Kahlemengih Misineri me Keieu Lapalap
“Kumwail kahlemengih ie, duwehte ei kin kahlemengi Krais.”—1 KOR. 11:1.
1. Dahme kahrehda kitail anahne kahlemengih Sises Krais?
WAHNPOARON Pohl kin kahlemengih Sises Krais, me wia Misineri me keieu lapalap. Pohl kin pil kangoangehki ienge Kristian kan: “Eri, kumwail kahlemengih ie, duwehte ei kin kahlemengi Krais.” (1 Kor. 11:1) Mwurin en Sises ketikihong sapwellime wahnpoaron kan mehn kahlemeng en karakarahk ni eh widen patehnehrail ko koaros, e ahpw mahsanih ong irail: “I wiahiong kumwail mehn kahlemengih ehu, pwe kumwail en pil wia duwehte me I ahpwtehn kasalehiong kumwail.” (Sohn 13:12-15) Nin duwen Kristian en rahn pwukat kitail ahneki pwukoa kesempwal ehu en alasang Sises Krais nan atail lokaia kan, oh atail wiewia kan oh mwomwen atail kin kasalehda duwen kitail nan mour en ehuehu rahn.—1 Pit. 2:21.
2. Mendahki ma Governing Body sohte idihukada en wia emen misineri, soangen pepehm pwung dahieu me ke kak ahneki?
2 Nan artikel en mwowe, kitail sukuhliki me misineri men kin pekederlahng pwukoa en sounkalohk—emen me kin wahla rongamwahu ong meteikan. Me pid duwen met, Pohl kasalehda peidek kesempwal ekei. (Wadek Rom 10:11-15.) Tehk en wahnpoaron-o peidek: “Ia duwen arail kak rong, ma mahsenpe sohte pahn wiawihong irail?” Mwurin mwo e kasalehda sang nan kokohp en Aiseia duwen mahsan pwukat: “Meid lingan oh kaselel atail udiahl meninkeder kan ni ar kin wa kohdo rongamwahu!” (Ais. 52:7) Mendahki ke sohte idihdda en pekederlahng sahpw liki pwehn papah nin duwen misineri men, ke kak en ahneki pepehm en perenki wia emen sounkalohk ni ahmw kin kahlemengih Sises nin duwen sounkalohk men me kin ngoangki kalohki rongamwahwo. Sounpar samwalahro, sounkalohk kan en Wehio me 6,957,852 wia ‘pwais en sounkadehde en rongamwahu’ nan sahpw akan me tohtohki 236.—2 Tim. 4:5.
“Kiht me Keselahr At Mehkoaros oh Ideidawehn Komwi”
3, 4. Dahme Sises pwilikihdi nanleng oh dahme kitail en wia pwe kitail en kak idawehn ih?
3 Pwe Sises en kak kapwaiada sapwellime pwukoa pohn sampah, Sises “ketin tounmeteikihla mehkoaros, oh ketin wiahla ladu men” oh pwilikihdi moure nanleng oh sapwellime lingan. (Pil. 2:7) Sohte lipilipil dahme kitail kin wia ni atail kin kahlemengih Krais, met sohte kak pahrekiong dahme Sises wiahda ni eh ketido sampah. Ahpw kitail kak tengedi ni dadaur nin duwen sapwellime tohnpadahk kan me solahr kin sohpeila mwuri ong mehkan me kitail kak en ahneki nan en Sehdan sampah.—1 Sohn 5:19.
4 Ehu ahnsou wahnpoaron Piter patohwanohng Sises: “Maing, iet kiht me keselahr at mehkoaros oh ideidawehn komwi.” (Mad. 19:27) Piter, Andru, Seims, oh Sohn mwadangete pwilikihdi arail uhk kei ni ahnsou re alehdi luhk en idawehn Sises. Re solahr wia soused kan ahpw re wiakihla kalohk arail doadoahk. Nan Rongamwahu en Luk, Piter koasoia: “Maing, komw mwahngih mahs duwen kiht, pwe se tounmeteikilahr mehkoaros me aht oh iangkomwilahr.” (Luk 18:28) Pali laud en kitail sohte kin tounmeteikihla mehkoaros ‘me atail’ pwehn idawehn Sises. Ahpw kitail anahne en kin ‘tounmeteikihla pein kitail’ pwe kitail en kak wiahla emen me kin idawehn Krais oh ladu en Siohwa men me kin papah ih ki mohngiong unsek. (Mad. 16:24) Soangen ahl wet kin imwikihla kapai tohto kan. (Wadek Madiu 19:29.) En kin kahlemengih Krais ni atail kin ngoangki kalohk kin wadohng kitail peren nan atail mohngiong, ahpw mehlel ma kitail ahnekier pwais en sewese emen en karanihala Koht oh sapwellime Ohl kompoake.
