Ketier en Krais—Ia Wehwehn Met ong Uhk?
“Dah kilelepen omwi ketier oh kaimwiseklahn koasoandi en mehkan?”—MAD. 24:3, NW.
1. Soangen peidek kesempwal dahieu sapwellimen Sises wahnpoaron kan idek reh?
KERENIONG sounpar riekid samwalahro, sapwellimen Sises wahnpoaron pahmen kihda peidek ehu ni ahnsou me irail patohdo kelehpwla rehn arail Soumas pohn Nahna Olip. Irail idek: “Ahnsou dah me mepwukat pahn wiawi, oh dah kilelepen omwi ketier oh kaimwiseklahn koasoandi en mehkan?” (Mad. 24:3, NW) Nan peideko, wahnpoaron ko idek ire kesempwal riau, “omwi ketier” oh “kaimwiseklahn koasoandi en mehkan.” Dahme ire pwukat kin pid duwen?
2. Dahme lepin lokaiao “kaimwisekla” kin pil wehwehkiong?
2 Kitail pahn tehkpene mahs wehwehn lepin lokaia “kaimwisekla,” ni lokaiahn Krihk syn·teʹlei·a. Paipel en New World Translation kin ahnsou koaros kawehwehdi lepin lokaia wet ong “kaimwisekla,” ahpw e pil kin kawehwehdi pil ehu lepin lokaiahn Krihk te’los ong “imwi.” Wekpeseng en wehwehn lepin lokaia riau pwukat kak rasehng mwomwen padahk ehu me kin wiawi nan Kingdom Hall. Kaimwiseklahn padahko iei ahnsou me brother me wia padahko kin doadoahngki kisin ahnsou ehu pwehn katamankin sounrongorong kan dahme e koasoia nan eh padahko oh e pil kin kasalehda iaduwen ire pwukat kak kamwakid irail. Imwin padahko iei ahnsou me brothero pahn doudi sang wasahn padahko. Ni mwohmwohte, nan Paipel, lepin lokaiao “kaimwiseklahn koasoandi en mehkan” kin pid erein ahnsou ehu me pahn kohkohla oh lel imwi.
3. Soahng dah kan me kin wiawi nan erein ahnsou en ketier en Sises?
3 Dahme lepin lokaia “ketier” me wahnpoaron ko idek duwen kin pidada? Met kohsang lepin lokaiahn Krihk pa·rou·siʹa.a Pa·rou·siʹa de ketier en Krais tepida sang ni ahnsou me Sises ketin wiahla Nanmwarki nanleng nan pahr 1914 lel “kahn kamakam kowahlap,” ahnsou me e pahn ketido pwehn kasohrehla me suwed kan. (Mad. 24:21, NW) Soahng tohto, me iangahki “imwin rahn akan” en koasoandi suwed kan, kihpenehn me pilipilda kan, oh arail iasadahn mour nanleng, kin wiawi nan erein ketier en Krais. (2 Tim. 3:1; 1 Kor. 15:23; 1 Des. 4:15-17; 2 Des. 2:1) Kitail kak nda me “kaimwiseklahn koasoandi en mehkan” (syn·teʹlei·a) kin peipeiante de pahrekiong erein ahnsou me adaneki ketier en Krais (pa·rou·siʹa).
Erein Ahnsou Reirei Ehu
4. Ia mwomwen ketier en Sises oh wiewia kan me wiawi nan mwehin Nohao kin pahrekpene?
4 Pa·rou·siʹa kin pid erein ahnsou reirei ehu me kin pahrekiong dahme Sises mahsanih me pid duwen eh ketier. (Wadek Madiu 24:37-39.) Tehk me Sises sohte ketin karasahiong ahnsoun eh ketier ong erein ahnsou mwotomwoto me Nohliko wiawi nan mwehin Noha. Ahpw, e ketin karasahiong eh ketier ong erein ahnsou reirei ehu me kohkohla lao lel ni Nohliko. Me iang wia kisehn erein ahnsowo iei ahn Noha kauwada warihmwo oh wia doadoahk en kalohk, oh pil ahnsou kan me kohkohla oh lel ahnsou me Nohliko wiawi. Soahng pwukat wiawi nan erein sounpar tohto. Ni mwohmwohte, ketier en Krais pil kin pid wiewia kan me pahn wiawi erein ahnsou me kohkohwong oh lel kahn kamakam kowahlapo, oh pil iangahkihte wiewia kan me pahn wiawi nan kahn kamakam kowahlapo.—2 Des. 1:6-9.
