Kumwail Wahupene Nanpwungamwail

“Kumwail wahupene nanpwungamwail.”​—ROM 12:10.

1, 2. (a) Kitail kak ahneki lamalam en aktikitik ma kitail pahn kasalehda dah ong meteikan? (b) Iaduwen Paipel kin doadoahngki lepin lokaia “wahu,” oh ong soahngen aramas dah kei kin mengeiong irail en wauneki meteikan?

ARTIKEL en mwowe me kasansalehda kesempwalpen kaweid en Mahsen en Koht: “Kumwail koaros pwuhriong nan likoun karakarahk oh uhpahpene nanpwungamwail; pwe Pwuhk Sarawi mahsanih, “Koht kin ketin pelianda me aklapalap akan, a e ketikihong sapwellime kalahngan me karakarahk kan.” (1 Piter 5:5) Ehu ahl kitail kak pwuhriong nan likoun karakarahk iei sang ni atail pahn wauneki meteikan.

² Lepin lokaia “wahu” kin kalapw kadoadoahk nan Paipel pwehn kasansalehda ia uwen kesempwal kitail en kasalehda wahu oh nsenohki pepehm en meteikan. Kitail kin wauneki aramas teikan sang ni atail pahn kadek ong irail, kesempwaliki irail, karonge arail madamadau kan, oh kaunopada en kapwaiada arail pekipek kan me kitail kakong wia. Aramas me kin ahneki lamalam aktikitik sohte pahn apwaliki wia met. Ahpw, irail akan me kin aklapalap pahn apwaliki wauneki meteikan ni mehlel, oh mwein re pahn kapinga meteikan ihte pwehki re men aramas teikan en wia mehkot ong irail.

Siohwa kin Wauneki Aramas akan

3, 4. Iaduwen Siohwa wauneki Eipraam, oh dahme kahrehda?

³ Siohwa kin wia mehn kahlemeng mwahu en wauneki aramas akan. E ketin kapikada aramas akan pwe ren kak wiahda pein arail pilipil kan oh e sohte kin wiakin irail duwehte misihn kei. (1 Piter 2:16) Karasepe ieu, ni ahnsou me e padahkiong Eipraam me Sodom pahn kamwomwala pwehki arail tiahk suwed, Eipraam patohwanohng, “Ia duwe, komw uhdahn pahn ketin kamwomwala me mwahu kan iangahki me suwed akan? Ma mie aramas mwahu limehk nan kahnimwo, komw pahn ketin kamwomwala kahnimwo pwon? Komw sohte pahn kupwur mahk oh sohte ketin kamwomwala kahnimwo pwehki me limehko me mwahu?” Siohwa ahpw ketin sapeng me e pahn mahkong kanihmwo unsek pwehki aramas 50 me mwahu. Ahpw Eipram ni lamalam karakarahk pwurehng wia e pekipek kan. Dahme pahn wiawi ma aramas mwahu 45 me dierekda? 40? 30? 20? 10? Siohwa kamehlelehong Eipraam me e sohte pahn kamwomwala Sodom ma aramas mwahu ehkte me dierekda.​—Senesis 18:20-33.

⁴ Siohwa ketin mwahngih me sohte aramas ehk me mwahu nan kahnimw en Sodom, ahpw e wauneki Eipraam ni e karonge ahn Eipraam madamadau. Pwekihda? Pwehki, Eipram “likihala Kauno [“Siohwa,” New World Translation]; oh ihme Kauno [“Siohwa,” NW] ketin kupwurperenkihla oh sapwellimankihla.” Eipraam adanekihla “kompoakepahn Siohwa.” (Senesis 15:6; Seims 2:23, NW) Siohwa pil kin ketin mahsanih me Eipraam kin wauneki meteikan. Ni ahnsou me akamai wiawihda me pid duwen sahpw nanpwungen nein Eipraam oh nein Lohd silipen mahn akan, Eipraam wauneki Lohd ni eh mweidong Lohd en pilada sahpw me e men kousoan ie. Lohd ahpw pilada wasa me e lemeleme me keieu mwahu, oh Eipraam uhd kohla ehu wasa tohrohr.​—Senesis 13:5-11.

