Ke Kin Tiengla Mwowe oh Kasalehda Wahu?
“Kumwail en tiengla mwowe oh kasalehda wahu nanpwungamwail.”—ROM 12:10, NW.
1. Nan sahpw tohto, dahme aramas tohto solahr kin kasalehda?
NAN ekei sahpw kan, me pwulopwul kan kin kelepwikihdi mwohn aramas laud kan pwehn kasalehda wahu. Irail kin wia met pwe irail en dehr mwomwen reireisang me laud kan. Nan soangen sahpw pwukat, e pil sohte konehng seri men en sohpeisang emen me laud. Kasalepen wahu kin wekpeseng nan soangsoangen tiahk kan ahpw koaros kin katamankin kitail duwen Kosonned en Moses me mahsanih: “Kahkahki oh wauneki me mah kan.” (Lip. 19:32) Ahpw e kansensuwed me nan sahpw tohto, pali laud en aramas akan solahr kin kasalehda wahu ong meteikan.
2. Mahsen en Koht kin padahkihong kitail en wauneki ihs?
2 Mahsen en Koht kin kihda kesempwalpen en kasalehda wahu. E kin padahkihong kitail en wauneki Siohwa oh Sises. (Sohn 5:23) Kitail pil kin ale kaweid en kasalehda wahu ong tohnpeneinei kan, iangatail tohnkaudok kan oh pil ekei likin mwomwohdiso. (Rom 12:10; Ep. 6:1, 2; 1 Pit. 2:17) Ia ekei ahl kan me kasalehda kitail kin wauneki Siohwa? Iaduwen kitail kin kasalehda wahu ong riatail Kristian akan? Kitail en tehkpene mepwukat oh pil peidek teikan me pid duwen ire wet.
Wauneki Siohwa oh Pil Mware
3. Ia ehu ahl kesempwal en wauneki Siohwa?
3 Ehu ahl kesempwal en wauneki Siohwa iei en kasalehda wahu ong mware. Kitail wia aramas ekei ong mware. (Wiewia 15:14; Rom 10:13) E inenen wia pwais kaselel ehu en wiliandi mwaren Koht lapalap Siohwa. Soukohp Maika kohpada: “Aramas tohto pahn kekeid ni mwaren arail koht; ahpw kitail pahn kekeid ni mwaren Siohwa atail Koht kohkohlahte.” (Maika 4:5, NW) Kitail kin “kekeid ni mwaren Siohwa” sang ni atail kin nantihong en mour ni ahl ehu me kalinganahda mware. Nin duwen Pohl katamankihong Kristian akan nan Rom, ma kitail sohte kin mour pahrekiong rongamwahu me kitail kin kalohki, kitail “wiemwahlkilahr” mwaren Koht.—Rom 2:21-24.
4. Iaduwen ke kin kilangwohng ahmw pwais en kadehde duwen Siohwa?
4 Kitail kin wauneki Siohwa sang ni atail wia doadoahk en kalohk. Mahs, Siohwa ketin luke wehin Israel en wia sapwellime sounkadehde kan, ahpw irail sohte kapwaiada pwukoa wet. (Ais. 43:1-12) Irail kin kalapw sapeikiong Siohwa oh kin “katoutouwihala nan kupwuren Koht Sarawien Israel.” (Mel. 78:40, 41) Kedekedeo, wehio solahr ahneki nanpwungmwahu rehn Siohwa. Rahnwet, kitail kin kalahnganki atail pwais en kadehde duwen Siohwa oh mware. Kitail kin wia met pwehki kitail poakohng ih oh men mwareo en sarawihla. Atail kin ese padahk mehlel duwen Samatail nanleng oh kupwure kan kin kamwakid kitail en men wia doadoahk en kalohk. Atail pepehm kin duwehte en wahnpoaron Pohl me koasoia: “E uhdahn koasoandiong ie I en wia doadoahk wet. Oh meid suwediong ie, ma I sohte pahn lohkiseli rongamwahu!”—1 Kor. 9:16.
5. Iaduwen en pwoson Siohwa kin pid en wauneki ih?
5 Sounmelkahka Depit koasoia: “Irail kan me patohwan esei komwi [“mwaromwi,” NW] pahn kin likih komwi; komw sohte kin ketin likidmeliehla mehmen me kin patohdo rehmwi.” (Mel. 9:10) Ma kitail kin uhdahn ese Siohwa oh kasalehda wahu ong mware, kitail pahn likih ih duwehte me sapwellime ladu lelepek kan en mahs kin wia. Soangen likilik oh pwoson wet ong Siohwa iei pil ehu ahl en kasalehiong ih wahu. Tehk iaduwen Mahsen en Koht kin kasalehda me en likih Siohwa kin pid en wauneki ih. Ni ahnsou me Israel en mahs solahr likih Ih, Siohwa ketin keinemwe Moses: “Ia erein aramas pwukat ar pahn mwamwahlikin ie? Ia erein ar pahn kahng kamehlele ie, ni ei wiadahr manaman tohtohie mwohn masarail kan?” (Nemp. 14:11) Ni pali teio, kitail kak kasalehda atail wauneki Siohwa sang ni atail kin likih ih en doare kitail oh sewese kitail ni atail kin lelohng kahpwal akan.
