Dahme Pwung oh Sapwung: Paipel—Kaweid Likilik Ehu

KAWEID ME KITAIL ANAHNE

Nan Paipel, Siohwaa Koht ketin kawehwehda me aramas akan anahne sapwellime sawas oh re sohte kak pein kaweid ar mour. (Seremaia 10:23) Ihme kahrehda e ketikihdi kaweid me pid wiewia nan Paipel. E kin ketin poakohng aramas koaros oh e sohte kin ketin kupwurki kitail en wiahda pilipil suwed kan me pahn kamedekeikitailla oh kahpwalihala atail mour. (Deuderonomi 5:29; 1 Sohn 4:8) Laudsang met, pwehki eh wia Sounkapikpatail, e ketin sapwellimanki erpit oh kupwurokong en ketikihong kitail kaweid me pid tiahk me keieu mwahu. (Melkahka 100:3; 104:24) Ahpw Koht sohte kin ketin idingkihong aramas akan ren momourki sapwellime koasoandi kan.

Siohwa ketikihong tepin ohlo oh liho, Adam oh Ihp soahng koaros me ira anahne pwe ira en kak nsenamwahu. (Senesis 1:​28, 29; 2:​8, 15) E pil ketikihong ira kaweid mengei kan me e ketin kupwurki ira en peikiong. Ahpw, e ketin mweidohng ira en pein pilada ma ira pahn idawehn kaweid pwuko de soh. (Senesis 2:​9, 16, 17) E kansensuwed me Adam oh Ihp pilada ira en momourki pein ara koasoandi a kaidehn sapwellimen Koht koasoandi. (Senesis 3:6) Ia imwilahn met? Ia duwe, aramas akan kin nsenamwahu ni ar kin wia dahme re medewe me pwung? Soh. Poadopoad kin kadehdehda me pohnsehse sapwellimen Koht koasoandi kan sohte kin wahdo popohl oh nsenamwahu poatopoat.—Eklesiasdes 8:9.

Paipel kin kihda kaweid me kitail anahne pwe kitail en wiahda pilipil mwahu kan me kak sewese kitail, sohte lipilipil soangen mour dah me kitail tikida loale. (2 Timoty 3:​16, 17; kilang koakon “Pwuhk Ehu ong Aramas Koaros.”) Tehk ia duwen Paipel eh kin wia met.

Kalaudehla omw ese dahme kahrehda aramas kin kahdaneki Paipel “mahsen en Koht.”—1 Deselonika 2:13. Kilang kisin kasdo Ihs me Kaweid Ntingdahn Paipel? nan jw.org/pon.

PAIPEL KIN KASALEHDA SAPWELLIMEN KOHT KAWEID KAN

Paipel kin padahkihong kitail sapwellimen Koht wiewia ong aramas akan sangete nin tapio. Audepe kan kin sewese kitail en wehwehki sapwellimen Koht madamadau duwen dahme pwung oh sapwung oh dahme mwahu oh suwed ong kitail. (Melkahka 19:​7, 11) Mehn kasukuhl kan me kitail sukuhlki kin ahnsou koaros mehlel oh pahn sewese kitail en wiahda pilipil mwahu kan nan atail mour ehuehu rahn.

Karasepe, tehk kaweid me mi nan Lepin Padahk 13:20: “Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.” Kaweid wet kin kadoadoahk nan atail ahnsou duwehte mahso. Paipel kin audaudki soangen kaweid katapan oh kesempwal kan.—Kilang koakon “Kaweid en Paipel Kin Mwahu Ahnsou Koaros.”

Ahpw ele ke pahn medewe, ‘Ia duwen ei kak ese me kaweid en Paipel pahn sewese ie?’ Iren mwurin met pahn koasoia ekei mour en aramas akan.