Kolokolete “Sahl Silipwoat” Nan Pwopwoud
“Sahl silipwoat me patpene pahn apwal en mweipeseng.”—EKL. 4:12.
1. Ihs me kapwopwoudipene tepin aramas riemeno?
MWURIN kepikipikdahn tuhke kan oh mahn akan, Siohwa Koht ketin kapikada tepin aramas, Adam. Mwuri, Koht ketin kameirkelikihala Adam oh E ketin doadoahngki apwoat tihnkopwouwih ko pwehn wiahiong sawasepe me unsek. Ni Adam eh kilangada liho, e ahpw nda: “Iei met emen me rasehng iehte—tih me sang tih kat, oh uduk sang ni udukei.” (Sen. 1:27; 2:18, 21-23) Siohwa ketin kasalehda eh kupwurki kepikipikdahn tepin lih oh kapwopwoudipene tepin aramas riemeno oh kupwuramwahwih ira.—Sen. 1:28; 2:24.
2. Iaduwen Sehdan kauwehla nanpwungen Adam oh Ihp?
2 Ahpw uhwong wiawihong sapwellimen Siohwa koasoandi en pwopwoud. Iaduwe? Emen ngehn suwed me adaneki Sehdan pitih Ihp en tungoale wahntuhke me sohte mweimwei ong irao. Adam eri iang eh pwoud sapeikiong Koht. Ni ara wia met, ira uhwong sapwellimen Koht pwung en kaunda oh kaweid. (Sen. 3:1-7) Ni ahnsou me Siohwa ketin keinemwe dahme ira wiadahro, e sansalehr me nanpwungara solahr mwahu. Adam kapwukoahki eh pwoud oh nda: “Lih me komw ketikihong ieo me patohwanohng ie I en tungoale, iei me I tungoalehkihda.”—Sen. 3:11-13.
3. Soangen madamadau sapwung dah me ekei mehn Suhs akan kin wia?
3 Erein ahnsou reirei ehu, Sehdan kin doadoahngki soangsoangen wiewiahn widing kan pwehn kauwehla nanpwungen pwopwoud kan. Karasepe, e kin doadoahngki kaunen lamalam kan en kihda madamadau sapwung me pid pwopwoud. Ekei kaunen mehn Suhs kin mwamwahliki sapwellimen Koht koasoandi kan oh mweidohng ohl pwopwoud kan en kak mweisang arail pwoud pwehki kisin wiewia tikitik soh katepe me duwehte kihong sohl laudla nan mwenge. Ahpw Sises ketin kasalehda: “Mehmen mweisang eh pwoud ni kahrepe ieu me kaidehn kamwahl, e ahpw pwoudikihda emen lih tohrohr, e wiadahr dipen kamwahl.”—Mad. 19:9.
4. Iaduwen koasoandi en pwopwoud kin lelohng kahpwal rahnwet?
4 Sehdan kin nannantihte en kauwehla nanpwungen pwopwoud kan. Patpene en ohl ohl oh lih lih, ohl oh lih kousoanpene ahpw sohte pwopwoud oh mweipeseng en pwopwoud ki kahrepe tikitik kan kin kasalehda me e kin pweida ni eh kin kauwehla pwopwoud kan. (Wadek Ipru 13:4.) Nin duwen Kristian akan, dahme kitail kak wia pwe kitail en dehr iang pidada soangen madamadau sapwung pwukat me pid duwen pwopwoud? Kitail kak tehkpene ekei irair me kak sewese pwopwoud en peren oh pweida mwahu.
Kolokol Siohwa nan Pwopwoud
5. Ia wehwehn “sahl silipwoat” nan pwopwoud?
5 Pwopwoud ehu anahne kolokol Siohwa pwe ara pwopwoud en kak pweida. Sapwellime Mahsen ketihtihki: “Sahl silipwoat me patpene pahn apwal en mweipeseng.” (Ekl. 4:12) “Sahl silipwoat” iei karasaras ehu. Ahnsou me karasaras wet kin kadoadoahk ong pwopwoud, met kin pid ohl oh lih pwopwoud me wia tepin sahl rioapwoato, oh Siohwa Koht iei sahl me keieu kesempwal me iang sahl rioapwoato. Ehuiong Koht kin kihong pwopwoud ehu kehl en powehdi kahpwal akan, oh iei ahl en ahneki peren me keieu laud nan pwopwoud.
