Atail Doadoahk en Kalohk—Elen Kasalehda Limpoak Mehlel
1 Ni atail kin kalohk ong mehteikan, kitail kasalehda me kitail peikiong kosonned riau me keieu kesempwal. (Madiu 22:37-39) Atail limpoak ong Siohwa kin kamwekid kitail en kapinga Ih. Atail limpoak ong mehn mpatail kan kin kamwekid kitail en kangoange irail en rapahki loalokong pwung en kupwuren Koht pwehn, duwehte kitail, ren poakohng Siohwa oh ahneki koapworopwor en mour soutuk. Ihme, nin duwen kitail kin kalohk ong mehteikan, kitail kin kapinga mwaren Siohwa oh ehukihong mehn mpatail kan duwen koapworopwor kaselel en Wehio. Ei, atail iang doadoahk en kalohk kin kasalehda limpoak mehlel ong Koht and ong aramas.
2 Atail limpoak pahn kamwekid kitail en kalohk ong soangsoangen aramas nan soangsoangen wasa kan. (1 Kor. 9:21-23) Karasepe ehu: Emen elder Kristian mwomwohd limwahn emen Padre en Roman Kadolik ahnsou me e iang sounpihr. Elder menet kahreong Padre en koasoi ni eh wia peidek kadek kan oh ekis ekis tepida koasoi duwen Wehio. Mwohn Padre dohdihsang sounpihro, e ale pwuhk riau sang brothero. Kitail kilang me ni eldero kasalehda limpoak mehlel ong mehn mpe imwila mwahu!
3 Limpoak Mehlel Kin Kamwekid Kitail en Kalohk: Irail me kin iang doadoahk en auxiliary oh regular pioneer kin kasalehda me re ahneki limpoak mehlel ong Koht oh mehn mparail. Irail me pioneer kin tohnmeteikihla arail ahnsou oh kehl pwehn sewese mehteikan ni pali ngehn. Dahme kin kamwekid irail en wia met? Emen pioneer nda: “I wehwehki me limpoak iei ehu kisehn wahn ngehn kan. Ihme kahrehda, ma sohte limpoak, I sohte pahn iang padahk mehlel oh pil I sohte kak pweida mwahu nin duwen pioneer men. Limpoak kin kahrehong ie en medemedewe laud duwen aramas oh arail anahn akan oh I kalahnganki me aramas kin mwekidki limpoak.” Sises kasalehda limpoak ong aramas. Ehu rahn, ahnsou me Sises oh sapwellime tohnpadahk kan pahn kohla wasakis en “kommoal” pwe re pwang, pokono lel wasao mwohn irail. Dahme Sises wia? E “kupwurohkinirailla,” oh ihme Sises sohlahr medemedewe eh anahn en kommoal, ahpw e “tapihada kawehwehiong irail soahng tohto.”—Mark 6:30-34.
4 Mendahki aramas kin soikala rongamwahu me kitail men ehukihong irail, kitail kak ahneki peren mehlel pwe kitail wehwehki me, pwehki limpoak, kitail wia uwen me kitail kak pwehn sewese mehteikan en ale kamourparail. Ni ahnsou me Krais pahn kasawihada aramas pwehn kadeikirailda, kitail pahn inenen peren pwe kitail kasalehda limpoak mehlel ong mehteikan ni atail ‘wia atail pwais en sounkadehde en Rongamwahu.’—2 Tim. 4:5.