5. Iaduwen Siohwa wauneki Lohd?

⁵ Siohwa pil wauneki ohl pwungo Lohd. Mwohn kamwomwalahn Sodom wiawi, Siohwa padahkiong Lohd en tangala pohn nahna kan. Ahpw Lohd sohte men kohla wasao; e men kohla wasa me keren, Soar, edetehn kahnimwo mihmi nan wasao me pahn kamwomwala. Siohwa uhd mahsanih ong Lohd: “Eri, me mwahu! I sohte pahn kamwomwala kisin kahnimwen.” Siohwa wauneki Lohd ni e kupwurehla dahme Lohd peki.​—Senesis 19:15-22; 2 Piter 2:6-9.

6. Iaduwen Siohwa wauneki Moses?

⁶ Ni ahnsou me Siohwa kadarala Moses nan Isip pwehn kahluwa sapwellimen Siohwa aramas akan sang nan Isip oh padahkihong Parao en mweidong irail en kohkohlahsang irail, Moses uhd patohwanohng Koht: “I sohte kin kak pato mwohn pokon. I me soakoahiek en pato, oh loweiet me toutou.” Siohwa kamehlelehiong Moses: “Pwe I pahn seweseiuk pwe ke en kak lokaia, oh I pahn padahkihong uhk dahme ke pahn nda.” Ahpw Moses peikasal. Ni ahnsowo, Siohwa pwurehng kamehleleong Moses oh e koasoanehdi me rie, Aaron, pahn wiliandi Moses nin duwen emen me pahn koasoi mwohn aramas akan.​—Eksodus 4:10-16.

7. Dahme kahrehda Siohwa men wauneki meteikan?

⁷ Ei, Siohwa kin kasalehda me e men wauneki aramas akan, keieu irail akan me kin papah ih. Mendahki dahme re kin peki me kin ekis weksang dahme Siohwa ketin koasoanehdier, Siohwa kin medemedewe duwen ahr pekipek kan oh kin mweidong ahr pekipek kan en pweida ma pekipek pwukat sohte pahn uhwong sapwellime kupwur kan.

Sises Kin Wauneki Meteikan

8. Iaduwen Sises wauneki lih emen me inenen soumwahu?

⁸ Sises kin kahlemengih Siohwa en wauneki meteikan. Ehu ahnsou nan pokon ehu, mie emen lih me kohwahki mehn warmwowi erein sounpar 12. Toahkte kan sohte kak kamwahuiala eh soumwahu. Pahnangin Kosonned en Moses, liho me saminla oh sohte konehng en mih nan pokon. Ahpw liho keilahng pohnpelikie oh e doahke sapwellimen Sises likouwo, oh ni ahnsowohte e mwahula. Sises sohte lemeidihd nin duwen Kosonnedo pwehn lipwoarehki liho sapwung me e wiahdahr. Ahpw, pwehki e wehwehki irairo me liho mihmi loale, e wauneki liho ni e mahsanih: “Nei serepein, omw pwoson me kakehlaiukada. Eri, kohkohwei ni popohl, pwe ke kehlaildahsangehr omw soumwahuwen.”​—Mark 5:25-34; Lipai 15:25-27.

9. Iaduwen Sises wauneki mehn Liki men?

⁹ Pil ehu ahnsou, lih en Phoenicia koasoiong Sises: “Maing, komwi me kisehn kadaudok en Depit, komw ketin kupwure ie mahs. Nei serepein men mie me ngehn suwed tiadahr powe; e kin mihmi nan apwal laud.” Sises ese me e pekederdohngete wehin Israel ahpw kaidehn ong mehn liki kan, ihme e mahsanihong liho met: “E sohte konehng kihsang kenen seri kan [mehn Israel kan] kanarail mwenge oh keselahng kisin kidi kan [mehn liki kan].” Liho ahpw sapeng: “Mehlel, Maing; ahpw kisin kidi kan pil kin kang mweremwer en kisin mwenge kan me kin pwupwudihsang nin tehpel en ar soumas akan.” Sises uhd mahsanih: “Eri, lih! Omw pwosonen me laud! E pahn wiawihong uhk duwen me ke inengieng.” Nah serepein kehlailda. Sises wauneki mehn liki menet pwehki eh pwoson. E kasalehda kadek oh kamarahrahda irair wet ni ahnsou me e sohte doadoahngki lepin lokaia pwukat: kidi lawalo kan, ahpw e uhd doadoahngki lepin lokaia pwukat: “kisin kidi kan.”​—Madiu 15:21-28.

