Wauneki Irail Akan Me Pwukoahki En Apwalih Kumwail

“Kumwail wauneki aramas koaros, poakohng riamwail Kristian kan, lemmwiki Koht, oh wauneki nanmwarki lapalapo.”​—1 PITER 2:17.

1, 2. Iaduwen aramas akan kin kilangwong irail akan me ahneki manaman nan rahnpwukat? Dahme kahrehda?

“SERI KAN kin ahneki pwung koaros. Irail sohte kin wauneki pahpa oh nohno kan,” nohno men kompilainki. Mie sain ehu me kin kapasdi ni mwurin sidohsa kan, me koasoia: “Peikasalki Irail Akan me kin Ahneki Manaman.” Mwein ke eseir duwen met, me madamadau pwukat kin kasansalehda irairen madamadau en aramas akan me kin wiawi nan rahnpwukat. Madamadau wet en sohte kasalehda wahu ong pahpa oh nohno kan, sounpadahk kan, kaun en pisnes kan, kaun en koperment kan kin kalapw wiawi nin sampah pwon.

² Ekei aramas ele kin itik pwopwerail oh eri nda, ‘Irail akan me kin mih nan pwukoa en apwalih kitail sohte warohng I en wauneki irail.’ Mehlel, ekei ahnsou e pahn apwal en kahmahmki met. Kitail kin kilang de rong duwen kaun en koperment mwersuwed kan, kaun en pisnes noahrok kan, sounpadahk kan me sohte kin wia ahr pwukoa ni ahl mwahu, oh pahpa oh nohno lemei kan. Ahpw, e inenen kaselel, pwe Kristian malaulaute kin sohte kasalehda wahu ong irail akan me kin ahneki pwukoa nan mwomwohdiso.​—Madiu 24:45-47.

3, 4. Dahme kahrehda Kristian akan anahne kasalehda wahu ong irail akan me kin ahneki pwukoa en kaunda kitail?

³ Nin duwen Kristian akan, mie “kahrepen” kitail kak wauneki irail akan me kin kaunda de apwalih kitail nin sampah wet. Wahnpoaron Pohl kaweidkin Kristian akan en “peikiong pwungen wehi kan; pwe Koht, iei ih me kin ketikihong wehi kan arail pwung, oh ih me pil ketikihongehr pwungen wehi kan nin sampah.” (Rom 13:1, 2, 5; 1 Piter 2:13-15) Pohl pil kin kasalehda kahrepen peikiong irail akan me kin kaun nan peneinei kan: “Kumwail lih akan, kumwail peikiong amwail pwoud kan, pwe ih me kumwail uhdahn pahn wia nin duwen tiahk en Kristian. Kumwail seri kan, iei amwail pwukoa nin duwen tiahk en Kristian: kumwail pahn kin peikiong amwail pahpa oh nohno kan, pwe iei me Koht kin ketin kupwurperenki.” (Kolose 3:18, 20) Elder kan en mwomwohdiso kin warohng kitail en wauneki irail pwehki ‘sihpw akan koaros me ngehn sarawi ketikihong irail en apwahpwalih. Irail en wia silepen mwomwohdisohn Koht.’ (Wiewia 20:28) Pwehki kitail kin wauneki Siohwa, ih kahrepe kitail pil kak wauneki aramas akan me kin ahneki pwukoa en kaunda de apwalih kitail. Ahpw, ni mehlel, kitail en mwohneki atail wauneki Siohwa.​—Wiewia 5:29.

⁴ Kitail pahn medemedewe duwen sapwellimen Siohwa kaunda ileile, oh kitail pahn tehk duwen ekei aramas akan me sohte wauneki irail akan me ahneki pwukoa laud kan oh pil irail aramas akan me kin wauneki irail.

Sohte Wauneki Aramas kin Kahrehong Emen en Sohlahr Kenikenla Rehn Kauno

5. Iaduwen Maikal sohte wauneki Depit, oh met imwikihla dah?

⁵ Sang poadoapoad en Nanmwarki Depit, kitail kak kilang ia duwen Siohwa kin kilangwong aramas akan me kin mwamwahliki irail akan me kin ale manaman en kaunda meteikan. Ni ahnsou me Depit wahlahng nan Serusalem Kohpwahn Inowo Maikal “kilangada Nanmwarki Depit eh wie kahkahlek oh lusulusseli mwohn Kohpwao. Serepeino eri nsensuwedkihla kowahlap.” Maikal anahne pohnese me Depit iei kaun en peneinei men oh pil nanmwarki en sahpwo. Ahpw, e kasalehda e pepehm akan ni e kin doadoahngki lokaia kamedek kan: “Rahnwet nanmwarkien Israel ketin kalowediong pein ih mwar lapalap ehu, ni eh ketin kasalehda eh mwomwen iahkalahr mwohn mesen serepein lidu en sapwellime soumas akan!” Pwehki met, Maikal sohte nainekihda seri men.​—2 Samuel 6:14-23.

