4 Pein Esehla Pasapeng kan
“Ke meid pwoson tikitik! Dahme ke peikasalki?”—Madiu 14:31.
IA OMW MEHN KEREMPWA KAN? Mie pak sapwellimen Sises tohnpadahk kan pil kin ahneki peikasal. (Madiu 14:30; Luk 24:36-39; Sohn 20:24, 25) Ni mehlel, Paipel kin kawehwehda me en sohte ahneki pwoson duwehte “dihp me kin salihkitaildi.” (Ipru 12:1) Wahnpoaron Pohl ntingihdi: “Kaidehn aramas koaros kin kamehlele mahseno.” (2 Deselonika 3:2) Met sohte wehwehki me ekei sohte ahneki koahiek en ahneki pwoson. Ahpw me tohto sohte kin nantihong en kakairada pwoson. Koht pahn ketin kapaiada irail kan me kin nantihong en ahneki pwoson.
IA DUWEN KE KAK POWEHDI KAHPWAL WET? Pein kasawih ire kan me ke kin peikasalki. Karasepe, sapwellimen Sises tohnpadahk Tomas peikasalki me Sises ketin iasadahr mendahki tohnpadahk teikan padahkihong ih me re kilangada Sises. Tomas men pein kilang mehn kamehlel. Eri, dahme wiawi? Sises ketikihong Tomas mehn kadehde me e anahne pwehn ahneki pwoson kehlail.—Sohn 20:24-29.
Sang nan Paipel, Siohwa Koht kin ketikihda pasapeng kan pwe kitail en solahr ahneki peikasal. Karasepe, me tohto solahr pwoson Koht pwehki re kin medewe de nda me Koht me ketin kahrehda mahwen kan, tiahk lemei, oh kahpwal kan me kin lelohng aramas akan. Dahme Paipel mahsanih duwen ire wet?
Koht sohte kin ketin doadoahngki kaundahn aramas. Sises ketin wiahki ngehn soh sansal men me adaneki Sehdan “kaunen sampah wet.” (Sohn 14:30) Sehdan kasongehki Sises en ahneki manaman en kaunda wehi koaros en sampah ma e pahn ketin pwongih ih ni eh nda: “I pahn kihong komwi soangen manaman koaros oh lingan en wehi pwukat koaros. Pwe koaros kohiengieier oh I kak kihong mehmen me I men kihong.” Sises sohte mahsanih me Sehdan sohte ahneki manaman wet. Ahpw E mahsanih: “E ntingdier nan Pwuhk Sarawi me ‘Kaun-ohte, omw Koht, me ke pahn pwongih, oh ihete me ke pahn papah.’” (Luk 4:5-8) Ei, Sehdan oh koperment en aramas akan me pwukoahki kahpwal kan me kin wiawi nan sampah, ahpw kaidehn Koht.—Kaudiahl 12:9, 12.
Ni ahnsou keren, Siohwa Koht pahn ketin kasohrehla kahpwal koaros. E ketin koasoanehdier Wehi ehu de koperment ehu me sapwellime Ohl Sises Krais pahn ketin kaunkihda sampah. (Madiu 6:9, 10; 1 Korint 15:20-28) Nin duwen me Paipel kohpadahr, rongamwahu en Wehio kin lohkiseli wasa koaros nan sampah ahnsou wet. (Madiu 24:14) Ni ahnsou keren, Wehi wet pahn kasohrehla koaros me kin uhwong oh pahn kihsang kahpwal koaros.—Daniel 2:44; Madiu 25:31-33, 46; Kaudiahl 21:3, 4.
IA KATINGPEN EN ESEHLA PASAPENG PWUKAT? Irail kan me kin peikasal kin duwehte ilok kan me kin “wekiwekidengkiseli angin padahk en aramas widingan akan.” (Episos 4:14; 2 Piter 2:1) Ahpw irail kan me kin rapahkihda pasapengpen arail peidek kan kak ‘dadaurete arail pwoson.’—1 Korint 16:13.
Sounkadehdehn Siohwa kan me kin wiahda makasihn wet men sewese iuk en diarada pasapengpen peidek kan me kin kahrehiong uhk en sohte ahneki pwoson. Se luke iuk en iang kiht kasawih at padahk kan. Met pahn kakehlailihala omw pwoson Koht.
Pwehn kalaudehla omw wehwehki ire wet, kilang irelaud 8 oh 11 en pwuhken Dahme Paipel Uhdahn Padahngki?a, “Dahkot Wehin Koht?” oh “Dahme Kahrehda Koht Ketin Mweidohngki Lokolok en Mihmihte?”
[Nting tikitik me mi pah]
a Sounkadehdehn Siohwa kan me wiahda.
[Kawehwehpen kilel kan nan ehu ehu pali 9]
Irail kan me kin diarada pasapengpen arail peidek kan kak ahneki pwoson kehlail