Utung Sapwellimen Siohwa Koasoandi kan ong Tiahk

Siohwa Koht ketin koasoanehdi koasoandi ong tiahk en aramas. Karasepe, e ketin kasalehda me pwopwoud iei koasoandi poatopoat ehu nanpwungen ohl emen oh lih emen. (Mad. 19:4-6, 9) E ketin kalahdeki soangen tiahk samin koaros me pid wia nsenen pwopwoud. (1 Kor. 6:9, 10) E pil ketikihda kaweid kan me pid likou oh kapwat me pahn katohrehsang sapwellime aramas akan sang meteikan.​—Deud. 22:5; 1 Tim. 2:9, 10.

Nan sampah rahnwet, aramas tohto kin soikala sapwellimen Siohwa koasoandi kan. (Rom 1:18-32) Re kin mweidohng madamadau en me tohto en kamwakid mwomwen arail likou oh kapwat oh wiewia. Me tohto kin kalahki arail wiewia suwed oh kauwe irail kan me kin idawehn ehu soangen koasoandi tohrohr.​—1 Pit. 4:3, 4.

Nin duwen Sounkadehdehn Siohwa kan, kitail anahne eimah utung sapwellimen Koht koasoandi kan ong tiahk. (Rom 12:9) Ia duwen? Kitail anahne ni kamantik kasalehiong meteikan dahme pahn kaperenda Siohwa. Ahpw kitail pil anahne kolokol koasoandi pwung wet nan pein atail mour. Karasepe, ni atail kin pilada soangen likou oh kapwat, kitail kak pein idek rehtail: ‘Ia duwe, ei pilipil kin kasalehda sapwellimen Siohwa koasoandi kan de koasoandi en sampah kan? Mwomwen ei likou oh kapwat kin kasalehda me ngehi emen Kristian me kin wauneki Koht?’ De ni atail kin pilada en kilang ehu prokram en TV de ehu kasdo, kitail kak pein idek rehtail: ‘Ia duwe, Siohwa pahn ketin kupwurki prokram wet? Ahn ihs koasoandi kan ong tiahk me prokram wet kin utung? Ei pilipil en mehn kamweit kan kakete kaluwetehla ei koasoandi ong tiahk? (Mel. 101:3) E kakete kadipikelekelih tohn ei peneinei de meteikan?’​—1 Kor. 10:31-33.

Dahme kahrehda e uhdahn kesempwal kitail en utung sapwellimen Siohwa koasoandi kan ong tiahk? Sises Krais pahn kereniong ketin kasohrehla wehi kan oh soahng suwed kan koaros. (Esek. 9:4-7) Ihte irail kan me kin wia kupwuren Koht me pahn mourla. (1 Sohn 2:15-17) Eri kitail en utungada sapwellimen Siohwa koasoandi kan ong tiahk pwe irail kan me kin kilang atail wiewia mwahu en kapinga Koht.​—1 Pit. 2:11, 12.

KILANG KASDO BECOME JEHOVAH’S FRIEND​—ONE MAN, ONE WOMAN OH TEHK PEIDEK PWUKAT:

• Dahme kahrehda e wia elen loalokong en mourki sapwellimen Siohwa koasoandi kan?

• Dahme kahrehda pahpa nohno kan anahne mwadang tepida padahkihong neirail seri kan duwen sapwellimen Siohwa koasoandi kan ong tiahk ni arail tikitikte?

• Ia duwen me pwulopwul oh me mah kan koaros ar kak sewese aramas akan en paiekihda sapwellimen Koht kamwahu?