Katengehdi loalen Meteikan Koapworopwor en Mour Soutuk
1 Mendahki aramas kin raparapahki elen kapwandehla ahnsoun ahr mahla oh kareireila ahnsoun ahr mour, re kin mahlate oh pil mehla. Ia uwen atail kin kalahnganki me Paipel kin kawehwehda karepen aramas kin mahla oh mehla, oh e pil kin kawehwehda iaduwen aramas pahn pwurehng pwulopwulla oh duwen mehla ah sohla pahn wiawi. Padahk mehlel pwukat kin sansalda nan pwuhko Ke Kak Mour Kohkohlahte nan Paradais nin Sampah. Pwuhko kin sapengla ni sansal peidek kapwonopwon kan me pid duwen mour oh mehla, oh kin idialahng sounwadawado ahnsou me Paradais pahn kapwurpwurdo.
2 Nan April kitail pahn kihla pwuhk en Mour Kohkohlahte ki mehn akedei en tepiada onop en Paipel kan. (Madiu 28:19, 20) Mwuri kitail pahn pwurehng pwurela rehn irail ko koaros me kasalehda arail perenki rongen Wehio. Ni ahl wet kitail pahn katengehdi loalen meteikan koapworopwor en mour soutuk. (Taitus 1:2) Pwehn kak kapwaiada met, komw pahn diarada me iren sawas kan pah pahn wia sawas laud.
3 Ni ahnsou me ke tepin tuhwong aramaso, ele komw kak kalelepek reh peidek wet:
◼ “Mie pak me komw kin wahponki dahme karehda aramas kin inengieng mour werei? [Mweidohng en sapeng.] Pelien lamalam en Buddhist, Kristian, Hindu, Muslim, oh meteikan koaros kin koapworopworki me mie mour mwurin mehla.” Pakpeseng pwuhko Mour Kohkohlahte ong pali 10, oh wadek parakrap 9. Mwurin omw kawehwe iren Pwuhk Sarawio me kileledi, komw kak kalelepek reh: “Eri, dahme karehda, aramas kin mehkihla? Oh iaduwen mehla pedolong nan sampah?” Kalelepek rehn tohnihmwo ma e men pein kilang pasepengo. Ma e pwungki met, pakalahng pali 74 oh kosoia kisin oarelapo “Dahme Karehda Kitail Mahla oh Mehla.” Onop ehu tepdahr! Ma soh, pwilikidi reh pwuhko pwehn wadek, oh wiahda pilahn en pwuredo, e pahn mwahu ma mwurinte rahn ehu de riau, pwehn sapengla peidek kan.
4 Ni ahnsou me komw pwurehng pwurela pwehn kosoia pwuhko “Mour Kohkohlahte” me komw pwilikihdi rahn teio, komw kak inda:
◼ “I pwuredo pwehn kosoia peidek riauwo me pid mehla me kita sohte sapengla.” Katamanki tohnihmwo peidek kan. Mwuri kosoia ire kan nan parakrap 14 ni pali 74. Ma kak, komw kak pousehlahte onopo de ma sohte kak, ah komw doadoahngki peideko ni tepin parakrap 15 pwehn tepiada amwa kosoi en onop en mwuhr. Wiahda pilahn sansal en omw pahn pwurehng pwuredo. Kihong tohnihmwo ehu kisin doarepwehn luk (handbill), oh ni mwotomwot kawehwehiong iahd mihding en mwomwohdiso kan kin wiawi. Ni kadek luke ih en iang towehda mihding kan.
5 Ma komw wia doadoahk en kalohk sang ihmw lel ihmw de kalohk ni ahnsou soh lipilipil, komw kak tepiada ehu kosokosoipene ni omw pahn nda:
◼ “Mie pak me komw kin medemedewe dahme ahnsou kohkohdo kin kolokol ong kitail oh ong sampah? [Mweidohng en sapeng.] Paipel kin oarelapiada ahnsou kohkohdo ni lepin lokaia ehute—Paradais! E kawehwehda me nin tepio, Koht ketin wiahda wasahkis nin sampah en wia paradais kaselel wasa me e ketin pwilikihdi ie pwopwoud aramas ko me e ketin kapikada. Ira pahn kaparaparla oh kadirekihla aramas nan sampah pwon, oh ekis ekis koadoahkehda sampah pwon en wiahla paradais ehu. Tehk kosoipen paradais.” Pahkala pwuhko Mour Kohkohlahte ong ni pali 10, oh wadek parakrap 11, pahn kisin oarelap “Soahngen Mour Me Ke Inengieng.” Sang nan nohmw Paipel kasalehong tohnihmwo iren Pwuhk Sarawi kan me kileledi, Aiseia 35:5, 6, oh eri kosoia ire kesemwpwal kan nan parakrap 12. Kosoiaiong me kumwa en pousehlahte kosoia soahngen mour me pahn wiawi nan Paradaiso me pahn kapwurpwurdo oh kosoiapene parakrap 13-14. De kangoangehki aramaso en pein wadek pwuhko Mour Kohkohlahte ni pein ah ahnsou, oh koasoanehdi kumwa en pwurehng tuhpene oh kosoia met.
6 Ma ni ahnsou me ke tepin tuhwong, ke sohte tepiada ehu onop reh, eri ni ahnsou me ke pwurehng pwurela reh ke kak song en tepiada ehu onop reh ni amw pahn inda:
◼ “Nin duwen me kita kosoiapene nan atail kosoia en rahnteio, me ih kupwuren Koht me sampah pwon en wiliakapwala ong ni paradais ehu. Met kapwarehda peidek wet, Ia pahn mwomwen mour nan Paradaiso?” Pahkala pwuhko Mour Kohkohlahte ong pali 13, oh onopki parakrap 13-14. Mwurin met kasalehong kilel kan ni pali 12-13, oh kalelepek rehn aramaso ma e men kouson nan soahngen wasa kaselel duwehte met. Mwuri wadek keioun pwuloi en lokaia kan en parakrap 19 ni pali 15. Ma kak, pousehlahte onopo de ma sohte kak, indahiong me mwurin amw pahn pwuredo ke pahn kawehwehiong dahme anahn pwe emen en kak mour nan Paradaiso me kapwurpwurdo. Pwilikihdi reh ehu kisinlikou en luk (handbill), oh kawehwehiong ahnsoun mihding en mwomwohdiso kan nan wihk kan, oh ni kadek luke aramas en iang towehda mihding kan nan Kingdom Hall.
7 Pwuhko Mour Kohkohlahte kin wia mehn kalohk kaselel ehu en padahkihong meteikan “mour soutuk” me Koht ketin inoukihda. Omw onopkihong aramas akan Paipel nan imwerail kak katengehdi loalerail koapworopwor kaselel wet me pwilsang rehn Koht me “sohte kin ketin likamw.”