Sises—Mehn Kahlemeng me Keieu Mwahu

KE MEN kalaudehla ahmw nsenamwahu oh kamwahwihala ahmw mour? Wahnpoaron Piter kawehwehda ia duwen kitail kak wia met. E ntingihdi: “Pein Krais eh lokolongkin kumwail oh ketikihong kumwail karasepe mwahu, ih pil duwen amwail pahn idawehn oh kahlemengih.” (1 Piter 2:21) Kitail kak sukuhlki soahng tohto sang mouren Sises Krais. Kitail kak kalaudehla atail nsenamwahu oh kamwahwihala atail mour sang ni atail kin sukuhlki duwen Sises oh kahlemengih ih. Kitail pahn tehkpene ekei sapwellime irair kaselel kan oh ia duwen kitail kak kahlemengih ih.

Sises kin ketin toupahrek. Mendahki Sises mahsanih me “sohte wasa e kak kaulewei ie tapwi,” e sohte kin ketin wia mour ehu me sohte peren. (Madiu 8:20) E kin ketin iang kamadipw kan. (Luk 5:29) Sises ketin kawekila pihl ong wain ni ehu kamadipw en kapwopwoud. Met keieun sapwellime manaman me kileldi nan Paipel. Manaman wet kin kasalehda me ih kaidehn aramas men me sohte men patehng aramas teikan oh sohte kin ahneki ahnsou peren. (Sohn 2:1-11) Ahpw Sises ketin kasalehda dahme e kin keieu kesempwalki nan mour. E mahsanih: “Ei kapwaiada kupwur en ih me ketin poaroneiehdo, oh wiahda sapwellime doadoahk, iei me ei tungoal.”—Sohn 4:34.

□ Ke kin tehk ma ahmw kin rapahki pai en kepwe kan kin toupahrekiong ahmw nantihong ahneki nanpwungmwahu rehn Koht?

Aramas kin mengeiong keiong Sises. Paipel kin kasalehda me Sises kin ketin kadek ong aramas. E sohte kin ketin pwangahki ahnsou me aramas kin patohla reh oh kasalehda arail kahpwal kan oh peidek kan. Ehu ahnsou e ketiket nan pokon oh lih emen me kohwahki soumwahu erein sounpar 12 doahke sapwellime likowo. Liho koapworopworki me e kak ale sawas. Aramas teikan kakete lemeleme me dahme liho wia me sapwung. Ahpw ni elen kadek Sises ketin mahsanih: “Nei serepein, omw pwoson me kakehlaiukada.” (Mark 5:25-34) Seri kan pil perenki mihmi reh. Irail sohte perki me e pahn ketin pohnsehse irail. (Mark 10:13-16) Sises oh sapwellime tohnpadahk kan kin kalapw koasoakoasoipene. Tohnpadahk ko kin men karanih ih.—Mark 6:30-32.

□ Meteikan kin mengeiong patehng iuk?

E kin ketin poakehla aramas akan. Ehu sapwellimen Sises irair kaselel iei me e kak ketin wehwehki pepehm en meteikan oh e kin ketin sewese irail. Wahnpoaron Sohn kasalehda me ahnsou me Sises mahsanihada Mery eh sengisengki mehlahn rie Lasarus, Sises “ahpw kupwurohla oh pahtoula” oh “ketin tentenihr.” Meteikan kak kilang me Sises ketin poakehla peneineio oh me e sohte ketin namenengki kasalehda met mwohn meteikan. Oh e ketin kasalehda sapwellime kadek laud ni eh ketin kaiasada Lasarus!—Sohn 11:33-44.

Pil ehu ahnsou, e ketin tuhwong emen ohl tokutok. Soumwahu wet inenen apwal pwehki ohlo anahne kelekelehpw. Ohlo peki rehn Sises: “Maing, ma komw ketin kupwurki, komw kak ketin kamwakeleiehda.” Mwomwen sapwellimen Sises mwekid ong met me inenen kadek. “Sises eri mahsanih, ‘I mwahuki,’ e ahpw ketikihda lime ko powe oh ketin sair ohlo, mahsanih, “Eri, mwakelekelda!” (Mad. 8:2, 3) Sises sohte ketin kamwahwihala aramas akan ihte pwehn kapwaiada kokohp. E kupwurki kihsang arail pahtou. Ehu sapwellime kaweid kin kamwakid sapwellime wiewia kan. Aramas tohto kin wadlikihla kaweid wet: “Duwen me ke men aramas en wiahiong uhk, ih duwen me ke pahn wiahiong irail.”—Luk 6:31.

