Kasalehda Omw Wauneki Meteikan

1. Dahme kahrehda aramas akan kin kalahnganki meteikan ar kin kasalehiong irail wahu? (Lepin Padahk 22:​1, NW)

KE KIN kalahnganki ni aramas akan ar kin kasalehiong uhk wahu? Ei uhdahn. Aramas koaros kin men meteikan en waunekin irail. E kin kahrehda kitail en peren. Ihme kahrehda Paipel mahsanih me en “alehdi wahu kin mwahusang silper oh kohl.”—Wadek Lepin Padahk 22:​1, NW.a

2-3. Dahme kahrehda e sohte kin ahnsou koaros mengei en kasalehiong meteikan wahu, oh dahme kitail pahn koasoiapene nan iren onop wet?

² Ekei pak e kin apwal en kasalehiong meteikan wahu. Ehu kahrepe iei pwehki kitail kin kilang soh unsek en meteikan. Oh pil aramas tohto rahnwet sohte kin kasalehda wahu. Ahpw kitail anahne weksang irail. Dahme kahrehda? Pwehki Siohwa ketin kupwurki kitail en wauneki “aramas koaros.”—1 Pit. 2:17.

³ Nan iren onop wet, kitail pahn sukuhlki ia wehwehn en wauneki meteikan oh ia duwen atail kak wia met ong (1) tohn atail peneinei, (2) riatail Kristian kan, oh (3) irail kan likin mwomwohdiso. Ahpw kitail uhdahn pahn medemedewe ia duwen atail kak kasalehda wahu pil ni ahnsou apwal kan.

IA WEHWEHN EN WAUNEKI METEIKAN?

4. Ia wehwehn en wauneki meteikan?

⁴ Ia wehwehn met? En wauneki meteikan kin dokedoke dahme kitail kin medewehki aramas akan oh mwomwen atail wiewia ong irail. Ni atail kilang emen eh ahneki irair mwahu kan, de wiahda soahng mwahu kan, de pil wia atail kaun, kitail kin kasalehiong irail wahu. Oh met kesempwal pwehki kitail uhdahn men wia met.—Mad. 15:8.

5. Dahme kak sewese kitail en kasalehiong meteikan wahu?

⁵ Siohwa ketin kupwurki kitail en kasalehiong meteikan wahu. Karasepe, e ketin padahkihong kitail en kasalehiong “irail kan me ahneki manaman” wahu. (Rom 13:​1, 7) Ahpw ekei kakete medewe: ‘I pahn wauneki aramas ma irail kin kasalehda wahu.’ Ia duwe, madamadau wet konehng? Soh. Kitail ese me kitail anahne kasalehiong meteikan wahu kaidehn pwehki dahme re wia de sohte wia, ahpw pwehki Siohwa ketin kupwurki kitail en wauneki meteikan oh kitail men kaperenda ih.—Sos. 4:14; 1 Pit. 3:15.

6. Kitail kak wauneki emen me sohte kin waunekin kitail? Menlau kawehwehda. (Pil kilang kilel ni kilin Kahn Iroir wet.)

⁶ Ekei kakete medewe, ‘Kitail kak wauneki emen me sohte kin waunekin kitail? Ei. Medewehla ekei karasepe. Nanmwarki Sohl kasarowehdi nah pwutako Sonadan mwohn meteikan. (1 Sam. 20:​30-34) Mendahki met, Sonadan waunekihte eh papaho oh iangih mahwen lao eh pahpao Sohl mehla. (Eks. 20:12; 2 Sam. 1:23) Samworo Lapalap Ilai karaunehki Ana me e sakaula. (1 Sam. 1:​12-14) Mendahki met, Ana koasoiong Ilai ni wahu, mendahki koaros nan Israel ese me Ilai sohte kapwungala nah pwutak suwed ko nin duwen pahpa men oh samworo lapalap men. (1 Sam. 1:​15-18; 2:​22-24) Oh ekei ohl nan Adens, kanamenekih wahnpoaron Pohl oh nda me e ‘ewenwedei.’ (Wiewia 17:18) Ahpw Pohl koasoiong irail ni wahu. (Wiewia 17:22) Karasaras pwukat kasalehda me atail limpoak ong Siohwa oh sohte men kansensuwedihala kak kamwakid kitail en kasalehiong meteikan wahu kaidehnte ahnsou me mengei ahpw pil ni ahnsou me apwal. Kitail pahn koasoiapene ihs me kitail anahne wauneki oh dahme kahrehda.