6. Iaduwen Siohwa kin kilangwong ahn Kora kin mwamwahliki sapwellimen Koht me keidio?

⁶ Pil ehu karasepehn emen me sohte wauneki kaun akan me Koht ketin pilada, iei Kora. Nin duwen emen me wia mehn Kohath, ia uwen laud e pwais me e kin paiekihda ni e kin papah Siohwa nan Impwalo! Ahpw e song en kasapwungehla Moses oh Aaron, me Koht ketin pilada en apwalih mehn Israel akan. Kora koasoanehdi en ehu ong soupeidi teikan en mehn Israel oh ni lokaia lemei e ndaiong Moses oh Aaron: “Kauno ketin sapwellimanki mehn Israel koaros, oh Kauno Siohwa kin ketiket rehtail koaruhsie. Eri, a dahme komwi, Moses, kin pein kasapwilkomwihda pohn sapwellimen Kauno aramas akan?” Iaduwen Siohwa kin kilangwong madamadau en Kora oh irail akan me kin utungada ih? Koht kin kilang arail wiewia kan nin duwen irail me kin mwamwahliki Siohwa. Mwurin Kora oh soupeidi me 250 kilangada sampah sarapeseng oh kadallehla aramas me mih limwahn irail, Siohwa ketin kadaridi kisiniei me kamwasikahla Kora oh soupeidi kan.​—Nempe 16:1-3, 28-35.

7. Irail “wahnpoaron lapalap akan” mie ahr pwung en kauwe pwukoa me kohwong Pohl?

⁷ Nan mwomwohdisohn Kristian nan keieun senturi, mie aramas akan me kin mwamwahliki koasoandi en epwel me kohsang powe. Irail “wahnpoaron lapalap akan” nan mwomwohdisohn Korint kin mwamwahliki Pohl. Re kin kauwe sapwellimen Pohl padahk kan, ndinda met: “Nein Pohl kisinlikou kan me nohn uk oh kehlail, ahpw ni eh kin piserdo rehtail, e kin luwet oh eh mahsen kan pil sohte wia mehkot.” (2 Korint 10:10; 11:5) Mendahki ma Pohl emen sounkapahrek koahiek men de soh, aramas teikan anahne kasalehda wahu ong ih nin duwen wahnpoaron men. Ahpw, sapwellimen Pohl padahk kan me luwet? Eh kahparek kan mwohn wehi pokon me ntingdi nan Paipel kin kasalehda ia uwen koahiek en ih nin duwen sounkapahrek men ong en sewese aramas teikan en kamehlele eh padahk kan. Eri, ni e wia koasoia mwotomwot rehn Herod Agrippa II, emen me “mwahngih mwahu . . . duwen tiahk en mehn Suhs akan oh pil arail wiewia kan,” Pohl kahrehong nanmwarki menet en mahsanih met: “Nan erein ahnsou mwotomwot kiset ke pahn kahrehda ahi wiahla emen Kristian”! (Acts 13:15-43; 17:22-34; 26:1-28, New World Translation) Ahpw, wahnpoaron lapalap akan nan Korint kin kedipehkin ih me e padahk kan kin luwet oh sohte katepe! Iaduwen Siohwa kin kilangwong ahr madamadau kan? Nan ehu padahk ong sounapwalih kan en mwomwohdiso en Episos, Sises Krais kin kupwurki irail akan me kin kahng en idawehnla irail akan ‘me pein wiahkin irail wahnpoaron.’​—Kaudiahl 2:2.

