Kitail Koaros en Wauneki Siohwa oh Sapwellime Ohl
Iaduwen Aramas Koaros me kin Iang Towehda Kataman ni April 8 Kak Ale Katingparail ni Unsek
1 Ihs me aramas kin kihong wahu tohrohr nan rahn pwukat? Irail me kin wia soahng kan me tohnsampah kin kesempwaliki. Ahpw, pali laud en ahnsou, mwuri, aramas akan kin manokehla dahme re kin wia. Ahpw, iaduwen soangen wiewia kan me uhdahn katep laud ong aramas koaros? Kitail pahn kasarawi wiewia me keieu kesempwal sangete mahs lel met me wiawi nan sampah ni atail pahn kasarawi Katamanpen Kamatalahn Krais mwurin kihrlahn ketipin ni April 8, 2001.
2 Ihs me kin warohng wahu me keieu laud? Pwuhk Sarawi kin sapeng: “Komwi [“Siohwa,” New World Translation] me uhdahn warohng sapwellimanki lingan, wahu, oh roson. Pwe komwi me ketin wiadahr mehkoaros.” (Kaudiahl 4:11) Pwehki Siohwa me kapikada soahng koaros, ihme kahrehda e konehng Ih en wia Kaun Lapalap en nanleng oh sampah. E konehng Ih en warohng wahu ong ahnsou kohkohlahte!—1 Tim. 1:17.
3 Sises Krais, Sapwellimen Koht Ohl, wia soahng tohto me pahn warohng wahu laud oh kahrehda kapai tohto ong aramas akan oh kapai pwukat sohte pahn imwisekla. Sises pil kahlemengih Seme ni ahl me keieu unsek. (Sohn 5:19) Pwehki Sises peikiong Semeo ni unsek iangahki eh papah Semeo ni lelepek kahrehda e “warohng sapwellimanki manaman, kepwe, erpit, roson, wahu, lingan, oh kaping.” (Kaudiahl 5:12) Semeo wauneki Sises ni e ketikidahng Sises pohn mwoale nanleng oh idihdda ih nin duwen nanmwarki men. (Melkahka 2:6-8) Ong kitail, kitail pahn kak wauneki Siohwa oh Sises ni atail pahn kasarawi Katamanpen Kamatalahn Krais ni April 8, 2001.
4 E inenen kansensuwed pwe pali malaulau en aramas me memour sangete mahs lel met kihong Siohwa oh sapwellime Ohl wahu me konehng ira. Mahs, pil mie ahnsou kan me sapwellimen Koht aramas, mehn Israel kan, sohte kin kihong Siohwa arail kaudok me kohsang arail mohngiong. Met kin kasalehda me re sohte kin wauneki Siohwa. (Mal. 1:6) Ma kitail men wauneki Siohwa ni ahl me konehng, kitail kin kasalehda met sang atail lelepek oh peik me poahsoankihda limpoak oh kalahnganki soahng koaros me Siohwa oh sapwellime Ohl wia ong kitail. Kitail men kihong Siohwa soangen wahu oh met kin wehwehki me kitail pahn lemmwiki Siohwa, oh pohnese Ih oh Sises ni soahng koaros me kitail kin wia. Mwomwohdiso en Kristian kin padahkiong oh sewese aramas akan en wia met.
5 Ahnsou Tohrohr Ehu en Kasalehda Wahu: Katamanpen Kamatalahn Krais kin wia kasarawi ieu me keieu kesempwal ong sapwellimen Siohwa aramas akan pahr koaros. Aramas koaros me inengihada papah Siohwa oh wauneki Ih kak iang towehda kasarawi wet. (Luk 22:19) Se koapworopworki me likin irail Sounkadehde meh rar pak weneu me kin kaukaule iang kalohk, irail me kin perenki rong pahn pil iang towehda kasarawi wet oh koaros patpene pahn tohtohki aramas rar pak 14 samwa. Met kin wia ahnsou mwahu ehu en wauneki Samatail nanleng! Mehlel, kasarawi wet kin katamankin kitail duwen dahme Sises wia ong kitail, ahpw, wahu me kitail kin kasalehong Sises ni atail pahn iang towehda kasarawi wet pil kin kawauwih Seme, me kadarodo Sises.—Sohn 5:23.