5. Iaduwen mahsen kan me kileldi nan Kaudiahl irelaud 6 kin kasalehda me ketier en Sises kin reireiki erein ahnsou reirei ehu?
5 Kokohp en Paipel teikan kin kasansalehda me ketier en Krais kin pid erein ahnsou reirei ehu ah kaidehn ihte eh ketido pwehn kasohrehla me suwed kan. Pwuhken Kaudiahl kin kasalehda me Sises me dake oahs pwetepwet men oh nihn ehu kohieng. (Wadek Kaudiahl 6:1-8.) Mwurin eh aleier nihn nin duwen Nanmwarki nan pahr 1914, Sises tepida “mwesel kohkohla, kolahng kalowehdi eh imwintihti kan.” Iren Paipel kan mwurin mwo uhd kasalehda duwen irail me tangodo mwuri kin dake oahs kan me soangsoangen poh kan. Irail pwukat kin wehwehkiong kokohp en mahwen, sohte itar en mwenge, oh soumwahu lusulus kan, oh soahng pwukat koaros kin wiawi nan erein ahnsou reirei en “imwin rahn akan.” Kitail kin kilang pweidahn kokohpo nan atail ahnsou.
6. Dahme Kaudiahl irelaud 12 kin sewese kitail en wehwehki duwen ketier en Krais?
6 Kaudiahl irelaud 12 kin kihda pil ekei oaritik kan me pid duwen kokoudahn Wehin Koht nanleng. Wasao, kitail wadek duwen mahwen me wiawi nanleng. Maikel—iei Sises Krais me sapwellimaniki pwukoa nanleng—oh sapwellime tohnleng kan mahweniong Tepil oh ienge tohnleng suwed kan. Ni imwilahn mahweno, Sehdan me Tepil oh ienge tohnleng kan piskendihongehr sampah. Paipel kasalehiong kitail me ni ahnsowo, Tepilo inenen lingeringer kowahlap “pwehki eh ese me eh ahnsou mwotomwotalahr.” (Wadek Kaudiahl 12:7-12.) Kahrehda e sansal me erein ahnsou ehu me “meid suwediong” sampah oh towe kan wiawi mwurin kokoudahn Wehin Krais nanleng.
7. Dahme keriau en Melkahka kin mahsanih duwe, oh soangen ahnsou dahieu me kileldi nan wasao?
7 Melkahka irelaud riau pil kin kohpada duwen ahnsou me Sises ketin wiahla Nanmwarki pohn Nahna Saion nanleng. (Wadek Melkahka 2:5-9; 110:1, 2.) Ahpw, melkahka wet pil kin kasalehda me pahn mie erein ahnsou ehu me kaun akan en sampah oh neirail aramas kan pahn kohwong arail ahnsou mwahu en kak pilada en uhpahiong kaundahn Krais. Irail kin ale kaweid ren “rong” oh doadoahngki arail madamadau oh kapwungala pein irail. Ei, nan erein ahnsowo, “meid pai irail koaros me kin wiahki KAUN-O sileparail” sang ni arail kin papah Siohwa oh sapwellime Nanmwarki idihdda men. Kahrehda, pahn mie ahnsou ieu me kaun akan oh neirail aramas kan kak doadoahngki pwehn wiahda wekidekla kan me anahn nan erein ketier en Krais, me sapwellimaniki manaman en nanmwarki.—Mel. 2:10-12.
Pohnese Kilelo
8, 9. Ihs me pahn pohnese kilel en ketier en Krais oh wehwehki wehwehn ireo?