Kasalehda Wahu Mendahki Soh-Unsek

8. Iaduwen Depit kasalehda wahu ong koasoandi me Siohwa ketin pilada Sohl en kaunda irail?

⁸ Mie mehn kahlemeng tohto nan Paipel ong irail akan me kin wauneki aramas akan me kin pwukoahki manaman en kaunda pohn aramas teikan edetehn kaun pwukat kin doadoahngki sapwung ahr manaman. Depit emen me wia mehn kahlemeng mwahu. E kin papah Nanmwarki Sohl, ahpw Sohl peirinki ahn Depit wiewia kan oh nantihong en kemehla ih. (1 Samuel 18:8-12; 19:9-11; 23:26) Mendahki Depit kak kemehla Sohl, e koasoia met: “I sohte kak kauwehla ih me Kauno ketin wiahkihlahr nanmwarki!” (1 Samuel 24:3-6; 26:7-13) Depit wehwehki me Sohl me sapwung, ahpw e mweidong Siohwa en kadeikada ih. (1 Samuel 24:12, 15; 26:22-24) E sohte wia kauwe Sohl oh pil lokaia lemei ong Sohl.

9. (a) Ia ahn Depit pepehm ni ahnsou me Sohl kin lemei ong ih? (b) Iaduwen kitail ese me ahn Depit wauneki Sohl me mehlel?

⁹ Depit kin pwunod ni ahnsou me e lelohng kahpwal wet? Depit likweriong Siohwa, “Aramas lemei kan . . . songosong en kemeiehla.” (Melkahka 54:3) E kasalehong Siohwa e pepehm loal kan: “Maing ei Koht, komw ketin doareiesang ei imwintihti kan . . . Aramas lemei kei irail me pokonpenehr pwehn uhwong ie. Maing Kaun, kaidehn pwehki ei dipadahr de wiadahr sapwung ehu, de pwehki kisin sapwung kis me mie rehi, me re mwadamwadangkipenehng nan dewerail.” (Melkahka 59:1-4) Mie ahnsou ehu me ke ahneki soangen pepehmohte​—me ke sohte wia sapwung ehu ong emen me ahneki manaman pohmw, ahpw e kin kihong uhk apwal? Depit kin wauneki Sohl ahnsou koaros. Ni ahnsou me Sohl mehla, Depit sohte peren, ahpw e wiahda koul en kedepwidepw ehu: “Sohl oh Sonadan, ira koaros me kupwurkalahngan oh kapwuriamwei, ni ara mour oh pil ni ara mehla; ira koaros marahra sang ikel, ira koaros kehlailasang laion. Kumwail lihen Israel kan, kumwail mwahieiki Sohl.” (2 Samuel 1:23, 24) Depit kin wia mehn kahlemeng mwahu en emen me kin kasalehda wahu ni mehlel ong sapwellimen Siohwa me keidi, edetehn Sohl kin wia sapwung ong ih!

10. Mehn kahlemeng mwahu dahieu Pohl wia ni e kin wauneki governing body me Koht ketin pilada, oh met me imwikihla dah?

¹⁰ Ni ahnsoun Kristian akan, kitail pil kin wadek duwen mehn kahlemeng kaselel kan en irail akan me kin wauneki aramas akan me Koht ketin pilada en apwalih kitail. Karasepe ieu, emen iei Pohl. E kin kasalehda wahu ong pilipil kan me governing body en mwomwohdisohn Kristian kin wiahda. Ni kaimwiseklahn seiloak ong Serusalem me Pohl wiahda, governing body kihong ih kaweid en wia kasarawien kamwakel pwehn kasalehong aramas teikan me Pohl sohte kin uhwong Kosonned en Moses. Pohl kakete ahneki madamadau wet: ‘Rahn teio, brother pwukat padahkiong ie en mweselsang Serusalem ni ahnsou me ekei aramas men kemehla ie. Ahpw, met re men I en kasalehda mwohn pokono me I kin wauneki Kosonned en Moses. I ntingihdier kisinlikou ehu ong mehn Kalesia kan oh kaweidkin irail me irail saledeksangehr Kosonnedo. Ma I pahn kohla ni Tehnpas Sarawio, aramas teikan ele mwein sohte pahn wehwehki dahme I kin wia met, pwe irail pahn lemeleme me I kin uhd utungada irail aramas akan me kin sirkumsais.’ Ahpw, Pohl sohte ahneki madamadau wet. Pwehki met sohte kin pid en emen pahn kauwehla kosonned en Kristian akan, Pohl kin kasalehda wahu oh e kin kapwaiada kaweid en governing body nan keieun senturi. Met imwikihla aramas akan anahne kapitasang Pohl mworomwor en pwihn en mehn Suhs, oh e salihdi nan imweteng mpen sounpar riau. Ahpw, imwilahn met, kupwuren Koht pweidaher. Pohl kalohk ong kaun lapalap kan en Sesaria oh koperment me pein wahlahng Pohl nan kahnimw en Rom pwen wia kadehde mwohn Sihsar.​—Wiewia 9:26-30; 21:20-26; 23:11; 24:27; Kalesia 2:12; 4:9, 10.

