Sises Krais—Misineri me Keieu Lapalap
“I kohdohsang reh, oh ih me ketin kadariehdo.”—SOHN 7:29.
1, 2. Ia wehwehn misineri, oh ihs me kak kahdaneki Misineri keieu lapalap?
DAHME ke kin medewehda ahnsou me ke rong lepin lokaia wet “misineri”? Ekei kin medewe duwen misineri kan sang palien lamalam akan me kose me irail Kristian kei, me pali tohto en irail kin iang pidada palien politik oh pil pesines kan nan sahpw akan me irail kin doadoahk. Ahpw ma kowe emen Sounkadehdehn Siohwa kan, ele ke kin medewehla duwen irail misineri kan me Governing Body kin kadarpeseng nan sahpw tohto kan nan sampah pwehn kalohki duwen rongamwahwo. (Mad. 24:14) Irail misineri pwukat kin ni soh roporop kihong laud arail ahnsou oh kehl ong kahrepe kesempwal wet pwehn sewese aramas akan en karanihala Siohwa Koht oh iang perenki ahneki nanpwung mwahu reh.—Seims 4:8.
2 Lepin lokaia pwukat “misineri” de “misineri kan” sohte kin pwarada nan nting kan en kawehwehpen Paipel en New World Translation of the Holy Scriptures. Ahpw ni mahsen en kawehwe duwen Episos 4:11, Reference Bible en New World Translation kin kasalehda me lepin lokaiahn Krihk wet “sounkalohki rongamwahu” kak pil kadoadoahk ong “misineri.” Siohwa iei Sounkalohki Rongamwahu keieu lapalap, ahpw e sohte kak en kahdaneki Misineri keieu lapalap pwehki sohte emen me kadarala ih wasakis. Eri me pid duwen Semeo nanleng, Sises Krais mahsanih: “I kohdohsang reh, oh ih me ketin kadariehdo.” (Sohn 7:29) En kasalehda uwen e ketin loalloale sampah, Siohwa poaronehdo sapwellime Iehros ong sampah. (Sohn 3:16) Sises kak en kahdaneki Misineri keieu lapalap, pwehki ehu kahrepe me e pekederdo sampah iei en “kadehdehda duwen me mehlel.” (Sohn 18:37) E kin inenen pweida mwahu nan eh kin kalohki rongamwahu en Wehio, oh kamwahu kan sang sapwellime doadoahk wet kin mihmiehte ong kitail. Karasepe, kitail kak en doadoahngki sapwellime ahl en padahk kan nan atail doadoahk en kalohk, sohte lipilipil ma kitail wia emen misineri de soh.
3. Soangen peidek dah kan me kitail en tehkpene?
3 Sapwellimen Sises pwukoa nin duwen sounkalohki Wehio men kin kihda soangen peidek duwehte met akan: Dahme Sises kin lelohng ni e wie ketiket sampah? Dahme kahrehda mwomwen eh kin padahk kin mwahu ong soahng koaros? Oh dahme kahrehiong eh doadoahk en kalohk en kin pweida mwahu?
Ahneki Irair en Men Tounmetei Mendahki Irair en Wasa Kapw
4-6. Soangen wekidekla dahkei me Sises kin lelohng ni eh pekederdihdo sampah?
4 Misineri kan rahnpwukat oh pil ekei Kristian akan me kin kosoula wasa me anahnepen sounkalohki Wehio kin inenen laud ele kin anahne en ahnla soangen irair en mour ehu me weksang soangen mour me irail kin tikida loale. Ahpw uhdahn kitail sohte kak en medewehla uwen wekpeseng laud me mih nanpwungen ahn Sises irair en mour sampah oh eh mour nanleng, wasa me e kin kousoan rehn Semeo nanpwungen tohnleng kan me kin papah Siohwa ki nsen mehlel oh mwakelekel. (Sohp 38:7) Ia uwen e wia wekpeseng laud ehu ong ih en kousoan nanpwungen aramas dipan akan nan sampah suwed ehu! (Mark 7:20-23) Sises pil anahne kanengamahiong irair en peirin me mih nanpwungen sapwellime tohnpadahk keren kan. (Luk 20:46; 22:24) Ahpw ni mehlel, sohte lipilipil soangen irair dahieu me lelohng ih ni e ketiket sampah, e kin ni unsek apwalihala koaros.
