Rong Kanahieng Sapwellimen Koht Mahsen En Kokohp
“Eri, se kin koapworopwor laudki kokohp me soukohp ako lohkidohr. Me konehng mehlel kumwail en tehk oh kesempwalki.”—2 PITER 1:19.
1, 2. Dahme wiawi me kin kasalehda me mie mesaia likamw akan?
EREIN sounpar epwiki kei, mesaia likamw akan kin song en kohpada dahme pahn wiawi ni ahnsou kohkohdo. Nan kalimau en senturi C.E., mie emen ohl me kahdanekin pein ih Moses, oh e pitihkihdi mehn Suhs akan me mih nan deke en Krihd me ih me mesaia oh e pahn kapitirailla sang arail kahpwal akan. Rahn me e kileledi arail rahn en saledeksang arail kahpwal akan, irail idawehnla ih kohla nan wasa ehu me ileile, me irail kak kilikilangdohng pohn Sehden Mediderenien. E padahkiong irail me re anahne lusdihla nan sehd, oh sehdo pahn pwalpeseng mwohrail. Aramas tohto lusdihla nan sehd oh duhla, oh mesaia likamw menet uhd tangasang wasao.
2 Nan senturi 12, emen “mesaia” pil kohsang Yemen. Caliph, de kaun en wasao, idek rehn mesaia menet, ma e kak kilang kilel ehu me pahn kadehde me ih uhdahn mesaiao. Eri, “mesaia” menet padahkiong “caliph” en lopuksang moange. E kohpadahr me e pahn mwadang iasada, met pahn wia kilel me ih uhdahn mesaia. Caliph pwungki pilahn wet—oh met imwilahn “mesaia” menet.
3. Ihs Mesaia mehlelo, oh dahme sapwellime doadoahk en kalohk kin kadehde?
3 Mesaia likamw akan oh arail kokohp kan sohte kin pweida, ahpw ma kitail pahn rong kanahieng sapwellimen Koht mahsen en kokohp akan, kitail sohte pahn nsensuwedla. Mesaia mehlelo iei Sises Krais, oh ih me kapwaiada kokohp tohto en Paipel. Soun nting en Rongamwahu, Madiu, doadoahngki kokohp en Aiseia oh e ntingihdi met: “‘Sapwen Sepulon, sapwen Napdali, ni elen kolahng sehdo, palio Sordan, Kalili, sapwen mehn liki kan! Aramas me kin mihmi nan rotorot, re pahn kilangada marain lapalap ehu! Maraino pahn daker irail akan me kin mihmi nan rotorot en mehla.’ Sang ni ahnsowo me Sises ketin tapihada kapahrengkiseli sapwellime padahk, mahsanih, “Kumwail koluhla oh wiliakapwala! Pwe Wehin Koht kerendohr.’” (Madiu 4:15-17; Aiseia 9:1, 2) Sises kin wia “marain lapalap ehu” oh sapwellime doadoahk en kalohk kin wia kadehde me ih me Soukohpo me Moses kohpadahr. Irail aramas akan me kin kahng rong Sises, pahn kamakamala.—Deuderonomi 18:18, 19; Wiewia 3:22, 23.
4. Iaduwen Sises kapwaiada Aiseia 53:12?
4 Sises pil kapwaiada mahsen kan en kokohp me pwuhken Aiseia 53:12 kohpadahr: “E meirongkihla eh mour sang ni pein nsene, oh mweidala pein ih pwe en iang wadawadohng me dipan akan. E wilian me dipan ngeder oh kasakaskin irail pwe re en ale mahkpen diparail kan.” Pwehki Sises ese me kereniong e pahn meirongkihla eh mour nin duwen tomw ehu, e men kakehle sapwellime tohnpadahk kan. (Mark 10:45) E kakehle irail ni ahl kapwuriamwei ehu ni ahnsou e linganla.
