Soai Keriau: Dene Aramas Suwed Kan Kin Kalokolok nan Ehl
Ia wasa me soai wet tepisang ie? Pwuhk ehu koasoia: “Nanpwungen ohlen Krihk kan me kin ndandki arail lamalam kan, emen me adaneki Plato iei me kin keieu kamwakid me tohto en pwungki eh madamadau duwen Ehl.”—Histoire des enfers (The History of Hell), sang Georges Minois, pali 50.
Pil ehu pwuhk koasoia: “Sang nan pahr 150 kohdo Kristian kan me kin sukuhlkihda padahk en ohlen Krihk kan me kin ndandki arail lamalam kan kin tapiadahr medewe me re anahne padahngki soahng kan me re kamehlele me pahrekiong madamadau en mehn Krihk kan . . . Madamadau me re keieu kamehlele iei padahk kan en Plato.”—The New Encyclopædia Britannica (1988), Volume 25, pali 890.
Ehu pwuhken Kadolik pil koasoia: “Padahk en atail mwomwohdiso kin kamehlelehla me mie ehl oh e poatopoat. Mwurinte aramas akan mehla ahpw re wiahda dihp laud, mehkot soh sansal kin kohsang nan paliwararail oh kohdihla nan ehl, wasa me re pahn lokolongki kalokolok en ehl, ‘kisiniei me sohte kin kunla.’ Kalokolok me keieu laud en ehl iei en tohrohrweisang Koht kohkohlahte.”—Catechism of the Catholic Church, 1994 edition, pali 270.
Dahme Paipel mahsanih? “Ei, me momour kan ese me re pahn mehla, ahpw me melahr akan sohte ese mehkot. Solahr keting ehu pahn kohieng irail; re manokonoklahr douluhl. Nantihong doadoahk laud ni soahng koaros me ke pahn wia met, pwe e sohte pahn mie wiewia, de lamalam, de loalokong, de erpit, nan wasahn me melahr akan [lokaiahn Ipru, Sheol]—oh iei wasa me ke pahn kohla ie.”—Eklesiasdes 9:5, 10.
Lepin lokaiahn Ipru Sheol, kin kawehwehdi ong “wasahn me melahr akan” de “ehl” nan Paipel en Pohnpei. Dahme iren Paipel wet kasalehda duwen irair en me melahr kan? Ia duwe, re kin lokolok nan Sheol pwe ren kak pwainkihla arail dihp kan? Soh, pwe re “sohte ese mehkot.” Ihme kahrehda Sohp, ni ahnsou me e weiweirek laud pwehki eh soumwahu, peki rehn Koht, oh koasoia: “I ahpw men komwi en ketin nekidiehla nan sapwen me melahr akan [lokaiahn Ipru, Sheol]; komw ketin karirihiehla, omwi engieng lao tokedi, komwi ahpw ketin kilelehdi ahnsou me komwi pahn ketin taman ie.” (Sohp 14:13) Eri, mehnda Sohp en peki met ma Sheol iei wasahn kalokolok poatopoat ehu? Nan Paipel, lepin lokaia wet me kawehwehdiong “ehl” kin wehwehki ni lokaiahn karasaras wasa me me melahr akan kin wie memeir ie. Sohte wiewia de madamadau kin wiawi wasao.
Eri ia duwe, kawehwe wet sou pahn pahrekiong dahme Pwuhk Sarawi mahsanih? Pwe soangen dihp dah me nohk suwed me pahn kak kahrehiong Koht limpoak men en ketin kalokehki aramas emen erein ahnsou poatopoat? (1 Sohn 4:8) Ma kisiniei en ehl wiahte soai pwoat, a ia duwen koasoiepen nanleng?
Menlau pil tehk iren Paipel pwukat: Melkahka 146:3, 4; Wiewia 2:25-27; Rom 6:7, 23
IRE MEHLEL:
Koht sohte kin ketin kaloke aramas nan ehl
[Kawehwehpen kilel kan nan ehu ehu pali 5]
Barrators—Giampolo/The Doré Illustrations For Dante’s Divine Comedy/Dover Publications Inc.