Dahme Pwung oh Sapwung: Pilipil Ehu me Ke Anahne Wiahda
Kaweid kan me kitail pilada en momourki pahn kak wiahiong atail mour en nsenamwahu de soh. Siohwa Koht ketin mwahngih met. Ihme kahrehda e ketin kupwurki kitail en momourki sapwellime koasoandi kan.
Siohwa ketin kupwurki kitail en ahneki mour nsenamwahu oh meleilei.
“Ngehi me KAUN-O omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie. Ma ke rongete ei kosonned akan! Eri, kupwuramwahu ahpw pahn pwilipwilwei rehmw rasehng piletik pwoat me sohte kin madada. Powehdi pahn lelohng uhk, rasehng iloak kan me kin pwungupwungdohng ni oaroahr.”—Aiseia 48:17, 18.
Nin duwen Sounkapikpatail, Koht ketin mwahngih dahme keieu mwahu kitail en momourki. E ketin kupwurki kitail en peikiong sapwellime kaweid pwehki met pahn mwahuong kitail. Ni atail kin peikiong sapwellimen Koht kehkehlik kan, kitail sohte anahne pwunodki ma atail pilipil kan pahn imwila mwahu. Kitail pahn wiahda pilipil pwung ahnsou koaros, pilipil me pahn kahluwalahng popohl oh nsenamwahu.
Siohwa sohte ketin kupwurki kitail en wia dahme kitail sohte kakohng.
“Kosonned wet me I padapadahkihong kumwail rahnwet, kaidehkin kosonned apwal ehu ong kumwail de dohsang kumwail.”—Deuderonomi 30:11.
Ni atail kin momourki sapwellimen Koht koasoandi kan mwein kitail pahn anahne wekidala mwomwen atail madamadau oh wiewia. Ahpw, Siohwa sohte ketin kupwurki kitail en wia laudsang dahme kitail kakohng. Nin duwen Sounkapikpatail e ketin mwahngih dahme kitail kakohng. Oh ni atail esehla Siohwa, kitail pahn diarada me “sapwellime kehkehlik kan me sohte apwal.”—1 Sohn 5:3.
Siohwa ketin inoukihda me e pahn ketin sewese irail kan me pilada en momourki sapwellime koasoandi kan.
“Ngehi, KAUN-O, amwail Koht; ngehi me kin kakehlakei kumwail, oh mahmahsanihong kumwail, ‘Kumwail dehr masak, pwe I pahn sewesei kumwail.’”—Aiseia 41:13.
Kitail kak mourki mour me Koht ketin kupwurki ong kitail pwehki e pahn ketin sewesei kitail. E kak ketin sewesei kitail sang nan sapwellime Mahsen, Paipel, me kin kihong kitail kangoang oh koapworopwor.
Aramas rar kei nan sampah pwon diarada me ni ar kin momourki koasoandi en Paipel kan, met kin kamwahwihala ar mour. Ke men kalaudehla omw wehwehki kaweid mwahu kan me mi nan Paipel? Ke kak tepida ni omw wadek kisin pwuhk Pereperenki Mour Kohkohlahte! me mi nan jw.org/pon oh sohte isepe. Iren mehn kasukuhl pwukat mi loale:
Ia Duwen Paipel Eh Kak Seweseiuk?
Paipel Kin Kihda Koapworopwor
Ke Kak Likih Paipel?
Ni omw pahn tehk Mahsen en Koht, Paipel, ke pahn diarada me audepe kan koadoadoahkte; e kin likilik ahnsou koaros, met oh “kohkohlahte.” (Melkahka 111:8) Dahme keieu mwahu kitail en momourki iei peikiong kaweid en Paipel kan. Ahpw, Koht sohte pahn ketin idingkihong kitail en wia met. (Deuderonomi 30:19, 20; Sosua 24:15) Pein kitail me anahne pilada.