Kitail Anahne Sapwellimen Koht Kaweid ni Soahng Koaros
“Koht menet, iei atail Koht kohkohlahte; e pahn kin ketin kahluwa kitail erein ahnsou me pahn kohdo kan.”—MEL. 48:14.
1, 2. Dahme kahrehda kitail anahne idawehn sapwellimen Siohwa kaweid ah dehr likih pein atail loalokong, oh soangen peidek dah kan kin kohda?
E MENGEI kitail en wiahki mehkan me sohte katepe oh keper mehkan me katapan oh mwahu. (Lep. Pad. 12:11) Ma kitail uhdahn men wia mehkot me sohte konehng ong Kristian wia, mohngiongitail pahn kin kalapw wiahda kahrepe kan me mwomwen pwung kitail en wia. (Ser. 17:5, 9) Kahrehda, sounmelkahka men kin kasalehda eh erpit ni ahnsou me e kapakapohng Siohwa: “Komw ketin kadarodo sapwellimomwi marain oh mehlel pwe en kahluwa ie.” (Mel. 43:3) E kin likih Siohwa, ah kaidehn pein eh loalokong me sohte unsek, oh Siohwa iei eh utupen kaweid me keieu mwahu. Duwehte sounmelkahkao, kitail pil anahne sohpeiong Koht pwehn ale kaweid sang reh.
2 Ahpw, dahme kahrehda kitail anahne likih sapwellimen Siohwa kaweid laud sang kaweid teikan koaros? Iahd kitail anahne rapahki sapwellime kaweid? Soangen madamadau dahieu kitail anahne ahneki pwehn paiekihda sapwellime kaweid, oh iaduwen Siohwa kin ketin kahluwa kitail rahnwet? Kitail pahn tehkpene duwen peidek kesempwal pwukat nan artikel wet.
Dahme Kahrehda Kitail Anahne Likih Sapwellimen Siohwa Kaweid?
3-5. Dahme kahrehda kitail kak uhdahn likih sapwellimen Siohwa kaweid?
3 Siohwa iei Samatail nanleng. (1 Kor. 8:6) E uhdahn mwahngih soahng koaros duwen emenemen kitail oh e kak ketin kasawih mohngiongitail. (1 Sam. 16:7; Lep. Pad. 21:2) Nanmwarki Depit patohwanohng Koht: “Komw ketin mwahngih mehkoaros me I kin wia; sang wasa doh, komw ketin mwahngih ei lamalam akan koaros. Pil mwohn ei kin pato, komw mwahngiher dahme I pahn patohwan.” (Mel. 139:2, 4) Pwehki Siohwa mwahngih soahng koaros duwen kitail, sohte kahrepe kitail en peikasalki ma e mahsanih dahme keieu mwahu ong kitail. Oh pil ehu, Siohwa sapwellimaniki erpit unsek. E ketin mahsanih soahng koaros, soahng loal kan me aramas sohte kak kilang, oh mwahngih dahme pahn wiawi sang nin tapio. (Ais. 46:9-11; Rom 11:33) Ih me “Koht, ihete me kin sapwellimanki erpit ni unsek.”—Rom 16:27.
4 Patehng met, Siohwa kin ketin limpoakohng kitail oh ahnsou koaros kupwurki dahme keieu mwahu ong kitail. (Sohn 3:16; 1 Sohn 4:8) Nin duwen Koht limpoak men, e kin ketin kadek ong kitail. Tohnpadahk Seims ntingihdi: “Soangen wiawi sapan koaros oh kisakis mwahu koaros kin kohdihdo sang nanleng; re kin kohdihdo sang rehn Koht, Sounwiepen marain koaros en nanleng kan.” (Seims 1:17) Irail akan me kin ale kaweid sang rehn Koht kin paiekihda laud sapwellime kadek.
5 Oh pil, Siohwa me keieu lapalap. Me pid duwen ire wet, sounmelkahkao koasoia: “Mehmen me kin diar eh wasahn ruk rehn KAUN-O, mehmen me kin mihmi pahn silepen Wasa Lapalapo, iei ih me kak patohwanohng Koht, ‘Komwi me soundoarepei oh silepei. Komwi me ei Koht; me I kin likih.’” (Mel. 91:1, 2) Ni ahnsou me kitail kin idawehn sapwellimen Siohwa kaweid, kitail kin rapahki wasahn ruk rehn Koht me sohte kak sapwungala. Ma kitail lelohng uhwong kan, Siohwa pahn ketin perekitail. E pahn ahnsou koaros lelepek ong kitail. (Mel. 71:4, 5; Wadek Lepin Padahk 3:19-26.) Ei, Siohwa mwahngih oh kupwurki dahme keieu mwahu ong kitail, oh e sapwellimaniki manaman en ketikihong kitail dahme keieu mwahu. Ia uwen pweipwei ma kitail pahn pohnsehse sapwellime kaweid! Ahpw, iahd kitail anahne ale sapwellime kaweid?