10. Mehn kasukuhl kehlail dahieu me Sises padahkiong sapwellime tohnpadahk kan, oh dahme kahrehda irail anahne sawas wet?

¹⁰ Sises kin nantihong padahkiong sapwellime tohnpadahk kan ia uwen kesempwal en ahneki lamalam aktikitik oh wauneki meteikan, pwehki pein emenemen irail kin lemeleme me pein irail kesempwal. Ehu ahnsou mwurin re akamaipene, Sises keinemwe rehrail, mahsanih: “Dahme kumwail akahkamaiki kohdo nanialo?” Irail nennenlahte, pwe “re akahkamaiki kohdo ihs me keieu lapalap rehrail.” (Mark 9:33, 34) Pil ni pwong mwohn Sises pwoula, “tohnpadahk ko ahpw akamaikihda ihs me pahn lapalap rehrail.” (Luk 22:24) Ni ahnsou me Pahsohpa wiawi, Sises “ketin wudekihdiong pihl nan peisin ehu oh tapihada widenki patehnehn sapwellime tohnpadahk ko.” Mehn kasukuhl kaselel ieu! Sises iei Sapwellimen Koht Ohl, oh nan audepen lahng oh sampah, e mihte pahnangin Siohwa. Ahpw, e padahkiong sapwellime tohnpadahk kan mehn kasukuhl en kasalehda wahu ni ah widen patehnehn tohnpadahk kan. Sises mahsanih: “I wiahiong kumwail mehn kahlemengih ehu, pwe kumwail en pil wia duwehte me I ahpwtehn kasalehiong kumwail.”​—Sohn 13:5-15.

Pohl kin Wauneki Meteikan

11, 12. Mwurin Pohl wiahla Kristian men, dahme e sukuhliki, oh iaduwen e kadoahkiada dahme e sukuhliki ong Pailimwon?

¹¹ Nin duwen emen me kin kahlemengih Krais, wahnpoaron Pohl kin wauneki meteikan. (1 Korint 11:1) E mahsanih: “Se sohte song en rapahki kapingpat sang rehn aramas . . . Ahpw se kin kadek ni at mi rehmwail, duwehte nohno men ni eh kin apwahpwalih nah seri kan.” (1 Deselonika 2:6, 7) Ei, nohno men kin apwahpwalih nah seri tikitik kan. Mwurin Pohl wiahla Kristian men, e sukuhliki irairen aktikitik oh kin wauneki ienge Kristian akan ni ah kin kadek ong irail. Ni ahl wet e kin kasalehda me e kin wauneki ahr nsen pilipil kan nin duwen me e kasansalehda ni ahnsou me e selidi nan Rom.

¹² Ladu men, ede Onesimus, me tangasang ah soumas kin karonge sapwellimen Pohl padahk. E wiahla Kristian men oh kompoakepahkihla Pohl. Eden ah soumaso iei Pailimwon, pil emen Kristian me kin kousoan nan Eisia Mainer. Nan ehu kisinlikou ong Pailimwon, Pohl koasoia duwen ia uwen Onesimus kin katapan ong ih: “I men en mihmihte rehi met.” Ahpw, Pohl kapwurehong Pailimwon Onesimus, pwe e ntingihdi met: “I sohte men idingohng komwi en sewese ie; ahpw, I men komwi en wia sang nan kupwuromwi. I sohte pahn wia mehkot ma komw sohte pahn pwungki.” Pohl sohte kin isaneki me e wia wahnpoaron en mwomwohdiso men, ahpw e kasalehda me e wauneki Pailimwon ni ah sohte peki Pailimwon en mweidong Onesimus en mihmi rehn Pohl nan Rom. Ahpw, Pohl kaweidkin Pailimwon en wauneki Onesimus oh en sohlahr kilangwong ih nin duwen “ladu men; ahpw e wialahr riomw ni pali ngehn.”​—Pailimwon 13-16, NW.