WAUNEKI TOHN OMW PENEINEI

7. Dahme kahrehda e kak apwal ong kitail en wauneki tohn peneinei?

⁷ Kahpwalo. Kitail kin mi rehn atail peneinei pali laud en ahnsou. Pwehki met, kitail ese arail irair mwahu kan oh soh unsek kan. Ele ekei irail ahneki soumwahu ehu me kahrehda e apwal kitail en apwalih irail, de ahneki pwunod laud. Ekei pil kin koasoia oh wia soahng kan me kin kamedekeikitailla. Kitail kin nsenamwahu ni atail mi rehn tohn atail peneinei, ahpw ni ar sohte kin kasalehda wahu, irail kak lingeringerda pahn emenemen. Imwilahn met, irail sohte kin miniminpene. Duwehte soumwahu en nankoakon medek eh kin kahrehda paliwar en sohte doadoahkpene mwahu, sohte wahu nan peneinei kak kahrehda irail en sohte miniminpene. Ahpw duwehte soumwahu tohto ar kak mwahula, peneinei kan pil kak sukuhlki en wauneki emenemen.

8. Dahme kahrehda e kesempwal en wauneki tohn atail peneinei? (1 Timoty 5:​4, 8)

⁸ Dahme kahrehda kitail kin kasalehda wahu? (Wadek 1 Timoty 5:​4, 8.) Nan nah tepin kisinlikou ong Timoty, Pohl koasoia duwen tohn peneinei kan ar anahne nsenohki en emenemen anahn. E kawehwehda me kitail en kasalehiong tohn atail peneinei wahu, kaidehn pwehki kitail anahne ahpw pwehki atail kin “poadidiong Koht.” Met wehwehki me kitail kin wia met pwehki atail poakohng Siohwa oh wiahki met kisehn atail kaudok ong ih. Siohwa me ketin wiahda peneinei. (Ep. 3:​14, 15) Eri ni atail kin kasalehiong atail peneinei wahu, kitail kin uhdahn wauneki Siohwa, me ketin wiahda peneinei. (1 Tim. 5:4) Met wia kahrepe kesempwal en wauneki atail peneinei.

9. Ia duwen pwopwoud ehu ara kak kasalehda me ira kin wauneki emenemen? (Pil kilang kilel kan.)

⁹ Ia duwen atail pahn kasalehda wahu. Ohl pwopwoud men me kin wauneki eh pwoud kin kasalehda me liho kesempwal ong ih ni ara kin kelehpwla oh pil ni ara mi rehn meteikan. (Lep. Pad. 31:28; 1 Pit. 3:7) E sohte kin keme, kanamenekih, de kahrehiong en pehm me sohte katepe. Ariel,b me kin mi Argentina koasoia: “Pwehki ei pwoudo soumwahu, ekei pak e kin koasoia soahng kan me kamedek. Ni eh kin wia met, I kin taman me dahme e koasoia kaidehn ihme e men nda. Oh I kin song en tamataman 1 Korint 13:​5, me sewese ien kin koasoiong ni wahu a kaidehn ni lemei. (Lep. Pad. 19:11) Lih pwopwoud men kin wauneki eh pwoud sang ni eh kin koasoia soahng kan me kasalehda me e wauneki. (Ep. 5:33) E sohte kin kauwe, kemenkouruhrki, oh kanamenekih, e ese me ma e wia met, e pahn kauwehla eh mouren pwopwoud. (Lep. Pad. 14:1) Sister men nan Italy me eh pwoudo kin pwunod laud koasoia: “Ekei pak I kin medewe me ei pwoudo kin nohn pwunod daulihala. Mwoweo, ei koasoi oh mwomwen meseie kin kasalehda me I sohte wauneki. Ahpw ni ei kin mi rehn kompoakepahi kan me kin koasoia meteikan ni wahu kin sewese ie. Met kamwakid ien kalaudehla ei wauneki ei pwoudo.”