Iahd Kitail Anahne Ale Kaweid?
6, 7. Iahd me kitail anahne ale sapwellimen Siohwa kaweid?
6 Ni mehlel, kitail anahne ale sapwellimen Koht kaweid erein atail mour sang ni ahnsou me kitail pwulopwul lao kitail mahla. Sounmelkahkao koasoia: “Koht menet, iei atail Koht kohkohlahte; e pahn kin ketin kahluwa kitail erein ahnsou me pahn kohdo kan.” (Mel. 48:14) Duwehte sounmelkahkao, Kristian loalokong kan sohte pahn uhdihsang sohpeiong Koht pwehn ale kaweid.
7 Mehlel, mie ahnsou kan me kitail kin pehm me kitail anahne mwadang ale sawas. Ekei pak kitail mih nan “apwal laud,” mwein lelohng kalokolok kan, soumwahu laud, de solahr doadoahk ni ahnsou me kitail sohte kasik. (Mel. 69:16, 17) Nan soangen ahnsou pwukat, e kansenamwahu en sohpeiong Siohwa pwehki kitail kamehlele me e pahn kakehlailih kitail pwe kitail en dadaurete oh e pahn ketin sewese kitail pwe kitail en wiahda pilipil mwahu kan. (Wadek Melkahka 102:17.) Ahpw, kitail pil anahne sapwellime sawas ni soangen ahnsou teikan. Karasepe, ni ahnsou me kitail koasoiong mehn mpatail kan duwen rongamwahu en Wehio, kitail anahne sapwellimen Siohwa kaweid ma kitail men atail padahk en pweida. Oh sohte lipilipil soangen pilipil dah me kitail en wiahda—me pid duwen mehn kamweit, likou oh kapwat, werek, doadoahk, sukuhl, de mehkot tohrohr—kitail kak wiahda pilipil pwung ihte ma kitail pahn idawehn sapwellimen Siohwa kaweid. Ni mehlel, kitail anahne ale kaweid ni soahng koaros nan atail mour.
Keper en Sohte Ale Sapwellimen Koht Kaweid
8. Dahme ahn Ihp wiewia kan kin kasalehda ni ahnsou me e kangala wahntuhke me sohte mweimwei?
8 Ahpw tamanda me kitail anahne perenki idawehn sapwellimen Siohwa kaweid. Koht sohte pahn ketin idingkihong kitail en wia met ma kitail sohte men wia. Tepin aramas me pilada sohte pahn idawehn sapwellimen Siohwa kaweid iei Ihp, oh eh mehn kahlemeng kin kasalehda me soangen pilipil suwed kak imwikihla kahpwal laud. Pil medewehla dahme eh wiewia kan kin kasalehda? Ihp kangala wahntuhke me sohte mweimwei pwehki e men ‘duwehla Koht pwe e pahn esehla dahme mwahu oh dahme suwed.’ (Sen. 3:5) Eh wiewia kan kin kasalehda me e men ale pwukoa me Koht ketin sapwellimaniki, oh e men wiahda pein eh pilipil me pid duwen dahme mwahu oh dahme suwed, oh sohte men idawehn sapwellimen Siohwa koasoandi kan. Kahrehda e soikala sapwellimen Siohwa pwuhng en kaunda. E men kaunda pein ih. Eh pwoud, Adam, pil iang wia soangen elen uhwongadaohte.—Rom 5:12.
9. Ma kitail pahn soikala sapwellimen Siohwa kaweid, dahme kitail kin ni mehlel wiewia, oh dahme kahrehda met me keieu sapwung?