5. Kawehwehda ehu ekspiriens me kasalehda dahme irail oko me seiloakla kousoanla nan sahpw teikan kin pilada en wia ni ar sukuhlikihdi padahk mehlel kan en Paipel.
5 Valmir, mehn Brazil men me kin koukousoan nan werengen Suriname kin wia emen soun repen kohl. E kin kamamsakau oh ahneki mour suwed. Ehu ahnsou ni e kin koukousoan nan kahnimw ehu wasao, Sounkadehdehn Siohwa kan tepiada onop en Paipel reh. E kin onop rahn koaros, wiahda wekidekla kan oh papidaisla. Ni e diarada me eh doadoahk kin kahrehong ih en apwaliki mourki mour me pahrekiong padahk kan en Paipel, e netikihla eh pesineso me kin wiahda mwohni laud oh pwurala Brazil rehn eh peneinei pwe en sewese irail en diarada padahk mehlel. Ni ahnsou me irail kin sukuhlikihdi padahk mehlel kan en Paipel, tohto me kin seiloakla oh mihla nan sahpw kepwehpwe kan pwehn repen elen mwohni laud kin pwurodo nan uhdakarail pwe ren kak sewese oh padahkiong arail peneinei kan oh meteikan en karanihala Siohwa. Irail sounkalohk kan en Wehio pwukat kin kasalehda mehlel arail ngoangki kalohk.
6. Dahme kitail kak wia ma kitail sohte kak kosoula nan wasa kan me sounkalohk kan en Wehio kin anahn laud?
6 Tohto Sounkadehde kan kin kosoula nan wasa kan me sounkalohk kin anahn laud. Ekei kin kohla papah ong doadoahk en kalohk nan ehu wehi tohrohr sang arail sahpw. Mwein pein kitail sohte kak kosoula nan ehu wasa tohrohr duwehte meteikan ahpw kitail kak alasang Sises ni atail kin wia uwen atail kak koaros nan doadoahk en kalohk.
Siohwa Kin Ketikihda Kasukuhl me Anahn
7. Soangen sukuhl dahkei mie me wiawihda en padahki irail kan me men kamwahwihala arail koahiek en wia sounkalohk kan en Wehio?
7 Duwehte en Sises kin alehdi kasukuhl sang rehn Semeo, kitail kak paiekihda kasukuhl me Siohwa kin ketikihda ahnsouwet. Pein Sises kin mahsanih: “Soukohp ako ntingihdier, ‘Irail koaros pahn ale padahk sang rehn Koht.’” (Sohn 6:45; Ais. 54:13) Rahnwet, mie sukuhl kan me kin wiawihda pwehn padahki oh kaunopada kitail en wia sounkalohk kan en Wehio. Kitail kak kamehlele me kitail koaros kin pil paiekihda met sang Theocratic Ministry Sukuhl nan pein atail mwomwohdiso kan. Pioneer kan kin ahneki kapai tohrohr en iang towehda Pioneer Service Sukuhl. Mie pioneer kei me wereilahr me kin paiekihda en pil pwurehng towehda soangen sukuhlo pak riau. Elder oh ministerial servant kan iangehr towehda Kingdom Ministry Sukuhl pwehn kamwahwihala arail koahiek en padahk oh arail doadoahk en papah me re kin wia ong iengerail sounkaudok kan. Tohto elder kan oh ministerial servant kan me sohte pwopwoud alehdier kasukuhl sang Ministerial Training Sukuhl, sukuhl ehu me kin kaunopada irail en sewese meteikan nan arail doadoahk en kalohk. Pil tohtohn irail brother oh sister kan me alehdi pwukoa en misineri kin alehdi kasukuhl sang Watchower Bible School of Gilead.