8 Ni ahnsou me Parisi kan idek rehn Sises iahd Wehio pahn pwarodo, Sises ketin sapeng me Wehio sohte pahn kohdo “ni mwohmw sansal” ong arail madamadau. (Luk 17:20, 21) Me seupwoson kan sohte kak wehwehki met. Pwe ia mwomwen ar pahn kak wia met? Pwe irail pil sohte mwahn men pohnese me Sises iei arail Nanmwarki en ni ahnsou kohkohdo. Eri, ihs me pahn pohnese kilel en ketier en Krais oh wehwehki wehwehn ireo?
9 Sises ketin doulahte oh mahsanih me sapwellime tohnpadahk kan pahn kilang kilelo ni sansal duwehte arail kin kilang “lioal eh kin pir, oh linge ahpw kin kamarainihada wasa sang apalien lahng lel apali.” (Wadek Luk 17:24-29.) E kesempwal en tehk me Madiu 24:23-27 kin pil doadoahngki soangen ire wette ni en Sises kin ketin mahmahsanih duwen kilel en ketier en Krais.
Dih me Kilikilang Kilelo
10, 11. (a) Mahso, ia mwomwen atail wehwehki “dih” me kileldi nan Madiu 24:34? (b) Ihs me sapwellimen Sises tohnpadahk ko pahn lemeleme me wia kisehn “dih” wet?
10 Mahs, makasihn wet kawehwehdahr me nan mwehin tepin Kristian akan, “dih wet” me kileldi nan Madiu 24:34 (NW) wehwehki “irail mehn Suhs seupwoson akan me wie momour nan erein soangen ahnsoutehkis.”b Kawehweo mwomwen pwung pwehki nan ire teikan koaros, Sises kin ketin doadoahngki lepin lokaia “dih,” me Paipel en Pohnpei kin kalapw kawehwehdi ong “aramas en ahnsou wet,” ni mwomwen irair suwed ehu, oh pali laud en ahnsou, Sises kin ketin kapatahiong soangen lepin lokaia duwehte “suwed” pwehn kawehwehda ia mwomwen diho. (Mad. 12:39; Mark 8:38; Luke 11:29, 30) Kahrehda pahr kan me samwalahr ko, makasihn wet kin kasalehda me nan pweidahn kokohpo nan atail ahnsou, Sises ketin mahmahsanih duwen “dih” suwed en seupwoson akan me pahn kilang pweidahn kilel en “kaimwiseklahn koasoandi en mehkan” (syn·teʹlei·a) oh imwin koasoandi wet (teʹlos).
11 Mehlel me ni ahnsou me Sises kin ketin doadoahngki lepin lokaia “dih” ni mwomwen irair suwed ehu, e kin ketin mahmahsanih duwen aramas suwed akan nan ahnsowo. Ahpw iaduwen, iei ih uhdahn wehwehn sapwellime mahsen me kileldi nan Madiu 24:34? Tamanda me sapwellimen Sises tohnpadahk pahmeno patohdo “kelehpwla reh.” (Mad. 24:3) Pwehki Sises sohte ketin kapatahiong soangen lepin lokaia duwehte “suwed” ni ahnsou me e ketin mahmahsanihong irail duwen “dih wet,” ahpw wahnpoaron ko pahn wehwehki ni soh peikasal me pein irail oh iengerail tohnpadahk kan me wia kisehn “dih” me sohte pahn mehla “lao mepwukat koaros pahn pweida.”
12. Iaduwen iren Paipel kan kin kasalehda ma ihs me Sises kin mahmahsanih duwe ni ahnsou me e ketin doadoahngki lepin lokaiao “dih”?
12 Ia poahsoanpen kawehwe wet? Sang ni atail tehk kanahieng iren Paipel kan. Sises mahsanih nan Madiu 24:32, 33: “I men kumwail en ale padahk ehu sang ni tuhke me adaneki pik. Ma rahntuhke pwoatet kin pohndipwla oh mwuterekla oh teh kan kin tapihada os nin rah kan, kumwail kin esehki me rahk kerendohr. Eri, pil duwehte, ma kumwail pahn kilang mepwukat koaros eh wiawi, kumwail pahn esehki me ahnsawi kerendohr, me e nektehn tepida.” (Pil kilang Mark 13:28-30; Luk 21:30-32.) Mwurin mwo, Madiu 24:34 (NW) mahsanih: “Dih wet sohte pahn mehla lao mepwukat koaros pahn pweida.”