Ni Ahnsoun Sises ketin Wekila oh Linganla kin Kakehle Pwoson
5. Ni pein omw lokaia kan, iaduwen ke pahn kawehwehda en Sises ketin wikila oh linganla?
5 Ni ahnsoun Sises ketin wekila oh linganla, met kin kohpada duwen ni ahnsou kohkohdo. Sises mahsanih: “Pwe Nein-Aramas pahn ketido nin lingaling en Seme, oh sapwellime tohnleng kan pahn iang . . . Kumwail en ese pwe ekei me iang mihmi met, re sohte pahn mehla, irail lao pahn kilang Nein-Aramas eh pahn ketido nin duwen Nanmwarki men.” (Madiu 16:27, 28) Ekei wahnpoaron kan uhdahn kilang Sises oh Sapwellime Wehio ketido? Madiu 17:1-7 mahsanih: “Mwurin rahn weneu Sises ahpw ketin kahredahla Piter oh pirieno, Seims oh Sohn, pohn nahna ileile ieu pwe re en kalapwukala ie. Ih eri ketin wekila mwohrail.” Dahme wiawi me inenen kapwuriamwei! “Ih eri ketin wekila mwohrail: silangi marainla duwehte ketipin, oh sapwellime likou pwetepwet linganla. Tohnpadahk silimeno ahpw kilangada Moses oh Elaisa, me wie koasoakoasoi ong Sises.” Pil, “pelien depwek marain pali pa kipeiraildi,” oh irail rong kapitien Koht me mahsanih: “‘Iei met nei pwutak kompoake me I kin popohlki—kumwail rong sapwellime padahk.’ Tohnpadahk ko rongadahte ngihlo, masepwehkada kowahlap, iei me re poarikidiong nanpwel. Sises ahpw ketido doahke irail oh mahsanih: ‘Kumwail uhda, kumwail dehr masak.’”
6. (a) Dahme kahrehda Sises mahsanih me e wikila oh linganla kin wia kasansal ehu? (b) Dahme kasansal wet kin mwete?
6 Wiewia kapwuriamwei wet wiawi pohn Nahna Ermon, wasa me Sises oh sapwellime wahnpoaron silimen pweidi ie ni pwong. Likamwete en Sises wekila oh linganla wiawi ni pwong, oh met kahrehong wiewia wet en inenen kaselel oh sansal. Kahrepe Sises mahsanih me wiewia wet iei kasansal ehu, pwehki Moses oh Elaisa mehlahr ahnsou werei oh ira sohte uhdahn mihmi rehrail. Ihte Krais kelepw me uhdahn mihmi wasao. (Madiu 17:8, 9) Wiewia kapwuriamwei wet kasalehong Piter, Seims, oh Sohn duwen Sises eh pahn linganla ni ahnsou me e pahn ketiket nan mwoale nanleng nin duwen nanmwarki en Wehin Koht ni ahnsou kohkohdo. Moses oh Elaisa kin mwete iengen Sises me keidi kan, oh kasansalo kin utungada mahsen en Sises duwen Wehio oh duwen e pahn nanmwarkihla ni ahnsou kohkohdo.
7. Dahme kasalehda me Piter kin tamanda ni oaritik kasansal en Sises wikila oh linganla?
7 En Sises linganla kin sewese kakehle pwoson en irail wahnpoaron silimen me pahn ahneki pwukoa kesempwal nan mwomwohdiso en Kristian. Silangen Krais marainla, oh sapwellime likou pwetepwet linganla oh kapitien Koht pakairki me Sises iei sapwellime Ohl kompoake me re anahne rong—kahrepen wiewia pwukat wiawi pweida mwahu. Ahpw, irail wahnpoaron kan sohte pahn kak koasoiong aramas teikan kasansal wet lao lel Sises iasada. Mpen sounpar 32 mwuri, Piter tamanda ni oaritik kasansal wet. E ntingihdi duwen kesempwalpe oh ia wehwehn kasansal wet: “Se sohte poahsoankihda soai likamw at padahk kan ong kumwail duwen roson en ketidohn atail Kaun Sises Krais. Pein kiht se kilangki masat akan sapwellime roson lapalahpie. Se iang mi wasa me Koht Sahm ketin kawauwihala oh kalinganahla, ni kapitien Sahm eh peidohng pohn Sises sang Wasa Lingalihngie, mahsanih, “Ih nei kompoakeo met, me I kin kupwurperenki.” Pein kiht iang rong ngihl wet me peidihdo sang nanleng, ni at iang ketiket pohn nahna sarawio.”—2 Piter 1:16-18.