8. Ia uwen ekei brother kan kin kesempwaliki kasukuhl me Siohwa kin ketikihda?
8 Tohtohn Sounkadehdehn Siohwa kan kin wiahda wekidekla kan pwe ren kak towehda soangen sukuhl pwukat. Pwe en kak towehda Ministerial Training Sukuhl me pahn wiawi nan Canada, Yugu anahne en uhdi sang eh doadoahk en mwohni pwehki eh kaun en doadoahko sohte kamanahla eh pekipek en kommoal sang doadoahk. E koasoiahda: “I sohte koluhkihla met. Ni mehlel, ma re pahn kamanahla ei pekipek en kommoal-o e pahn mwomwen me re wia mehkot tohrohr ehu ong ie, mwein re pahn medewe me met pahn kahrehiong ie en tengedi ni lelepek ong doadoahko. Ahpw ahnsou wet I kakehr en wia soangen pwukoa sohte lipilipil kan me mwein ele I pahn kakete alehdihsang rehn Siohwa.” Tohto kin perenki tounmeteikihla soahng kan me mahs re kin kesempwaliki pwe irail en kak isaneki alehdi kasukuhl me Koht kin ketin ketikihda.—Luk 5:28.
9. Kihda ehu karasaras me kasalehda imwila mwahu kan sang padahk en Pwuhk Sarawi oh nsenoh.
9 Padahk en Pwuhk Sarawi oh nsenoh kin sewese emen en kekeirda mwahu oh koahiekla. (2 Tim. 3:16, 17) Medewehla dahme wiawi ong Saulo me kin mihmi Guatemala. E ipwidihte ahneki kisin kahpwal nan eh mwahliel oh emen eh sounpadahko ndaiong eh nohno en dehr idingkihong ih en sukuhliki wadawad oh nting pwe met pahn ihte katoutouehki eh madamadau. Saulo eri sohla iang sukuhl ni eh saikinte esehla wadawad oh nting. Ahpw emen ohl Sounkadehde men padahkiong Saulo en esehla wadawad ni eh doadoahngki brochure en Apply Yourself to Reading and Writing (Kaiahnuhkada en Wadawad oh Nting). Kedekedeo Saulo kekeirda lella koahiek en wia padahk nan Theocratic Ministry Sukuhl. Mwurin mwo, en Saulo nohno tuhwong sounpadahko ni ahnsou e kohla kalohk ihmw lel ihmw. Ni e rongada me Saulo esehlahr wadawad oh nting, sounpadahko idek reh ma e kak kahrehdo ih ni imweo ni wihk mwuri. Wihko leledo eri sounpadahko idek rehn Saulo: “Dahme ke pahn padahkiong ie?” Saulo tepiada wadek ehu parakrap sang nan pwuhk me adaneki “What Does the Bible Really Teach? (Dahme Paipel Uhdahn Padahngki?) Sounpadahko eri nda, “I sohte kak kamehlele me met ke uhd padapadahki ie.” E mwekidkihda oh e sohla kak koledi pilen mese oh pwoalehdi Saulo.
Padahk me Kin Kamwakid Mohngiong
10. Mehn doadoahk kaselel dahieu mie kitail en doadoahngki ni atail padahngki padahk mehlel kan en Paipel?
10 Sises kin poahsoanekihda eh padahk pohn dahme Siohwa kin ketin padahkiong ih oh kaweid kan me dierek nan sapwellimen Koht Mahsan me ntingdi. (Luk 4:16-21; Sohn 8:28) Kitail kin kahlemengih Sises ni atail kin kadoadoahki sapwellime kaweid oh kapwaiada padahk kan me mih nan Pwuhk Sarawi. Ihme kahrehda kitail koaros kin pwungkipene dahme kitail kin koasoia oh medemedewe me kin sewese kalaudehla atail kin miniminpene. (1 Kor. 1:10) Ia uwen kitail kin kalahnganki irail “ladu lelepek oh loalokong” kan me kin ketikihda sawasepen Paipel kan me kin sewese kitail en kolokol ehupenehn nan atail padahk kan oh pweidahn atail doadoahk en wia sounkalohkpen Wehio! (Luk 12:42; Mad. 28:19, 20) Ehu soangen pwuhk pwukat iei pwuhken Bible Teach me kawehwehdier ni uwen lokaiao 179.