Ke Kin Kasalehda Wahu?

11. Iaduwen kitail kak wauneki kaun en koperment kan?

¹¹ Ke kin wauneki irail akan me kin ahneki pwukoa en kaunda de apwalih aramas akan? Kristian akan kin ale kaweid en “kihong amwail daksis kan, . . . oh kumwail wauneki irail.” Ni mehlel, atail kin peikiong “pwungen wehi kan” sohte kin ihte pid atail kin pwain daksis kan ahpw kitail pil pahn kasalehda wahu ong irail sang ni atail tiahk oh lokaia kan. (Rom 13:1-7) Dahme kitail pahn wia ma kaun en koperment kan pahn lemei ong kitail? Nan Chiapas State, Mexico, kaun akan en ehu kousapw uhd adiasang sahpw en mwetuwel ehu me peneinei en Sounkadehdehn Siohwa 57 kin sapweniki. Irail wia met pwehki Kristian pwukat sohte kin iang ekei kamadipw me pelien lamalam teikan kin kalapw iang. Nan mihding en kapwungala kahpwal wet, irail Sounkadehde kan kin mwomw mwakelekel oh arail likou kin soandi mwahu, oh re kin doadoahngki lokaia wahu kan. Mwurin sounpar ehu, pilipilo en koperment eri pwungki Sounkadehde kan. Oh pil, arail tiahk kan kin kahrehong ekei aramas me kin iang mihding pwukat en men wiahla Sounkadehdehn Siohwa kan!

12. Dahme kahrehda e kesempwal en kasalehda “wahu” ong ohl pwopwoud men me saikinte iang padahk mehlel?

¹² Iaduwen ke kak kasalehda wahu ong irail akan me Koht ketikihong irail pwukoa en apwalih nan peneinei? Mwurin wahnpoaron Piter koasoia duwen en Sises lelohng lokolok, e koasoia: “Pil duwehte kumwail lih pwopwoud kan, kumwail peikiong amwail pwoud kan, pwe ma ekei irail sohte pwoson mahsen en Koht, re en alehkihla pwoson amwail mouren wiewia mwahu. Kumwail sohte anahne kapahrekiong irail, pwe re pahn pein kilang amwail mour mwakelekel oh duwen amwail wauneki Koht.” (1 Piter 3:1, 2; Episos 5:22-24) Piter kin kasansalehda ia uwen kesempwal lih pwopwoud en peikiong ah pwoud ni “wahu,” mendahki ekei ohl pwopwoud kan sohte kin warohng wahu. Ma lih pwopwoud pahn kasalehda wahu, ele mwein met pahn kak sewese ohl pwopwoud me saikinte iang pwoson mehlel en iangala ehu rahn.

13. Iaduwen lih pwopwoud kan kak wauneki arail pwoud ohl akan?

¹³ Nan iren Paipel pwukat, Piter kin kasalehda duwen mehn kahlemeng mwahu en Sera, me eh pwoud Eipraam kin wie mehn kahlemeng mwahu en pwoson. (Rom 4:16, 17; Kalesia 3:6-9; 1 Piter 3:6) E pahn konehng lih pwopwoud kan me arail pwoud kan iangala padahk mehlel en dehr kasalehda wahu me pahn pahrekiong wahu me lih pwopwoud kan kin kasalehong arail pwoud kan me saikinte iang padahk mehlel? Ahpw, dahme ke pahn wia ma ke sohte pwungki pilipil en ahmw pwoud ohl duwen irair ehu? Sises kihda ehu kaweid me kitail kak doadoahngki ong ni irair tohto: “A ma sounpei en likih men pahn itonehng uhk ke en wa eh koaruk mwail ehu, iangala mwail riau.” (Madiu 5:41) Ke kin wauneki omw pwoud ohl ni omw pahn utungada eh pilipil kan? Ma met kin apwal ong uhk, ehukihong ih omw pepehm akan? Dehr lemeleme me e wehwehki omw pepehm akan. Ahpw, ni ahnsou me ke pahn ehukihong ih omw pepehm akan, tamanda en wia met ni elen wahu. Paipel kaweidkin kitail met: “Amwail koasoi mwohn aramas en katapan oh kansenamwahu; oh kumwail uhdahn pahn ese duwen amwail pahn sapeng koaros ni pwung.”​—Kolose 4:6.