13, 14. Dahme kahrehda kitail kak nda me “dih” me Sises mahmahsanih duwe iei sapwellime tohnpadahk ko?
13 Sises mahsanih me sapwellime tohnpadahk kan, me pahn kereniong keikihdi ngehn sarawi, iei irail me anahne koasoanehdi arail madamadau ni ahnsou me re kilang “mepwukat koaros” eh wiawi. Eri e sansal me Sises ketin mahmahsanih duwen sapwellime tohnpadahk kan ni ahnsou me e mahsanih mahsen pwukat: “Dih wet sohte pahn mehla lao mepwukat koaros pahn pweida.”
14 Weksang me seupwoson kan, sapwellimen Sises tohnpadahk kan sohte pahn ihte kilang kilelo ahpw re pil pahn wehwehki wehwehn kilelo. Irail pahn “ale padahk ehu” sang pweidahn kilelo oh “esehki” uhdahn wehwehn kilelo. Irail pahn uhdahn wehwehki me “ahnsawi kerendohr, me e nektehn tepida.” Mendahki mehn Suhs seupwoson akan oh Kristian me keidi lelepek kan koaros kilangada ekei pweidahn sapwellimen Sises mahsen kan ahnsowo, sapwellime tohnpadahk keidi kante me kak ale padahk sang soangen wiewia pwukat—irail kelepw kak wehwehki ia uhdahn wehwehn dahme re kilikilang.
15. (a) Nan atail ahnsou, ihs me kin wiahda “dih” me Sises ketin mahsanih duwe? (b) Dahme kahrehda kitail sohte kak kapatahda ia uwen werei en “dih wet”? (Kilang koakon nan pali 29.)
15 Irail akan me sohte wehwehki padahk mehlel en Koht nan atail ahnsou kin pehm me sohte soangen “mwohmw sansal” ehu me kin pwarada me pid duwen kilelepen ketier en Sises. Irail kin lemeleme me mehkoaros duweduwehte sangete mahs. (2 Pit. 3:4) Ahpw ni pali teio, rien Krais me keidi lelepek kan, me iei pwihn ehu rahnwet me kin mwete Sohn, kin pohnese kilelo ni sansal duwehte re kak kilang lioal eh kin pir, oh re pil wehwehki uhdahn wehwehn kilelo. Nin duwen ehu pwihn, irail me keidi pwukat kin wiahda “dih” en aramas akan me kin momour ni ahnsoutehkis nan atail ahnsou me sohte pahn mehla “lao mepwukat koaros pahn pweida.”c Met kin kasalehda me ekei rien Krais me keidi kan pahn momour pohn sampah ni ahnsou me kahn kamakam kowahlap me kokohpdahr pahn tepida.
“Kumwail Pepehd oh Mwasamwasahn”
16. Dahme sapwellimen Krais tohnpadahk koaros anahne wia?
16 Kitail anahne wia laud sang ihte pohnese kilelo. Sises ketin doula oh mahsanih: “Eri, dahme I ndaiong kumwail, I pil ndaiong aramas koaros: kumwail pepehd oh mwasamwasahn!” (Mark 13:37) Sohte lipilipil ma kitail kisehn me keidi kan de pokon kalaimwun, ih me keieun kesempwal ong kitail iei en kapwaiada met. Sises ketin wiahlahr Nanmwarki nan pahr 1914 oh met daulihlahr sounpar duweisek samwalahro. Mendahki e sohte mengei, kitail anahne kasalehda me kitail onopada mwahu oh mwasamwasahn. Atail wehwehki me Krais ketier nanleng oh kakaun nin duwen Nanmwarki men kak sewese kitail en wia met. Met pil kak katakatamankin kitail me ni ahnsou keren, e pahn ketido pwehn kasohrehla sapwellime imwintihti kan ni “ahnsou me [kitail] sasairki.”—Luk 12:40.