Kitail en Wauneki Aramas Nan Rahn Pwukat

13. Dahme pwuhken Rom 12:10 padahkiong kitail en wia?

¹³ Sapwellimen Koht Mahsen kin kihda kaweid wet: “Kumwail en tiengala mwowe en wauneki meteikan.” (Rom 12:10, NW) Met kin wehwehki me kitail sohte pahn awih aramas teikan en kasalehong kitail wahu mahs, ahpw kitail pahn tiengala mwowe en wauneki irail. “Eri, kumwail dehr kin ngoangki raparapahkihte pein kamwahupamwail kan, ahpw emenemen en ngoangki rapahki kamwahupen meteikan.” (1 Korint 10:24; 1 Piter 3:8, 9) Ihme, sapwellimen Siohwa ladu kan kin rapahki ahnsou kan en wauneki pein arail tohnpeneinei kan, iengarail Kristian akan nan mwomwohdiso, oh pil aramas akan me mih likin mwomwohdiso.

14. Iaduwen ohl pwopwoud oh lih pwopwoud kak wahupene nanpwungara?

¹⁴ Paipel kaweidkin kitail: “Duwen Krais eh tapwin aramas koaros, duwen ohl pwopwoud eh moangen eh pwoud, oh duwen Koht eh tapwin Krais.” (1 Korint 11:3) Siohwa kihong pwukoahn ohlo en wiaiong eh pwoud lih nin duwen Krais wiaiong mwomwohdiso. Nan 1 Piter 3:7, ohl pwopwoud kan kin ale kaweid me kin pid arail pwoud lih kan “en pohnese me irail me luwet, oh . . . waunekin irail.” Ohl pwopwoud kak wia met ni e pahn, ni mehlel, men rong madamadau en eh pwoud lih oh pil rong oh medemedewe duwen sawas kan me eh pwoud kin kihda. (Senesis 21:12) Ele e kak pil mweidong eh pwoud lih en pilada mahs ma irair wet sohte pahn uhwong Paipel, oh ohl pwopwoud pahn sewese eh pwoud oh kadek ong ih. Ni pali teio, “lih pwopwoud en wauneki eh pwoud.” (Episos 5:33) Lih pwopwoud mwahu men pahn rong eh pwoud ohl, oh e sohte pahn ngidingidki eh pwungte en pweida, de kauwe oh kasohwauwi eh pwoud, de lokaia tohto ong eh pwoud. E pahn ahneki lamalam en aktikitik oh sohte pahn kaunda eh pwoud, edetehn liho koahiek sang eh pwoud ohl nan ekei irair kan.

15. Dahme konehng kin kohwong me mah kan, oh iaduwen re pahn mwekidki met?

¹⁵ Nan mwomwohdisohn Kristian, mie irail akan me kin warohng kitail en wauneki, duwehte irail me mah kan. “Ke anahne kesihnenda mwohn aramas moangepwet kan, oh ken kahkahki oh wauneki me mah kan.” (Levi 19:32, NW) Met kin keieu pid irail akan me kin papah Siohwa ni lelepek erein sounpar tohto pwehki “moangepwet iei kapwat lingan ehu ma e keid ni ahl pwung ehu.” (Lepin Padahk 16:31, NW) Sounapwalih kan anahne wia mehn kahlemeng mwahu ni arail kin wauneki iengarail Kristian akan me mah sang irail. Ni mehlel, irail me mah kan pil anahne wauneki me pwulopwul kan, keieu irail akan me ale pwukoah en apwalih pwihn en sihpw kan.​—1 Piter 5:2, 3.

16. Iaduwen pahpa/nohno kan oh seri kan kin wahupene nanpwungarail?

¹⁶ Me pwulopwul kan anahne wauneki arail pahpa oh nohno kan: “Seri kan, ih amwail pwukoan Kristian: peikiong samamwail oh inamwail kan, pwe ih me pwung. ‘Kahkahki semomw oh inomw,’ iei tepin kosonned me inou ehu iang. Eri, iet inowo: ‘pwe ke en pweida mwahu oh mour werei nin sampah.’” Ahpw, pahpa oh nohno kan pil anahne wauneki neirail seri kan, pwe kaweid kohwong irail en ‘dehr kamwakara mwahl noumwail seri kan, ahpw kekeirirailda ni kaiahn oh ni madamadau en Siohwa.’​—Episos 6:1-4, NW; Eksodus 20:12, NW.