5 Sises sohte ni mwomwen manaman ehu mwadang esehla lokaia me aramas kin doadoahngki, e tepida sukuhliki sang ahnsou me e seri pwelel. Met wekidekla laud ehu sang eh kin wia soun kaweidih tohnleng kan nanleng! Nin sampah, Sises kin doadoahngki ehu “lokaiahn aramas akan.” Met inenen weksang ‘mahsen en tohnleng kan.’ (1 Kor. 13:1) Ahpw en lokaia kaselel, sohte aramas emen nan sampah me kak lokaia duwehte ih.—Luk 4:22.
6 Pil medewehla irair teikan me wia wekidekla laud kei ong sapwellimen Koht Ohl ahnsou me e ketidihdo sampah. Mendahki e sohte sohsohki dipen Adam, E wia aramasala, duwehla irail ko me mwuhr wiahla “rie ko,” de irail me keidi kan me kin idawehn ih. (Wadek Ipru 2:17, 18.) Ni pwong me wia kaimwisekpen eh mour sampah, Sises irehsang pein ih en dehr peki rehn Semeo nanleng en kadarodo “karis en tohnleng tohtohsang karis eisek riau.” Ahpw song medewehla irail tohnleng akan me e kin ahneki manaman pohrail ahnsou me e wia Tohnleng Lapalap, Maikel! (Mad. 26:53; Sud 9) Ei, Sises kin wiahda manaman akan, ahpw dahme e wiahda nin sampah sohte kak pahrekiong dahme e pahn kak wia nanleng.
7. Me pid duwen Kosonnedo, iaduwen en mehn Suhs akan kin mwekidki duwen met?
7 Erein ahnsou kan me e saikinte wie aramasala oh kin kahdaneki “Mahseno,” Sises ele kin wia sapwellimen Koht Sounkair men me kin kahluwa mehn Israel kan nan sapwtehn. (Sohn 1:1; Eks. 23:20-23) Ahpw mendahki irail “aleier sapwellimen Koht kosonned, me tohnleng kan ketikidohr, [irail] ahpw sohte peikiong!” (Wiewia 7:53; Ipru 2:2, 3) Ni mehlel, irail kaun en lamalam akan en mehn Suhs nan ahnsou en tepin Kristian kan sohte kin wehwehki ni pwung uhdahn wehwehn Kosonnedo. Karasepe, medewehla duwen kosonned en Sapad. (Wadek Mark 3:4-6.) Irail sounkawehwe kan en Kosonnedo oh pil Parisi ko “sohte nsenohki peikiong padahk kesempwal kan en Kosonnedo, duwehte pwuhng, kalahngan oh mehlel.” (Mad. 23:23) Mendahki met, Sises sohte pweiek oh uhdi sang en kadehdehda duwen me mehlelo.
8. Dahme kahrehda Sises kak wia sawaspatail?
8 Sises kin ahneki irair en men tounmetei. E kin mwekidki limpoak ong aramas oh kin nsenohki en sewese irail. Eh ngoangki wia sounkalohki rongamwahu sohte kin sohla. Oh pwehki e lelepek ong Siohwa erein e ketiket sampah, Sises “ketin wiahla pwarer en mour soutuk ong irail koaros me kin peikiong.” Laudsang met, “e kakehr ketin sewese irail kan [duwehte kitail] me kin ale songosong, pwehki pein ih ketin iangehr ale songosong sang ni sapwellime lokolok.”—Ipru 2:18; 5:8, 9.
Kasukuhlda Mwahu nin Duwen Sounpadahk Men
9, 10. Soangen kasukuhl dah me Sises alehdi mwohn e pekederdihdo sampah?
