Padahk Ehu me Pali Laud Kin Kamehlele
“I kin auramanki me I wie isihs nan ehl! I auramaniahda me I lekdekla nan kisiniei ehu oh I kin pwourda weriwer. Eri, I kin nantihong en dehr wia dihp.”—Arline.
KE KIN kamehlele me ehl iei wasahn kalokolok ong me dipan akan? Tohto kin kamehlele met. Karasepe, nan pahr 2005, ohl emen me ale sukuhl laud nan ehu University nan Scotland diarada me sang ren meh 750, kaun en palien lamalam 250 kin kamehlele me irail akan me kin katohreirailsang Koht pahn “lokolok soutuk nan arail madamadau nan ehl.” Ah me 150 kin kamehlele me paliwararail kan pahn wie lokolok nan ehl.
Nan sahpw tohto, soangen padahk wet kin rek wasa koaros. Karasepe, mie roporop ehu me wiawi nan Amerika nan pahr 2007, me adaneki Gallup, diarada me persent 70 en aramas akan kin kamehlele me mie ehl. Pil nan wasa kan me pali laud en aramas akan sohte nohn nsenohki iang sarawi, irail kin pil kamehlele padahk en ehl. Nan pahr 2004, soangen roporop wette pil diarada me nan Canada, persent 42 kamehlele me mie ehl oh nan Britain, persent 32.
Dahme Kaunen Lamalam kan Kin Padahngki
Tohto kaunen palien lamalam akan solahr padahngki me ehl iei wasahn kalokolok nan kisiniei. Re uhd wekidala padahk wet en duwehla padahk en Kadikisimus, me wiawihda nan 1994 me koasoia: “Uhdahn wehwehn kalokolok nan ehl iei katohrohr soutuk sang Koht.”
Mendahki met, pali laud en aramas kamehlelehte padahk me dene ehl iei wasahn lokolok soutuk nan kisiniei. Irail akan me kin utung padahk wet nda me e kohsang nan Paipel. President en Baptist, Albert Mohler koasoia: “Met uhdahn kohsang nan Pwuhk Sarawi.” (Southern Baptist Theological Seminary)
E Kesempwal Dahme Ke Kamehlele?
Ma ehl iei wasahn kalokolok ehu, ke uhdahn pahn masak. Ahpw ma padahk wet sohte mehlel, eri kaun en palien lamalam kan kin kahrehiong aramas en masepwehk ni soh kahrepe. Irail pil kin kamwamwahlihala Koht.
Dahme Mahsen en Koht kin mahsanihki duwen met? Ire kan mwuri pahn doadoahngki kawehwehn Paipel en Kadolik oh Prohs pwehn sapengla peidek siluh pwukat: (1) Dahme kin wiawiong emen me mehla? (2) Dahme Sises ketin padahngki duwen ehl? (3) Iaduwen omw esehla dahme mehlel duwen ehl kak kamwakid uhk?