Karanih Koht
E Ketin Mwahngih Atail Lokolok
“PEPEHM en poakehla wet iei en pehm nan ahmw mohngiong duwen ahn emen lokolok.” Iei met mwomwen ahn emen Sounkadehdehn Siohwa mah men me wia misineri kin kawehwehda duwen irair kesempwal wet. Siohwa Koht ketin kasalehda mehn kahlemeng keieu mwahu ong duwen kasalehda pehmitik ong pepehm en meteikan. E kin ketin pehm lokolok en sapwellime aramas akan. Dahme kahrehda kitail kak kamehlele met? En Siohwa kin ketin pehmitik ong mehkan kin sansalda ni unsek sang ni sapwellimen Sises mahsen oh wiewia kan ni ahnsou me e ketiket pohn sampah. (Sohn 5:19) Karasepe, tehk dahme Sohn 11:33–35 kasalehda.
Ni ahnsou me kompoakepahn Sises Lasarus mwadang mehla, Sises ketila nan kahnimw me Lasarus kin mihmi ie. E sansal mehlel, me rien Lasarus serepein kan, Mery oh Marda, uhdahn pahtoula mehlel. Sises uhdahn poakepoake peneinei wet. (Sohn 11:5) Eri, ia sapwellimen Sises pepehm ong met? Iren Paipel kan mahsanih: “Sises mahsanihada [Mery] sengiseng, oh mehn Suhs ako me iang ih pil sengiseng, e ahpw kupwurohla oh pahtoula. E ahpw ketin kalelapak rehrail, ‘Ia wasa me kumwail sarepediong ie?’ Irail ahpw sapeng, patohwan, ‘Maing at Kaun, komw ketido oh mahsanih.’ Sises ahpw ketin tentenihr.” (Sohn 11:33-35) Dahme kahrehda Sises sengiseng? Mehlel, kompoakepahn Sises Lasarus melahr, ahpw Sises pahn ni ahnsou keren kaiasada ih. (Sohn 11:41-44) Mie mehkot tohrohr me sair sapwellimen Sises pepehm kan?
Pil ehu tehk kanaiehng ire kan me kileldi powe. Tehk mwahu me ni ahnsou me Sises mahsanihada Mery oh irail akan me wie sengiseng, e “kupwurohla” oh “pahtoula.” Tepin kawehwehn Paipel doadoahngki lepin lokaia me kasalehda pepehm loal.a Sises ketin mwekidkihda mehlel dahme e mahsaniho. Pepehm loal me e sapwellimanki ahnsowo uhdahn sansalda mehlel pohn silangi ni ahnsou me e ketin tentenihr. E sansal, sapwellimen Sises mohngiong mwekidki mehlel lokolok en meteikan. Mie pak ke pil kin iang sengiseng pwehki ke kilang emen me ke nsenohki mehlel wie sengiseng?—Rom 12:15.
En Sises ketin pehmitik ong pepehm en meteikan kin sewese kitail en kalaudehla atail loalokongkihla duwen irair oh ahl akan en Semeo, Siohwa. Tamanda me Sises kin ni unsek wia kasalepen irair akan me Semeo sapwellimanki kahrehda e kak mahsanih: “Mehmen me kilangieier pil kilangehr Sahm.” (Sohn 14:9) Eri ni ahnsou me kitail wadek me “Sises ketin tentenihr,” kitail pil kak kamehlele me Siohwa kin pil ketin pehm lokolok en sapwellime tohnkaudok akan. Ei, pil irail sounnting en Paipel teikan kasalehda duwen ire mehlel wet. (Aiseia 63:9; Sekaraia 2:8) Siohwa uhdahn Koht emen me kin ketin pehmitikiong pepehm en meteikan!
Kitail kin karanihala emen me kin pehmitikiong pepehm en meteikan. Ni ahnsou me kitail kin nan kapehd toutou de nsensuwedla, kitail kin karanihala emen me kak wehwehki oh pehmitikiong kan. Ia uwen atail kin karanihala Siohwa, Koht emen me diren limpoak me kin ketin pehm atail lokolok oh ketin wehwehki kahrepen atail kin sengiseng oh kakerehdi pilen masatail!—Melkahka 56:8.
[Nting tikitik me mi pah]
a Lepin lokaiahn Krihk me kawehwe “ketin tentenihr” wehwehki “sengiseng de mwahiei ni ngihl tikitik.” Weksang met, lepin lokaia me kadoadoahk ong Mery oh irail kan me iang ih sengiseng kin kawehwehdi nin duwen met “sengiseng de mwahiei ni ngihl laud.”