9 Mwohn Kristian en rahnpwukat kin pekederpeseng nin duwen misineri kei, Governing Body kin koasoanehdi irail en kasukuhlda. Iaduwen, Sises Krais pil kin ale kasukuhl? Ei, ahpw e sohte iang sukuhl en sounpadahk kan en ahnsowo mwohn e keikihdi ngehn sarawi oh wiahla Mesaia, oh e pil sohte ale kasukuhl sang kaun en lamalam ndand kan. (Sohn 7:15; pil kilang Wiewia 22:3.) Eri, dahme kahrehda Sises kin uhdahn warohng en wia kasukuhl?
10 Mendahki dahme e ele sukuhlikihsang eh nohno, Mery, oh pil sang eh pahpa, Sosep, me apwalihada ih, e kin ale kasukuhl me keieu kesempwal sang rehn Siohwa, me keieu warohng en kasukuhlihada ih. Me pid duwen met, Sises mahsanih: “I sohte kin kihda padahk sang pein ngehi; a Semei me ketin kadariehdo, pein ih me ketin mahsanih dahme I pahn koasoia oh kadehdehda.” (Sohn 12:49) Kitail en tehk me sapwellimen Koht Ohl kin ale kaweid pisetik kan ong dahme e pahn padahngki. Mwohn eh ketidihdo sampah, Sises kin ni mehlel kihong ahnsou laud en kin rongorong kaweid kan en Semeo. Mie pil ehu kasukuhl me kak mwahu sang met?
11. Ia uwen laud en ahn Sises kin kasalehda duwen en Semeo kin ketin apwalih aramas en sampah?
11 Sangete ahnsou me e kapikipikda, Iehroso kin inenen karanih Semeo. Erein e saikinte wia aramasala, Sises wehwehkihla mehlel sapwellimen Koht madamadau ong aramas en sampah sang ni eh kin kilang iaduwen Siohwa kin apwalih irail. Sapwellimen Koht limpoak ong tohnsampah kin sansalda rehn sapwellime Ohl ni uwe ieu me nin duwen emen me wie kasalepen Semeo ni unsek, e kak mahsanih: “Oh I pil perenkihda aramas akan koaros.”—Lep. Pad. 8:22, 31.
12, 13. (a) Iaduwen Sises kin ale kasukuhl ni e kin mahmahsanih mwomwen en Semeo kin apwahpwalih mehn Israel kan? (b) Iaduwen Sises kin doadoahngki kasukuhl me e alehdi?
12 Kasukuhl me Sises alehdi kin pil pidada en kin mahmahsanih iaduwen Semeo kin apwalihala irair apwal akan. Karasepe ehu, tehk duwen dahme Siohwa ketin wiaiong mehn Israel sapeik kan. Nan Nehmaia 9:28 mahsanih: “A ni ar meleileidi, re pwurehng wiahda dihp, komwi [Siohwa] eri ketin pwurehng mweidala pwe re en lohdiong pahn arail imwintihti kan. Ahpw ni ar kolulahr oh peki komwi en komourirailla, komw ketin karonge irail nanleng, oh pak tohtohie komw ketin kapitirailla nan omwi kalahngan lapalap.” En iang doadoahk oh pil mahmahsanih en Siohwa doadoahk, met kahrehiong Sises en pil kasalehda soangen pepehm en poakehla wette ong aramas akan nan eh wasahn kalohk.—Sohn 5:19.
13 Sises kin doadoahngki dahme e sukuhliki sang ni e kin kasalehda pepehm en poakehla ong sapwellime tohnpadahk kan. Ni pwohng mwohnte eh pahn pwoula, sapwellime wahnpoaron akan koaros me e kin loalloale “ahpw kesehla Sises oh tangdoaui.” (Mad. 26:56; Sohn 13:1) Wahnpoaron Piter pil kahmahmkihla Krais pak siluh! Mendahki met, Sises sohte kahrehiong sapwellime wahnpoaron kan en pehm me irail sohlahr kak pwuredo reh. E mahsanih ong Piter: “I kapakapkin uhk, Saimon, pwe omw pwoson en dehr luwetala. Oh ni omw pahn sapahldohng rehi, ke pahn kakehlahda pwoson en riomw kan.” (Luk 22:32) Israel en Koht kin pweidahier ni eh kokouda poahsoanki “wahnpoaron” ako, oh pohn poahsoan takai kan en kelen Serusalem Kapw kin mie mwaren irail wahnpoaron lelepek ehk riemeno me wia sapwellimen Sihmpwulo, Sises Krais. Leledo rahnwet, Kristian keidi kan oh iengerail me poadidi kan, “sihpw teikan,” kin kekeirda nin duwen pwihn ehu me kin kalohki duwen Wehio pahn limen Koht oh pil pahn kaunda en sapwellime Ohl kompoak.—Ep. 2:20; Sohn 10:16, NW; Kaud. 21:14.
