Rahn en Komourala ki Wehin Koht Leledohr!
“Mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.”—MAD. 6:10.
1. Dahme kin oaralapihada sapwellimen Sises padahk kan?
NI AHNSOU me Sises wia sapwellime Kapahrek en Pohn Dohlo, e ketin kapatahiong nan sapwellime kapakap ire kesempwal me oaralapihada sapwellime padahk kan. E padahkihong sapwellime tohnpadahk kan en kin kapakap ong Koht: “Mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.” (Mad. 6:9-13) Sises “ketin kakahnseli nan kahnimw oh nan kousapw akan, ketin kapakapahrengki Rongamwahu duwen Wehin Koht.” (Luk 8:1) Krais ketin kangoangehki sapwellime tohnpadahk kan: “Kumwail rapahki mahs Wehin Koht oh dahme e kin ketin kupwurki.” (Mad. 6:33) Ni omw pahn onopki artikel wet, rapahki ahl akan ong en doadoahngki ire pwukat nan omw doadoahk en kalohk. Karasepe, medewehla iaduwen ke pahn sapengla peidek pwukat: Ia uwen kesempwal en rong en Wehio? Dahme aramas akan anahne pitsang? Oh iaduwen Wehin Koht pahn wahdo komour?
2. Ia uwen kesempwal en rohng en Wehio?
2 Sises ketin kohpada me: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” (Mad. 24:14) Rongamwahu me pid Wehin Koht kin wia mehkot me keieu kesempwal. E uhdahn wia rohng me keieu kesempwal nan sampah! Nan mwomwohdiso en Sounkadehdehn Siohwa kan me daulihala meh 100,000, mpen meh isirar en sapwellimen Koht ladu kan kin iang towe doadoahk laud ehu me sohte doadoahk ehu kak pahrekiong, doadoahk en kairehki meteikan duwen Wehio me pweidahier. Pweida wet kin wia rongamwahu pwehki e kin wehwehki me Koht ketin wiahdahr wehi ehu nanleng me pahn kaunda mehkan koaros nin sampah. Pahn kaundahn Wehio, kupwuren Siohwa pahn ketin pweida pohn sampah nin duwen e kin ketin wiawi nanleng.
3, 4. Dahme pahn pweida ni ahnsou me kupwuren Koht pahn wiawi pohn sampah?
3 Dahme pahn wiawihong aramas akan ahnsou me kupwuren Koht pahn wiawi pohn sampah? Siohwa pahn “kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” (Kaud. 21:4) Aramas akan sohte pahn soumwahuda de mehla pwehki dihp oh soh unsek me re sohsohki. Me melahr akan me Koht kin tamataman pahn kakehr ahneki mour kohkohlahte pwe Paipel kin inoukihda: “Aramas koaros, me mwahu oh suwed, pahn iasada sang mehla.” (Wiewia 24:15) Solahr pahn mie mahwen, soumwahu de lehk oh sampah pahn wekila wiahla paradais ehu. Pil mahn keper kan nan ahnsouwet pahn mihmihpene ni popohl rehn aramas akan oh pil mahn teikan.—Mel. 46:9; 72:16; Ais. 11:6-9; 33:24; Luk 23:43.
4 Ki kapai kaselel kan me pahn pweida pwehki kaundahn Wehio, ihme kahrehda kokohp en Paipel kin mahsanih duwen mour ni ahnsowo nan koasoi kansenamwahu pwukat: “Me aktikitik kan pahn sapwenikihla sahpwo oh re pahn paiamwahu oh popohl.” Ahpw dahme pahn wiawihong irail kan me kin kahrehda kahpwal? Pwuhk Sarawi kin ketin kohpada: “Ahnsou keren aramas suwed kan pahn sohrala; ke pahn rapahkin irail, ke ahpw sohte pahn diar irail.” Ahpw ong “irail kan me kin likih KAUN-O pahn sapweniki sahpwo.”—Mel. 37:9-11.