6, 7. (a) Dahme Kristian akan kak wia pwehn kolokol Siohwa nan arail pwopwoud? (b) Irair dah me kahrehda emen sister kin kesempwalki eh pwoud?
6 Dahme pwopwoud ehu kak wia pwe ara pwopwoud en kak duwehte sahl silipwoato? Sounmelkahka Depit koulki: “Maing ei Koht, ia uwen ei kin ngoangki kapwaiada kupwuromwien! I kin kolokol sapwellimomwi padahk kan nan mohngiongiet.” (Mel. 40:8) Atail limpoakohng Koht pil kin kamwakid kitail en papah ih ki mohngiong unsek. Kahrehda ira koaros anahne kakairada nanpwungmwahu rehn Siohwa oh perenki kapwaiada kupwure. Ohl oh lih pwopwoud pil anahne kakehlakahda ahn meteio limpoak ong Koht.—Lep. Pad. 27:17.
7 Ma sapwellimen Koht kosonned kin mih loalatail, kitail pahn kasalehda soangen irair kan me duwehte pwoson, koapworopwor oh limpoak oh met pahn sewese kakehle nanpwungen pwopwoud. (1 Kor. 13:13) Emen Kristian ede Sandra me pwopwoud erein sounpar 50 nda: “Dahme I kin keieu kesempwaliki rehn ei pwoud iei eh kaweid me poahsoankihda Paipel oh eh limpoak ong Siohwa me kehlail sang eh limpoak ong ie.” Ohl pwopwoud kan, amwail pwoud kan kak ndahkin kumwail soahng wet?
8. Dahme anahn pwehn ale “kamwahupe” nan pwopwoud?
8 Nin duwen pwopwoud ehu, kumwa kin keieu kesempwaliki amwa nanpwungmwahu rehn Siohwa oh amwa doadoahk en Kristian nan amwa mour? Ke kin uhdahn wiahki ahmw pwoud me iei iengomw nan ahmw doadoahk ong Siohwa? (Sen. 2:24) Nanmwarki Solomon ntingihdi: “Aramas riemen mwahusang emente, pwehki ma ira pahn patpene doadoahk, e pahn mie katepe [“kamwahupe,” NW].” (Ekl. 4:9) Ohl oh lih pwopwoud anahne doadoahk laud pwehn ale “kamwahupe” me wehwehki limpoak oh ehupene me Koht kin ketin kapaiada.
9. (a) Pwukoa dah kan me ohl pwopwoud kan pwukoahki? (b) Nin duwen Kolose 3:19, ia pahn wiewiahn ohl pwopwoud men ong eh pwoud?
9 Kasalepen me pwopwoud ehu kin kolokol Koht nan ara pwopwoud iei ara nannanti en kapwaiada Sapwellime koasoandi kan. Ohl pwopwoud me keieu pwukoahki en apwalih anahn en war en peneinei oh sewese arail nanpwungmwahu rehn Koht. (1 Tim. 5:8) Ohl pwopwoud kan en pil tehk pepehm en arail pwoud. Kolose 3:19 mahsanih: “Kumwail ohl akan, kumwail en poakohng amwail pwoud kan, oh dehr lemeiong irail.” Emen semen en Paipel kawehwehda me lepin lokaia “lemei” kin pidada “wia lokaia kamedek de kamakam oh sohte kasalehda limpoak oh nsenoh, sohte apwalih de sewese irail.” Soangen tiahk wet sohte konehng nan peneinei en Kristian. Ma ohl pwopwoud men kin doadoahngki eh tapwi ni elen limpoak, eh pwoud pahn men uhpah ih.
