Dahme Uhdahn Wiawi Ahnsou Emen Mehla?
“Mie mehkot rehn aramas akan me sohte kak mehla, mehnda ma irail pil aramas suwed . . . Re kin kalokolok nan kisiniei me sohte kak kunla, oh re sohte kak mehla oh sohte imwin arail lokolok.”—Sang Sounnting Clement en Alexandria nan pahr 1885.
DUWEHTE Clement, irail me kin utung padahk en ehl me dene e wia wasahn kalokolok pil nda me mie mehkot me sohte kin mehla mwurin aramas men mehla. Paipel kin utung padahk wet? Tehk dahme Mahsen en Koht sapengki peidek pwukat.
Tepin aramas Adam sohte kak mehla? Mwurinte Adam kapikipikda, Koht ketikihong ih kehkehlik wet: “Ke kak tungoale wahntuhke koaros me mi nan mwetuwelet, ahpw ihte wahntuhkehn kehsehki aramas dahme mwahu oh dahme suwed me ke sohte pahn tungoale, ma ke pahn tungoale, ke pahn mehkihla rahnohte.” (Senesis 2:16, 17) Adam kak mehla.
Dahme wiawihong Adam mwurin eh wiahda dihp? Kalokolok me Koht ketikihong kaidehn en lokolok soutuk nan ehl. Ahpw Paipel mahsanih: “Ke pahn doadoahk oh kakerehdi pwudowomw, pwe ke en koadoahkihada wahn pwelen sampah, ke lao pwurehng wiepwella, me ke wiawihda sang ie. Pwe ke wiawihda sang pwehl oh ke pahn pwurehng wiepwella.” (Ni nting laud; Senesis 3:19) Sapwellimen Koht mahsen sohte kasalehda me mie mehkot sang paliweren Adam me sohte iang mehla.
Mie aramas emen me mehla ahpw mehkot reh memourte? Sohte. Paipel mahsanih nan Eklesiasdes 3:20: “Aramas oh mahn kin kolahng wasatehkis; ira koaros wiawihda sang pwehl, oh ira koaros pahn pwurehng wiepwella.” Wahnpoaron Pohl pil ntingihdi: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.” (Rom 5:12) Aramas koaros dipan kahrehda aramas koaros pahn mehla.
Me melahr emen kak ese de kehn mehkot? Paipel mahsanih: “Me momour kan ese me re pahn mehla, ahpw me melahr akan sohte ese mehkot. Solahr keting ehu pahn kohieng irail; re manokonoklahr douluhl. Nantihong doadoahk laud ni soahng koaros me ke pahn wia met, pwe e sohte pahn mie wiewia, de lamalam, de loalokong, de erpit, nan wasahn me melahr akan—oh iei wasa me ke pahn kohla ie.” (Eklesiasdes 9:5, 10) Eri, ma me melahr akan sohte ese mehkot oh arail lamalam pil sohrala, iaduwen arail pahn kak kehn lokolok nan ehl?
Sises Krais ketin karasa mehla duwehte emen me meir kelikla. (Sohn 11:11-14) Ekei pahn uhwong oh nda me Sises ketin padahngki me ehl wasa karakar ehu oh me dipan akan pahn lekdeklong loale. Kitail tehk dahme Sises uhdahn mahsanihki ehl.