Ipwsapahl—Iei Elen Komour?
IA DUWEN ke pahn sapengla peidek wet, “Ke ipwsapahl?” Aramas tohto nan sampah pahn sapengki, “Ei!” Irail kin kamehlele me en ipwsapahl kin wia kilelepen Kristian mehlel koaros oh ihte met elen komour. Irail kin pwungki madamadau en kaunen pelien lamalam kan duwehte Robert C. Sproul me ntingihdi: “Ma emen sohte ipwsapahl, . . . eri ih kaidehn Kristian men.”
Ia duwe, ke iang kamehlele me ma ke ipwsapahl, eri ke pahn kak komourala? Ma ei, eri ke uhdahn pahn men sewese omw peneinei oh kompoakpahmw kan en komourala. Ahpw pwe irail en kak wia met, re anahne wehwehki wekpeseng en emen me ipwsapahl oh emen me sohte ipwsapahl. Eri, ia duwen ke pahn kawehwehiong irail ia wehwehn ipwsapahl?
Aramas tohto kin kamehlele me lepin lokaia “ipwsapahl” kin koasoia duwen aramas emen me inoukihda ni mehlel en papah Koht oh Krais. E sohte kin ahneki nanpwungmwahu rehn Koht mahs ahpw met e wekiong aramas me ahneki nanpwungmwahu reh.
Ia duwe, ke pahn pwuriamweikihla me Paipel sohte pwungki ire wet? Ke men esehla dahme Mahsen en Koht uhdahn padahngki duwen ipwsapahl? Ke uhdahn pahn paiekihda ma ke pahn tehk kanahieng ire wet. Pwekida? Pwehki omw wehwehkihda dahme pwung duwen ipwsapahl pahn wia kamwahu ong omw mour ahnsouwet oh pil ahnsou kohkohdo.
Dahme Paipel Padahngki?
Lepin lokaia “ipwsapahl” pwarada nan Sohn 3:1-12. Wasaht kin koasoakoasoia duwen en Sises mahmahsanihong emen kaunen pelien lamalam nan Serusalem. Ke pahn kak kilang iren Paipel wet nan koakon nan pali 7. Se kangoange iuk en wadek kanahieng.
Nan iren Paipel pwukat, Sises ketin kasalehda ire kesempwal kan me pid “mour kapw.”a Sapwellimen Sises mahsen kan kin sewese kitail en sapengla peidek siluh pwukat me kileldi pah:
◼ Ia uwen kesempwal en mour kapw?
◼ Kitail kak pein pilada ma kitail kak ipwsapahl?
◼ Ia kahrepen ipwsapahl?
Kitail pahn tehkpene ehuehu peidek pwukat.
[Nting tikitik me mi pah]
a Lepin lokaia pwukat “mour kapw” pwarada nan 1 Piter 1:3. Lepin lokaia pwukat kin kawehwehda dahme kin wiawi ni en emen kin “ipwsapahl.” “Ipwsapahl” oh “mour kapw” kohsang lepin lokaiahn Krihk, gen·naʹo.
[Koakon nan pali 7]
“Kumwail Koaros Uhdahn Pahn Ipwsapahl”
“Eri, ohl emen mie, ede Nikodihmus; ih sounkaweid men rehn mehn Suhs ako, me kisehn pwihnen Parisi. Pwohng ehu, ohl menet ahpw waidohng rehn Sises oh patohwanohng, ‘Rapai, se patohwan ese me komwi sounpadahk emen me pekederdo sang rehn Koht, pwehki sohte emen me kak wia kilel pwukat me komw kin ketin wiewia me Koht sohte ketin ieiang.’ Sises ahpw ketin sapeng, mahsanih, ‘I ndaiong uhk ni mehlel: mehmen me sohte ipwsapahl, e sohte pahn kak kilang Wehin Koht.’ Nikodihmus eri patohwan idek, ‘Ia duwen aramas mahlahr emen, e pahn kak ipwidi sapahl? Mehlel me e pahn kak pwurehng pedolong nan kapehd en ine oh pwurehng ipwidihsang?’ Sises ahpw ketin sapeng, mahsanih, ‘I ndaiong uhk ni mehlel: sohte emen kak pedolong nan Wehin Koht, ma e sohte pahn ipwiki pihl oh Ngehn Sarawi [“sapwellimen Koht manaman,” NW]. Pali uduk kin ipwidihsang aramas, a pali ngehn sang Ngehno. Ke dehr pwuriamweikihla ei ndaiong uhk me kumwail koaros uhdahn pahn ipwsapahl. Kisinieng kin ipila wasa me e anahne, oh ke kin rong ngile, ahpw ke sehse wasa me e ipido sang ie, de wasa me e kin ipilang ie. Eri, iei duwen emenemen me ipwikihdi Ngehno.’ Nikodihmus ahpw pil patohwan idek, ‘Ia duwen mepwukat ar kak wiawi?’ Sises eri ketin sapeng, mahsanih, ‘Sounpadahk lapalap en Israel men kowe, a ke ahpw sohte wehwehki duwen mepwukat? I ndaiong uhk ni mehlel: se kin koasoia mehkan me se wehwehki, oh se kin kadehde duwen mehkan me se kilangehr; ahpw sohte emen rehmwail me men kamehlele at kadehde. Kumwail sohte kin kamehlele ie ni ahnsou me I kin ndaiong kumwail duwen mehkan me pid sampah wet; eri, ia duwen amwail pahn kak kamehlele ie ma I pahn ndaiong kumwail duwen mehkan me pid nanleng?”—Sohn 3:1-12.