11. Iaduwen emen sister en Idiopia powehdi uhwong sang ni e doadoahngki pwuhken Bible Teach?
11 En kin doadoahngki pwuhken Bible Teach ni ahnsou en onop Pwuhk Sarawi kin kakete kawekala mohngiong en irail me kin uhwong padahk mehlel kan. Ahnsou ehu, Lula, sister en Idiopia me wia emen pioneer, onohnop Paipel rehn tohnsukuhl emen ni en lih emen me tohnsukuhlo peneineiki pidelongete oh nda re sohte anahne soangen onopo. Ni meleilei Lula kawehwehiong peneinei en tohnsukuhlo ni eh doadoahngki karasaras en mwohni likamw me ntingdi nan irelaud 15 en pwuhken Bible Teach. Liho eri meleileidi oh mweidohng ira en doula ara onopo. Ni mehlel, e iang mih mwo ni ara pwurehng wia onop oh pein ih pekihda emen en onop reh ni e pahn pwain onopo! Mwurinte mwo, e kin onop pak siluh nan ehu wihk oh kekeirda mwahu nan padahk mehlel.
12. Kihda ehu karasaras me kasalehda iaduwen me pwulopwul kan kin pweida ni arail padahngki padahk mehlel kan en Paipel.
12 Me pwulopwul kan kak sewese meteikan ni ar pahn doadoahngki pwuhken Bible Teach. Ni ahnsou me Keanu, me sounpar 11 kin mihmi Hawaii wadewadek nah pwuhko nan sukuhl, emen ienge me kin iang ih sukuhl peidek reh: “Dahme kahrehda ke sohte kin iang kasarawi holiday kan?” Keanu eri wadek pasapengo sang nan pwuhko nan appendix ong ire me koasoia “Kitail en Kin Iang Kasarawi Holiday kan?” E eri pahkala ni tepin pwuhko wasa me iren audepen pwuhko kin kairekdi oh idek rehn pwutako mehnia ire me e pahn keieu perenki. Ehu onop en Paipel eri tepida sang mwo. Pahr me ahpwtehn nek, Sounkadehdehn Siohwa kan wia onop en Paipel me tohtohki 6,561,426, tohtohn onop pwukat kin doadoahngki pwuhken Bible Teach. Ke kin doadoahngki mehn doadoahk kaselel wet ong onop en Paipel kan?
13. Ni ahl dahieu onop en Paipel kin kak kamwakid laud aramas akan?
13 En kin doadoahngki pwuhken Bible Teach ni onop en Paipel kak wia mehn kamwakid laud ong irail akan me kin inengieng wia kupwuren Koht. Pwopwoud ehu me wia doadoahk en special pioneer me kin mihmi Norway tepiada onop en Paipel rehn ehu peneinei en Zambia. Pwopwoud en Zambia-o nainekier serepein silimen oh re sohla men pwurehng naineki seri. Eri ni ahnsou me liho liseianda, ira koasoanehdi me re pahn kaiohla serio. Mwohn rahn ekei me re pahn tuhwong toahkte, re onopki irelaudo me koasoia “Ahneki Sapwellimen Koht Lamalam ong me Pid Mour.” Kilel me sansalda nan irelaudo duwen serio me mihmihte nan kapehden eh nohno inenen kamwakidada pwopwoudo me kahrehiong ira en kauhdi ara koasoandi en kaiohla neira serio. Ira pousehla kakairada oh kamwahwihala ara nanpwungmwahu rehn Koht oh kihong eden neira serio en duwehte eden ohlo me onop rehra.
14. Karasahda iaduwen en kin mour pahrekiong dahme kitail padahngki kin wahdo imwila mwahu kan.
14 Mehkot kesempwal duwen en Sises elen padahk iei eh kin mour pahrekiong dahme e kin padahngki. Me pid ire wet, tohto aramas akan kin pwungki tiahk mwahu en Sounkadehdehn Siohwa kan, ni ar kin alasang Sises. Ohl en pesines men nan New Zealand were sidohsa aramas kauwehla oh pirapahsang eh kisin kapang-o. E kairehkin met ong emen police me nda: “Ihte ahmw pahn kak pwurehng ale ahmw kepwe kan, ma emen Sounkadehdehn Siohwa kan me pahn diarada.” Emen lihen Sounkadehde me diarada kapang-o. Ni eh esehda met, ohl me ahneki kapang-o kohla ni imwen sistero. E nsenamwahula pwe e diarada me ehu nah doaropwe me inenen kesempwal mihmihte. Sistero ndaiong ih: “Ihte me keieu pwung ien wia en kapwurehwei ahmw kepwe kan pwehki ngehi emen Sounkadehdehn Siohwa kan.” Ohlen pesines-o pwuriamweikihla pwehki e tamanda dahme police-o padahkiong ih nimenseng en rahno. E kin sansal me Kristian mehlel kan kin mour pahrekiong padahk kan me dierek nan Paipel oh kin kahlemengih Sises.—Ipru 13:18.
