Ia Duwen Esehla Padahk Mehlel me Pid Ehl Kak Kamwakid Omw Madamadau?
IRAIL kan me kin padahngki me ehl wia wasahn kalokolok kin utung padahk likamw duwen Siohwa Koht oh sapwellime irair kan. Ni mehlel, Paipel mahsanih me Koht pahn ketin kasohrala aramas suwed akan. (2 Deselonika 1:6-9) Ahpw sapwellimen Koht engieng sohte wia sapwellime irair me keieu kesempwal.
Koht sohte kin kupwurperenki kaloke aramas suwed. Pein ih mahsanih: “Kumwail dehr lemeleme me I kin kupwurperenki mehlahn aramas dipan emen.” (Esekiel 18:23) Ma Koht sohte kin kupwurperenki mehlahn me suwed akan, iaduwen e kak kupwurki kilang irail en lokolok kohkohlahte?
Sapwellimen Koht irair me keieu kesempwal iei limpoak. (1 Sohn 4:8) Ei, “e kin kupwur mwahu ong aramas akan koaros oh kin ketin kalahngan ong wiepen nin lime kan koaros.” (Melkahka 145:9) Kahrehda Koht kupwurki kitail en kakairada limpoak mehlel ong ih.—Madiu 22:35-38.
Masak Ehl de Limpoak ong Koht—Mehnia Me Kamwakid Uhk?
Padahk en ehl me aramas pahn kalokolok kin kahrehiong aramas en masak Koht ni ahl sapwung. Weksang met, aramas emen me sukuhliki padahk mehlel duwen Koht oh tepida poakohngala ih kin lemmwiki ih. Nan Melkahka 111:10 mahsanih, “Elen loalokongla iei wauneki KAUN-O; e kin ketin kupwurokong en wia kadeik pwung ong irail kan me kin wauneki.” En lemmwiki Koht sohte wehwehki en masak daulihala ahpw en wauneki ih pwehki ih me Sounkapikada. Met pahn kahrehiong kitail en ahneki pepehm en masak kansensuwedihala ih.
Tehk iaduwen esehla padahk mehlel me pid ehl kin kamwakid Kathleen me sounpar 32 me kin doadoahngki wini en kasahliel. Mahs e kin perenki mwemweitseli, kin lemei, sohte poakohng pein ih oh kin mour en nenek. E nda: “I kin kilang nei serepein me sounpar ehuo oh medewe, ‘dahme I wihwiahiong ih. I pahn isihskihla met.’” Kathleen song en uhdihsang doadoahngki wini en kasahliel ahpw sohte kak pweida. E nda, “I men wia aramas mwahu ahpw soahng koaros nan ei mour oh sampah wet uhdahn suwed. Likamwete sohte kahrepen ei pahn wia aramas mwahu men.”
Kathleen eri tuhwong Sounkadehdehn Siohwa men. E nda: “I sukuhliki me sohte isihs nan ehl. Iren Paipel kan uhdahn kawehwehda mwahu. I nsenamwahula mehlel ni ei esehda me I sohte pahn isihsla.” E pil sukuhliki duwen sapwellimen Koht inou me aramas kak mour kohkohlahte pohn sampah me pahn solahr mie soahng suwed kan. (Melkahka 37:10, 11, 29; Luk 23:43) E nda, “met mieier ei koapworopwor mehlel en mour kohkohlahte nan Paradais!”
Eri masak ehl pahn kahrehiong Kathleen en sohla doadoahngki wini en kasahliel? E nda: “Ni ahnsou me I kin inengihada doadoahngki wini en kasahliel, I kin kapakap oh peki Siohwa Koht en ketin sewese ie. I kin medewe duwen sapwellime pepehm ong tiahk samin kan, oh met kahrehiong ie en sohte men kansensuwedihala ih. E kin ketin sapengla ei kapakap akan.” (2 Korint 7:1) Masak kansensuwedihala Koht sewese Kathleen en uhdi sang tiahk samin kan.
Ei, kakairada limpoak ong Koht oh lemmwiki ih ahpw kaidehn masak kalokolok nan ehl me pahn kamwakid kitail en wia kupwuren Koht pwehn kak ahneki peren kohkohlahte. Sounmelkahkao ntingihdi: “Meid pai irail kan me kin peikiong KAUN-O, oh kin momourki sapwellime kosonned akan.”—Melkahka 128:1.