Mahsen en Siohwa Kin Ieias
Ire Kesempwal akan Sang nan Pwuhken Seims oh Piter
KERENIONG sounpar 30 mwurin Pendekos nan pahr 33 C. E., tohnpadahk Seims, rien Sises, ntinglahng Kristian me keidi kan. Eh mehn akadei iei en kangoange irail en kehlail ni pwoson oh en dadaurete ni ahnsou apwal akan. E pil kihda kaweid en kapwungala pingiping me tepida nan mwomwohdiso.
Mwohnte Kaunen Rom Nero tepida kaloke Kristian akan nan pahr 64 C. E., wahnpoaron Piter ntingihada keieun nah kisinlikou ong Kristian akan pwehn kangoange irail en kesihnenda teng nan pwoson. Mwurinte kisinlikou wet, e ntingihdi keriaun nah kisinlikou oh e kangoange ienge Kristian akan en tehk kanahieng mahsen en Koht oh katamankihong irail duwen rahnen Siohwa eh kerendohr. Kitail kak paiekihda atail en tehk kanahieng ire kesempwal kan nan kisinlikou kan en Seims oh Piter.—Ipru 4:12.
KOHT KETIKIHONG ERPIT IRAIL KAN ME KIN “KAPAKAP NI PWOSON”
Seims ntingihdi: “Meid pai aramas me kin loalopwoatete nan apwal me kin kohieng, pwe mwurin eh pahn powehdi sosohng wet, e pahn ale nin duwen keting ehu, mour.” Ong irail kan me kin “kapakap ni pwoson,” Siohwa pahn ketikihong irail erpit pwehn powehdi arail kahpwal kan.—Seims 1:5-8, 12.
Irail me pahn “wiahla sounpadahk” nan mwomwohdiso anahne pwoson oh erpit. Mwurin Seims kasalehda me lowen aramas duwehte “kisin kakon tikitik kis” me kak ‘kasaminehla wasa koaros ni paliwar unsek,’ e kaweidki me ineng kan en sampah kak kauwehla ahn emen nanpwungmwahu rehn Koht. E pil kasalehda dahme emen kak wia pwehn pwurehng kehlailda nan eh nanpwungmwahu rehn Siohwa.—Seims 3:1, 5, 6; 5:14, 15.
Pasapengpen Peidek kan me Pid Duwen Iren Paipel kan:
2:13—Ni ahl dahieu me irail me “kin ahneki kalahngan kin pitsang kadeik”? Ni atail kin wehkong Koht duwen pein kitail, e kin ketin tamanda duwen atail kin kasalehda mahk ong meteikan oh e pahn ketin mahkohng dipatail kan ki tomw en sapwellime Ohl. (Rom 14:12) Met sou kihong kitail kahrepe mwahu ehu en kasalehda mahk nan atail mour?
5:20—“Mehmen me pahn kasapahldo me dipan emen sang nan eh mour suwed” pahn komourala ihs sang mehla? Kristian emen me kasapahldo me dipan emen me koluhla sang eh mour suwed pahn sewese ih en pwurehng ahneki nanpwungmwahu rehn Siohwa oh doarehla ih sang mehla soutuk. Kristian menet me kin sewese me dipano ni ahl wet pil pahn “kahrehda lapwepwen dihp ngedehrie” ong aramaso.
Mehn Kasukuhl kan ong Kitail:
1:14, 15. Dihp kin tepidohsang ineng suwed. Kahrehda kitail en dehr medemedewe ineng suwed kan oh mweidohng en kekeirda. Kitail anahne ‘en audehkihda nan kapehdatail kan’ oh atail madamadau kan soahng mwahu kan.—Pil. 4:8.
2:8, 9. “Lipilipilki aramas” kin uhwong “kosonned en Wehin Kohto” me pid limpoak. Kahrehda Kristian mehlel kan en dehr lipilipilki aramas.
2:14-26. Kitail kin komourla ‘ni pwoson, kaidehn . . . atail wiewia kan’ me poahsoankihda Kosonned en Moses de wiewia kan en Kristian. Atail pwoson anahne laud sang en ndahte me kitail kamehlele Koht. (Ep. 2:8, 9; Sohn 3:16) E anahne kamwakid kitail en mour pahrekiong kupwuren Koht.
3:13-17. “Erpit me kin sang powe” uhdahn siksang erpit me ‘kisehn sampah oh . . . kisehn tepil’! Kitail anahne raparapahki erpit me kohsang rehn Koht “rasehng me kin rapahki silper de takai kesempwal me rir kan.”—Lep. Pad. 2:1-5.
