahn wiawi mwuhr, I kohpada mahsie dahme pahn wiawi.” (Aiseia 46:10) Dahme Siohwa ketin mahsanih me pahn wiawi ni ahnsou kohkohdo?
Dahme Paipel Mahsanih
Siohwa sohte pahn mweidala sampah de me momour kan pohn sampah en ohla laud lao eh pahn sohla kak mwahula. Ni mehlel Paipel inoukihda me Koht pahn “kauwehla irail kan me kin kauwehla sampah.” (Kaudiahl 11:18) Ki sapwellime Wehio, de koperment nanleng, Siohwa pahn kamwakelehsang suwed kan sampah oh pahn wahdo soangen irair kan me e kupwurki sangete nin tepio. (Senesis 1:26-31; 2:8, 9; Madiu 6:9, 10) Iren Paipel kan en mwuri kin oaralapihada dahme pahn wiawi ni ahnsou kohkohdo, oh kin kasalehda dahme pahn wiawi me pahn sair ahn emenemen mour pohn sampah.
Aiseia 35:5, 6. “Iei ahnsowo me maskun kan pahn pehdpeseng, oh me salengepon kan pahn rongada wasa. Me nehtuk kan pahn mwusikekda oh kahkahlek, oh me lohteng kan pahn ngisingiski ar peren. Pihl pahn kuspekda oh pwilwei nan saptehn.”
Daniel 2:44. “Koht en nanleng pahn ketin kauwada mwehi ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.”
Sohn 5:28, 29. “Ahnsou ehu pahn kohdo me irail koaros me mihmi nan sousou kan pahn rong kapitie [en Sises], oh re pahn pedoisang nan arail sousou kan.”
Kaudiahl 21:3, 4. “Pein Koht pahn kin ketiket rehrail oh e pahn wiahla ar Koht. E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”
Iaduwen Pasapeng Sang Paipel Kin Wahdo Meleilei Mehlel nan Atail Madamadau
Keieu, ngoaren koasoi wet ele nohn kaselel oh apwal ong kitail en kamehlele. Ahpw sapwellimen Koht inou pwukat, ah kaidehn ahn aramas. Oh Siohwa Koht “sohte kin ketin likamw.”—Taitus 1:2.
Ma ke pahn koapworopworki sapwellimen Koht inou kan oh peikiong sapwellime kosonned kan, ke pahn kak ahneki lamalam meleilei mendahki soangen kahpwal kan me ke kin lelohng. Mahwen, duhpek, soumwahu oh pil kahpwal en me mahlahr kan me kakete pil mehla—sohte ehu rehn kahpwal pwukat kak en kihsang ahmw meleilei kohkohlahte. Pwekida? Pwehki ke pahn kamehlele ni mehlel me sapwellimen Koht Wehio pahn kamwahwihala soangen kahpwal pwukat koaros.
Iaduwen ke kak ale soangen koapworopwor wet ni ahnsou kohkohdo? Ke anahne ken “kawiliakapwala” loalomw oh kamehlelehiong pein kowe “dahme kupwuren Koht—dahme mwahu, oh dahme e kin ketin kupwurperenki, oh dahme unsek.” (Rom 12:2) Ke pahn pil anahne pil ekei mehn kamehlele me pahn kasalehda me ke kak likih inou kan nan Paipel. E konehng ken tehk met. Ekei soahng kan me ke kin wia nan ahmw mour pahn wahdo meleilei laud ong ahmw madamadau.