9 Rahnwet, ma kitail sohte kin idawehn sapwellimen Siohwa kaweid, duwehte Ihp, kitail pil pahn pohnsehse me ih me sapwellimaniki pwuhng en koasoanehdi dahme mwahu oh suwed. Nna, medewehla duwen emen me kin ahnla kilang kilel suwed kan. Ma e kin iang mwomwohdisohn Kristian, e ese sapwellimen Siohwa koasoandi duwen ire wet. E sohte konehng en koasoi duwen mehkan me pidada tiahk samin, oh sohte konehng en kilang soahng pwukat. (Ep. 5:3) Sang ni eh kin soikala sapwellimen Siohwa koasoandi kan, soangen aramaso kin kasalehda me e kin sapwungki sapwellimen Siohwa pwuhng en kaunda oh soikala Sapwellime pwukoa en tapwi. (1 Kor. 11:3) Met me keieu sapwung pwe Seremaia koasoia, “sohte aramas emen me kaunda pein eh mour.”—Ser. 10:23.
10. Dahme kahrehda kitail anahne doadoahngki atail saledek en wiahda pilipil kan ni ahl me konehng?
10 Ekei ele pahn sapwungki dahme Seremaia koasoia oh dene pwehki Siohwa ketikihong kitail saledek en wiahda pilipil kan, e sohte kak kadeik kitail duwen iaduwen kitail kin doadoahngki saledeko. Ahpw, ken dehr manokehla me saledek en wiahda pilipil kan kin wia kaidehn kisakis te ahpw e pil kin wia pwukoa ieu. Kitail kin pwukoahki dahme kitail kin pilada en nda oh wia. (Rom 14:10) Sises mahsanih: “Ewen aramas kin kapwadewei audepen nan kapehde.” E pil mahsanih: “Lamalam suwed kan kin pwilisang nan kapehd en aramas oh kin kahrehda kamaramas, kamwahl, nenek, pirap, likamw, oh karaun likamw ape.” (Mad. 12:34; 15:19) Kahrehda atail lokaia kan oh wiewia kan kin kasalehda audepen mohngiongitail. Irail kin kasalehda uhdahn soangen aramas dah kitail. Ihme kahrehda Kristian loalokong men kin rapahki sapwellimen Siohwa kaweid ni soahng koaros. Ma e pahn wia met, Siohwa pahn ketin kupwurperenki ih pwehki e ‘kin kapwaiada sapwellime kosonned kan’ oh Siohwa pahn ketin “wiahda me mwahu” ong ih.—Mel. 125:4.
11. Dahme kitail kak sukuhliki sang poadopoad en Israel?
11 Tamanda duwen poadopoad en Israel. Ni ahnsou me wehio kin wiahda pilipil mwahu kan oh peikiong sapwellimen Siohwa kosonned kan, Siohwa kin ketin pere irail. (Sos. 24:15, 21, 31) Ahpw irail kin kalapw doadoahngki arail saledek ni ahl me sapwung. Ni mwehin Seremaia, Siohwa mahsanihong irail: “Re sohte peikiong ie, de rong ie. Pwe re wiahda soahng koaros me pein ar mohngiong suwed oh keptakai kin ndaiong irail. Irail ahpw suwesuwedlahte, sohte mwahula.” (Ser. 7:24-26) Ia uwen kansensuwed met! Kitail en dehr keptakai de nohn kesempwaliki atail ineng kan oh soikala sapwellimen Siohwa kaweid oh kehliki pein atail loalokong kan oh “suwesuwedlahte, sohte mwahula”!
Dahme Kitail Anahne Wia Pwehn Idawehn Sapwellimen Koht Kaweid?
12, 13. (a) Soangen irair dah kan kin kamwakid kitail en idawehn sapwellimen Siohwa kaweid? (b) Dahme kahrehda pwoson kesempwal?
12 Atail limpoak ong Siohwa pahn kamwakid kitail en men idawehn sapwellime kaweid. (1 Sohn 5:3) Ahpw, Pohl kin kasalehda pil ehu irair me kitail anahne ni ahnsou me e koasoia: “Pwoson me kitail kin weweidki, kaidehk marain en paliwar.” (2 Kor. 5:6, 7) Dahme kahrehda pwoson kesempwal? Siohwa kin ketin kahluwa kitail nan “ahl me pwung,” ahpw ahlo sohte kin kahluwa kitaillahng kepwe kan de pwais kan nan sampah wet. (Mel. 23:3) Ihme kahrehda kitail anahne pwoson kehlail kapai kan me kohsang atail kin papah Siohwa. (Wadek 2 Korint 4:17, 18.) Oh pwoson kin sewese kitail en itarki dahme kitail ahneki.—1 Tim. 6:8.