Iaduwen Sises Kin Kasukuhl
14, 15. Ni ahl dah kan me sapwellimen Sises irair en kasukuhl kin weksang en sounkawehwe en Kosonned oh pil Parisi ko?
14 Iaduwen Sises kin doadoahngki dahme e sukuhlikihdi ong sapwellime tohnpadahk kan? Ma kitail pahn kapahrekihong en Sises kin padahkih aramas ong en kaun en lamalam en Suhs akan arail kin kasukuhl, kitail pahn kilang ni sansal uwen erpit de ileile en sapwellimen Sises padahk kan. Irail sounkawehwe en Kosonnedo kan oh pil Parisi kan kin ‘mwamwahliki mahsen en Koht pwe irail en daur pein arail tiahk kan.’ Weksang met, dahme Sises padahngki kin kaidehn sang pein ih, e kin ahnsou koaros padahngki sapwellimen Koht mahsen. (Mad. 15:6; Sohn 14:10) Kitail anahne en pil wia duwehte.
15 Pil mie ehu irair me kahrehda Sises en weksang douluhl irail kaun en lamalam akan. Me pid duwen sounkawehwe en Kosonned kan oh Parisi ko, e mahsanih: “Kumwail uhdahn pahn kin peikiong oh kapwaiada mehkoaros me re pahn kin padahkiong kumwail; a kumwail dehr alasang ar wiewia kan; pwe re sohte mwahn kin kapwaiada dahme re kin kapahrengkihwei.” (Mad. 23:3) Sises kin kapwaiada dahme e kin padahngki. Kitail en tehkpene ehu karasaras me pahn kadehdehda me met mehlel.
16. Dahme kahrehda kitail kak nda me Sises kin mour pahrekiong sapwellime mahsen kan me kileledi nan Madiu 6:19-21?
16 Sises kin kangoange sapwellime tohnpadahk kan en ngoangki “kepwehpwehkihla paien nanleng.” (Wadek Madiu 6:19-21.) Iaduwen, en Sises mour kin pahrekiong mehn kangoang wet? Ei, pwehki e kak ni mehlel kosoaia ki pein ih: “Kidien wel kan mie dewerail, oh menpihr en pahnlahng kan mie pasarail; a sohte wasa me Nein-Aramas kak wendi oh kommoaldi ie.” (Luk 9:58) Sises kin mourki mour ehu me e sohte anahne kedirepwki kepwe tohto. E kin ihte kedirepwkihla doadoahk en kalohki rongamwahu en Wehio, oh e kin kasalehda nan eh mour ia wehwehn en kin saledeksang pwunod me kin kohsang kepwehpwehkihla paien sampah. Sises pil kasalehda ia uwen e pahn mwahu en kepwehpwehkihla paien nanleng, wasa “me mer oh loangenmwet sohte kin kauwehla, oh wasa me aramas lipirap akan sohte kak dapengpeseng ihmw akan oh pirap ie.” Ke kin idawehn sapwellimen Sises mehn kangoang wet en kepwehpwehkihla paien nanleng?
Irair akan me Aramas Kin Poakepoakehki Sises
17. Soangen irair kaselel dah kan me kahrehda Sises en wia sounkalohki rongamwahu keieu mwahu?
17 Soangen irair dah kan me kahrehda Sises en wia sounkalohki rongamwahu keieu mwahu? Ehu iei sang eh madamadau de pepehm ong aramas akan me e kin sewese. Nanpwungen irair kaselel akan en Siohwa me Sises kin alasang iei aktikitik, limpoak, oh irair en poakehla. Tehk iaduwen irair pwukat kin kahrehdo aramas rehn Sises.