10. Ia duwen me pwulopwul kan ar kak kasalehda me re wauneki arail pahpa nohno?

¹⁰ Me pwulopwul kan, peikiong koasoandi kan me amwail pahpa nohno wiahda. (Ep. 6:​1-3) Koasoiong irail ni wahu. (Eks. 21:17) Ni arail mahmahla, kasalehda me ke waunekin irail sang ni omw sewesekin irail dahme re anahne. Wia uwen omw kak pwehn apwalih irail. Medewehla mehn kahlemeng en Maria, me eh pahpao kaidehn emen Sounkadehdehn Siohwa. Ni ahnsou me eh pahpao soumwahuda, e apwal ong Maria en apwalih pwehki e kin lemeiong. E koasoia: “I sohte kin kapakapkihte ien wauneki ei pahpao, ahpw ien pil kak kasalehda me I wauneki. I medewe me ma Siohwa ketin kehkehlingkihong ien wauneki ei pahpa nohno, eri e pahn pil ketikihong ie kehl en wia met. Mwuhr, I esehda me I anahne wauneki ei pahpao, mehnda ma e sohte wekila.” Ni atail kin wauneki tohn atail peneinei mehnda ma e apwal, kitail kin kasalehda me kitail wauneki Siohwa me ketin wiahda koasoandi en peneinei.

WAUNEKI RIOMW KRISTIAN KAN

11. Dahme kahrehda kitail kakete apwalki wauneki riatail Kristian kan?

¹¹ Kahpwalo. Riatail Kristian kan kin wia uwen ar kak en mour pahrekiong kaweid en Paipel kan; ahpw ekei sohte kin kadek ong kitail, ahneki madamadau sapwung duwen kitail, de kalidorih kitail. Ma riatail Kristian men kihda ‘kahrepen en kaulime kitail,’ e kak apwal ong kitail en wauneki. (Kol. 3:13) Dahme kak sewese kitail?

12. Dahme kahrehda e kesempwal kitail en wauneki riatail Kristian kan? (2 Piter 2:​9-12)

¹² Dahme kahrehda kitail kin kasalehda wahu? (Wadek 2 Piter 2:​9-12.) Nan nah keriaun kisinlikowo, Piter koasoia me ekei nan mwomwohdiso ahnsowo sohte kin kasalehda arail wauneki “irail kan me Koht ketin kawauwihala,” me iei elder kan. Irail sohte kin koasoia soahng mwahu kan duwen elder ko. Ia duwen tohnleng lelepek kan me kilang dahme wiawi ar mwekidki? “Pwehki ar wauneki Siohwa,” irail sohte kauwehkin irail lokaia kamedek. Medewehla met! Tohnleng lelepek ko sohte men kauwe ohl pohnmwahso pwukat. Ahpw, irail mweidohng Siohwa en ketin kadeikirailda. (Rom 14:​10-12; pil kilang Sud 9.) Kitail kak sukuhlsang tohnleng pwukat. Tohnleng kan pil kin wauneki me uhwong kan. Eri ia uwen laud en atail anahne wauneki riatail Kristian kan me kin poakohng Siohwa. Kitail anahne wia uwen atail kak en waunekin irail. (Rom 12:10) Atail wia met kin kasalehda me kitail wauneki Siohwa.

13-14. Ia duwen atail kak kasalehda atail wauneki irail kan nan mwomwohdiso? Menlau kihda karasaras. (Pil kilang kilel kan.)

¹³ Ia duwen atail pahn kasalehda wahu. Elder kan, ni amwail kin padahkih meteikan, wia met ni limpoak ahnsou koaros. (Pail. 8, 9) Ma kumwail anahne kaweid emen, wia met ni kadek a kaidehn ni amwail lingeringer. Sister kan, kumwail kak sewese irail kan nan mwomwohdiso en wauneki emenemen sang ni amwail sohte kin lipahnede emen de karaunlikamwih emen. (Taitus 2:​3-5) Kitail koaros kak kasalehda atail wauneki elder kan nan mwomwohdiso sang ni atail kin utung irail oh kasalehda atail kalahnganki doadoahk laud me re kin wia pwehn wia mihting kan, tiengla mwowe nan kalohk, oh sewese irail kan me “weweid nan ahl sapwung.”—Kal. 6:1; 1 Tim. 5:17.

¹⁴ Sister men me adaneki Rocío, diarada me e apwalki wauneki elder men me kihong ih kaweid. E koasoia: “I nsensuwed pwehki I pehm me e sohte koasoiong ie ni kadek. Nan imweio, I kin kauwe. Mendahki I song en dehr kasalehda met, I pehm me e sohte uhdahn nsenohkin ie eri I sohte nsenohki eh kaweid.” Dahme sewese Rocío? E koasoia: “I wadek 1 Deselonika 5:​12, 13. Ni ei esehda me I sohte kin kasalehda ei wauneki brother menet, kadeikpen loalei tepida kedirapwa ie. I kapakapohng Siohwa oh wia roporop nan neitail sawasepen Paipel kan pwehn diarada ire kan me kak sewese ien wekidala ei madamadau. Mwuhr I esehda me kaidehn brothero me kahpwalo, ahpw ngehi me pohnmwahso. Met I wehwehki me ma I sohte aktikitik, e pahn apwal ong ie en wauneki meteikan. I kin nannantihte kalaudehla ei wauneki meteikan, oh I pehm me Siohwa ketin kupwurperenki ei wia met.”