3:18. Kitail anahne “kamwerehdi ni popohl” war en rongamwahu en Wehio. E kesempwal kitail en kin meleilei oh dehr pohnmwahso oh men akamai.
‘TENGETENG NI PWOSON’
Piter katamankihong ienge Kristian kan duwen arail “koapworopwor laud” ong mour nanleng. E ndaiong irail: “Kumwail wia keinek pilipil ehu, pwihn samworo en Nanmwarkio, kumwail wia wehi sarawi ehu.” Mwurin e kihda kaweid duwen peik, e kangoange koaros en “lamalamteieu oh kupwurteieu; kumwail limpoakpene nin duwen Kristian, oh kadekpene oh aktikitikpene.”—1 Pit. 1:3, 4; 2:9; 3:8.
Pwehki “imwin mehkoaros [en koasoandi en mehn Suhs akan] kerendohr,” Piter kangoange ienge Kristian kan en ‘kaunda paliwararail kan oh mwasamwasahn pwe irail en kak kapakap.’ E padahkihong irail: “Kumwail onohnop oh mwasamwasahn. . . . Kumwail tengeteng ni amwail pwoson oh kehlail.”—1 Pit. 4:7; 5:8, 9.
Pasapengpen Peidek kan me Pid Duwen Iren Paipel kan:
3:20-22—Ia duwen papidais kin komourkitailla? Irail me men komourla anahne en papidaisla. Ahpw papidais kelehpw sohte pahn komourkitailla. “Iasadahn Sises Krais” pahn komourkitailla. Emen me pahn papidaisla anahne pwoson me e kak komourla pwehki Sises ketin pwoula nin duwen meirong ehu oh iasada, “ketidiongehr ni palimaun en Koht,” oh sapwellimaniki manaman pohn me momour oh me melahr. Papidais me poahsoankihda soangen pwoson wet kin pahrekiong ‘me welimeno me pitsang’ Nohliko.
4:6—Ihs “me melahr ako” me “Rongamwahu . . . pil kalohk ong”? Iei irail ko me mehla ‘pwehki arail sapeik kan oh diparail kan,’ de irail kan me sohte ahneki nanpwungmwahu rehn Siohwa mwohn arail rong rongamwahu. (Ep. 2:1) Mwurin arail pwosonla rongamwahu, irail tepida ‘mour’ pwehki irail ahneki nanpwungmwahu reh.
Mehn Kasukuhl kan ong Kitail:
1:7. Pwe atail pwoson en uhdahn katapan, e anahne ale sosohngpe. Soangen pwoson kehlail kak kahrehiong ‘kitail en aleier komourpatail.’ (Ipru 10:39) Kitail en dehr pweiek sang kasongosong kan en atail pwoson.
1:10-12. Tohnleng kan men dehdehkihla padahk rir kan sang Koht me sapwellime soukohp kan en mahs ntingihdier me pid duwen mwomwohdisohn Kristian keidi kan. Ahpw mepwukat sansalda ihte ahnsou me Siohwa ketin tepida doadoahngki mwomwohdiso. (Ep. 3:10) Kitail sou men alasang mehn kahlemeng en tohnleng ko oh nantihong rapahki “sapwellime kupwur rir”?—1 Kor. 2:10.
2:21. Kitail anahne kahlemengih Sises Krais oh perenki tounmeteikihla atail mour pwehn uhpah sapwellimen Siohwa pwung en kaunda.
5:6, 7. Ma kitail mweidohng Siohwa atail pwunod kan, e pahn ketin sewese kitail en mwohneki atail kaudok nan mour ahnsou koaros oh dehr nohn pwunodki dahme pahn wiawi lakapw.—Mad. 6:33, 34.
“RAHNEN KAUN-O PAHN LELEDO”
Piter ntingihdi: ‘Sohte mwahn kokohp ehu kin pwilisang ni nsenen aramas emen, ahpw sapwellimen Koht manaman me kin ti pohn aramas ni ar kin lohkihda mahsen en Koht.’ En tehk kanahieng duwen kokohp pwukat kak pere kitail sang “sounpadahk likamw ekei” oh pil irail akan me kak kasaminehla kitail.—2 Pit. 1:21; 2:1-3.