10. Soangen madamadau dah me lih pwopwoud Kristian men anahne kasalehda?
10 Lih pwopwoud Kristian kan me men kolokol Siohwa nan arail pwopwoud anahne kapwaiada sapwellimen Koht koasoandi kan ong lih pwopwoud. Wahnpoaron Pohl ntingihdi: “Kumwail lih pwopwoud kan, kumwail pein uhpah amwail pwoud kan, duwehte amwail kin uhpah Kaun-o. Pwe ohl pwopwoud ih me moangen eh pwoud, duwehte Krais me tapwin mwomwohdiso.” (Ep. 5:22, 23) Sehdan pitih Ihp oh likamwkihda me dene uhtohrda sang Koht pahn wahdo peren soutuk. Irair en men uhtohr kin sansal nan pwopwoud tohto rahnwet. Ahpw lih pwopwoud akan me pohnese sapwellimen Koht madamadau duwen pwopwoud kin perenki uhpahiong arail tapwi limpoak kan. Irail tamataman me Siohwa ketin koasoanehdi Ihp en wia ‘sawasepen’ eh pwoud. E sansal me rehn Koht, met iei pwukoa kesempwal ehu. (Sen. 2:18) Lih pwopwoud Kristian men me kin perenki kapwaiada pwukoa wet kin wia “kaperenpen” eh pwoud.—Lep. Pad. 12:4.
11. Dahme emen brother kosoaia me sewese eh pwopwoud?
11 Pil ehu sawas ong en kolokol Koht nan pwopwoud iei ara pahn kin onop pene Mahsen en Koht. Gerald me pwopwoud erein sounpar 55 nda, “Wiewia me keieu kesempwal nan mour en pwopwoud me pweida iei wadek oh onop pene Paipel.” E pil kapatahiong, “Doadoahkpene nan soahng kan me pid atail kaudok kin kahrehda ohl oh lih pwopwoud en kerenpene nanpwungara oh pil rehn Siohwa.” Onop pene Paipel kin sewese peneinei en tamataman sapwellimen Siohwa koasoandi kan oh kakehlailihala arail nanpwungmwahu rehn Siohwa oh pil kaukaule kekeirda nin duwen Kristian.
12, 13. (a) Dahme kahrehda kapakap pene inenen kesempwal ong pwopwoud ehu? (b) Ia pil ekei doadoahk en Kristian me kin kakehlailih pwopwoud?
12 Pwopwoud nsenamwahu kan pil kin kapakap pene. Ma ohl pwopwoud men kin ‘kasalehda eh apwal kan koaros’ oh peki mehkot me pid ara irair, met pahn kakehlahda ara pwopwoud. (Mel. 62:8) Karasepe, e pahn mengei en pwilikihdi amwa sawehwe mwurin amwa peki rehn Siohwa sawas oh kaweid! (Mad. 6:14, 15) Me pid duwen kapakap, e konehng emenemen en koasoanehdi en ‘sawaspene oh mahkpene nanpwungara.’ (Kol. 3:13) Tamataman me kapakap kin kasalehda omw kin likih Koht. Nanmwarki Depit patohwan: “Me momour kan koaros kin sohpeiong oh koapworopworkin komwi.” (Mel. 145:15) Ahnsou me kitail kin sohpeiong oh koapworopworki Koht ni kapakap, atail pwunod kan kin tikitikla pwehki kitail ese me ‘e kin ketin apwahpwalih kitail.’—1 Pit. 5:7.
13 Pil ehu ahl en kolokol Siohwa nan mouren pwopwoud iei en iang towehda mihding kan en mwomwohdiso oh ehupene nan kalohk. Nan atail mihding kan, pwopwoud kan kin sukuhliki iaduwen arail pahn pelian “widing suwed kan” me Sehdan kin doadoahngki pwehn kauwehla peneinei kan. (Ep. 6:11) Ohl oh lih pwopwoud me kin kaukaule ehupene nan kalohk kin esehla en “kehlail oh dadaur.”—1 Kor. 15:58.