14. Ia wehwehn en wauneki pahpa oh nohno kan?

¹⁴ Iaduwen kumwail seri kan? Mahsen en Koht kihda kaweid wet: “Seri kan, ih amwail pwukoahn Kristian: peikiong samamwail oh inamwail kan, pwe ih me pwung. ‘Wauneki semomw oh inomw,’ iei tepin kosonned me inou ehu iang.” (Episos 6:1-3, NW) Tehk lepin lokaia pwukat: ‘peikiong samamwail oh inamwail’ kin wehwehki ‘wauneki semomw oh inomw.’ Lepin lokaia “wahu” ni lokaiahn Krihk kin wehwehki “kesempwaliki.” Ihme kahrehda, en peikiong kin wehwehki laudsang en ni menseirin peikiong kosonned en pahpa oh nohno kan me ke lemeleme sohte mwahu ong uhk. Koht kin peki rehmw en wauneki omw pahpa oh nohno oh kesempwaliki ahr kaweid kan.​—Lepin Padahk 15:5.

15. Iaduwen seri kan kak wauneki ahr pahpa oh nohno kan ni ahnsou me irail lemeleme me arail pahpa oh nohno kan kin wiahda sapwung ehu?

¹⁵ Ma omw pahpa oh nohno kan pahn wia mehkot me pahn kahrehong kumwail en sohlahr men wauneki irail, eri dahme ke kak wia? Nantihong kilang irairo nin duwen re kin kilang irairo. Re soh kin “kahrehong kumwail ipwidi” oh apwalih kumwail? (Lepin Padahk 23:22) Irail soh kin mwekidki limpoak ong kumwail? (Ipru 12:7-11) Koasoiong omw pahpa oh nohno kan ni elen wahu, oh kawehwehda omw pepehm akan ni meleilei oh kadek. Mehnda ma re pahn koasoiong kumwail ni ahl me kumwail sohte kin pwungki, menlau dehr doadoahngki soangen lokaia me sohte pahn kasalehda wahu ong irail. (Lepin Padahk 24:29) Tamanda me Depit kin nantihong wauneki Sohl, mendahki nanmwarkio kin sohlahr kapwaiada sapwellimen Koht kaweid. Peki sawas sang rehn Siohwa en ketin sewese kumwail en kapwungala omw pepehm akan. Depit mahsanih, “Kumwail kasalehiong amwail apwal kan koaros.” “Koht iei wasahn ruk ong kitail.”​—Melkahka 62:8; Koulen Kedepwidepw kan 3:25-27.

Wauneki Irail akan me Kin Apwalih Kumwail

16. Dahme kitail kak sukuhlikihsang sounpadahk likamw akan oh tohnleng kan?

¹⁶ Elder kan nan mwomwohdiso kin pilipilda sang rehn ngehn sarawi, ahpw irail pil kin wia aramas soh-unsek kei oh kak wiahda sapwung kan. (Melkahka 130:3; Eklesiasdes 7:20; Wiewia 20:28; Seims 3:2) Pwehki met, mwein ekei nan mwomwohdiso pahn soh itarki elder kan. Iaduwen kitail pahn mwekidki ni ahnsou me kitail lemeleme me mehkot nan mwomwohdiso sohte kin wiawi ni pwung? Tehk duwen wekpeseng en sounpadahk likamw akan nan keieun senturi oh irail tohnleng kan: “Sounpadahk likamw pwukat me eimah oh aklapalap, re sohte wauneki lingaling en mehn powe kan, pwe re kin lahlahwe. Pil tohnleng kan me kehlailsang oh manamansang sounpadahk likamw pwukat, sohte kin lahlahwe irail mwohn silangin Kauno.” (2 Piter 2:10-13) Ni ahnsou me sounpadahk likamw akan kin lahlahwe “lingaling en mehn powe kan”​—wehwehki elder kan me ale manaman nan mwomwohdiso en Kristian nan keieun senturi​—tohnleng kan sohte kin lahlahwe sounpadahk likamw akan me kin kahrehong brother kan en saminiminpene. Tohnleng kan me laudsang aramas akan oh pil eseier laudsang aramas akan duwen kopwungpwung, re pil eseier dahme kin wiawi nan mwomwohdiso. Ahpw, “pwehn wauneki Siohwa,” re mweidong Koht en wia kadeik.​—Ipru 2:6, 7; Sud 9.

