2 Esehla Dahme Mehlel Duwen Koht
“Oh iet mour: aramas akan en eseikomwihla, me komwihte Koht mehlel.”—Sohn 17:3.
IA OMW MEHN KEREMPWA KAN? Ekei kin nda me Koht sohte ketin mie. Meteikan kin kamehlele me Koht kaidehn emen me kitail kak kompoakepahnki ahpw e wiahte manaman kehlail ehu. Oh mie me kin kamehlele me ih emen me kitail kak kompoakepahnki, ahpw re kin padahngki soangsoangen padahk kan duwen ihs ih oh ia sapwellime irair kan.
IA DUWEN KE KAK POWEHDI KAHPWAL WET? Ehu ahl en esehla duwen Koht iei en kilang soahng kan me e ketin kapikada. Wahnpoaron Pohl koasoia: “Sang ni ahnsou me Koht ketin kapikada sampah, aramas kak dehdehki me ih uhdahn Koht mehlel oh sapwellime manaman me poatopoat. Mepwukat me sansal mwahu sang ni wiepen nin lime kan.” (Rom 1:20) Ni omw kin kasawih mwahu duwen kapikipik kan, ke kak sukuhlki duwen erpit oh manaman en atail Sounkapikada.—Melkahka 104:24; Aiseia 40:26.
Ahpw pwehn esehla soangen Koht dahmen ih, emenemen kitail anahne wadek oh kasawih Mahsen en Koht me iei Paipel. Dehr mweidohng meteikan en pilada dahme ke pahn kamehlele. Ahpw ken idawehn dahme Paipel kaweidki: “Kumwail dehr kahlemengih wiewia kan en sampah wet, ahpw mweidohng Koht en ketin kawiliakapwala loalamwail kan unsek. Eri, kumwail ahpw pahn esehda dahme kupwuren Koht—dahme mwahu, oh dahme e kin ketin kupwurperenki, oh dahme unsek.” (Rom 12:2) Karasepe, tehk duwen ire pwukat me Paipel kin kasalehda duwen Koht.
Mie mwaren Koht. Ahnsou me Paipel tepin ntingdi, mwaren Koht pwarada pak kid kei nan Paipel pwon. Sounkawehwe tohto kin doadoahngki mwar wet nan Melkahka 83:18 me mahsanih: “Pwe aramas akan en ese me komwi, me mwarenki Siohwa, komwi kelehpw me Keieu Lapalap pohn sampah koaros.”—King James Version.
Siohwa Koht sapwellimaniki pepehm kan me kin mwekidida pwehki wiewia kan en aramas. Mwurin Siohwa ketin kapitala mehn Israel kan sang arail kin wia lidu nan Isip, mie pak irail pohnsehsehla sapwellime kaweid kan. Re kin “kansensuwedihada” ni ar kin uhwong ih. Arail wiewia kan kin “katoutouwihala nan kupwuren Koht Sarawien Israel.”—Melkahka 78:40, 41.
Siohwa kin ketin nsenohki emenemen kitail. Sises mahsanihong sapwellime tohnpadahk kan: “Kumwail kak pwainkihda kisin menpihr riemen sens ehu; ahpw sohte emen ira pahn pwupwudiong nanpwel, ma Samamwail sohte ketin mweidohng. A ong kumwail, pil pitenmoangamwail koaros iangehr wadawadedi. Eri, kumwail dehr masak, pwe kumwail kesempwalsang mehlel menpihr tohto!”—Madiu 10:29-31.
Koht sohte kin ketin lipilipilki aramas akan pwehki arail keinek de wasa me re kohsang ie. Wahnpoaron Pohl padahkihong mehn Krihk kan nan Adens me Koht “ketin wiahda kadaudok koaros sang rehn ohltehmen, oh ketikihong irail en koukousoan pohn sampah pwon.” E pil koasoia me Koht “sohte dohsang emenemen kitail.” (Wiewia 17:26, 27) Wahnpoaron Piter koasoia: “Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung; sohte lipilipil ih soangen aramas dah.”—Wiewia 10:34, 35.
IA KATINGPEN ESEHLA KOHT? Ekei kin “inenen poadidiong Koht, ahpw sohte kekeid ni pwungen marain mehlel.” (Rom 10:2) Ma ke pahn esehla dahme Paipel uhdahn padahngki duwen Koht, ke sohte pahn mweidohng emen en pitihdi kowe oh ke pahn kak “keido mpen Koht.”—Seims 4:8.
Pwehn kalaudehla omw wehwehki duwen ire wet, menlau kilang irelaud 1 en pwuhken Dahme Paipel Uhdahn Padahngki?a, “Dahme Uhdahn Mehlel me Pid Duwen Koht?”
[Nting tikitik me mi pah]
a Sounkadehdehn Siohwa kan me wiahda.
[Kawehwehpen kilel kan nan ehu ehu pali 6]
Ehu ahl en esehla duwen Koht iei en kilang soahng kan me e ketin kapikada