6. Dahme kin kamwakid kitail en kasalehda atail wauneki Siohwa?
6 Sises ketin kasalehda me en wauneki Siohwa anahne kohsang nan loalatail. Ong irail akan me arail kaudok sohte kin kohsang nan loalarail, Sises ketin doadoahngki mahsen en Siohwa: “Aramas pwukat kin kahkahkin ie arail lokaiahte, a kapehdirail kan me inenen dohsang ie.” (Mad. 15:8) En wauneki Siohwa ni mehlel kin kohsang atail limpoak mehlel ong ih. (1 Sohn 5:3) Kitail pil kin tamatamante sapwellimen Siohwa inou: “I pahn kin wauneki irail kan me kin waunekin ie.”—1 Sam. 2:30.
Sounapwalih kan nan Mwomwohdiso Kin Kasalehda Wahu ong Meteikan
7. (a) Dahme kahrehda brother kan me ahneki pwukoa kan anahne kasalehda wahu ong meteikan? (b) Iaduwen Pohl kin kasalehda wahu ong ienge tohnkaudok kan?
7 Wahnpoaron Pohl kin kaweidih ienge tohnkaudok kan: “Kumwail en tiengla mwowe oh kasalehda wahu nanpwungamwail.” (Rom 12:10, NW) Brother kan me ahneki pwukoa nan mwomwohdiso anahne en wia mehn kahlemeng mwahu de “en tiengla mwowe” pwehn kasalehda wahu ong meteikan. Irail akan me ahneki pwukoa kan anahne idawehn mehn kahlemeng en Pohl. (Wadek 1 Deselonika 2:7, 8.) Brother kan nan mwomwohdiso kan me Pohl mwemweitla ie ese me e sohte pahn padahkihong irail en wia mehkot me pein ih sohte men wia. Pohl kin kasalehda wahu ong ienge tohnkaudok kan kahrehda irail pil kin wauneki ih. Ni en Pohl nda: “I pekihki rehmwail, kumwail en kin alasang ie,” kitail kak kamehlele me me tohto kin perenki wia met pwehki eh mehn kahlemeng mwahu.—1 Kor. 4:16.
8. (a) Ia ehu ahl kesempwal me Sises ketin kasalehda me e wauneki sapwellime tohnpadahk kan? (b) Iaduwen sounapwalih kan rahnwet kin idawehn sapwellimen Sises mehn kahlemeng mwahu?
8 Pil ehu ahl me sounapwalih men kin kasalehda wahu ong meteikan iei en kawehwehda ia kahrepe me e kin padahkihong irail en wia mehkot. Ni eh wia met, e kin alasang Sises. Karasepe, ni ahnsou me e mahsanihong sapwellime tohnpadahk kan en kapakapki tohn dondol en tohtohla, Sises ketin padahkihong irail ia kahrepe. E mahsanih: “Rahket me inenen laud, a tohndoadoahk kan me malaulau. Kumwail eri kapakap oh peki rehn Kaunen rahket pwe en ketin kadarodo tohndoadoahk tohto pwe re en iang doadoahk.” (Mad. 9:37, 38) Pil duwehte, ahnsou me e mahsanihong sapwellime tohnpadahk kan en “mwasamwasahn,” e ketikihong irail kahrepe. E mahsanih: “Pwe kumwail sehse rahn me amwail Kaun-o pahn ketido.” (Mad. 24:42) Pak tohto Sises ketin padahkihong sapwellime tohnpadahk kan dahme irail anahne wia oh pil ia kahrepe. Ni ahl wet, e ketin kasalehda me e wauneki irail. Met wia mehn kahlemeng mwahu ong sounapwalih kan!
Wauneki Sapwellimen Siohwa Mwomwohdiso oh Eh Kaweid
9. Ni ahnsou me kitail kasalehda wahu ong mwomwohdisohn Kristian nan sampah pwon oh wiliepe kan, ihs me kitail pil kin wauneki? Kawehwehda.