18. Dahme kahrehda kitail kak en nda me Sises kin aktikitik?
18 Ni eh pwungkihdahr en wia pwukoa wet en ketidihdo sampah, Sises kin “tounmeteikihla mehkoaros, oh ketin wiahla ladu men. E ketin wia-aramasala oh ketidohng sampah ni mwomwen aramas.” (Pil. 2:7) Iei met irair en aktikitik. Patehng met, Sises sohte kin kilengidih ong aramas de wiahkin irail me re sohte wad. E sohte ahneki soangen madamadau me duwehte, ‘I ketidihdo sang nanleng, eri kumwail anahne en rong ie.’ Weksang irail akan me kin kinehda me irail mesaia kei, Sises sohte kin suweiki de pakairkiseli duwen eh pwukoa en wia uhdahn Mesaia mehlelo. Ekei pak e kin mahsanihong aramas akan en dehr ndaiong meteikan ihs ih de dahme e wiahdahr. (Mad. 12:15-21) Sises men aramas akan en pein wiahda arail pilipil en idawehn ih poahsoanda sang dahme irail kilangehr. Ia uwen e wia kapai ehu ong sapwellime tohnpadahk kan en ese me arail Kaun sohte kin kasik me irail en duwehte tohnleng unsek kan me e kin ieiang ahnsou me e ketiket nanleng!
19, 20. Iaduwen limpoak oh pepehm en poakehla kin kamwakid Sises en sewese aramas akan?
19 Sises Krais kin pil kasalehda limpoak—irair me keieu kesempwal rehn Semeo nanleng. (1 Sohn 4:8) En Sises kin padahki aramas akan kin poahsoankihda eh limpoak ong irail. Karasepe ehu, tehk iaduwen eh pepehm ong kaun mwahnakapw emen. (Wadek Mark 10:17-22.) Sises kin ahneki pepehm en “limpoak” ong mwahnakapw menet oh kin men sewese ih, ahpw kaun pwulopwul menet sohte men netikihla eh diren kepwe kan pwehn idawehnla Krais.
20 Ehu irair kaselel me Sises kin sapwellimaniki iei irair en poakehla aramas. Nin duwen koaros aramas soh unsek, irail akan me kin mwekidki sapwellime padahk kan kin ahneki diren kahpwal. Pwehki e wehwehki duwen met, Sises kin padahkih irail ki elen kadek oh poakehla. Pwehn karasahda: Mie ehu ahnsou, Sises oh sapwellime wahnpoaron kan inenen kedirepwla laud oh sohla kak pil diarada ahnsou en mwenge. Ahpw ia en Sises pepehm ahnsou me e mahsanihada lapalahn pokon ehu? “E ahpw kupwurohkinirailla. Pwe re rasehng pelin sihpw ehu me sohte silepe. Ih eri ketin tapihada kawehwehiong irail soahng tohto.” (Mark 6:34) Sises ketin mwahngih duwen irair kompoake me aramas akan nan eh wasa kin ahneki oh kin doadoahngki eh kehl pwehn padahki irail oh wiahda manaman akan pwehn wia kamwahuparail. Ekei kin kakaranihala irail ong Sises pwehki eh irair kaselel kan, ekei mwekidki eh mahsan kan, oh wiahla sapwellime sounkalohk kan.
21. Dahme kitail pahn koasoiapene nan artikel en mwuhr?
21 Artikel en mwuhr pahn kasalehda me mie soahng tohto me kitail kak sukuhliki sang sapwellimen Sises doadoahk en kalohk nin sampah. Ni ahl tohto dah kan me kitail kak kalaudehla atail kahlemengih Misineri me keieu lapalap, Sises Krais?
Ia Ahmw Pasapeng?
• Soangen kasukuhl dah me Sises alehdi mwohn eh ketido sampah?
• Iaduwen sapwellimen Sises irair en kasukuhl kin ileile sang en sounkawehwe Kosonned kan oh pil Parisi ko?
• Soangen irair kaselel dah kan me aramas kin poakepoakehki Sises?
[Kawehwehpen kilel kan nan ehu ehu pali 19]
Iaduwen Sises kin padahki pokon kalaimwun kan?