17. E konehng en wauneki ihs?

¹⁷ Kitail pil anahne wauneki irail akan me kin doadoahk laud en papah nan mwomwohdiso: “En wauneki irail me mah kan me wiewia doadoahk mwahu en apwalih mwomwohdiso, ahpw mehlel ong irail me kin doadoahk laudki arail padahk.” (1 Timoty 5:17, NW) Ehu ahl kitail kak wauneki irail ntingihdi nan pwuhken Ipru 13:17, NW: “Kumwail peikiong amwail sounapwalih kan oh uhpaiong irail.”

18. Dahme kitail pahn wiaiong irail akan me mih likin mwomwohdiso?

¹⁸ Kitail anahne wauneki irail kan likin mwomwohdiso? Ei. Karasepe ieu, kitail en peikiong kaweid wet: “Aramas koaros uhdahn pahn peikiong pwungen wehi kan.” (Rom 13:1) Kitail anahne peikiong irail kaun en koperment kan me Siohwa kin mweidong en kaunda lao lel kaundahn sapwellime Wehio pahn uhd wiliandi irail. (Daniel 2:44) Eri kitail kin “kihong irail atail daksis kan; kitail pwainohng irail atail daksis en moahng oh daksis en atail dipwisou kan; oh kitail en wauneki irail koaros.” (Rom 13:7, NW) Kitail anahne “wauneki aramas koaros.”​—1 Piter 2:17.

19. Iaduwen kitail kak “wia mwahu” ong meteikan oh waunekin irail?

¹⁹ Ni mehlel, kitail pahn wauneki irail akan me mihmi likin mwomwohdiso, ahpw kitail pahn tehk dahme Sapwellimen Koht mahsen kasansalehda: “Eri, nindokon eh mie atail ahnsou, kitail en wia mwahu ong aramas koaros; ahpw mehlel ong irail kan me kisehn atail pwoson.” (Kalesia 6:10) Ni mehlel, ahl me keieu mwahu kitail kak “wia mwahu” ong aramas teikan iei en sewese irail en perenki rong oh kaitarala ahr anahn akan ni pali ngehn. (Madiu 5:3) Kitail kak wia met ma kitail pahn kapwaiada mehn kataman kan en wahnpoaron Pohl: “Wia uwen omw kak mwohn silangin Koht, pwe en ketin pwungkin uhk, nin duwen tohndoadoahk men me sohte kin namenengki eh doadoahk, me kin padahkihong aramas akan mahsen en Koht ni mehlel.” Ni atail pahn kin rapahki ahnsou en kalohk ong aramas teikan ni kadek, ‘oh kapwaiada atail pwais en sounkadehde en Rongamwahu,’ kitail sohte kin ihte wia mwahu ong koaros ahpw kitail kin wauneki irail.​—2 Timoty 2:15; 4:5.

Wauneki Siohwa

20. Dahme wiawihong Parao oh sapwellime sounpei kan, oh pwekida?

²⁰ JSiohwa kin wauneki sapwellime kapikapikda kan. E konehng kitail en pil wauneki ih. (Lepin Padahk 3:9; Kaudiahl 4:11) Sapwellimen Siohwa Mahsen mahsanih: “Pwe I pahn kin wauneki irail kan me kin waunekin ie, oh I pahn kin mwamwahliki irail kan me kin mwamwahlikin ie.” (1 Samuel 2:30) Ni ahnsou me Parao en Isip rong pekipek ehu en mweidong Sapwellimen Koht aramas akan en kohkohla, e uhd ni aklapalap sapeng: “Ihs Siohwa, pwe I en dukiong oh mweidohng Israel en kohkohweisang rehi?” (Eksodus 5:2, NW) Ni ahnsou me Parao kadarala sapwellime sounpei kan en kemehla mehn Israel kan, Siohwa pwalangpeseng Sehd Weitahta pwe mehn Israel en kak kotehla. Ahpw ni ahnsou me mehn Isip kan pwakihirailla, Siohwa kahrehong sehdo en pwurpene. “E ketin sikendiong karis en sounpei en Isip kan oh wararail kan nan kepin madau.” (Eksodus 14:26-28; 15:4) Ahn Parao aklapalap oh kahng kawauwih Siohwa kahrehdohn ih en ohkihla oh mehla.​—Melkahka 136:15.