9 Pwehn wauneki Siohwa, kitail pil anahne en wauneki mwomwohdisohn Kristian nan sampah pwon iangahki wiliepe kan. Ni ahnsou me kitail kin kapwaiada kaweid en Paipel sang pwihn en ladu lelepek, kitail kin kasalehda wahu ong sapwellimen Siohwa pwihn oh sapwellime koasoandi kan. Nan mwomwohdisohn tepin Kristian akan, wahnpoaron Sohn kilangada anahn en kapwungala irail akan me sohte kin wauneki me idihdda kan. (Wadek 3 Sohn 9-11.) Mahsen en Sohn kin kasalehda me mie me sohte kin wauneki sounapwalih kan oh pil arail padahk kan oh kaweid kan. Ahpw pali laud en Kristian ako sohte duwehte irail. Ni ahnsou me wahnpoaron kan momour, e sansal me nin duwen pwihn ehu, re kin kasalehda wahu ong sounapwalih kan.—Pil. 2:12.
10, 11. Kawehwehda sang iren Paipel kan dahme kahrehda konehng ekei en ahneki manaman nan mwomwohdisohn Kristian.
10 Pwehki Sises mahsanihong sapwellime tohnpadahk kan “kumwail koaros kin wia pirien ehu,” ekei kin lemeleme me e sohte anahne emen en ahneki manaman nan mwomwohdisohn Kristian. (Mad. 23:8) Ahpw nan palien Pwuhk Sarawi ni lokaiahn Ipru oh Krihk, mie karasaras tohto en ohl akan me Koht ketikihong irail manaman. Poadopoad en kaunen peneinei kan, sounkopwung kan oh nanmwarki kan nanpwungen mehn Ipru en mahs kin kihda mehn kadehde tohto me Siohwa kin ketin doadoahngki wiliepe kan pwehn ketikihda kaweid kan. Ma irail sohte wauneki me idihdda kan, Siohwa kin ketin kapwungala irail.—2 Nan. 1:2-17; 2:19, 23, 24.
11 Ni ahlohte, tepin Kristian akan kin pohnese manaman en wahnpoaron kan. (Wiewia 2:42) Karasepe, Pohl kin kaweidih rie Kristian akan. (1 Kor. 16:1; 1 Des. 4:2) Ni ahnsowohte e pil kin uhpahiong irail akan me ahneki manaman poh. (Wiewia 15:22; Kal. 2:9, 10) Ei, Pohl kin ahneki madamadau pwung ong manaman nan mwomwohdisohn Kristian.
12. Ire kesempwal riau dah kan me pid duwen manaman me kitail kak sukuhliki sang karasaras kan en Paipel?
12 Kitail kak sukuhliki ire kesempwal riau sang met. Keieu, e pahrekiong iren Paipel kan me “ladu lelepek oh loalokong” me Governing Body kin wiliandi en idihada ohl kan pwehn ahneki pwukoa kan, oh ekei ohl pwukat pahn ahneki manaman pohn ohl idihdda teikan. (Luk 12:42-44; 1 Pit. 5:1-3) Keriau, kitail koaros iangahki ohl idihdda kan anahne wauneki irail akan me ahneki manaman pohtail. Ia ekei ahl kan me kitail kak wauneki irail akan me ahneki pwukoa nan mwomwohdisohn Kristian en sampah pwon?
Kasalehda Wahu ong Sounapwalih kan me Kin Seiloak
13. Iaduwen kitail kak kasalehda wahu ong sounapwalih kan me kin seiloak?
13 Pohl koasoia: “Riat ko, se peki rehmwail: kumwail en kin wauneki mehlel irail kan me wie doadoahk rehmwail, irail kan me Kaun-o ketin piladahr pwe re en kin kaweid oh panawih kumwail. Eri, kumwail waunekin irail oh pil poakohng irail ni mehlel, pwehki doadoahk me re kin wia. Kumwail pil ahnekipene meleilei nanpwungamwail.” (1 Des. 5:12, 13) Sounapwalih kan me kin seiloak uhdahn kin wia kisehn ‘irail kan me wie doadoahk rehtail.’ Kahrehda kitail anahne en “poakohng irail ni mehlel.” Ehu ahl me kitail kak wia met iei en idawehn arail kaweid ki mohngiong unsek. Ni en sounapwalih me kin seiloak kin padahkihong kitail kaweid kan sang pwihn en ladu lelepek, “erpit me kin sang powe” pahn kamwakid kitail en mwadang en peikiong ih.—Seims 3:17.