5. Dahme pahn wiawihong koasoandi en ahnsou pwukat?
5 Pwe mepwukat koaros en kak pweida, koasoandi en ahnsouwet iangahki wehi kan, palien lamalam kan oh palien pesines kan pahn anahne en kasohrala. Oh ih duwen met akan me wehin nanleng pahn uhdahn kapwaiada. Ngehn sarawi kin kamwakid soukohp Daniel en kohpada duwen met: “Ni ahnsou me nanmwarki ko pahn kakaun wasa, Koht en nanleng pahn ketin kauwada mwehi ehu me sohte imwi. Mwehi wet sohte pahn kak lohdi, ahpw e pahn kauwehla mwehi teikan koaros, oh pahn mihmi kohkohlahte.” (Dan. 2:44) Wehin Koht—koperment kapw ehu nanleng—uhd pahn kaunda pohnangin koasoandi kapw ehu nin sampah. E pahn mie “lahng kapw oh sampah kapw, wasa me pwungen kalahngan en Koht pahn poadada ie poatopoat.”—2 Pit. 3:13.
Ahnsouwet Anahn Laud ong Komour
6. Iaduwen Paipel kin kawehwehda suwedlahn sampah suwed wet?
6 Ni ahnsou me Sehdan, Adam oh Ihp uhwongada Koht pwehki ar kin men pein pilada dahme pahn pwung oh sapwung, met kahredahr kahpwal eh tepidahier mihla nan poadopoad en aramas kohkohdo. Sang ahnsowo mwurin sounpar 1,600 mohn Nohliko, poadopoad kasalehda “duwen aramas akan ar suwedlahr nin sampah, oh ar lamalam akan eh kin suwed ahnsou koaros.” (Sen. 6:5) Pil mpen pahr 1,300 mwuri, Solomon kasalehda irair suwed en eh ahnsou ni eh ntingihdi: “I ahpw peirinkihda irail kan me melahr oh sohralahr; re nsenamwahu sang mehlel irail kan me momourte. Ahpw irail kan me saikinte ipwidi, me saikinte kilang sapwung kan me kin wiewiawi nin sampah, iei irail me keieu nsenamwahusang koaros.” (Ekl. 4:2, 3) Sounpar 3,000 kei douwehr powe leledo ni atail ahnsou, suwed pil wie kekeirda.
7. Dahme kahrehda ahnsouwet kin keieu konehng kitail en komourkihla Wehin Koht?
7 Ni eh kin mehlel pwe suwed kin mihmikiher ahnsou reirei, kahrehda ahnsou wet eh kin keieu konehng kitail en komourkihla Wehin Koht. Irair en ahnsou en pahr 100 kei me samwalahr kin wia ahnsou me inenen suwed oh e kin pil doudoulahte pil susuwedla. Karasepe ieu, ripoht sang Pwihn ehu me kin kasawih wiewia kan en sampah koasoia: “Nan erein sounpar 100 samwalahr oko, aramas me mehkihla mahwen kin pak siluh tohtohsang uwen aramas me mehla nan mahwen akan me wiawiher nan erein sounpar 1,900 mwohn mwo.” Sang nan 1914 tohtohsang aramas rar pak 100 kei me mehkihla mahwen! Ehu encyclopedia song en kapatahda uwen tohtohn aramas me mehla, eri e lel rar pak 60, tohtohn irail akan me mehla ni mahwen keriau en sampah. Pwehki ekei wehi kan nainekier mehn mahwen en nuclear, aramas akan kakehr kamwomwala aramas tohto nan sampah wet. Oh pil mendahki kekeirdahn palien sains oh palien wini, sounpar koaros duhpek kin kemehla mour en seri kan me tohtohki rar pak limau samwa.—Kilang irelaud 9 nan pwuhken What Does the Bible Really Teach? (Dahme Paipel Uhdahn Padahngki?)
8. Ni soh peikasal, dahme sounpar kid kei kasalehda duwen kaundahn aramas?
8 En aramas ar songosong en kauhdi suwed kan sohte kin pweida. Palien politik, palien pesines kan oh palien lamalam kan sohte kak en kamwahwihala anahn en aramas akan ong meleilei, pweidahn mour nsenamwahu en aramas oh roson mwahu. Ni ar kin songosong en kamwahwihala kahpwal akan me aramas kin lelong, eri ahpw ihte me re wiahda kalaudehla kahpwal. E kin pwung me sounpar kid kei erein en aramas ar kin kakaun kasalehda mehlelpen lokaia pwukat: “Sohte mehmen me kaunda pein imwilahn eh mour; sohte aramas emen me kaunda pein eh mour.” (Ser. 10:23) Ei, “ekei aramas ahneki manaman, a ekei kin wie lokolok pahn ar manaman.” (Ekl. 8:9) Laudsang met, “audepen lahng oh sampah koaros kin weiweirek, rasehng medek en neitik, lao lel ahnsou wet.”—Rom 8:22.