□ Omw wiewia kan kin kasalehda me ke kin poakehla meteikan?

Sises ketin mwahngih irair en aramas. Mendahki Sises sohte kin ketin wiahda sapwung, e sohte kin ketin kasik me meteikan pil sohte pahn wiahda sapwung. E pil sohte kin ketin kasalehda me ih me mwahu sang meteikan. Oh e kin ketin mwahngih irair en meteikan. Ehu ahnsou, lih emen “me inenen mour suwed” kasalehda eh pwoson oh kalahngan ni eh kawisekesekehkihla pilen mese aluweluwe ko. Sises ketin mweidohng liho en wia met. Ohlo me luke Sises nan imweo pwuriamweikihla met pwehki ohlo kadeikadahr liho. Sises ketin mwahngih me liho ahneki mohngiong mehlel, kahrehda e sohte ketin kadeik en liho dihp kan. Sises ahpw mahsanihong liho: “Omw pwosonen me komouruhkalahr; kohkohwei ni popohl.” Sapwellimen Sises kadek kak kamwakid liho en kesehla eh mour mahs.—Luk 7:37-50.

□ Ke kin mwadang en kapinga meteikan oh pwand en kadeik irail?

E sohte kin ketin lipilipilki aramas oh wauneki irail. Sises kin ketin loalloale sapwellime tohnpadahk Sohn. Mwein met pwehki ara irair kan duwepenehte oh ira pil peneinei.a Ahpw e sohte kin ketin kasalehda me Sohn me kesempwal sang tohnpadahk teikan. (Sohn 13:23) Ahnsou me Sohn oh rie Seims peki reh pwais me keieu mwahu nan Wehin Koht, Sises ketin sapeng: “A mwohd ni palimauni oh palimeingi, e sohte mweimweiong ie I en pilada.”—Mark 10:35-40.

Ahnsou koaros Sises kin ketin wauneki meteikan. E sohte kin ketin lipilipilki aramas mendahki aramas teikan kin lipilipilki aramas. Karasepe, ahnsowo, ohl kan kin mwamwahliki lih akan. Ahpw Sises kin ketin kasalehda wahu ong lih akan. E ketin tepin kasalehda me ih me Mesaia ong lihen Sameria, ah kaidehn mehn Suhs. Pali laud en mehn Suhs akan kin kailongki mehn Sameria kan oh sohte men rahnmwahu ong irail. (Sohn 4:7-26) Sises pil ketikihong lih akan pwais en tepin wia sounkadehde sapwellime iasada.—Madiu 28:9, 10.

□ Ke sohte kin lipilipilki aramas mendahki arail keinek, de ma re ohl de lih, de arail lokaia, de arail wehi?

E kin ketin kapwaiada sapwellime pwukoa ong peneinei. E sansal me Sosep mehla ni ahnsou me Sises pwulopwul. Sises kin ketin apwalih ine oh rie ko ni eh ketin wia kapinte. (Mark 6:3) Mwohnte eh pwoula, e ketin koasoanehdi me sapwellime tohnpadahk Sohn pahn apwalih ine.—Sohn 19:26, 27.

□ Ke kak kahlemengih Sises ni ahmw pahn kapwaiada ahmw pwukoa ong peneinei?

Sises kin ketin wia kompoakepah mehlel men. Sises ketin wia kompoakepah me keieu mwahu men. Ia duwen? E sohte ketin soikala kompoakepah kan pwehki arail kin pwurepwurehng wia sapwung kan. Sapwellime tohnpadahk kan sohte kin ahnsou koaros wia dahme e kupwurki. Ahpw e kin ketin kasalehda me ih kompoakparail men sang ni eh kin ketin tetehk arail irair mwahu kan oh e sohte kin ketin lemelemehk suwed ong irail. (Mark 9:33-35; Luk 22:24-27) E sohte kin ketin idingkihong irail en pwungki sapwellime madamadau ahpw e kin ketin kangoange irail en kasalehda arail pepehm kan ni saledek.—Madiu 16:13-15.