8. (a) Dahme mahsen en Koht me pid sapwellime Ohl kin kasalehda? (b) Ia wehwehn depweko me pwarada ni ahnsou me Sises linganla?
8 Dahme wiawi me keieu kesempwal iei ahnsou me Koht ketin mahsanih met: “Iei nei pwutak kompoake me I kin popohlki—kumwail rong sapwellime padahk.” Mahsen wet kin kasalehda me Koht idihada Sises en wiahla Nanmwarki en Wehin Koht oh aramas koaros anahne peikiong ih. Depweko kin wehwehki me kasansal wet pahn wiawi ni soh-sansal. Ihte aramas akan me pahn kak wehwehki “kilelo” esehier me Sises ketier nan mwoale nan Wehio ni soh-sansal oh met re kin kilangki ni mesen wehwe. (Madiu 24:3) Ni mehlel, kaweid en Sises ni e padahkiong sapwellime ko en dehr ndahiong mehteikan duwen kasansalo lao lel e iasada, kin kasalehda me ni ahnsou me e pahn linganla pahn wiawi mwurin e iasada.
9. Dahme kahrehda kasansal en Krais linganla anahne kakehle atail pwoson?
9 Mwurin Piter koasoia duwen en Sises wekila oh linganla, e nda met: “Eri, se kin koapworopwor laudki kokohp me soukohp ako lohkidohr. Me konehng mehlel kumwail en tehk oh kesempwalki, pwe e rasehng marain ehu me kin dakedaker wasa rotorot, wasa lao rahnpeseng oh marain en usuhn rahn ahpw pahn kamarainihada kapehdamwail kan. Eri, mwohn mehkoaros, iet me kumwail en tamatamanen: sohte emen kak kawehwehda kokohp ehu en nan Pwuhk Sarawi sang ni pein nsene. Pwe sohte mwahn kokohp ehu kin pwilisang ni nsenen aramas emen, ahpw Ngehn Sarawi me kin ti pohn aramas ni ar kin lohkihda mahsen en Koht.” (2 Piter 1:19-21) En Sises linganla kin kawehwehda mwahu duwen likilik en sapwellimen Koht mahsen en kokohp. Kitail anahne rong kanahieng mahseno oh en dehr rong “soai likamw akan” me sohte kin poahsoankihda padahk me kohsang rehn Koht. Atail kin pwoson mahsen en kokohp pahn kehlailkihda kasansal en en Sises wekila oh linganla pwe kasansalo me kin mwete en Sises linganla ni manaman en kaunda Wehio oh met pweidaher. Ei, mie mehn kadehde mehlel kan me kitail kin kilang rahnpwukat me kin kasalehda me Krais ketier nan mwoale nanleng nin duwen nanmwarki kehlail men.
Ia Mwomwen Usuhn Rahn Ah Kin Dakada
10. Ihs me wia de dahkot “usuhn rahn” me Piter koasoia duwe, oh dahme kahrehda ahmw pasepeng wia met?
10 Piter ntingihdi: “Me konehng mehlel kumwail en tehk oh kesempwalki [mahsen en kokohp], pwe e rasehng marain ehu me kin dakedaker wasa rotorot, wasa lao rahnpeseng oh marain en usuhn rahn dakedaker, oh ahpw pahn kamarainihada kapehdamwail kan.” Ihs de dahkot “usuhn rahn”? Lepin lokaia “usuhn rahn” pwarada pak ehute nan Paipel, oh lepin lokaia “usuhn nimenseng,” oh usuh rahn kin duwepenehte. Nan Kaudiahl 22:16, Sises Krais adaneki “usuhn rahn lingaling.” Ni soangen ahnsou kei nan sounpahro, ekei usu kan kin keieu pwarada mwuhr ni palimesehn nanleng. Irail kin pwarada mwohnte dakadahn ketipin ni menseng oh irail me kin pakairkihdo tepin rahno. Piter doadoahngki lepin lokaia “usuhn rahn” pwehn karasaiong Sises mwurinte e pahn ale manaman en kaunda Wehio. Ni ahnsowo, Sises dakado pohn mehkoaros nanleng oh pil atail sampah! Nin duwen en Mesaia Usuhn Rahn, e kin lohkihdo rahn kapw, de ahnsou kapw, ong aramas peik kan.