9. Soangen irair dah kei me Kristian mehlel kan en kasik pwe ren kilang nan “imwin rahn akan”?
9 Me pid duwen atail ahnsou, Paipel kin kohpada: “Mie ahnsou apwal ekei ni imwin rahn akan.” Mwurin e kawehwe irair en imwin rahn akan me aramas kin kakaun sampah, kokohpo pousehlahte koasoia: “aramas suwed oh me likamw akan pahn nantihweite sang ni me suwed ong ni me suwedsang.” (Wadek 2 Timoty 3:1-5, 13.) Ih soahng wet me Kristian kan kin kasik pwe “sampah unsek mi pahn manaman en Me Suwedo,” Sehdan. (1 Sohn 5:19) Ahpw rongamwahwo iei me Koht pahn ketin kapitkihla irail akan me kin poakohng ih. Irail pahn pitsang sampah wet me suwed oh me pahn pil kohkohlahng pil suwedsang met.
Ihete me Kin Ketikihda Komour
10. Dahme kahrehda Siohwa iei ihete me kak ketikihda Komour?
10 Ni ahmw kin kalohki rongamwahu, kawehwehiong irail akan me kin rongorong me Siohwa-te me pahn ketikihda komour. Ihete kelehpw me sapwellimaniki roson oh ketin kupwurki en ketin doarehla sapwellime ladu kan sang nan irair suwed akan koaros. (Wiewia 4:24, 31; Kaud. 4:11) Kitail kak kamehlele me Siohwa pahn ketin doarehla sapwellime aramas akan oh ketin kapwaiada sapwellime kupwur akan pwe e ketin kaukihlahr oh ketin mahsanih: “Dahme I koasoanedier pahn pweida. Dahme I kupwuredahr pahn uhdahn wiawi.” Sapwellime mahsan pahn “kapwaiada audepen [kupwure] koaros; e pahn kin kapwaiada mehkoaros me [e] anahne en pweida.”—Wadek Aiseia 14:24, 25; 55:10, 11.
11, 12. Mehn kamehlel dahieu Koht ketikihong sapwellime ladu kan?
11 Siohwa ketin kamehlelehiong kitail me e pahn ketin doarehla sapwellime ladu kan ni ahnsou me e pahn ketikihdo kopwung ong me suwed akan. Ni ahnsou me e ketikihong pahngok rehn Seremaia en kihong kaweid kehlail ong irail me wiahda dihp toutou kan, Koht ketin mahsanih: “Ke dehr masak irail.” Dahme kahrehda en dehr masak? “Pwe I pahn kin ieiang uhk oh sinsileiuk.” (Ser. 1:8) Met pahrekiong ahnsowo mwohnte ahnsou me Siohwa ketin kamwomwala Sodom oh Komora, ni eh poaronehdo sapwellime tohnleng riemen en kahre Lohd oh eh peneinei pwehn doarehla irail sang wasao. “KAUN-O eri ketin kamwerehdi suwepel okohk, pohn Sodom oh Komora.”—Sen. 19:15, 24, 25.
12 Ma e pil pidada uwen tohtohn tohnsampah pwon, Siohwa pil kak ketin kamourala irail akan me kin kapwaiada sapwellime kupwur. Ni ahnsou me e ketin kasohrala sampah suwed en mahs ki Nohliko, “e ketin komourala Noha, iei ih me lohkiseli duwen mour pwung pahn kupwuren Koht, oh pil iangahki aramas isimen.” (2 Pit. 2:5) Siohwa pahn ketin pwurehng kamourala me pwung kan ni eh pahn ketin kasohrala sampah suwed en ahnsou wet. Sapwellime mahsen kin kangoangehki kitail: “Kumwail sohpeiong KAUN-O, kumwail me mpahi koaros en sahpwo . . . Kumwail wiahda dahme pwung oh aktikitikla mwohn silangi. Mweinele kumwail kak pitsang kalokolok en rahn me e pahn ketin kasalehda sapwellime engieng.” (Sep. 2:3) Imwin koasoandi suwedo eh pahn kasohrala “aramas pwung—aramas lelepek—pahn kousoan nan sahpw wet, ahpw Koht pahn ketin koahkoahsang aramas suwed kan nan sahpwo.”—Lep. Pad. 2:21, 22.