14. Iaduwen mwomwohdiso kin kasalehda arail wauneki sounapwalih kan me kin seiloak? Ia imwilahn met?
14 Iaduwen ma kitail alehdi kaweid en wia mehkot ni ahl ehu me weksang dahme kitail ahnlahr? Pwe kitail en kasalehda wahu, ekei pak kitail anahne en powehdi ineng en pelian oh nda, “Se sohte kin wia soahng wet wasaht” de “Mwein e kak wiawi nan mwomwohdiso teikan ahpw kaidehn nan at mwomwohdiso.” Weksang met, kitail pahn nantihong peikiong kaweido. En tamataman me mwomwohdiso iei sapwellimen Siohwa oh Sises me wia Tapwi pahn sewese kitail en wia met. Ni ahnsou me mwomwohdiso pahn perenki kapwaiada kaweid sang sounapwalih me kin seiloak, met kin kasalehda me irail wauneki ih ni mehlel. Wahnpoaron Pohl kin kapinga brother kan nan Korint pwehki arail kasalehda wahu oh peik ong kaweid me Taitus, elder men me mwemweitla rehrail, kihong irail. (2 Kor. 7:13-16) Rahnwet, kitail pil kak kamehlele me atail kin perenki kapwaiada kaweid kan me kitail kin alehdi sang sounapwalih kan me kin seiloak pahn kalaudehla atail peren nan doadoahk en kalohk.—Wadek 2 Korint 13:11.
“Kumwail Wauneki Aramas Koaros”
15. Ia ekei ahl akan me kitail kak kasalehda wahu ong iangatail Kristian akan?
15 Pohl ntingihdi: “Ke dehr lipwoare ohl laud, ahpw kamantikih duwehte omw pahpa men. Wiahki mwahnakapw akan riomw, oh lih laud kan omw nohno, oh peinakapw akan riomw serepein, ni tiahk pwung koaros. Wauneki liohdi kan me kelekelehpw.” (1 Tim. 5:1-3) Mahsen en Koht kin kaweidih kitail en wauneki koaros nan mwomwohdisohn Kristian. Iaduwen ma kowe oh riomw brother de sister men sohte kak pwungkipene mehkot? Met pahn irehdi iuk sang ahmw pahn kapwaiada pwukoa en wauneki iengomw Kristian menet? De ke kak wekidala ahmw madamadau sang ni ahmw pahn tamataman me ih emen sapwellimen Koht ladu oh e ahneki irair mwahu kan en Kristian? Irail akan me ahneki manaman keieu anahne wauneki riarail Kristian akan, ‘dehr kin aksoupeidi ong irail kan me mi pahn epwelparail.’ (1 Pit. 5:3) Nan mwomwohdisohn Kristian me sansalkihda limpoak mehlel nanpwungen towe kan, mie ahl tohto me kitail kak kasalehda wahu nanpwungatail.—Wadek Sohn 13:34, 35.
16, 17. (a) Dahme kahrehda e kesempwal kitail en wauneki irail akan me kitail kin kalohk ong oh pil irail akan me kin uhwong kitail? (b) Iaduwen kitail kin “wauneki aramas koaros”?
16 Kaidehn ihte tohnmwomwohdiso en Kristian me kitail anahne wauneki. Pohl ntinglahng Kristian akan nan eh ahnsou: “Nindokon eh mie atail ahnsou, kitail en wia mwahu ong aramas koaros.” (Kal. 6:10) E kin apwal en kapwaiada kaweid wet ma iangatail tohndoadoahk de tohnsukuhl men sohte kin kadek ong kitail. Nan soangen ahnsowo, kitail anahne tamanda mahsen pwukat: “Ke dehr nda, ‘I pahn wiahiong dahme e wiahiong ie.’” (Lep. Pad. 24:29) En kapwaiada kaweid wet pahn sewese kitail en nantihong kasalehda wahu ong irail akan me kin uhwong kitail. Duwehte met, ni ahnsoun kalohk, en ahneki lamalam en aktikitik kak sewese kitail en sapeng “ni tiahk en kadek oh wahu.” (1 Pit. 3:15, 16) Mwomwatail oh atail likou pil kak kasalehda atail wauneki irail kan me kitail kin kalohk ong.
17 Eri, sohte lipilipil ma kitail mih rehn iangatail tohnkaudok kan de irail akan likin mwomwohdiso, kitail en nantihong kapwaiada kaweid wet: ‘Kumwail wauneki aramas koaros, poakohng riamwail Kristian kan, lemmwiki Koht, oh wauneki nanmwarki lapalapo.’—1 Pit. 2:17.
Iaduwen Ke Pahn Sapeng?
Iaduwen ke kak kasalehda wahu ong:
• Siohwa?
• Elder kan nan mwomwohdiso oh sounapwalih kan me kin seiloak?
• Emenemen tohnmwomwohdiso?
• Irail akan me kitail kin kalohk ong?
[Kawehwehpen kilel kan nan ehu ehu pali 23]
Tepin Kristian akan kin wauneki koasoandi en governing body
[Kawehwehpen kilel kan nan ehu ehu pali 24]
Nan sahpw koaros, elder kan kin wauneki sounapwalih kan me kin seiloak me Governing Body idihada