Patehng mepwukat, Sises ketin limpoakohng kompoakepah kan. (Sohn 13:1) Ia uwen? E mahsanih: “Iet limpoak me keieu laud me emen kak ahneki ong kompoakepah kan, ma e pahn tounmeteikihla eh mour pwehki kompoakepah ko.” (Sohn 15:13) Mie emen kak kihong kompoakepah kan mehkot me laud sang pein eh mour?

□ Ke kin wia kompoakepah men pil ni ahnsou kan me meteikan kin kansensuwedih iuk?

E kin ketin eimah. Sises kaidehn ohl luwet men me duwehte mahlen kan kin kalapw kasalehda. Pwuhken Rongamwahu kan kin kasalehda me ih ohl kehlail oh eimah men. Pak riau, Sises ketin kausasang sounetinet kan iangahki arail kepwe kan sang nan tehnpas sarawio. (Mark 11:15-17; Sohn 2:14-17) Ni ahnsou me aramas kan kohla reh pwehn koledi “Sises, mehn Nasaret,” e ketin kasalehda ni eimah pein ih oh perei sapwellime tohnpadahk kan oh mahsanih: “Ngehi Iei ih. Eri, ma kumwail raparapahkin ie, kumwail mweidohng ohl pwukat re en kohkohla.” (Sohn 18:4-9) Ihme kahrehda ahnsou me Pontius Pailet kilangada sapwellimen Sises eimah mendahki eh ketin ale kalokolok, e nda: “Kumwail kilang! Iet ohlo!”—Sohn 19:4, 5.

□ Ke kin kasalehda eimah ni ahnsou me ke anahne?

Patehng sapwellime irair kaselel teikan, ih irair pwukat me kin wiahki Sises mehn kahlemeng me keieu mwahu ong kitail. Ma kitail kin kahlemengih ih, kitail pahn kalaudehla atail nsenamwahu oh kamwahwihala atail mour. Ihme kahrehda wahnpoaron Piter kangoange Kristian akan en idawehn kanahieng lipwen Sises kan. Ke kin wia uwen ahmw kak en idawehn kanahieng lipwen Sises kan?

E Ketin Wia Laud Sang Mehn Kahlemeng

Sises ketin wia laud sang atail mehn kahlemeng. E mahsanih: “Ngehi me ahl, ngehi me mehlel, ngehi me mour; sohte me kak kolahng Semei ma soh ngehi.” (Sohn 14:6) E ketin kasalehda padahk mehlel duwen Koht oh met ritingada ahl en karanih Koht. Patehng met, Sises ketikihda koasoandi ehu ong aramas lelepek kan pwehn ahneki mour.—Sohn 3:16.

Sises mahsanih me pid duwen kahrepen eh ketidihdo sampah: “Nein-Aramas me ketido, kaidehn pwe aramas akan en papah, a pwe en papah aramas akan; oh pwe en tounmeteikihla moure, pwe me ngeder en maiauda.” (Mad. 20:28) Ni eh ketikihda sapwellime mour nin duwen meirong ehu, Sises ketin koasoanehdi koasoandi ehu ong aramas pwehn ahneki mour soutuk. Dahme emenemen kitail anahne wia pwehn paiekihda koasoandi wet? Sises ketin mahsanih: “Oh iet mour: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.”—Sohn 17:3.  

Kitail anahne esehla Sises, kahlemengih ih, oh pwoson sapwellime meirong pwehn ahneki mour soutuk. Se kangoange iuk en koasoanehdi ahnsou pwehn onop Paipel oh kapwaiada eh padahk kan duwehte Sises kin ketin wia.

Sapwellimen Sises mehn kahlemeng kin padahkihong kitail soangen aramas dah kitail anahne wia. Sapwellime meirong kak kasaledek kitail sang dihp oh pweinen dihp me iei mehla. (Rom 6:23) Kitail sohte kak ahneki mour nsenamwahu ma kitail sohte kin kahlemengih Sises Krais. Ke dehr mweidohng ahmw kedirepw kan oh pwunod kan en mour en kauwehla ahmw ahnsou en doudouloale oh idawehn sapwellimen Sises Krais mehn kahlemeng mwahu. Pwehki ih ohl me keieu lapalap sangete mahs.

[Nting tikitik me mi pah]

[Kilel kan nan pali 5]

Sises kin ketin toupahrek

Aramas kin mengei en keiong ih

E kin ketin poakehla aramas