13. Iaduwen sapwellimen Siohwa ladu kan me melahr pahn komourala?
13 Ahpw sapwellimen Koht ladu kan kin mehkilahr soumwahu, kalokolok oh soahng teikan. (Mad. 24:9) Eri iaduwen re pahn komourala? Ni atail tehkehr mwowe me “aramas koaros, me mwahu . . . pahn iasada sang mehla.” (Wiewia 24:15) E kin mehkot kansenamwahu en ese me sohte mehkot kak kauhdi Siohwa ni eh pahn ketin kamourala sapwellime ladu kan!
Wehi Pwung Ehu
14. Dahme kahrehda kitail kak kamehlele me Wehin Koht iei koperment pwung ehu?
14 Ni ahmw pahn wia doadoahk en kalohk, ke kak kawehwe me sapwellimen Siohwa Wehin nanleng kin wia koperment pwung ehu. Met kin mehlel pwehki e kin kasalehda sapwellimen Koht irair kan me duwehte kopwungpwung, pwung, oh limpoak. (Deud. 32:4, 1 Sohn 4:8) Koht ketikihongehr Wehio nin limen Sises Krais, rehn ih me keieu warohng en ketin kaunda sampah. Siohwa pil ketin kupwurki Kristian keidi 144,000 kan en pilipilda sang pohn sampah oh ketin kasapwilada irail en iang Krais mour nanleng oh iang pwukoahki pwukoa en kaunda tohnsampah.—Kaud. 14:1-5.
15. Kasalehda wekpeseng en kaundahn Wehin Koht oh kaundahn aramas akan.
15 Ia uwen e pahn wekpeseng nanpwungen kaunda pwukat, kaundahn Sises oh irail meh 144,000 oh pil kaundahn aramas soh unsek kan! Kaun akan en sampah nan koasoandi wet kin lemei oh kin kaweidih nehrail aramas akan en wia mahwen me kin imwikihla mehlahn aramas rar kei. Pwuhk Sarawi kin ketin kaweidih kitail en dehr koapworopworki aramas, “pwe sohte emen tohrohr kak komourkumwailla”! (Mel. 146:3) Ahpw sapwellimen Krais kaunda pahn kasalehda sapwellime irair en limpoak kaselel! Sises ketin mahsanih: “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla. Kumwail ale oh kapaikada ei mehn wisiket, oh kumwail padahngki sang ie, pwe I me opampap oh nan kapehd karakarahk; kumwail ahpw pahn diar kommoalpen ngenomwail kan. Pwe mehn wisik me I pahn kihong kumwail me mengei, oh audepe kan me marahra.”—Mad. 11:28-30.
Imwin Koasoandi Wet Pahn Kereniong Imwisekla!
16. Iaduwen imwin koasoandi wet pahn imwisekla?
16 Sampah wet mihmihkier nan imwin rahn akan, de “kaimwiseklahn koasoandi en mehkan” sangete nan pahr 1914. (Mad. 24:3, NW) Ahnsouwet, kereniongehr pahn lel ahnsou me Sises ketin kohpadahr me pahn wiawi. E mahsanih: “Pwe kahn kamakam kowahlap en ahnsowo pahn laudsang apwal me kin wiawi sang mahs kohdo lel met, pil sohte me pahn duwe sang met kohla.” (Mad. 24:21, NW) Kamakam laud wet me sohte kak kapahrek ong apwal me kin wiawi pahn kahrehiong en Sehdan sampah suwed wet en imwisekla. Ahpw ia duwen kahn kamakam kowahlap wet pahn tepida? Oh iaduwen e pahn imwisekla?
17. Dahme Paipel kasalehda pahn wiawi ni ahnsou me kahn kamakam kowahlap pahn tepida?
17 Kahn kamakam kowahlap pahn mwadangete tepida. Ei, “Rahnen Kauno” pahn mwadangete leledo ni en aramas akan ar sohte pahn kasik, “ni ahnsou me aramas akan pahn nda, ‘mehkoaros meleilei oh mwahu.’” (Wadek 1 Deselonika 5:2, 3.) Kokohp en kahn kamakam kowahlap wet pahn tepida ni ahnsou me wehi kan kin lemeleme me irail pahn kereniongehr kamwahwihala arail kahpwal laud kan. Tohnsampah pahn pwuriamweikihla ohlahn “Papilon Lapalap,” minimin en palien lamalam likamw koaros. Nanmwarki kan oh meteikan pahn pwuriamweikihla ni ahnsou kadeikpen Papilon Lapalap pahn wiawi.—Kaud. 17:1-6, 18; 18:9, 10, 15, 16, 19.