21. Dahme kahrehda Siohwa kin pelianda Pelsassar, oh met imwikihla dah?

²¹ Nanmwarki Pelsassar en Papilon kahng wauneki Siohwa. Ni ahnsou me aramas tohto kin sakaula nan kamadipw me wiawi, nanmwarki menet lahlahwe Siohwa ni e doadoahngki kep oh dahl akan me wisikdo sang nan Tehnpas Sarawio en Serusalem. Oh ni ahnsou me e wia met, e kapinga ah koht likamw akan. Ahpw Sapwellimen Siohwa ladu Daniel padahkiong ih met: “Eri, komwi, sapwellime pwutak, komw dadaurete omwi aklapalap . . . Komw ketin pelianda Kaunen nanleng.” Ni pwongohte, Pelsassar kamakamala, oh ah wehio kohsang ih.​—Daniel 5:22-31.

22. (a) Dahme kahrehda Siohwa engiengiada pahn kaun en mehn Israel akan oh neirail aramas akan? (b) Ihs me kenikenla rehn Siohwa, oh met kin imwikihla dah ong irail?

²² Nan tepin senturi C.E., ni ahnsou me Nanmwarki Erod kapahrek ong aramas akan, irail ahpw werikihda: “Kaidehn aramas emen me koasoakoasoiet, pwe koht emen!” Nanmwarki aklapalap menet sohte sapwungki dahme re kin ndinda, ahpw e perenkihda kaping wet. Ni ahnsowohte, “tohnleng en Kauno [“Siohwa,” NW] ahpw kesepwekehdi Erod, pwehki eh sohte kadehdehda me ih aramas emen, ahpw kaidehn ih Koht.” (Wiewia 12:21-23) Erod kin kapingahki pein ih, kaidehn Siohwa, oh e kamakamala. Kaun en pelien lamalam akan ni ahnsowo sohte kin wauneki Koht ni ahnsou re pilanehda en kemehla sapwellime Ohl, Sises. Ekei kaun akan eseier me Sises kin wia padahk mehlel kan, ahpw re sohte idawehnla Sises, “pwehki arail kesempwalki ale kaping sang rehn aramas laudsang ale kaping sang rehn Koht.” (Sohn 11:47-53; 12:42, 43) Nin duwen wehio pwon, irail sohte kin wauneki Siohwa de wiliepe me idihdda, Sises. Pwehki met, Siohwa sohlahr waunekin irail, ahpw e kesehla irail oh kasohrehla Tehnpas Sarawio. Ahpw Koht doarehla irail akan me kin wauneki ih oh sapwellime Ohl.​—Madiu 23:38; Luk 21:20-22.

23. Dahme kitail anahne wia ma kitail men mour nan sapwellimen Koht sampah kapw? (Melkahka 37:9-11; Madiu 5:5)

²³ Aramas koaros me men mour nan sapwellimen Koht sampah kapw mwurin koasoandi wet sohralahr, irail anahne wauneki Koht oh sapwellime Ohl, Sises Krais, oh peikiong ira. (Sohn 5:22, 23; Pilipai 2:9-11) Irail akan me sohte kin wauneki Koht, eri, “Koht pahn ketin koahkoahksang aramas suwed kan nan sampah.” Ni pali teio, aramas pwung kan me kin wauneki oh peikiong Koht oh Krais “pahn kousoan nan sahpw wet.”​—Lepin Padahk 2:21, 22.

Kousapahl

◻ Ia wehwehn wauneki meteikan, oh iaduwen Siohwa wia met?

◻ Iaduwen Sises oh Pohl wauneki meteikan?

◻ Nan rahnpwukat, e konehng kitail en wauneki ihs?

◻ Dahme kahrehda kitail anahne wauneki Siohwa oh Sises?

[Kilel nan Pali 27]

Siohwa wauneki Eipraam ni e karonge ahn Eipraam pekipek kan

[Kilel nan Pali 28]

Nan pwopwoud kan me kin pweida, ohl oh lih pwopwoud kan kin wahupene