Ahnsou me Kahpwal akan Kin Pwarada
14. Soahng dah kan me kak kahrehda kahpwal nan pwopwoud?
14 Kaweid kan me kohdaier mwowe sohte wia mehkot me kapw ong kitail. Ahpw, ke anahne koasoiaiong omw pwoud duwen mepwukat. Kilang ma mie wasa kan nan amwa pwopwoud me anahne kamwahula. Paipel kasalehda me irail akan me kolokol Siohwa nan arail mour en pwopwoud pahn pil “diar apwal tohto nan mouren sampah ni arail pwopwoud.” (1 Kor. 7:28) Pwehki soh unsek en aramas akan, irair suwed en nan sampah wet, oh pil lidip en Sehdan kan, irail sapwellimen Koht me lelepek me pwopwoud pil kak lelong kahpwal kan. (2 Kor. 2:11) Ahpw Siohwa kin ketin sewese kitail en kak powehdi kahpwal pwukat. Nein ohl lelepek Sohp mahn akan, ladu kan oh seri kan mehla. Ahpw Paipel mahsanih: “Ni mehkoaros me wiawiher, Sohp sohte dipikihda eh lahlahwehki Koht.”—Sohp 1:13-22.
15. Iaduwen kahpwal kan kak kamwakid ahn emen lokaia? Iaduwen ohl oh lih pwopwoud kak powehdi soangen kahpwal wet?
15 Ahn Sohp pwoud ndaiong ih: “Ia duwe, ke dadaurete nan omw loalopwoatohng Koht? Dahme ke sou lahlahwehki, ke ahpw mehla?” (Sohp 2:9) Mehlel, ahnsou me kahpwal kin pwarada, met kak kahrehong emen en wia mwekid pweipwei. Emen ohl loalokong koasoia: “Kahpwal kak kahrehong emen en wia mwekid pweipwei.” (Ekl. 7:7, NW) Ma omw pwoud lokaia kamedek ong uhk pwehki “kahpwal” ehu, song ken kolokol omw meleilei. Pwe ma ke pahn sapeng ni soangen ahlohte, e pahn kak kahrehong kumwa koaros en nda mehkot me pahn kalaudehla kahpwalo. (Wadek Melkahka 37:8.) Pohnsehsehla “pato mwahl akan” me pwarada pwehki pwunod en kahpwal kan.—Sohp 6:3.
16. (a) Iaduwen mahsen en Sises me dierek nan Madiu 7:1-5 kin pid mour en pwopwoud? (b) Dahme kahrehda toupahrek kesempwal nan mour en pwopwoud?
16 Ohl oh lih pwopwoud anahne en dehr kasik laudsang dahme konehng. Emen ohl de lih pwopwoud kakete kilang irair ehu rehn eh pwoud oh nda, ‘I kak wekidala ih.’ Ki limpoak oh kanengamah, ke kak sewese omw pwoud en ekis ekis kamwahwihala irairo. Ahpw ke dehr manokehla me Sises kin ketin karasahiong emen me kin mwahuki tetehk sapwung tikitik en meteio duwehte emen me kin kilang kisin “diper” nan mesen rieo ahpw sohte kak kilang “lepin tuhke” nan mese. Sises ketin kaweidkin kitail: “Dehr [“Uhdi,” NW] kadeik aramas teikan.” (Wadek Madiu 7:1-5.) Met sohte wehwehki me pwopwoud kan sohte pahn kapwungala sapwung laud kan me pwarada. Robert me pwopwoud erein sounpar 40 koasoia: “Koasoi ni saledek oh mehlel ong emenemen oh pil nantihong alehda kaweid pahn kahrehong emen en anahne wiahda wekidekla kan nan eh mour.” Kahrehda ken toupahrek. Dehr nsensuwed ma omw pwoud sohte kasalehda irair kan me ke mwahuki, ahpw nantihong en kalahnganki oh perenki irair mwahu kan me e ahneki ahnsou wet.—Ekl. 9:9.
17, 18. Ni ahnsou me kahpwal kin pwarada, iawasa kitail kak ale sawas sang ie?