11. (a) Dahme kahrehda 2 Piter 1:19 sohte kin wehwehki me “usuhn rahn” pahn uhdahn pwarada nan uhdahn mohngiong en aramas akan? (b) Iaduwen ke pahn kawehwehda 2 Piter 1:19?
11 Tohtohn kawehwehn Paipel kan kin utungada madamadau me mahsen en wahnpoaron Piter me ntingihdi nan pwuhken 2 Piter 1:19 kin pid uhdahn mohngiong en aramas akan. Mohngiong en aramas laud men kin toutouki ounce 9 lel 11. Iaduwen Sises Krais—me ni ahnsou wet wia ngehn men me kin ketiket nanleng oh sohte kak mehla—kak mihmi nan mohngiong tikitik en aramas akan? (1 Timoty 6:16) Ni mehlel, met pahn pidada mongiongatail kan ni pali ngehn, pwe sang mongiongatail kan, kitail kin rong kanahieng sapwellimen Koht mahsen en kokohp. Ahpw tehk kanahieng pwuhken 2 Piter 1:19, oh ke pahn kilang me New World Translation kin doadoahngki mwahi ko (commas) pwehn katohrohrpeseng lepin lokaia pwukat “wasa lao rahnpeseng oh marain en usuhn rahn dakedaker” sang lepin lokaia kan nan iretikitiko me ntinghidi mwowe oh sang lepin lokaia pwukat “nan kapehdamwail kan.” Eri, kitail kak kawehwehda iretikitik wet ni ahl wet: ‘Kitail koapworopwor laudki kokohp me soukohp ako lohkidohr; me konehng mehlel kumwail en tehk oh kesempwalki, pwe e rasehng marain ehu me kin dakedaker wasa rotorot, me kin kamarainihada kapehdamwail kan, lao rahnpeseng oh marain en usuhn rahn.’
12. Ia irairen mohngiong en pali laud en aramas akan, oh ia irairen mohngiong en Kristian mehlel akan?
12 Ia irairen mohngiong ni karasaras en pali laud en aramas dipan akan? Eri, mohngiongarail kan kin mih nan rotorot ni pali ngehn! Ahpw, ma kitail kin wia Kristian mehlel akan, likamwete mie marain ehu me kin kamarainihada kapehdatail kan. Nin duwen Piter koasoia, Kristian mehlel akan pahn kak pepehd oh marainla rasehng rahnpeseng en usuhn rahn ma irail pahn rong kanahieng sapwellimen Koht mahsen en kokohp lingaling kan. Re pahn ese me Usuhn Rahn dakadadohr, kaidehn nan mohngiong en aramas akan, ahpw mwohn kapikapikda kan koaros.
13. (a) Dahme kahrehda kitail kak kamehlele me Usuhn Rahn dakadaehr? (b) Dahme kahrehda Kristian akan kak dadaurete pahn irair apwal akan me Sises kohpadahr me pahn wiawi nan atail ahnsou?
13 Usuhn Rahn dakerer wasa! Kitail kak kamehlele met sang ni atail pahn rong kanahieng sapwellimen Sises kokohp laud me kin pid ahnsou me e ketier nan mwoale nanleng. Rahnwet, kitail kin kilang pweidahn kokohp wet, pwe mahs sohte mahwen me kin laud duwehte mahwen kan me kin wiawi erein imwin rahn akan iangahki lehk, rerrer en sahpw, oh doadoahk en kalohk me kin wiawi wasa koaros nan sampah nan rahnpwukat. (Madiu 24:3-14) Edetehn irair apwal pwukat me Sises kohpadahr kin pil dokedoke atail mour nin duwen Kristian akan, kitail pahn kak dadaurete oh ahneki popohl oh peren. Dahme kahrehda? Pwe kitail kin rong kanahieng sapwellimen Koht mahsen en kokohp oh pwoson dahme e inoukihong kitail nan ahnsou kohkohdo. Pwe kitail kin mihmi nan “imwin ahnsou,” kitail ese me kitail kereniong pahn mihmi nan ahnsou mwahu akan. (Daniel 12:4) Sampah wet kin mih pahn ahnsou apwal akan nin duwen Aiseia 60:2 kohpadahr: “Rotorot pahn kipehdi wehi teikan en sampah.” Iaduwen emen pahn kak kekeid nan rotorot wet? Ni ahnsou wet, emenemen kitail anahne, ni aktikitik, rong kanahieng sapwellimen Koht mahsen en kokohp, mwohn pahn pwandala. Aramas mehlel akan pahn anahne sohpeiong Siohwa Koht, nin duwen Utupen mour oh marain. (Melkahka 36:9; Wiewia 17:28) Ma kitail pahn wia met, kitail pahn kak marainla oh ahneki koapworopwor en paiekihda dahme Koht kupwurki ong aramas peik akan.—Kaudiahl 21:1-5.