18. Iaduwen Siohwa ketin mwekidki en Sehdan uhwongada Sapwellime aramas akan?
18 Ahnsou ehu ni ahnsowo pahn mie “kilel kei pahn pwarada ni ketipin, ni maram, oh pil ni usu kan” oh “kilel en Nein-Aramas pahn pwarada pahnlahng.” Eri kitail kakehr en ‘uhda oh sarada, pwe komourpatail kerendohr.’ (Luk 21:25-28; Mad. 24:29, 30) Sehdan de Kok pahn kamwakid nah pwihn en uhwongada sapwellimen Koht aramas akan. Ahpw Siohwa ketin mahsanih ong irail akan me kin uhwong sapwellime ladu lelepek kan: “Mehmen me pahn sair kumwail pahn sair mehkot me keieu kesempwal rehi.” (Sek. 2:8) Ihme kahrehda en Sehdan songosong en kamwomwala irail sohte pahn pweida. Pwekida? Pwehki Siohwa, Wasa Lapalahpie, pahn ketin mwadang kapitala sapwellime ladu kan.—Esek. 38:9, 18.
19. Dahme kahrehda kitail kak kamehlele me sapwellimen Koht sounpei kan pahn kamwomwala douluhl ahn Sehdan koasoandi en kaunda?
19 Ni en Koht pahn ketin pelianda wehi kan, ‘iei ahnsou me re pahn esehla me ih, iei Siohwa.’ (Esek. 36:23) E pahn poaronehdo sapwellime sounpei kan—karis en tohnleng kan me kin idawehn Krais Sises—pwe ren kasohrala koaros luhwen en Sehdan koasoandi pohn sampah. (Kaud. 19:11-19) Ni atail kin tamanda pak ehu ni pwohng ehute tohnleng emente “kemehla aramas 185,000” en sapwellimen Koht imwintihti kan, kitail pahn kak kamehlele me sounpei kan en nanleng pahn mengeiki kamwomwala koaros lipwen koasoandi en Sehdan pohn sampah ni ahnsou me kahn kamakam kowahlap pahn lalaudla oh lella Armakedon. (2 Nan. 19:35; Kaud. 16:14, 16) Sehdan oh nah ngehn saut akan pahn selidi nan pwoar soh kapi ehu erein pahr kid. Kedekedeo re pahn kamwomwala douluhl.—Kaud. 20:1-3.
20. Dahme Siohwa pahn ketin kapwaiada ki sapwellime Wehio?
20 Sampah pahn mwakelekelda sang soahng suwed kan, oh aramas pwung kan pahn momour pohn sampah wet kohkohlahte. Siohwa pahn ketin kasalehda me ihete me Sounkomour Lapalap. (Mel. 145:20) Ki sapwellime Wehio, e pahn ketin kapwurehdo sapwellime pwuhng en kaunda, kasarawihala mware, oh kapwaiada sapwellime kupwur laud pohn sampah. Ele ke pahn perenkihda kowahlap ahmw doadoahk en kalohk ni ahmw pahn lohki rongamwahu oh sewese irail akan me “mihmier nan irair en kak ale mour soutuk” en wehwehkihla me komourala ki Wehin Koht leledohr!—Wiewia 13:48, NW.
Ke Tamataman?
• Iaduwen Sises kasalehda kesempwalpen Wehio?
• Dahme kahrehda kitail anahnehki komourala ahnsouwet laudsang mahs?
• Soangen mwekid dah kan kitail kak kasik en wiawi erein kahn kamakam kowahlap?
• Iaduwen Siohwa kin ketin kamehlele ong kitail me ihete me wia Sounkomour Lapalap?
[Kawehwehpen kilel kan nan ehu ehu pali 16]
Sapwellimen Koht Mahsen kohpada doadoahk en kalohk nan sampah pwon me sohte kak kapahrekiong ahnsou teikan nan atail ahnsou
[Kawehwehpen kilel kan nan ehu ehu pali 19]
Duwehte en Siohwa ketin kapitala Noha oh eh peneinei, ih duwen e pahn ketin kapitala kitail
[Kawehwehpen kilel kan nan ehu ehu pali 20]
Siohwa “pahn kin ketin limwihasang pilen masarail koaros. Mehla solahr pahn wiawi.”—Kaud. 21:4