En Iang Towehda Mihding kan “Laud Sang Mahs”
1 Sangete mahs, tuhpene ong mihding kan kin kesempwal ong sapwellimen Siohwa aramas akan. Mehn Israel kan kin tuhpene ni tehnpas sarawi oh sinakoke kan ong wasahn kapokonpene ong kaudok mehlel oh kasukuhl sang powe oh miniminiong riatail kan ni peren. Pil duwehte Kristian en mahs kan, re sohte kin katiasang tuhpene. Pwehki kasongosong kan wie lalaudla nan imwin rahn akan, kitail koaros anahne kangoang ni pali ngehn me kin kohsang atail tuhpene ni mihding kan—oh kitail kin anahne kangoang “laud sang mahs.” (Ipru 10:25) Tehk kahrepe siluh me kitail kin iang mihding kan.
2 Pwehn Miniminpene: Nting Sarawi kan kin kaweidkin kitail en “kakehlakahda emen emen kumwail, oh sawaspene.” (1 Deselonika 5:11) Miniminiong riatail kan ni pali ngehn kin kadirehkihla atail madamadau lamalam mwahu kan oh kin kamwekid kitail en tiahk mwahu. Ahpw, ma kitail sohte men patehng mehteikan, kitail kak ahnekihda madamadau pweipwei oh roporop oh suwed kan.—Lepin Padahk 18:1.
3 Pwehn Sukuhliki Kaweid: Mihding en Kristian kan kin kaukaule kasukuhlikin kitail Pwuhk Sarawi pwehn kamwekid atail limpoak ong Koht en mihmihte nan mongiongatail. Mihding kan kin audaudki kaweid mwahu ong mour oh iaduwen kitail kak doadoahngki “kaweid en Koht.” (Wiewia 20:27, New World Translation) Nan mihding kan, kitail kin sukuhliki duwen atail en kalohkong aramas koaros rongamwahu oh iei soangen kasukuhl me kitail kin anahne ma kitail men ahneki peren laud en sewese mehteikan sukuhliki padahk mehlel sang Pwuhk Sarawi.
4 Pwehn Pere Kitail: Nan sampah suwed wet, mwomwohdiso kin duwehte wasahn ruk ni pali ngehn—wasahn ruk me dirkihla popohl oh limpoak. Ni ahnsou me kitail kin iang towehda mihding kan en mwomwohdiso, sapwellimen Koht ngehn sarawi kin kamwekid kitail en kasalehda wahn ngehn en Koht: “limpoak, peren, popohl, kanengamah, kadek, kamwahu, pwoson, opampap oh liksang me suwed.” (Kalesia 5:22, 23, New World Translation) Mihding kan kin kakehlail kitail pwe kitail en kesihnenda teng oh kehlail ni pwoson. Mihding kan kin sewese kitail en powehdi kasongosong kan me mihmi mwotail.
5 Ni atail kin kaukaule iang towehda mihding kan, kitail kin ahneki pepehm duwehte sounmelkahkao me ntingihdi nan Melkahka 133:1, 3: “Ia uwen lingan, ia uwen kansenamwahu en sapwellimen Koht aramas akan ar kin miniminpene!” Sohte lipilipil iawasa sapwellimen Koht aramas kin papah Ih oh tuhpene, “iei wasao me Kauno [Siohwa] ketin inoukihda me e pahn ketikihong kitail sapwellime kupwuramwahu—mour me sohte kak imwisekla.”