“Maraino Pwarodohngehr nin Sampah”
14. Dahme kitail anahne wia ma kitail men kilang pweidahn kokohp en Paipel kaselel kan?
14 Pwuhk Sarawi kin kasalehda ni sansal me Sises Krais wia Nanmwarki en Wehin Koht oh kin kakaun nanleng ni ahnsou wet. Pwehki e tepida kaunda sang nan pahr 1914, kokohp kaselel kan me pid ahnsou kohkohdo pahn kereniong pweida. Ma kitail men kilang pweidahn kokohp pwukat, kitail anahne wiahla aramas opampap akan me kin pwoson Sises Krais, oh koluhkihla atail wiewia sapwung kan oh sapwung kan me kitail wiahda ni sawehwe. Ni mehlel, irail akan me kin poakohng rotorot, sohte pahn ale mour soutuk. Sises mahsanih: “Eri, iet duwen kadeiko: maraino pwarodohngehr nin sampah, ahpw aramas akan poakohng rotorot laudsang maraino, pwehki arail kin wia me suwed. Pwehki mehmen me kin wia me suwed kin kailongki marain en me mehlel, oh e sohte kin men pwarodohng marain wet, pwehki e sohte mwahuki eh wiewia suwed kan en sansalda. A mehmen me kin wia me mehlel kin pwarodohng marain, pwe maraino en kasalehda me eh wiewia kan poahsoanki eh peikiong Koht.”—Sohn 3:19-21.
15. Dahme pahn wiawi ma kitail pahn mwamwahliki koasoandi en komour me Koht ketikihong kitail ki sapwellime Ohl?
15 Marain ni pali ngehn pwarodohngehr sampah ki Sises, oh e inenen kesempwal kitail en rong ih. Pohl ntingihdi: “Kawao Koht kin ketin mahseniong samatail mehn mahs ako pak tohto oh ni soangen mwohmw tohto sang rehn soukohp ako; a ni rahn pwukat, e ketin mahseniong kitail sang rehn Sapwellime Iehros. Iehros menet, iei ih me Koht ketin wiahkihda nanleng oh sampah pokon. Iehros menet, iei ih me Koht ketin pilada pwe en sapwellimankihla mehkoaros ni imwin kawa.” (Ipru 1:1, 2) Dahme pahn wiawi ma kitail pahn mwamwahliki koasoandi en komour me Koht ketikihong kitail ki sapwellime Ohl? Pohl pousehla oh koasoia met: “Pwe ma mahseno me tohnleng ko lohkidohr ong atail pahpa kahlap ako me mehlel, oh mehmen me sohte kapwaiada, de me kauwehla, e alehki kalokolok me konehng, eri, ia duwe? Kitail kak pitsang kalokolok, ma kitail pahn seukautihong soangen komour lapalapo? Pein Kauno me tepin lohkihdo komour wet; mwuhr, irail ko me iang rongasang, re ahpw kamehleledohng kitail. Ni ahnsowohte Koht ahpw ketin iang kadehdehda ni eh ketin wiahda kilel sansal oh kapwuriamwei kei, ni eh ketin kamwerehdiong kitail kisakis kan en Ngehn Sarawi nin duwen kupwure.” (Ipru 2:2-4) Ei, Sises me wia poahsoanpen mahsen en kokohp me wia lolohkseli.—Kaudiahl 19:10.