6 Dahme kitail kak wia pwehn utungada ahnsou tohrohr wet? Kitail kak sewese aramas akan me kin perenki rong en paiekihda ni unsek rahno. Kangoange irail en iang towehda kasarawi wet, oh ma re anahne sawas en iang towehda (mehn peidaid de iang irail alu lel Kingdom Hall), kitail kak sewese irail. Kawehwe ong irail ia kahrepe kapahrek kin wiawi. Sewese irail en tuhwong mehteikan (Introduce irail ong meteikan). Dahme re kilang oh rong pahn kak kamwekid irail en nantihong miniminiong kitail ni atail wauneki Siohwa.
7 Kitail dehr mwamwahliki ia uwen kesempwal en prokram en rahno. Emen tohnsukuhl en sukuhl laud ehu (university) koasoia: “Pak tohto I kin iang towehda Mihsa nan pein ahi sarawi ahpw met I anahne wehkada me amwail Katamanpen Kamatalahn Krais kin uhdahn wuksang Mihsa. I kilang me dahme wiawi kin duwehte dahme Pwuhk Sarawi kin koasoia, oh I lemeleme me kumwail ahneki padahk mehlel.” E tepida kaukaule iang towehda mihding kan oh, sohte pwand, e pil papidaisla.
8 Sewese Irail me Kapw kan en Kekeirada ni Pali Ngehn: Menlau tehk ihs irail me kapw kan me iang towehda Katamano, oh mwadang pwurehng pwurala rehrail pwehn kousapahlih soahng kan me re sukuhliki oh pil kilang. Kehsehkin irail duwen mihding kan, oh sewese irail en wehwehki me ma re iang towehda mihding pwukat, re pahn kak kalaudehla arail loalokong me kohsang Pwuhk Sarawi. Ke kak pil kousapahlih pwuhken Knowledge, irelaud 17 me oaralap koasoia: “Find Security Among God’s People,” de pil pwuhken Mour Kohkohlahte, irelaud 23 me oaralap koasoia: “Sapwellimen Koht Pwihn Sansal,” oh irelaud pwukat pahn kasalehda duwen sawas en pali ngehn me mwomwohdiso kin kihda, oh re kak pil doadoahngki. Koasoanehdi pwe ke kak pil kasalehong irail video cassette me oaralap kin koasoia Our Whole Association of Brothers pwe ren kak pein kilang minimin, peren oh ngoang me sapwellimen Siohwa aramas akan kin ahneki!
9 E kesempwal me irail me kin perenki rong kan en sukuhliki iaduwen pein irail pahn kak wauneki Siohwa. Kawehwe ong irail me kapakap sang mohngiongatail kin kaperenda Siohwa oh pil kak sewese kitail en pwurehng ale kehl ni pali ngehn. (1 Sohn 5:14) Ke kak doadoahngki brochure Kupwurki, Iren Mehn Kasukuhl 8 lel 12 oh kawehwe duwen soangen tiahk kan me kin kasalehda atail wauneki Siohwa. Ni atail pil pahn koasoia dahme ntingihdi nan brochure en Jehovah’s Witnesses, pali 30-31, kitail kak kangoange me kapw kan en medemedewe duwen ma re kak wauneki Siohwa ni arail pahn kak iang doadoahk en kalohk.
10 Ma kitail kin kalahnganki meirong en Sises oh pil kalahnganki atail pwais kaselel en papah nin duwen sapwellime tohnpadahk kan, mehpwukat kin kasalehda atail wauneki Samatail oh pil kin wahdo kapai kan ong aramas akan. Sises inoukihda: “Semei pahn ketin kawauwihala me kin papah ie.”—Sohn 12:26.