17. Iaduwen ke pahn anahne doadoahngki omw pwoson ni ahnsou me kahpwal akan kin pwarada me ke lemeleme me irail elder kan me sapwung?

¹⁷ Mehnda ma mehkot sohte kin wiawi ni ahl me konehng, kitail sohte pahn pwoson Sises Krais ieias me Tapwin Mwomwohdiso en Kristian? E soh kin ese duwen dahme kin wiawi nan sapwellime mwomwohdiso nin sampah pwon? E soh konehng kitail en kasalehda wahu ong eh kin kamwahuiala irairo oh pohnese me e kin apwalihala irair akan? Eri, ‘ihs kowe pwe ke en kadeikada mehn mpomw kan?’ (Seims 4:12; 1 Korint 11:3; Kolose 1:18) Dahme ke soh pahn kasalehong Siohwa omw pwunod kan sang ni omw kapakap kan?

18, 19. Dahme ke kak wia ma ke lemeleme me emen elder wia sapwung?

¹⁸ Pwehki aramas akan kin soh-unsek, kahpwal akan pahn kak pwarada. Ele mwein ekei ahnsou elder men pahn wiahda sapwung, kahrehong ekei aramas en nsensuwedkihla. Ahpw, ma kitail pahn pwurur pahn soangen irair pwukat, met sohte pahn kak sewese en kamwahuiala kahpwal wet. Mwein e pahn kalaudehla kahpwalo. Irail akan me kin ahneki erpit ni pali ngehn pahn awih Siohwa en kapwungala kahpwalo oh kaiahn me anahn ni sapwellime ahnsou oh ahl me e men kapwungala kahpwalo.​—2 Timoty 3:16; Ipru 12:7-11.

¹⁹ Ahpw dahme ke kak wia ma ke nohn pwunodki duwen kahpwal ehu? Dehr koasoiong mehteikan nan mwomwohdiso duwen kahpwalo, ahpw dahme ke soh pahn ni karakarahk tuhwong elder kan en sawas? Ke kak kawehwe ong irail omw pepehm akan, ahpw ken wia met kaidehn ni ahl en kauwe emen. Ahnsou koaros kitail en “kin soangen lamalam teieu” ong irail, oh ahnsou koaros kasalehda wahu ong irail nin duwen ke pahn likih irail. (1 Piter 3:8) En dehr doadoahngki lokaia kamedek kan, ahpw likih me irail Kristian mah kei. Kalahnganki kangoang kan me kohsang iren Paipel kan me re kin kihong kitail. Oh ma mwomwen sawas en kapwungala kahpwalo me anahn, eri likih Siohwa me e pahn kahre elder kan en wia dahme konehng oh pwung.​—Kalesia 6:10; 2 Deselonika 3:13.

20. Dahme kitail pahn onopki nan artikel en mwuhr?

²⁰ Ahpw, pil mie ehu irair me kitail pahn koasoiapene me kin pid wauneki irail akan me kin ahneki pwukoa en apwalih kitail. E soh pil konehng irail akan me kin ahneki pwukoa wet en kasalehda wahu ong irail akan me re kin apwalihala? Kitail pahn kasawihada ire wet nan artikel en mwuhr.

Iaduwen Ke Pahn Sapeng?

• Ia kahrepe mwahu kitail en wauneki irail akan me kin pwukoahki en kaunda de apwalih aramas akan?

• Iaduwen Siohwa oh Sises pahn kilangwong irail akan me sohte kin wauneki irail akan me Koht pilada en apwalih kitail?

• Ia ekei mehn kahlemeng mwahu kan ong irail akan me kin wauneki aramas akan me kin ale pwukoa en apwalih kitail?

• Dahme kitail kak wia ma kitail lemeleme me emen me kin apwalih kitail wiahda sapwung ehu?

[Kilel nan Pali 8]

Sera kin wauneki pwukoa me Eipraam ahneki oh e perenkihda

[Kilel nan Pali 9]

Maikel sohte wauneki Depit nin duwen tapwin peneinei oh nanmwarki

[Kilel nan Pali 11]

“I sohte kak . . . kauwehla ih me Kauno ketin wiahkilahr nanmwarki!”

[Kilel nan Pali 12]

Dahme ke soh pahn kasalehong Siohwa omw pwunod akan ni omw pahn wia omw kapakap kan?