13 Sises kin ketin kasalehda me kaudok mehlel kin pid tounmetei, oh kitail anahne pwoson pwehn ahneki irair en tounmetei. (Luk 9:23, 24) Ekei tohnkaudok lelepek kan kin wiahda tounmetei laud, re kin dadaurete pahn kahpwal en mwohni, uhwong kan, aramas akan me kin lipilipilki irail, oh kalokolok laud. (2 Kor. 11:23-27; Kaud. 3:8-10) Pwoson kehlail kelehpw kak sewese irail en dadaurete oh kolokol peren. (Seims 1:2, 3) Pwoson kehlail kin sewese kitail en uhdahn kamehlele me idawehn sapwellimen Siohwa kaweid me kin keieu mwahu ahnsou koaros. E kin ahnsou koaros wia kamwahupatail. Kitail kin uhdahn kamehlele me kapai kan ong irail me kin dadaurete ni lelepek kin siksang kahpwal akan me kin wiawi ni ahnsou kis.—Ipru 11:6.
14. Dahme kahrehda Akar anahne kasalehda aktikitik?
14 Pil medewehla duwen kesempwalpen irair en aktikitik pwehn idawehn sapwellimen Siohwa kaweid. Karasepe en Akar, lih lidu en Sara, kin kasalehda met. Ni ahnsou me Sara wehwehkihda me e sohte kak naineki seri kan, e kihong Eipraam Akar, oh Akar liseianda ong Eipraam. Mwurin mwo, Akar aklapalapehngla Sara. Imwilahn met, Sara tepida “sakosakone” kahrehda Akar eh tangasang. Emen sapwellimen Siohwa tohnleng tuhwong Akar oh padahkiong ih: “Pwurala rehn liho, oh peki mahk reh.” (Sen. 16:2, 6, 8, 9) Mwein Akar mwahuki ekei kaweid teikan. Pwehn kapwaiada ahn tohnlengo kaweido, Akar pahn anahne kesehla eh aklapalap. Ahpw Akar kasalehda lamalam en aktikitik oh wia dahme tohnlengo padahkiong ih, oh nah pwutak, Ismael, ipwidi pahn epwelpen semeo.
15. Kawehwehda ekei irair kan me kitail anahne kasalehda aktikitik pwehn idawehn sapwellimen Siohwa kaweid.
15 En idawehn sapwellimen Siohwa kaweid kak wehwehki me kitail pil anahne kasalehda aktikitik. Ekei ele pahn anahne ale kaweid me ehu soangen mehn kamweit me irail kin perenki kin kansensuwedih Siohwa. Mwein emen Kristian kansensuwedih emen oh anahne peki mahk. De mwein e wiahda sapwung ehu oh anahne pohnese eh sapwungo. Iaduwen ma emen wiahda dihp laud ieu? E anahne kasalehda lamalam en aktikitik oh wehkadahng elder kan dipeo. Mwein emen pahn piskensang nan mwomwohdiso. Pwehn kasapahldo nan mwomwohdiso, e anahne kasalehda aktikitik oh koluhla oh wiliakapwala. Nan irair pwukat oh irair teikan me duwehte irair pwukat, mahsen en Lepin Padahk 29:23 kak sewese kitail: “Aklapalap pahn kahrehiong omw pahn pwupwudi, ahpw ma ke aktikitik, ke pahn waunla.”
Iaduwen Siohwa Kin Ketin Kahluwa Kitail?
16, 17. Iaduwen kitail kak uhdahn paiekihda Mahsen en Koht nin duwen utupen sapwellimen Koht kaweid?
16 Utupen sapwellimen Koht kaweid me keieu mwahu iei Paipel, Mahsen en Koht. (Wadek 2 Timoty 3:16, 17.) Pwe kitail en uhdahn paiekihda Mahsen en Koht, kitail en dehr awih lao kitail pahn lelohng kahpwal kan ah mwuri kitail rapahki mahsen kan nan Paipel me pahn kak sewese kitail. Kitail pahn anahne wadek Paipel rahn koaros. (Mel. 1:1-3) Ni ahl wet, kitail pahn esehla audepen Mahsen en Koht. Sapwellimen Koht madamadau pahn wiahla atail madamadau, oh kitail pahn onopada mwahu en lelohng kahpwal kan me kitail sohte kin kasik.