17. Iaduwen atail wehwehki ire wet kin kamwakid kitail, oh dahme kitail anahne koasoanehdi teng en wia?
17 Atail wehwehki ia wehwehn ketier en Krais kak sewese kitail en kalaudehla atail pepehm en karuwaru. Kitail ese me Sises ketier oh ketin kakaun nanleng nin duwen Nanmwarki sangete nan pahr 1914. Ni ahnsou keren, e pahn ketido pwehn kasohrehla me suwed kan oh wahdo wekidekla laud kan pohn sampah pwon. Kahrehda kitail anahne koasoanehdi teng laud sang mahs en kaukaule iang doadoahk me Sises ketin kohpadahr ni eh mahsanih: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin [teʹlos] sampah ahpw pahn kohdo.”—Mad. 24:14.
[Nting tikitik me mi pahs]
a Wehwehn pa·rou·siʹa kin sansalda sang wekpeseng en ahn Pohl “mihmi rehmwail” oh “dohsang kumwail” me kileldi nan 2 Korint 10:10, 11 oh Pilipai 2:12. Me pid duwen oaritik kan, kilang pwuhken Insight on the Scriptures (Kawehwehpen Iren Paipel kan), Volume 2, pali 676-9.
b Kilang Kahn Iroir, May 1, 1996, pali 22-26, 28-30.
c Erein ahnsou me “dih wet” kin momour ie kin pahrekiong erein ahnsou me sansalda nan keieun kasansal me pwarada nan pwuhken Kaudiahl. (Kaud. 1:10–3:22) Pweidahn kilel en rahnen Kauno tepida sang nan pahr 1914 oh kohkohla lel ahnsou me keidi lelepek kan koaros melahr oh iasada.—Kilang Revelation—Its Grand Climax At Hand! (Kaudiahl—Eh Kaimwiseklahn Pweida Kowahlap Kerendohr!), pali 24, parakrap 4.
Iaduwen Ke Pahn Sapeng?
• Iaduwen kitail kin ese me ketier en Sises kin reireiki erein ahnsou reirei ehu?
• Ihs me kin pohnese kilel en ketier en Krais oh wehwehki wehwehn kilelo?
• Ihs me wiahda dih nan atail ahnsou me kileldi nan Madiu 24:34?
• Dahme kahrehda kitail sohte kak kapatahda ia uwen werei “dih wet” pahn momour?
[Kawehwehpen kilel kan nan ehu ehu pali 29]
Kitail kak Kapatahdea Ia Uwen Werei “Dih Wet” Pahn Momour?
Lepin lokaiao “dih” kin wehwehki aramas akan me wekpeseng arail sounpar kan ahpw mour nan ahnsou ehute. Karasepe, Eksodus 1:6 mahsanih: “Eri, Sosep oh rie ko, iangahki diho koaros, melahr.” Sosep oh rie kan ar sounpar wekpeseng, ahpw irail kin momour nan erein soangen ahnsoutehkis. Ekei rien Sosep ko ipwidi mwohn ih ahpw re pil iang kisehn “diho.” Ekei irail mour werei sang Sosep. (Sen. 50:24) Meteikan en “diho,” me duwehte Pensamin, me ipwidi mwurin Sosep ele momourte mwurin Sosep mehla.
Kahrehda ni ahnsou me lepin lokaia “dih” kin kadoadoahk me pid aramas akan me kin momour nan erein ahnsou ehu, uhdahn ia uwen werei en ahnsowo sohte kak sansalda, ihte kitail kak nda me mie imwin ahnsowo oh e sohte pahn nohn werei. Kahrehda ni eh ketin doadoahngki lepin lokaia “dih wet” me kileldi nan Madiu 24:34, Sises sohte ketikihong sapwellime tohnpadahk ko wiepe ehu pwehn koasoanehdi iahd “imwin rahn akan” eh pahn imwisekla. Ni pali teio, Sises kin ketin kasansalehda me irail sohte pahn ese “iahd e pahn leledo.”—2 Tim. 3:1; Mad. 24:36.
[Kawehwehpen kilel kan nan ehu ehu pali 26]
Mwurin eh aleier nihn nin duwen Nanmwarki nan pahr 1914, Sises kin ketin “kohkohlahng kalowehdi eh imwintihti kan”
[Kawehwehpen kilel kan nan ehu ehu pali 28]
“Dih wet sohte pahn mehla lao mepwukat koaros pahn pweida”