Koakon En Peidek
◼ Dahme karehda sen tehk kanaiengki atail likou oh at kapwat ni ahnsou me kitail kin pwarek ihmw kan en Society nan Brooklyn, Patterson, oh Wallkill, New York, oh rahn ohpis kan nan sampah?
Kristian kan anahne en kapwat mwahu. Ahnsou koaros atail likou oh kapwat en kasalehda atail ese tiahk mwahu oh wau me konehng ladu kan en Siohwa Koht. Met me keiou mehlel ni ahnsou me kitail kin mwemweitlahng ihmwen Society kan nan New York oh ni rahn ohpis kan me mih nan sampah pwon.
Erein 1998, kapokon en district oh kapokon en international pahn wiawi. Riatail me kid kan sang nan sahpw tohto pahn pwarek poason kaun en Society nan New York iangahki rahn ohpis kan nan sahpw teikan. Kaidehn ihte ni ahnsoun atail pwarek ihmw pwukat, ahpw pil ni ahnsou soh lipilipil kan, kitail anahne en ‘kasalehda ni mehkoaros me se kin wia, me kiht laduhn Koht kei,’ me pil iangahki kitail en likauda oh kapwata ni ahl me konehng.—2 Kor. 6:3, 4.
Ni ah kosoia duwen kesemwpwalpen likou oh kapwat konehng, pwuhko Organized to Accomplish Our Ministry kin kosoia duwen anahnepen en mwakelekel ni pali war, oh likou me konehng, oh kapwat mwahu ni ahnsou me kitail kin kalohk oh towehda mihding en Kristian kan. Eri, nan pali 131, parakrap 2, e kosoia: “Met pil duwehte ni ahnsou me emen kin mwemweitlahng ihmwen Bethel nan Brooklyn de ni rahn ohpis teikan en Society. Tamataman me, ahdo Bethel kin wehwehki ‘Tehnpas en Koht,’ ihme atail likou, oh kapwat, oh wiewia pahn duwehte ni ahnsou me kitail kin towehda mihding en kaudek nan Kingdom Hall.” Sounkalohk kan en Wehio me kohsang Brooklyn oh pil iangahki irail sounkalohk kan sang sahpw teikan me kin mwemweitdo pwehn kilang oh werekiong tohn peneinei en Bethel oh pwarek ihmw kan en Society anahne kapwaiada kosonned ile wette.
Atail likou en wia mehn kalimeng mwahu ong meteikan ong iaduwen arail kin kilangwohng kaudek mehlel en Siohwa. Ahpw, e pil sansalda me ekei brother kan oh sister kan kin likauwih soahngen likou me nohn daulihla, mwomwen re pahn mwadong ni ahnsou me re kin pwarek ihmw kan en Society. E sohte konehng en likauwih soahngen likou pwukat ni ahnsoun pwarek ihmw teikan en Bethel. Nan ire wet, me pil duwehte nan irair koaros en mouren Kristian, sen inengieng kolokolte kosonned ile ohte me pahn kasalehda sapwellimen Koht aramas kan sang nanpwungen tohnsampah ni atail pahn wia soahng koaros ong kalinganpen Koht. (Rom 12:2; 1 Kor. 10:31) E pil pahn konehng en kosoiong irail kan me kitail kin onop Paipel rehrail oh meteikan me ehdin pahn pwarek Bethel oh katamankin irail duwen kesemwpwalpen ren likouda oh kapwatada ni ahl me konehng.
Eri ni ahnsou me ke pwarek ihmw kan en Society, pein kalelepek rehmw: ‘Ahi likou oh kapwat kin kasalehda karakarahk?’ (Kaparekiong Maika 6:8.) ‘E kin kalinganada Kohto me I kin kaudekiong? Meteikan pahn suwedki mwomwen ahi likou oh kapwat? Ih kin wia mehn kalimeng mwahu ong meteikan me ehdin pahn pwarek wasao?’ Kitail en ahnsou koaros, sang atail likou oh kapwat, “kapingahki atail padahk duwen Koht, atail Sounkomour.”—Taitus 2:10.