WAUNEKI IRAIL KAN LIKIN MWOMWOHDISO

15. Dahme kahrehda kitail kakete apwalki wauneki irail kan likin mwomwohdiso?

¹⁵ Kahpwalo. Kitail kin kalapw tuhwong aramas akan nan kalohk me sohte kin nsenohki duwen Koht de Paipel. (Ep. 4:18) Ekei sohte kin men rong dahme kitail kin kalohngki. Ekei iengatail tohnsukuhl de tohn doadoahk sohte kin kadek ong kitail. Oh ele atail kaunen doadoahk de sounpadahk sohte kin kalahnganki atail doadoahk. Kitail kakete sohla wauneki oh kadek ong irail.

16. Dahme kahrehda e kesempwal kitail en wauneki irail kan me saikinte papah Siohwa? (1 Piter 2:12; 3:15)

¹⁶ Dahme kahrehda kitail en kasalehda wahu? Tamataman me Siohwa kin ketin mahmahsanih mwomwen atail wiewia ong irail kan me saikinte pahpa ih. Wahnpoaron Piter katamankihong Kristian ko me arail wiewia mwahu kak kamwakid ekei en “kalinganahda Koht.” Pwehki met, e padahkihong irail en kawehwehda dahme re kin kamehlele “ni mpahi oh wahu laud.” (Wadek 1 Piter 2:12; 3:15.) Mehnda ma Kristian kan anahne kawehwehiong me lapalap kan de meteikan duwen arail pwoson, irail anahne waunekin irail ahnsou koaros. Pwehki met, Siohwa kin ketin tetehk oh rongorong kaidehn dahme kitail ndahte ahpw mwomwen atail nda. Met wia kahrepe kesempwal kitail en wauneki irail kan likin mwomwohdiso!

17. Ia duwen atail kak wauneki irail kan likin mwomwohdiso?

¹⁷ Ia duwen atail pahn kasalehda wahu. Nan kalohk, kitail sohte men kahrehiong aramas akan en medewe me kitail kin wiahkin irail aramas sohte kesempwal kei pwehki irail sohte nohn ese duwen Paipel. Ahpw, kitail men wiahkin irail aramas kesempwal kei ong Koht oh irail lapalapasang kitail. (Ak. 2:7; Pil. 2:3) Eri, ma aramas ndaiong uhk mehkot me sohte kadek pwehki dahme ke kin kamehlele, dehr wiahiong irail soahngohte. Karasepe, kitail sohte men mwomwehda loalokong oh koasoia soahng kan me pahn kalingeringerih irail. (1 Pit. 2:23) Ma ke wia met mwadang pekimahk. Ia duwen omw kak wauneki irail kan nan omw wasahn doadoahk? Wia tohndoadoahk pwerisek men oh song en kilang soahng mwahu kan rehn iengomw tohndoadoahk kan oh pil aramas akan me ke doadoahkohng. (Taitus 2:​9, 10) Ni omw kin mehlel oh pwerisek en doadoahk, mwein ke kak de sohte kak kaperenda aramas ahnsou koaros, ahpw ke uhdahn pahn kaperenda Koht.—Kol. 3:​22, 23.

18. Dahme kahrehda e mwahu kitail en kalaudehla oh kasalehda atail wauneki meteikan?

¹⁸ Kitail ahneki kahrepe mwahu tohto en kakairada oh kasalehda atail wauneki meteikan. Kitail koasoiapenehr me ni atail kin wauneki tohn atail peneinei, kitail kin wauneki Siohwa me wia tapwin peneinei. Duwehte met, ni atail kin wauneki riatail Kristian kan, kitail kin wauneki Samatailo nanleng. Oh ni atail kin wauneki irail kan likin mwomwohdiso, kitail kin kamengeiong irail en ehu rahn kalinganahla de wauneki atail Koht lapalapo. Mehnda ma ekei sohte waunekin kitail, kitail en ahnsou koaros wauneki irail. Dahme kahrehda? Pwehki Siohwa pahn ketin kapaikitailda. E ketin inoukihda: “I pahn wauneki irail kan me kin waunekin ie.”—1 Sam. 2:30.