16. Dahme kahrehda kitail kak likih sapwellimen Siohwa Koht kokohp akan koaros?
16 Piter mahsanih: “Pwe sohte mwahn kokohp ehu kin pwilisang ni nsenen aramas emen.” Aramas sohte kak sang ni pein irail wiahda kokohp mehlel akan, ahpw kitail kak pwoson unsek sapwellimen Koht kokohp akan koaros. Kokohp pwukat kin uhdahn kohsang rehn Siohwa Koht. Ki sapwellime ngehn sarawi, Siohwa kin ketin sewese sapwellime ladu kan en wehwehki duwen pweidahn kokohp en Paipel kan. Ni mehlel, kitail kin kalahnganki Siohwa pwe E kin sewese kitail en wehwehkihla duwen pweidahn kokohp tohto sang nan pahr 1914. Oh kitail kin uhdahn kamehlele me luwen kokohp kan me pid duwen imwin koasoandi suwed wet pahn pweida. E kesempwal kitail en kaukaule rong kanahieng mahsen en kokohp kan me kohsang rehn Koht oh atail marain en sansalda mwohn aramas akan. (Madiu 5:16) Ia uwen laud atail kalahnganki Siohwa pwe e kin kahrehong ‘me rotorot me kapikapil kitail pahn wekidekiong ni marain en rahn’!—Aiseia 58:10.
17. Dahme kahrehda kitail anahne marain ni pali ngehn me kin kohsang rehn Koht?
17 Marain kin sewese kitail en kilang. E pil kin sewese tuhke kan en kekeirada oh wiahda soangsoangen wahntuhke kan me kitail kak kang. Kitail sohte kak mour ma sohte marain. Ahpw, iaduwen marain ni pali ngehn? E kin kaweid kitail oh kasalehong kitail dahme pahn wiawi nin duwen sapwellimen Koht Mahsen Paipel kin kohpada. (Melkahka 119:105) Siohwa Koht ni limpoak kin ‘ketin kadarodo sapwellime marain oh mehlel.’ (Melkahka 43:3) Kitail anahne kasalehda atail kalahngan laud ki sawas pwukat. Kitail en wia uwen me kitail kak en alehong nan loalatail marain en “loalokong en Koht” me pahn kamarainih nan mohngiongatail.—2 Korint 4:6; Episos 1:18.
18. Dahme sapwellimen Siohwa Usuhn Rahn kaunopada en wia met?
18 Kitail inenen pai en esehla me nan 1914, Sises Krais, Usuhn Rahn, dakedaker nan lahng oh sampah pwon oh ih ahnsou me kasansal en en Sises wikila oh linganla tepida pweida! Sapwellimen Siohwa Usuhn Rahn ketier nan mwoale nanleng, oh e kaunopadaher en kapwaiada kupwuren Koht pwe kasansal en Sises wikila oh linganla en pweida douluhl—“Rahn Lapalap en Koht, Wasa Lapalahpie.” (Kaudiahl 16:14, 16) Mwurin koasoandi mering wet pahn sohrala, Siohwa pahn kapwaiada sapwellime inou en “nanleng kapw oh sampah kapw” pwe kitail pahn kak kapinga ih kohkohlahte nin duwen Kaunepen Lahng oh Sampah oh Koht en kokohp mehlel akan. (2 Piter 3:13) Lao lel rahn kaselelo, kitail en nantihong kekeid nan marain en powe ni atail pahn rong kanahieng sapwellimen Koht mahsen en kokohp.
Iaduwen Ke Pahn Sapeng?
• Iaduwen ke pahn kawehwehda ia wehwehn en Sises wikila oh linganla?
• Iaduwen kasansal en en Sises wikila oh linganla kin kakehle atail pwoson?
• Ihs de dahkot sapwellimen Siohwa Usuhn Rahn, oh iahd e dakada?
• Dahme kahrehda kitail anahne rong kanahieng sapwellimen Koht mahsen en kokohp?
[Kilel nan Pali 21]
Ke kak kawehwehda ia wehwehn kasansal en en Sises wikila oh linganla?
[Kilel nan Pali 23]
Usuhn Rahn dakerer wasa. Ke ese iaduwen oh iahd met wiawi?