17 Patehng met, e pil kesempwal en doudouloale duwen dahme kitail kin wadek nan iren Paipel kan oh kapakapki ire pwukat. Ni ahnsou me kitail doudouloale duwen iren Paipel kan, kitail kak medemedewe iaduwen kitail pahn kak doadoahngki ire pwukat nan soangsoangen irair kan nan mour. (Mel. 77:12) Ni ahnsou me kitail lelohng kahpwal kan, kitail kin kapakapohng Siohwa oh peki sawas pwe kitail en diarada kaweid me kitail anahne. Sapwellimen Siohwa ngehn sarawi pahn sewese kitail en tamanda mouren kaweid en Paipel kan me kitail wadekehr nan Paipel de pwuhken sawaspen Paipel kan.—Wadek Melkahka 25:4, 5.
18. Ni ahl dah kan Siohwa kin ketin doadoahngki pirien en Kristian pwehn kahluwa kitail?
18 Atail pirien en Kristian pil wia ehu utupen sapwellimen Siohwa kaweid. Ehu kisehn pirien kesempwal wet iei “ladu lelepek oh loalokong” oh Governing Body me wiliandi pwihno, me kin kaukaule kihda padahk mehlel en Paipel me rasehng kisin tungoal sang nan pwuhk kan oh prokram en mihding kan oh kapokon kan. (Luk 12:42-44; pil kilang Wiewia 15:6, 22-31) Patehng met, nan pirien en Kristian, mie irail akan me kehlail arail nanpwungmwahu rehn Koht, keieu irail elder kan, me kin koahiek en kihda sawas kan oh kaweid kan me poahsoankihda Paipel. (Ais. 32:1) Me pwulopwul kan me kin tikida nan peneinei en Kristian mie arail utupen kaweid kesempwal. Ma arail pahpa oh nohno kan kin wia Kristian akan, Koht kin ketikihong pahpa oh nohno pwukat pwukoa en kihong irail me pwulopwul kan kaweid, oh me pwulopwul pwukat anahne rapahki kaweid sang rehn arail pahpa oh nohno kan.—Ep. 6:1-3.
19. Kapai dah kan kitail kin ahneki pwehki atail kin kaukaule rapahki sapwellimen Siohwa kaweid?
19 Ei, ni ahl tohto, Siohwa kin ketikihong kitail kaweid, oh kitail anahne paiekihda kaweid pwukat. Ni ahnsou me wehin Israel kin lelepek, Nanmwarki Depit koasoia: “At pahpa kahlap ako kin likih komwi; re likihkomwihla, oh komw ahpw ketin doareirailla. Re likweriong komwi, re ahpw pitla sang apwal; re likihkomwihla oh ar likilik ahpw kin pweida.” (Mel. 22:3-5) Ma kitail pahn likih Siohwa oh idawehn sapwellime kaweid, atail likilik pil pahn “pweida.” Atail koapworopwor sohte pahn sapwungala. Ma kitail pahn ‘Mweidohng Siohwa pein kitail oh likih ih’ oh sohte pahn likih pein atail loalokong, kitail pahn ale kapai laud pil ni ahnsou wet. (Mel. 37:5) Oh ma kitail pahn peikiong Siohwa oh dadaurete pwehki atail limpoakohng ih, kapai pwukat pahn mihmi rehtail kohkohlahte. Nanmwarki Depit ntingihdi: “KAUN-O kin kupwurperenki dahme pwung oh sohte kin likidmeliehla sapwellime aramas loalopwoat akan. E kin ketin sinsile irail ahnsou koaros . . . Me pwung kan pahn koukousoan nan sahpwo oh re pahn sapwenikihla kohkohlahte.”—Mel. 37:28, 29.
Ke Kak Kawehwehda?
• Dahme kahrehda kitail kin likih sapwellimen Siohwa kaweid?
• Dahme kitail pahn kasalehda ma kitail pahn soikala sapwellimen Siohwa kaweid?
• Ni soangen irair dah kei me Kristian men anahne kasalehda aktikitik?
• Iaduwen Siohwa kin ketin kahluwa kitail rahnwet?
[Kawehwehpen kilel kan nan ehu ehu pali 12]
Ke kin sohpeiong Siohwa ni soahng koaros nan ahmw mour?
[Kawehwehpen kilel kan nan ehu ehu pali 13]
Ihp soikala sapwellimen Siohwa pwuhng en kaunda
[Kawehwehpen kilel kan nan ehu ehu pali 14]
Soangen irair dah Akar anahne kasalehda pwehn idawehn ahn tohnlengo kaweid?