Dahme Aramas Kin Ndahki Duwen Sises
“Sises mehn Nasaret . . . me keieu ndand nan poadopoad.”—H. G. Wells, soupoad en England men.
“Krais kelehpwte me siklahsang aramas ndand kan koaros nan poadopoad.”—Philip Schaff, emen soupoad en mehn Swiss me pil samanih Pwuhk Sarawi.
IHS me warohng en adaneki ohl me keieu lapalap nan poadopoad? Dahme kin kahrehda emen en lapalap? Eh loalokong oh koahiek nan pali en mahwen? Eh wia aramas kehlail men? Eh wia emen me uhdahn loalokong? De e kin kohsang eh lokaia oh pil wiewia kan me pahn kin kamwakid aramas oh eh mehn kahlemeng mwahu ong aramas?
Tehk dahme soupoad kan, saintis kan, irail me sukuhl laud kan, soun nting kan, kaunen politik kan, oh meteikan me momour mahs oh pil met, kin koasoiahki duwen Sises Krais mehn Nasaret:
“Kitail sohte kak kahmahmki me Sises mehn Nasaret iei ih me kin keieu kamwakid laud aramas teikan, kaidehn ongete sounpar riekid samwalahro ahpw ong erein poadopoad en aramas.”—Reynolds Price, soun nting nan Amerika me pil samanih Paipel.
“Emen ohl me sohte dipe toukihda pein ih nin duwen meirong ehu ong kamwahupen meteikan iangahki eh imwintihti kan oh wialahr tomw ehu ong sampah. Met wiewia unsek ehu.”—Mohandas K. Gandhi, kaunen politik oh pelien lamalam en India.
“Ni ahnsou me I seri, I kin ale kaweid sang nan Paipel oh Talmud. Ngehi mehn Suhs men, ahpw mehn kahlemeng kaselel en Sises mehn Nasaret kin kamwakid laud ei madamadau.”—Albert Einstein, saintis en Sehmen men.
“Ong ie, Sises Krais me keieu mwahu sang koaros, nan poadopoad en aramas pwon nin duwen eh wia Sapwellimen Koht Ohl oh Nein Aramas. Soahng koaros me E ketin mahsanih oh ketin wia kesempwal ong kitail rahn pwukat, sohte emen me melahr de momour kin pahrekiong ih.”—Sholem Asch, soun nting en Polish me ntingihdi, Christian Herald; ih me doadoahngki nting en italic.
“Erein sounpar silihsek limau en ei mour, I sohte kin kamehlele mehkot. Sounpar limau samwalahro, I kamehlelehla me Sises uhdahn mie. I pwosonla padahk en Sises Krais oh ei mour pwon wiahkinteieu wekidekla.”—Count Leo Tolstoy, soun nting oh sounpadahk en mouren aramas sang Russian.
“Sohte emen nan poadopoad en aramas me kin kamwakidada mouren aramas tohtohie duwehte me Sises kin ketin wia oh irail me kin mwekidki kin wia tohtohlahte.”—Kenneth Scott Latourette, soupoad oh soun nting en Amerika men.
“Ia duwe, kitail kak nda me poadopoad en mour en Sises soai pwoat? Kompoakepahi ko, met sohte wia soai pwoatte. Sohte aramas kin peikasalki poadopoad en Socrates (ohl loalokong men me mour sounpar 500 mwohn Krais) me sohte ahneki mehn kadehde kan duwehte Sises.”—Jean-Jacques Rousseau, ohl loalokong en Frans men.
E sansal me Sises Krais me keieu warohng en wia atail mehn kahlemeng ong mour. Pohl iei emen me sukuhl laud ni mwehin Sises. Sises ketin pilada ih en wia Sapwellime tohnpadahk pwe en kadehdeiong aramas akan duwen Ih oh pil kangoange kitail en ‘kainenehiongete masatail kan’ ong Sises. (Ipru 12:2; Wiewia 9:3) Dahme Sises kak padahkihong kitail me pid duwen mour? Ia duwen ahmw pahn kak paiekihda sapwellime mour?