Kahlemengih en Sises Tiahk Mwahu ong Aramas akan
15, 16. Iaduwen kitail kak kahluwahdo aramas akan ong padahk kan me kitail kin kalohki?
15 En Sises tiahk mwahu ong aramas akan kin kahrehiong irail en kin men rong sapwellime mahsan. Karasepe, sapwellime limpoak oh karakarahk kin kamwakid me aktikitik kan en keido mpe. E kin kasalehda nsenoh oh kin poakehla irail ko me kin kohdo reh oh kin kansenamwahwih ki irail lokaia kadek oh kamwahwihala me tohto sang arail soumwahu kan. (Wadek Mark 2:1-5.) Kitail sohte kak wia manaman kan ahpw kitail kak kasalehda limpoak, karakarahk oh poakehla aramas—irair akan me kak sewese aramas akan en alehda padahk mehlel.
16 Pepehm en poakehla kin kadoadoahk ni ahnsou me emen special pioneer me adaneki Tariua kohla kalohk rehn emen ohl mah me adaneki Beere me kin koukousoan nan ehu dekehn Kiribati kan me mih nan Palieir en Pacific. Mendahki ohlo kin mwomwen me e sohte men rong, Tariua tehkada me elep paliweren ohlo mwoator oh e poakehla ih. Ih eri peidek reh: “Ke rongehr duwen dahme Koht inoukihong me soumwahu kan oh me mahlahr kan?” Mwurin mwo e wadek ehu ire sang nan kokohp en Aiseia. (Wadek Aiseia 35:5, 6.) Ohlo perenkihda ireo me kahrehiong ih en koasoia: “Sounpar tohto kei I kin wadewadek Paipel oh misineri kan en ei sarawio kin mwemweitdo rehi, ahpw I saikinte kilangada ire wet nan Paipel.” Ehu Paipel Study tepida rehn Beere oh e kekeirda kalaudehla eh loalokongkihla padahk mehlel. Ei, e ahneki kahpwal en paliwar ahpw e kin tiengla mwowe sewese pwihn me kin mihmi pohn deke doh kan oh kin alu seli pohn sahpwo pwon kalokalohki Rongamwahwo.
Pousehla Ahmw Kin Kahlemengih Krais
17, 18. (a) Iaduwen ke kak wiahla sounkalohk pweida men? (b) Dahme irail akan me kin kesempwaliki arail doadoahk en kalohk pahn pwaisaniki?
17 Nin duwen ekspiriens kaperen kan en doadoahk en kalohk kin pwurepwurehng kasalehda, kitail kak wia sounkalohk pweida kei ma kitail kin kekeirda oh kasalehda irair mwahu kan me Sises kin kasalehda. Eri ia uwen e kin pwung kitail en kin kahlemengih Krais nin duwen sounkalohk ngoang kan!
18 Ni ahnsou me ekei nan mwehin Sises kin wiahla sapwellimen Sises tohnpadahk kan, Piter patohwan peidengki met: “Dahme pahn pwaisat?” Sises ketin mahsanih: “Irail koaros me tounmeteikilahr imwarail kan, riarail kan, samarail de inarail kan, de neirail seri kan, de sapwarail kan, pwehki ngehi, re pahn ale pak epwiki iangahki mour soutuk.” (Mad. 19:27-29) Ih met me kitail uhdahn pahn pwaisaniki ma kitail pahn pousehlahte kahlemengih Sises Krais, Misineri me keieu lapalap.
Ia Ahmw Pasapeng?
• Iaduwen Siohwa kin ketin padapadahki kitail en wiahla sounkalohk kan?
• Dahme kahrehda pwuhken Bible Teach kin sewese pweidahn atail doadoahk en kalohk?
• Iaduwen kitail kak kahlemengih Sises nin duwen atail tiahk mwahu ong aramas akan?
[Kawehwehpen kilel kan nan ehu ehu pali 21]
Ni ahnsou me Sises luhke Piter, Andru, Seims oh Sohn en idawehn ih, irail mwadang mwekidki en idawehn ih