17 Kasongosong kak lel ni ahnsou me wekidekla nan mour kin wiawi. Pwopwoud ehu kak lelong kahpwal kan ni ahnsou me mie neira seri kan. Ohl de lih pwopwoud de seri men kakete lelong soumwahu laud. Pahpa oh nohno me mahlahr mwein pahn anahne sawas. Seri laud kan mwein kosoula wasa doh. Wekidekla teikan mwein wiawi pwehki pwais oh pwukoa nan mwomwohdiso. Wekidekla pwukat koaros kak kahrehda kisin kahpwal oh pwunod nan mour en pwopwoud.
18 Ma kahpwal nan omw pwopwoud kahrehda ken pehm me ke solahr kakohng, dahme ke kak wia? (Lep. Pad. 24:10) Dehr kesehla omw koapworopwor! Sehdan kin men kilang sapwellimen Siohwa me lelepek men eh kesehla kaudok mehlel. E pahn pil peren laud sang met ma pwopwoud ehu wia met. Kahrehda wia uwen omw kak koaros pwe omw pwopwoud en kolokolete sahl silipwoato. Paipel kin kasalehda irail me tohto me kolokolete arail lelepek mendahki kahpwal laud kan. Karasepe, ehu pak Depit kasalehong Siohwa audepen eh mohngiong ni eh patohwan: “Maing Koht, komw ketin kupwurkalahngan ong ie, pwe I patohwan milahr nan apwal laud; ei imwintihti kan [“aramas,” NW] kin pwakipwakih ie ahnsou koaros.” (Mel. 56:1) Mie pak me ke kin tihwohkihla uhwong sang “aramas”? Mehnda ma kahpwal kohsang emen tohrohr de pil emen me keieu karanih iuk, ahpw tamataman: Depit diar kehl en dadaur oh ke pil kak wia met. Depit mahsanih: “I kapakapohng KAUN-O, e ahpw ketin sapeng ie; e ketin kasaledekihiehla sang nan ei masak koaros.”—Mel. 34:4.
Pil Ekei Kapai
19. Ni ahl dah me kitail kak irehdi uhwong kan en Sehdan?
19 Ni ahnsoun imwi wet, ohl oh lih pwopwoud kan anahne ‘kakehlakahda emenemen irail, oh sawaspene.’ (1 Des. 5:11) Dehr manokehla me Sehdan kin nda me kitail kin lelepek ong Siohwa pwehki atail roporop. E pahn doadoahngki soangen ahl koaros, iangahki kauwehla mour en pwopwoud, pwehn kauwehla atail lelepek ong Koht. Pwehn irehdi uhwong kan en Sehdan, kitail anahne en likih Siohwa ni unsek.—Lep. Pad. 3:5, 6.
20. Kapai dah kan pahn kohsang kolokol Koht nan ahn emen mour en pwopwoud?
20 Kapai kan me kohsang atail kin kolokol Koht nan atail pwopwoud me tohto. Met sansal sang mour en Joel oh eh pwoud me pwopwoud erein sounpar 51. E nda: “I kin ahnsou koaros kalahngankihong Siohwa ei pwoud oh nanpwungmwahu me se ahneki. E kin wia lih pwopwoud mwahu men.” Ia duwen ara kin kakehlailih ara pwopwoud? “Se kin nantihong en kasalehda kadek, kanengamah oh limpoak ong emenemen.” Sohte emen kitail kak wia met ni unsek nan koasoandi suwed wet. Ahpw, kitail en nantihong doadoahngki kaweid en Paipel akan oh kolokol Siohwa nan atail pwopwoud. Ma kitail wia met, atail mour en pwopwoud pahn duwehte “Sahl silipwoat me patpene [me] pahn apwal en mweipeseng.”—Ekl. 4:12.
Ke Tamataman?
• Ia wehwehn en kolokol Siohwa nan mour en pwopwoud?
• Dahme ohl oh lih pwopwoud anahne wia ni ahnsou me kahpwal akan kin pwarada?
• Iaduwen atail ese me Koht mih nan pwopwoud ehu?
[Kawehwehpen kilel kan nan ehu ehu pali 20]
Kapakap pene kin sewese pwopwoud ehu en powehdi kahpwal kan