Piter kaweidki: “Ni imwin ahnsou kan aramas ekei pahn pwarodo me pahn . . . kin kepitkin kumwail.” Ahpw “Rahnen Kaun-o pahn leledo duwehte lipirap emen.” Piter kaimwisekla nah kisinlikou ki kaweid mwahu ong irail me kin “kasikasik sapwellimen Koht Rahno.”—2 Pit. 3:3, 10-12.
Pasapengpen Peidek kan me Pid Duwen Iren Paipel kan:
1:16-19—Ihs “usuhn rahn,” iahd me e dakadahr, oh iaduwen kitail ese me met wiawiher? “Usuhn rahn” menet iei Sises Krais mwurin e ketin wiahla Nanmwarki en Wehin Koht. (Kaud. 22:16) Nan pahr 1914, Sises ketin pwarada mwohn kepikipik kan koaros nin duwen Nanmwarki oh Mesaia, rasehng rahn ehu kin rahnpeseng. En Sises ketin lingalingla kin kasalehda me e pahn ketin ale lingan oh manaman en Wehio, oh met pil kin kasalehda me sapwellimen Koht mahsen en kokohp kin likilik. (Mark 9:1-3) En tehk mahsen pwukat kin kamarainihada loalatail oh kitail kak dehdehki me Usuhn rahno dakadahr.
2:4—Dahkot “ehl” wet, oh iahd irail tohnleng sapeik kan lekdekla loale? Nan lokaiahn Krihk, lepin lokaia “ehl” me kadoadoahk wasaht iei “Tartarus.” Tartarus iei irair ehu me rasehng imweteng me ngehn kante me kak kohla ie, a kaidehn aramas. E wia irair en sohte wehwehki kupwuren Koht kan. Irail me mi nan Tartarus sohte ahneki koapworopwor ong ahnsou kohkohdo. Koht ketin salihdi tohnleng sapeik pwukat nan Tartarus ni mwehin Noha oh irail pahn mihmi nan soangen wasao lao re pahn kasohrala.
3:17—Ia wehwehn en Piter nda “amwail eseier mepwukat”? Piter kin koasoakoasoia duwen mehkan me Koht ketin padahkihong ih oh sounnting en Paipel teikan me pid duwen ahnsou kohkohdo. Met sohte wehwehki me tepin Kristian akan kin ese oaritik kan koaros duwen ahnsou kohkohdo. Irail kin ese dahme pahn wiawi ni oaralap.
Mehn Kasukuhl kan ong Kitail:
1:2, 5-7. Patehng en sewese kitail en “marainkilahr atail Koht oh atail Kaun Sises,” ma kitail pahn nantihong kakairada soangen irair kan me duwehte pwoson, kanengamah, oh lelepek, met pahn kahrehda ‘atail mour eh pahn wah mwahu oh pweida.’—2 Pit. 1:8.
1:12-15. Pwe kitail en “poadidier teng nan padahk mehlel,” kitail anahne mehn kataman kan duwehte me kitail kin alehdi sang mihting kan en mwomwohdiso, pein atail onop en Paipel oh pil wadawad en Paipel.
2:2. Kitail en kanahieng pwe atail wiewia kan en dehr kauwehla mwaren Siohwa oh sapwellime pwihn.—Rom 2:24.
2:4-9. Pwehki dahme Siohwa ketin wiadahr mahs, kitail kak kamehlele me e “ketin mwahngih kapitasang me poadidi kan nan ar apwal akan, oh pil ketin mwahngih nekinekid ong me suwed kan lokolok [“kasohrala,” NW] lao lel Rahnen Kadeik.”
3:2-4, 12. En tehk kanahieng “mahsen en soukohp ako me wiawiher kawao oh kosonned en Kaun-o oh Sounkomour” pahn sewese kitail en tamatamante me rahnen Siohwa inenen keren.
3:11-14. Pwehki kitail kin “kasikasik sapwellimen Koht Rahno,” kitail anahne (1) “mwakelekel” ni paliwar, ni madamadau, ni tiahk oh ni atail kaudok; (2) wiahda mour me kin “kasarawihong Koht” ni atail kin iang doadoahk en kalohki Wehio oh katohnpadahk; (3) kolokol atail wiewia kan oh irair kan en “mwakelekel” oh dehr saminkihla sampah wet; (4) “pwung” ni atail kin wia soahng koaros sang mohngiong mehlel; oh (5) “kapehd popohl” sang ni atail ahneki nanpwungmwahu rehn Koht, riatail Kristian akan oh aramas teikan.